Ni rusiidiʼ stiidxaʼ Dios

Ñee ziuu dxi guiasa gueʼtuʼ la?

Tema riʼ zacaneni lii gánnaluʼ ximodo ricabi Biblia stiluʼ ca cosa ni zándaca huanabadiidxaluʼ. Pa riuuláʼdxiluʼ la? ca testigu stiʼ Jiobá zanda gúʼndanecaʼ lii ca guendarinabadiidxaʼ riʼ.

1. Ñee ziuu dxi guiasa gueʼtuʼ la?

Dxi yendá Jesús Betania, ti guidxi huiiniʼ nuu gaxha de Jerusalén, maʼ tapa gubidxa de guti Lázaro xhamígube. Marta ne María, ca bizaʼnaʼ gueʼtuʼ que, yenecaʼ Jesús ra gaʼchiʼ Lázaro ne nin qué nindaa gurízisi binni raqué. Ñee ruxuíʼluluʼ pabiáʼ nayecheʼ guyuu Marta ne María ora gundisaʼ Jesús Lázaro de lade gueʼtuʼ la? (Biindaʼ Juan 11:20-24, 38-44.)

Marta biʼniʼ cré zedandá dxi ziasa binni de lade gueʼtuʼ. Ne ca xpinni Jiobá de dxiqué maca nánnacaʼ zedandá dxi zandisaʼ Dios ca binni ni maʼ guti lu Guidxilayú riʼ. (Biindaʼ Job 14:14, 15.)

2. Ximodo nuu ca binni ni maʼ guti

Nécapeʼ «espíritu» ca nga stipa ni rusibani binni ne maniʼ la? peru cadi nácadinu ti espíritu ni nuu lu ti cuerpu de beela ne dxita (Eclesiastés 3:19; Génesis 7:21, 22). Nácanu binni ni guyáʼ de yu (Génesis 2:7; 3:19). Ora gati yuba ique binni, rixiá guiráʼ ni riníʼ ique. Ngue runi despué de biasa Lázaro de lade gueʼtuʼ, qué niníʼ ximodo raqué purtiʼ ca gueʼtuʼ ca maʼ qué gánnacaʼ gastiʼ. (Biindaʼ Salmo 146:4; Eclesiastés 9:5, 10.)

Casi maʼ bidúʼyanu ca, qué racaná diʼ ca gueʼtuʼ ca. Nga runi cadi dxandíʼ diʼ nga ni riníʼ binni ora rusiidiʼ raca castigar binni malu ora gati. Ni rusiidicabe ca rusihuínnini malu Dios, peru laabe qué riuuláʼdxibe guni crenu ruzaaquibe binni lu guí. (Biindaʼ Jeremías 7:31.)

  3. Ñee zanda guinínenu ca binni ni maʼ guti la?

Ca gueʼtuʼ ca qué riniʼcaʼ (Salmo 115:17). Peru ca demonio randa riníʼnecaʼ binni ne rúnicaʼ casi ora laacaʼ nga espíritu stiʼ ca binni ni maʼ guti (2 Pedro 2:4). Nga runi Jiobá na cadi jneza nga gacaláʼdxinu guinínenu gueʼtuʼ. (Biindaʼ Deuteronomio 18:10, 11.)

4. Tuu nga ca binni ni chiguiasa lade gueʼtuʼ

Ora gaca guidxilayú riʼ nacubi, millón de binni ni nuu ndaaniʼ ca baʼ ca zabánicaʼ sti biaje, dede né ca binni ni qué ñunibiáʼ ca ley stiʼ Dios ne pur ngue bíʼnicaʼ cosa malu. (Biindaʼ Lucas 23:43; Hechos 24:15.)

Ca binni ni guiasa dxi ca zanda guiziidicaʼ de Dios ne gusihuínnicaʼ nápacaʼ fe Jesús ra guzuubacaʼ diidxaʼ (Apocalipsis 20:11-13). Cani guni ni jneza zabánicaʼ nayecheʼ ndaaniʼ Guidxilayú sin qué chuʼ dxi gáticaʼ. Peru ca binni ni qué gusaana de guni cosa malu la? qué zápacaʼ guendanabani ni qué zaluxe, sínuque ziásacaʼ para «quiba donda» íquecaʼ, casi guníʼ Jesús. (Biindaʼ Juan 5:28, 29.)

5. Xi rizíʼdinu de Dios ora gánnanu ziasa gueʼtuʼ

Dios biseendaʼ Xiiñiʼ para gudii xquendanabani pur laanu ne nga si nga razón nuu para ganda guiasa binni de lade gueʼtuʼ. Ra biʼniʼ Jiobá zacá bisihuínnibe nadxiibe binni ne nacháʼhuibe né laacaʼ. (Biindaʼ Juan 3:16; Romanos 6:23.)

Pa riuuláʼdxiluʼ gánnaluʼ jma de laani la? biiyaʼ capítulo 6 ne 7 stiʼ libru riʼ, ni biʼniʼ ca testigu stiʼ Jiobá. Xipeʼ ndiʼ CUSIIDIʼ BIBLIA

[Dibuju/foto ni zeeda lu yaza 16]

De yu guyáʼ Adán