Yu Save Kam Klosap Long God

Hem i Mekem Olgeta We Tingting Blong Olgeta i Kam Nogud, Oli Harem Gud Bakegen

WAN Kristin woman we i harem nogud plante yia from we tingting blong hem i foldaon bitim mak, i talem se: “Jehova i no save lavem mi.” Tingting blong hem i strong se Jehova i stap longwe long hem. ?Olsem wanem? ?I tru se Jehova i stap longwe long ol man blong hem, we tingting blong olgeta i foldaon? Ol tok we God i pulum Deved blong talem long Ol Sam 34:18, i givim ansa long kwestin ya, mo i save mekem man i harem gud.

Deved i save gud se, taem wan gudfala man blong Jehova i kasem bigfala trabol long laef blong hem, hem i save harem nogud bitim mak. Taem Deved i yangfala, hem i mas ronwe mo haed from we jalus king ya, Sol, i wantem tumas blong kilim hem i ded. Deved i go haed long wan ples we hem i ting se Sol bambae i no save faenem hem. Hemia long taon ya Gat, ples blong ol man Filistia we oli enemi blong ol man Isrel. Be biaen, olgeta oli luksave Deved, ale Deved i mekem olsem se hem i wan krangke man, mo hemia i mekem rod blong hem, blong hem i save ronwe. Deved i talem tangkiu long God from we God i sevem hem, nao hem i raetem Sam 34 blong presem God.

?Olsem wanem? ?Deved i ting se God i stap longwe long olgeta we oli kasem trabol, nao oli harem nogud, mo oli ting se God i no save tingbaot olgeta? Deved i raetem se: “[Hae God] i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon olgeta.” (Vas 18) Naoia, i gud yumi luk olsem wanem ol tok ya oli save givhan long yumi blong harem gud, mo blong putum tingting blong yumi long ol promes blong God.

“[Hae God] i stap klosap.” Wan buk i talem se ol tok ya ‘i wantem soemaot se Hae God i stap lesin mo i lukluk ol man blong hem, i stap rere oltaem blong givhan long olgeta mo blong sevem olgeta.’ Yumi harem gud tumas blong save se Jehova i stap lukaot gud long ol man blong hem. Hem i lukluk ol trabol we oli stap fesem long ‘taem ya we laef i strong tumas,’ mo hem i save gud se oli harem olsem wanem long hat blong olgeta.—2 Timoti 3:1; Ol Wok 17:27.

“Ol man we tingting blong olgeta i kam nogud.” Long sam kantri, ‘man we tingting blong hem i kam nogud,’ hemia man we i harem nogud from we hem i laekem narafala, be narafala i no laekem hem. Be wan man blong hae save i talem se, ol tok we i stap long Sam ya, i tokbaot “man we i sore mo i harem nogud from enikaen trabol.” Yes, ol gudfala man blong God tu, oli save fesem bigfala trabol we i mekem tingting blong olgeta i kam nogud.

“Ol man we tingting blong olgeta i foldaon.” Man we tingting blong hem i foldaon, i save kam olsem we hem i ting nating long hem wan, nao blong smoltaem i no moa ting se wan gudfala samting i save kamaot. Wan buk we i givhan long ol man blong tanem Baebol i go long ol defren lanwis i talem se, tok ya i save minim tu “ol man we oli ting se i no gat wan gudfala samting nating we oli save putum tingting blong olgeta long hem.”

?Jehova i mekem wanem taem hem i luk ol man we “tingting blong olgeta i kam nogud,” mo ol man we “tingting blong olgeta i foldaon”? ?Hem i stap longwe long olgeta? ?Hem i luk olgeta se i no stret we hem i lavem olgeta mo tingbaot olgeta? !Nogat! Yu traem tingbaot wan papa we i lavem pikinini blong hem. Taem pikinini blong hem i harem nogud, papa ya i holem pikinini ya mo i mekem hem i harem gud bakegen. Long sem fasin, Jehova i stap klosap long ol man blong hem we oli krae i go long hem blong i givhan long olgeta. Yes, Jehova i rere blong givhan long olgeta we tingting blong olgeta i foldaon no i kam nogud, mo hem i mekem tingting blong olgeta i kam kwaet. Jehova i save givim waes mo paoa long olgeta blong winim enikaen trabol we oli fesem.—2 Korin 4:7; Jemes 1:5.

I gud yu traem faenemaot se yu mas mekem wanem blong kam klosap long Jehova. God ya we i gat sore, i promes se: “Mi mi stap . . . wetem man we i harem nogud mo we tingting blong hem i stap daon. Mi mi stap leftemap tingting blong olgeta we oli nating nomo, mo mi mekem olgeta we oli harem nogud long hat blong olgeta oli harem gud bakegen.”—Aesea 57:15, NW.