Hedha popepi naKalunga

Ehekeleko kwaamboka ye na omitima dha dhengwa pevi

OMUKIINTU gumwe Omukriste ngoka a kala e niwe kepolimano uule wethimbo, okwa ti: ‘Ngame Jehova ke hole ndje.’ Omukiintu ngoka okwa li a tompwa kutya Jehova oku li kokule naye. Ihe mbela Jehova oha kala ngaa shili kokule naalongeli ye mboka tashi vulika ya polimana? Oohapu dhomupisalomi David dha nwethwa mo ndhoka tadhi adhika mEpisalomi 34:18 otadhi gandja eyamukulo tali hekeleke kepulo ndyoka.

David okwa li e shi shi kutya aalongeli yaJehova aadhiginini ohaya vulu okugumwa kepolimano shi thike peni. Sho a li omugundjuka okwa li a ningi ontauki, molwaashoka omukwaniilwa omunandumbo Saul okwa li te mu kongo nopwaa na oluthuwo a hala oku mu dhipaga. David okwa li a ka konga uuholameno koshilongo shAafilisti mboka ya li aatondi yAaisraeli shedhina Gat, molwaashoka okwa li ta dhiladhila kutya Saul kapu na esiku a dhiladhile kutya oko tashi vulika a ye. Ihe konima yethimbo sho Aafilisti ya dhimbulula kutya omuntu ngoka nani oye David, David okwa li a tameke okwiiningitha a fa egoya nokwa li a hupile puupatekedhi. Okwa li a pandula Jehova sho e mu hupitha, nokwa ka nyola Episalomi 34 ndyoka lya kankamena koshimoniwa shoka.

Ihe mbela David okwa li ngaa i itaala kutya Kalunga ke na ko nasha naantu mboka ya gwililwa po komaupyakadhi, nokudhiladhila kutya Kalunga ine ya hokwa nokaye na ongushu koshipala she? David okwa nyola a ti: “Omuwa oku li popepi naamboka ya dhengwa pevi; ota hupitha mbo ya kanitha etegameno.” (Ovelise 18) Natu ka konakoneni oohapu ndhoka nokutala nkene tadhi vulu oku tu hekeleka noku tu pa etegameno.

“Omuwa oku li popepi.” Embo limwe lyomauyelele olya ti kutya uutumbulilo mboka “owa hala okutya Omuwa oha kala ta gandja eitulomo koshigwana she noku shi tonatela noha kala aluhe i ilongekidha oku shi kwathela noku shi hupitha.” Otashi hekeleke thiluthilu okutseya kutya Jehova oha kala ta tonatele oshigwana she. Oku wete omaupyakadhi ngoka tashi tsakaneke ‘pomathimbo omadhigu’ noku shi kutya ohashi kala shi uvite ngiini.—2 Timoteus 3:1; Iilonga 17:27.

‘Mboka ya dhengwa pevi’. Momalaka gamwe uutumbulilo ‘mboka ya dhengwa pevi’ otawu ulike kokukala wu tondike. Ihe omulongwantu gumwe okwa yelitha kutya oohapu ndhoka dhomupisalomi otadhi ulike “unene kokunika oluhodhi lwakwalukehe.” Odhoshili kutya omathimbo gamwe nokuli naapiya yaKalunga aadhiginini ohaya vulu okutsakaneka omaupyakadhi ga kwata miiti ngoka hage ya dhenge pevi.

‘Mboka ya kanitha etegameno.’ Omuntu ngele okwa polimana otashi vulika a kale i itala ko kutya ke na ongushu nomathimbo gamwe iha kala e na etegameno lyasha nandonando. Embo limwe ndyoka hali kwathele aatoloki yOmbiimbeli olya ti kutya uutumbulilo mboka otawu vulu okutolokwa ngeyi “mboka kaaye na etegameno lyasha.”

Ihe mbela Jehova ohi inyenge ngiini uuna ti indilwa ekwatho kwaamboka ya “kanitha etegameno” nosho wo mboka “ya dhengwa pevi”? Mbela oha kala kokule nayo nohe ya tala ko inaaya gwana okuulukilwa ohole nokupewa eitulomo? Hasho nandonando! Ngaashi owala omuvali omunahole ha papatele okanona ke noku ka hekeleka uuna ke li muupyakadhi, Jehova naye oku li popepi naalongeli ye mboka haya pula ekwatho kuye. Okwa halelela okuhekeleka nokuhwepopaleka mboka ya dhengwa pevi nokaaye na etegameno. Ohe ya pe uunongo noonkondo ndhoka ya pumbwa opo ya vule okuungaunga nuupyakadhi kehe we ya taalela.—2 Aakorinto 4:7; Jakob 1:5.

Omolwashike itoo kongo ekwatho opo wu mone kutya ongiini to vulu okuhedha popepi lela naJehova? Kalunga ketu omunalukeno oku uvaneka a ti: ‘Onda kala paantu opo ndi talaleke oomwenyo dhaaifupipiki nokuhekeleka omitima dha nyanyagulwa.’—Jesaja 57:15.