Gudani Kha Ipfi Ḽa Mudzimu

Naa Hu Na Fulufhelo Nga Vho Faho?

Yeneyi thero i haseledza nga ha mbudziso dze na vhuya na dzi vhudzisa nahone i ḓo sumbedza hune na wana hone phindulo Bivhilini yaṋu. Ṱhanzi dza Yehova vha ḓo takalela u haseledza dzenedzo phindulo na inwi.

1. Ndi ḽifhio fulufhelo ḽine ḽa vha hone nga ha vhafu?

Musi Yesu a tshi swika Bethania tsini na Yerusalema, Lazaro khonani yawe o vha o no vha na maḓuvha maṋa o fa. Yesu o ya vhiḓani e na Martha na Maria khaladzi dza Lazaro. Nga u ṱavhanya ho mbo ḓi ḓala gogo ḽa vhathu. Edzani u humbula uri Martha na Maria vho vha vho takala hani musi Yesu a tshi vusa Lazaro?—Vhalani Yohane 11:20-24, 38-44.

Martha o vha a tshi tenda uri vhafu vha ḓo vuwa. Vhashumeli vha Yehova vha fulufhedzeaho ndi kale vha tshi ḓivha uri tshifhingani tshi ḓaho, Mudzimu u ḓo vusa vhathu vho faho uri vha dovhe vha tshile kha ḽifhasi.—Vhalani Yobo 14:14, 15.

2. Ndi vhufhio vhuimo ha vhathu vho faho?

Naho “muya,” une wa vha maanḓa a vhutshilo u tshi ita uri vhathu na zwipuka zwi tshile, riṋe a ri sokou vha muya fhedzi une wa dzula ṋamani. (Muhuweleli 3:19; Genesi 7:21, 22) Ri vhathu vha ṋama vhe vha vhumbwa nga buse. (Genesi 2:7; 3:19) Musi vhuluvhi hashu vhu tshi fa, a ri tsha kona u humbula. Musi Lazaro a tshi vuswa vhafuni, ndi ngazwo a songo amba tshithu nga ha zwe zwa itea musi o fa nga nṱhani ha uri vho faho a vha na tshine vha ḓivha.—Vhalani Psalme ya 146:4; Muhuweleli 9:5, 10.

Zwi tou vha khagala uri vho faho a vha khou shengela. Ngauralo, pfunzo ya uri Mudzimu u shengedza vhathu vho faho a si ya ngoho. Mudzimu u vha a tshi khou ambelwa mazwifhi madala-dala. Mudzimu u nengiswa vhukuma nga pfunzo yeneyo ya uri u shengedza vhathu muliloni wa hele.—Vhalani Yeremia 7:31.

  3. Naa ri nga kona u amba na vhafu?

Vhafu a vha koni u amba. (Psalme ya 115:17) Musi vharuṅwa vhavhi vha tshi amba na vhathu, vha nga kha ḓi ḓiita u nga vha muya wa muthu o faho. (2 Petro 2:4) Yehova ha ṱoḓi ri tshi lingedza u amba na vhathu vho faho.—Vhalani Doiteronomio 18:10, 11.

4. Ndi vhafhio vhane vha ḓo vuswa?

Shangoni ḽiswa ḽi ḓaho, vhafu vha dzimilioni vha re mavhiḓani vha ḓo vuswa. Na vhathu vhe vha ita zwivhi nga nṱhani ha u sa ḓivha Yehova vha ḓo vuswa.—Vhalani Luka 23:43; Mishumo 24:15.

Vho vuswaho vha ḓo kona u guda mafhungo-ngoho nga ha Mudzimu na u sumbedza u vha na lutendo kha Yesu nga u mu thetshelesa. (Ndzumbululo 20:11-13) Vho vuswaho vhane vha ita zwithu zwavhuḓi vha ḓo ḓiphina nga vhutshilo vhu sa fheli kha ḽifhasi. Naho zwo ralo, hu na vhaṅwe vho vuswaho vhane vha ḓo bvela phanḓa vha tshi ita zwithu zwivhi. Samusi vhathu vho raloho vha tshi ḓo haṱulwa nga nṱhani ha vhuḓifari havho vhu si havhuḓi ha nga tshenetsho tshifhinga, vha ḓo vha vho “vutshela u haṱulwa.” Vhalani Yohane 5:28, 29.

5. U vuswa ha vhafu zwi ri gudisa mini nga ha Yehova?

Vhafu vha ḓo vuswa ngauri Mudzimu ndi ene we a ita uri zwi konadzee nge a rumela Murwa wawe uri a ṋekedze vhutshilo hawe a tshi itela riṋe. Nga zwenezwo, u vuswa ha vhafu ndi nḓila ine Yehova a ri sumbedza ngayo lufuno na tshilidzi tshawe tshihulwane.—Vhalani Yohane 3:16; Vha-Roma 6:23.

U itela u wana mafhungo o engedzeaho, sedzani ndima ya 6 na 7 kha bugu Bivhili I Funza Mini Zwa Vhukuma? yo gandiswaho nga Ṱhanzi dza Yehova.

[Tshifanyiso kha siaṱari 26]

Adamu o vhumbwa nga buse