Sud Machiegni gi Nyasaye

 Hoch ne Joma Chunygi Onyosore

DHAKO moro ma Jakristo ma ne oyudo osebedo gi parruok ahinya manyoso chunye, nowacho kama: “Jehova ok nyal hera ngang’.” Ne oneno ni Jehova bor kode ahinya. Be en adier ni Jehova ni mabor gi joma lame to nyalo bedo ni gin gi parruok ma nyoso chunygi? Dwoko machiwo hoch yudore e weche mokudh gi much Nyasaye ma Daudi jandik-zaburi nowacho e Zaburi 34:18.

Daudi nong’eyo kaka chuny ng’at malamo Jehova kochung’ motegno nyalo nyosore e bwo chandruok mager. Kane pod orawera, Daudi ne odak e ngima mar ringo, kilawe ahinya gi Saulo, ruoth ma janyiego ma ne dwaro nege. Daudi nomanyo kar buok kama noparo ni Saulo ne ok nyal yudee​—e dala mar Gath ma ne en dala mar wasikgi e gweng’ mar Filistia. Kata kamano, bang’ kane osefwenye, Daudi notony matin bang’ timre ng’at ma janeko. Daudi nowacho ni Nyasaye ema ne orese, kendo kaluwore gi gik ma ne oneno, nondiko Zaburi 34.

Be Daudi ne neno ni Nyasaye ni mabor gi jogo ma chunygi onyosore, kata maneno ni gin kanono nikech gin e bwo chandruok ahinya? Daudi ndiko niya: “Jehova ochiegni gi jo ma chunygi onyosore chuth, kendo oreso jogo ma chunygi [otur].” (Kwan matindo 18) Weuru wane ane kaka wechego chiwo hoch kod geno.

“Jehova ochiegni.” Buk moro nyiso ni wachno en “yo mar nyiso ni Ruoth nono kendo ng’iyo ahinya, koikore mar konyo kendo reso joge kinde duto.” En gima jiwo chunywa, ng’eyo ni Jehova ng’iyo kodwaro mondo orit joge. Oneno gik mayudogi e ndalogi mag “chandruok,” kendo ong’eyo kaka giwinjo chuth e chunygi ma iye.​—2 Timotheo 3:1; Tich Joote 17:27.

“Jogo ma chunygi onyosore chuth.” E ogendini moko, ‘nyosruok mar chuny’ timre ne ng’ato sama onyiso hera ne jomoko, to en ok nyise. Kata kamano, jasomo moro wacho ni weche jandik-zaburigo to wuoyo kuom “lit kata kuyo mapile yudo ji.” Ee, kata mana jogo malamo Nyasaye kochung’ motegno nyalo yudo chandruok moko mager manyoso chunygi.

“Jogo ma chunygi [otur].” Jogo ma chunygi onyosore nyalo nenore e wang’gi giwegi ka nono ahinya, mi gibed kata maonge geno kuom kinde. Buk moro ma jolok Muma tiyogo, wacho ni wachno inyalo lok ni, “jogo maonge gimaber ma ginyalo geno.”

Jehova timo nade ne jogo ma “chunygi onyosore” koda ‘ma chunygi otur’? Be obedo mabor kodgi, koneno ni ok giwinjore yudo herane koda kony? Ooyo, ok kamano! Mana kaka janyuol ma jahera ma mako kendo hoyo nyathi manie chandruok, Jehova chiegni gi joma lame ma ywakne mondo okonygi. Oikore hoyo kendo duogo joma chunygi onyosore koda ma chunygi otur. Onyalo miyogi rieko kod teko madwarore mondo mi ginyagore gi chandruok moro amora moyudogi.​—2 Jo Korintho 4:7; Jakobo 1:5.

Donge inyalo nono mondo ing’e kaka inyalo medo sudo machiegni gi Jehova? Nyasaye mopong’ gi kechno singo kama: “Adak . . . gi ng’ama chunye otur kendo ma chunye ool, mondo aduog chuny jochan kendo duogo chuny jogo misando.”​—Isaiah 57:15, New World Translation.