Fwenai Kudi Leza

Busengi ku ba Mityima Mityumuke

‘YEHOVA kakokejapo kunsanswa nansha dimo.’ Mo mwanenene kaka umo Mwine Kidishitu wadi wikonda na mutyima kupēpa mu būmi. Wadi ulanga aye mwine amba Yehova udi kulampe nandi. Lelo bine Yehova udi kulampe na batōtyi bandi batyumukwe mutyima? Kilondololwa kikankamika kitanwa mu binenwa bya ku mushipiditu bya Davida, mulembi wa mitoto, bisonekelwe mu Mitoto 34:18.

Davida wādi uyukile mukokeja kukambakanibwa mutōtyi wa Yehova na njia mipitepite. Paādi nsongwalume, wāikele na būmi bwa kunyemakana, pa kulondwalondwa na Solo, mulopwe wa mukao wādi ukanine’nka kumwipaya. Davida wākakimbile kwa kufyama kwaādi umona amba Solo kabwanyapo kumusokola—ku Ngata, kibundi kya balwana kya mu ntanda ya Fidishitia. Davida pa kujiulwa, wāpanda patyē, na kwienga buvila. Davida wātumbije Leza amba ye wamupandija, penepa wālemba Mitōto 34.

Lelo Davida wāmwene amba Leza udi kulampe na boba belelwe nansha bemona bu Leza kebabangilepo pa mwanda wa njia yebatana? Davida ulembele amba: “Yehova udi pa bwipi na boba ba mutyima mutyumuke, kadi upandijanga bano namino ba mushipiditu wa kwisasapo.” (Vese 18) Tutalei bino binenwa mobiletela busengi ne lukulupilo.

“Yehova udi pa bwipi.” Dibuku dimo dinena’mba uno mulongo wa binenwa i “muswelo wa kulombola’tu amba Mfumwetu utanga kutwi ne kutala bantu bandi, mwiteakanye kitatyi kyonso kwibakwasha ne kwibapandija.” Kuyuka’mba Yehova utalanga bantu bandi i kintu kikankamika. Umwene mobekadile mu ino “myaka ya malwa,” ne uyukile mobeimvwanina.—2 Temote 3:1; Bilongwa 17:27.

“Boba ba mutyima mutyumuke.” Mu ndimi imo, “mutyima mutyumuke” ulombola kubulwa kuswibwa. Mwifundi umo unena’mba, binenwa bya mulembi wa mitōto bifunkila pa “njia ne tusuwa tutana bonso.” Shako, nansha ke batōtyi ba kikōkeji ba Leza bakokeja kitatyi kimo kutanwa mu ngikadilo mikomo mpata ityumuna mityima yabo.

“Ba mushipiditu wa kwisasapo.” Bantu batyumukwe mutyima bakokeja kwityepelwa mu meso abo, bajimija kyaba kimo ne lukulupilo lonso. Dibuku dimo dya misoñanya ya balamuni ba Bible dinena amba bino binenwa byadi bikokeja kwalamunwa ne uno muswelo amba “boba kebadipo ne kiyampe kya kutengela kumeso.”

Le Yehova ulondololanga namani boba “ba mutyima mutyumuke” ne “ba mushipiditu wa kwisasapo”? Le udi nabo kulampe ne kwibamona amba kebafwaninwe kusanshibwa nansha kutebwa mutyima? Mhm, nansha dimo! Enka mulongelanga mbutwile wa buswe ukwata mwana ne kumusenga pasusuka, Yehova nandi udi pabwipi na batōtyi bandi bamwabija bukwashi. Wabilanga kusenga ne kutalaja ba mityima mityumuke ne ba mushipiditu wa kwisāsa’po. Ukokeja kwibapa tunangu ne bukomo bwibasakilwa mwa kulwila na matompo o-onso ebatana.—2 Kodinda 4:7; Yakoba 1:5.

Lelo ubulwe’po kukimba mukenga wa kufwena pabwipi na Yehova? Leza wa lusa ulaya amba: “Ngikalanga . . . na yewa udi ne mushipiditu wa kwisasa ne wa kwiubija, kusangula mushipiditu wa wakwiubija ne kusangula mutyima wa bakwisasa.”—Isaya 57:15.