TUˈUGË Dios mëduumbë diˈib jeky kujk tmëdäjnë tyäˈädë jotmay, jyënany: “Tsipëtsë Jyobaa xytsyokët”. Janääm jatsojk duˈun jyënaˈany axtë ko nyaytyukmëbëjkë ko Dios jagam yajpääty mä yëˈë. Per ¿jantsy tëyˈäjtënë ko Jyobaa jagam yajpääty mä pënaty xëmë moon tujktëp? Xyjotkujkmoˈoyëm extëm yaˈˈatsoojëmbity mä Salmo 34:18.

David nyijäˈäbë nety wiˈix nyayjawëtyë Dios mëduumbë ko dyajnaxy mëjwiin kajaa moˈon tujkën. Pes ko yˈënäˈkˈäjty ojts kyeˈekyjëdity ko ja rey Saúl mëktaˈaky pyajëdijtë ets yaˈooganë. Tëgok, jam ojts nyayuˈutsyëty Gat mä wyinmääy ko kyaj ja rey pyäädëdët, mä tsyëënëdë ja filistee diˈibë nety myëtsipˈäjttëp. Per axëëk jyajty, ojts yaˈëxkapy ets parë kyaj wiˈix yajtunët, ta nyayajnäjxë extëm lokë ets ta kyeky. David myëjkumääyë Dios ko yaˈˈawäˈätspëtsëëmë, ets extëm jyajty kyëbejty duˈun tkujäˈäyë mä Salmo 34.

¿Waˈandaa David wyinmääy ko Dios jagam yajpääty mä pënaty moon tujktëp ko tpäättë jotmay o nyayjawëdë ko kyaj nyitëkëdë etsë Dios pyudëkëdët? Yëˈë tkujäˈäyë mä bersikulo 18: “Wingonë Jyobaa yˈity mä jäˈäy diˈib tsayutpëmë kyorasoon jyäˈäwëp; ets yaˈˈawäˈätspëtseempy pënaty kyaj tnekymyëdatyë jotkujkˈäjtën”. Min nˈokˈijxëm wiˈixë tyäˈädë ayuk xyjotkujkmoˈoyëm.

“Wingonë Jyobaa yˈity.” Tuˈugë liibrë jyënaˈany ko tyäˈädë “yëˈë myaytyäˈägaampy ko nWintsënˈäjtëm xëmë yˈity listë parë tpudëkëyaˈany ets dyaˈˈawäˈätspëtsëmäˈänyë kyäjpn”. Jantsy oy xyajnayjäˈäwëm ko Jyobaa tkuentˈaty pënaty mëduunëp ets xëmë tˈixy tijaty jotmay yajnäjxtëp mä tyäˈädë tiempë diˈib “ayoˈon mëët” ets nyijäˈäp yajxon wiˈix nyayjawëdë (2 Timotee 3:1; Apostʉlʉty 17:27).

“Diˈib tsayutpëmë kyorasoon jyäˈäwëp.” Tuˈugë liibrë jyënaˈany ko David yëˈë myaytyäˈägan “oytyim diˈibëtyë jäj jëmuˈumën etsë mäˈäy täjën”. Ets axtë pënatyë Jyobaa myëduundëp mbäät dyajnaxtë mëjwiin kajaabë jotmay ets tjawëdët tsayutpëmë kyorasoon.

“Pënaty kyaj tnekymyëdatyë jotkujkˈäjtën.” Jäˈäy diˈib kyaj ti nyekyjotkujkmoˈoyëty mbäät näˈäty wyinmay ko kyaj ti ttsoojëty ets ko kyaj ti jotkujkˈäjtën tnekymyëdaty. Tuˈugë liibrë diˈib pudëjkëdëp pënaty kyäjpxnäjxtëbë Biiblyë, jyënaˈany ko tyäˈädë ayuk mbäät yajkäjpxnaxy extëm “pënaty kyaj ti oyˈäjtënë tnekyˈawixtë”.

¿Wiˈixë Jyobaa tˈatsoojëmbityë nyuˈkxtakën pënaty “tsayutpëmë kyorasoon jyäˈäwëp” ets “pënaty kyaj tnekymyëdatyë jotkujkˈäjtën”? ¿Waˈandaa Jyobaa jagam yajpääty mët ko kyaj nyitëkëdë yajtsoktët ets yajkuentˈattët? Kyaj. Pesë Jyobaa duˈun extëm tuˈugë uˈunk teety diˈib myajtsy myëneembyë yˈuˈunk diˈib määy täjp ets tjotkujkmoˈoy. Jyobaa wingon yˈity mä pënaty amdoojëbë naybyudëkë, ets yajtsoˈogaampy ja jyot kyorasoon ets jyotkujkmoˈoyaampy ja diˈib kyaj tnekymyëdatyë jotkujkˈäjtën. Dios mbäät myoˈoyëdë wijyˈäjtën etsë mëjää parë twinguwäˈägëdët oytyim diˈibëtyë jotmay (2 Korintʉ 4:7; Santya̱ˈa̱gʉ 1:5).

¿Tiko xykyapayoˈoy wiˈix mbäädë Jyobaa niˈigyë xymyëwingony? Yëˈë xyˈanmäˈäyëm: “Nyajpäätyëts [...] mët ja diˈib axëëk jäjtp këbajtp ets mët ja diˈib yujy tudaˈaky parëts jatëgok nyajjukypyëkët ja yujy tudaˈakypyë ets parëts nyajjukypyëkanë kyorasoon ja diˈib axëëk jäjtp” (Isaías 57:15).