Semena pabuipi ne Nzambi

Busambi kudi bantu badi ne mitshima itamba kunyingalala

MUANETU wa bakaji mukuabu uvua anu ne nsombelu ya tunyinganyinga wakamba ne: ‘Yehowa katu munnange meme to.’ Uvua mumone anu bu ne: Yehowa udi nende kule. Yehowa udiku bushuwa kule ne batendeledi bende badi mu nsombelu ya tunyinganyinga anyi? Tudi tupeta diandamuna didi dikolesha ku muoyo mu mêyi avua Davidi mufunde ku diambuluisha dia nyuma wa Nzambi adi mu Musambu wa 34:18.

Davidi uvua mumanye tshidi kanyinganyinga kakole mua kuenzela mutendeledi wa Yehowa udi mumulamate. Patshivuaye nsonga, uvua wenda unyema Shaula, mukalenge wa mukawu uvua wenda ujikangane nende bua kumushipa. Davidi wakaya kusokoma mu tshimenga tshia Gata mu buloba bua bena Peleshete, muaba uvua baluishi ne uvuaye wela meji ne: Shaula kakufikamu to. Kadi pakamumanyabu, wakadishiya bu mupala, kunyemaye. Davidi wakatumbisha Yehowa bua muvuaye mumupandishe. Malu avua mamuenzekele aa ke avua mamusake bua kufunda Musambu wa 34.

Davidi uvuaku wela meji ne: Nzambi udi kule ne bantu badi badimona bena dikenga anyi badi badimona kabatshiyi ne mushinga ku mêsu kuende bua nsombelu ya tunyinganyinga idibu nayi anyi? Davidi udi wamba ne: ‘Yehowa udi pabuipi ne bantu badi ne mitshima itamba kunyingalala, udi usungila badi ne mitshima ya majiya.’ (Mvese wa 18) Tumonayi mudi mêyi aa mua kutukolesha ku muoyo ne kutupetesha ditekemena.

‘Yehowa udi pabuipi.’ Mukanda mukuabu udi wamba ne: tshiambilu etshi “tshidi tshileja ne: Mukalenge utu umona malu onso atu afikila bantu ne utu ubatabalela; utu pabuipi misangu yonso bua kuambuluisha bantu bende ne kubasungila.” Bidi bitukolesha ku muoyo patudi tumanya ne: Yehowa udi umona malu onso atu afikila bantu bende. Udi umona ntatu idibu nayi mu matuku a “malu makole” aa ne mmumanye meji adibu bela.​—2 Timote 3:1; Bienzedi 17:27.

“Bantu badi ne mitshima itamba kunyingalala.” Mu imue miaba, ‘mutshima udi utamba kunyingalala’ udi mua kuleja muntu udibu kabayi banange to. Kadi mumanyi kampanda udi wamba ne: mêyi a mufundi wa Misambu aa adi akula bua “kanyinganyinga anyi dibungama dikole didi muntu mua kuikala nadi.” Bushuwa, nansha batendeledi ba Yehowa badi bamulamate badi mua kupeta ntatu mikole idi mua kutamba kubanyingalaja.

‘Badi ne mitshima ya majiya.’ Bantu badi batekete mu maboko badi mua kudimona kabatshiyi badiangata ne mushinga ne bajimija diakamue ditekemena dionso. Bilondeshile mukanda mukuabu utu wambuluisha bakudimunyi ba Bible, badi mua kukudimuna tshiambilu etshi ne: “bantu badi kabayi mua kutekemena bualu bua nsongo nansha bumue.”

Mmunyi mutu Yehowa umvua bua “bantu badi ne mitshima itamba kunyingalala” ne ‘badi ne mitshima ya majiya’? Udiku nabu kule, wamba mudibu kabayi bakumbane bua kubanangaye ne kubatabalela anyi? Tòo. Anu mutu tatu wa dinanga ukuata muanende udi ne kanyinganyinga ku tshianza ne umukolesha ku muoyo, ke mutu Yehowa pende pabuipi ne batendeledi bende badi badila kudiye bua abambuluishe. Udi ujinga ne muoyo mujima bua kuambuluisha badi ne mitshima ya majiya. Udi mua kubapesha meji ne bukole budi bukengedibua bua kutantamena ntatu ne mateta a mishindu yonso adibu mua kupeta.​—2 Kolinto 4:7; Yakobo 1:5.

Kuenaku mua kujinga bua kumanya mushindu uudi mua kusemena pabuipi ne Yehowa anyi? Umvua tshidi Nzambi wa luse eu ulaya: ‘Ndi mushikame ne muntu udi ne mutshima munyingalale ne mudipuekeshe, bua kusangalaja nyuma wa udi mudipuekeshe ne bua kusangalaja mutshima wa muntu udi unyingalala bua bubi.’​—Yeshaya 57:15.