Lugpay sa mga Ginaluyahan sing Buot
Mangin Suod sa Dios
Lugpay sa mga Ginaluyahan sing Buot
‘WALA gid ako ginahigugma ni Jehova,” siling sang isa ka Cristiano nga babayi nga may madugay na nga depresyon. Naghunahuna sia nga malayo si Jehova sa iya. Malayo gid man bala si Jehova sa iya mga sumilimba nga mahimo ginaluyahan sing buot? Makalulugpay gid ang ginsiling ni salmista David, nga makita sa Salmo 34:18.
Nahibaluan ni David ang epekto sang grabe nga pagluya sing buot sa matutom nga mga sumilimba ni Jehova. Nangin laaslaas si David sang pamatan-on sia kay ginalagas sia sang mahisaon nga hari nga si Saul para patyon. Nagpanago sia sa lugar nga ginahunahuna niya nga indi sia makit-an ni Saul—sa siudad sang Gat, nga teritoryo sang mga Filistinhon. Sang nakilal-an sia, nagpabuangbuang sia para makapalagyo. Gindayaw ni David ang Dios sa pagluwas sa iya, kag bangod sa iya inagihan, ginsulat niya ang Salmo 34.
Nagapati bala si David nga malayo ang Dios sa mga tawo nga nagabatyag nga wala ginaulikdan sang Dios bangod sa ila mga kabudlayan? Si David nagsulat: “Ang GINOO malapit sa mga boong sing tagiposoon, kag nagaluwas sang mga mahinulsulon sa espiritu [“mga napiutan,” NW].” (Bersikulo 18) Binagbinagon naton kon ngaa makahatag sing lugpay kag paglaum ini nga bersikulo.
“Ang GINOO malapit.” Suno sa isa ka reperensia, ini nga mga tinaga “nagapakita nga ang Ginuo nagabantay, nga handa pirme sa pagbulig kag pagluwas sa iya katawhan.” Makalilipay gid mahibaluan nga ginabantayan ni Jehova ang iya mga alagad. Nakita niya ang ila mga problema sa sining “makahalanguyos nga mga tion,” kag nahibaluan niya ang ila ginabatyag.—2 Timoteo 3:1; Binuhatan 17:27.
“Mga boong sing tagiposoon.” Sa iban nga kultura, ang naluyahan sing buot ukon “boong sing tagiposoon” amo ang isa nga napaslawan sa paghigugma. Pero suno sa isa ka iskolar, ang ginsiling sang salmista nagapatuhoy sa “pangkabilugan nga kasubo.” Huo, bisan ang matutom nga mga sumilimba sang Dios nagaatubang kon kaisa sing grabe nga mga kabudlayan nga makapaluya sing buot.
“Mga napiutan.” Mahimo nga ginapakanubo sang mga naluyahan sing buot ang ila kaugalingon, amo nga nagakadulaan sila sing paglaum. Suno sa isa ka reperensia sang mga manugbadbad sang Biblia, ini nga ekspresyon mahimo badbaron nga “mga wala sing ginalauman sa palaabuton.”
Ano ang pagtamod ni Jehova sa mga “boong sing tagiposoon” kag mga “napiutan”? Malayo bala sia sa ila kag wala niya sila ginahigugma kag ginaulikdan? Indi gid! Pareho sa isa ka mahigugmaon nga ginikanan nga nagalugpay sa iya nasubuan nga bata, si Jehova malapit sa iya mga sumilimba nga nagapangayo sing bulig. Handa sia nga paumpawan ang mga buong sing tagipusuon kag mga napiutan. Ginahatagan niya sila sing kaalam kag kusog para mabatas ang tanan nga kabudlayan.—2 Corinto 4:7; Santiago 1:5.
Ngaa indi mo pagtun-an kon paano mangin suod kay Jehova? Ining mapinalanggaon nga Dios nagpromisa: “Nagapuyo ako . . . upud sa . . . may mahinulsulon kag mapainubuson nga espiritu, sa pagpaumpaw sang espiritu sang mapainubuson, kag sa pagpaumpaw sang tagiposoon sang mahinulsulon.”—Isaias 57:15.
Bahin sang Biblia nga Mahimo Basahon sa Hunyo:
