Fuena Ku Huku

Eungumaneso Pala Vana Vaihamenwa Omutima

‘JEOVA kamakala vali nalumwe noluembia naame.’ Ongotyo omukai umwe Omukristau waihamenua unene novitateka momuenyo wae apopia. Ankho usoka okuti Jeova makala kokule nae. Okuti Jeova tyotyili ukahi kokule novafendi vae vamona emone? Ekumbululo liungumanesa livasiwa mondaka mba David, mo Salmo 34:18.

David ankho utyii oñgeni okuihamenwa unene tyikalesa omufendi wa Jeova wekolelo. Etyi ankho omukuendye, David wakalaile monofika, okutila Saulu ohamba yonkhi ankho uhanda okumuipaa. David wakaholamene kotyilongo tyonondyale mepundaumbo lio Gate ko Filistia, ankho asoka okuti Saulu nalumwe memuvasi. Anthi, etyi votyilongo otyo vemuimbuka, David elilingisa ngatyina otyova iya ahupu. David apandula unene Huku etyi emuyovola, moluotyo ahoneka o Salmo 34.

Okuti David ankho utavela okuti Huku ukahi kokule na vana veliunga ine vasoka okuti kavatokalele okupandwa Nae mokonda yemone? David wahoneka okuti: “Jeova ukahi popepi na vana vaihamenwa omutima. Uyovola vana vokuamona ononkhumbi.” (Versikulu 18) Tutalei oñgeni onondaka ombo mbuungumanesa nokuava ekevelelo.

“Jeova ukahi popepi.” Omukanda umwe upopia okuti onondaka ombo, “mbulekesa okuti Tatekulu ukahi nokuyunga nokutala nawa, apeho wafuapo pala okuvatela nokuyovola ovanthu vae.” Tyipameka okunoñgonoka okuti Jeova ukahi nokuyunga ovanthu vae. Oe weete ovitateka valwa navio ‘momuvo uno wepuiya,’ tupu wii oñgeni veliivite mokati kavo.—2 Timóteo 3:1; Atos 17:27.

“Vokuaihamenwa komutima.” Momihoko vimwe, “okuihamenwa komutima” tyilekesa ohole omunthu ena navakuavo, mahi oe vemuyele. Anthi, omunongo umwe wati onondaka mbo muhoneki wo salmu mbupopia ‘eliungo aliho omunthu akala nalio.’ Tyotyili, alo umwe ovafendi va Huku vekolelo pamwe vapita mononkhumbi ononene mbuihamesa omitima viavo.

“Vana vokuamona ononkhumbi.” Vokuasoya pamwe velitala ovo muene okuti vetupu vali ekevelelo nalike. Omukanda umwe wovapitiyi Vombimbiliya, wati ondaka oyo ipondola okupitiyua okuti, “Vana vahakevelela natyike otyiwa.”

Oñgeni Jeova akumbulula vana “vaihamenwa komutima” no “vokuamona ononkhumbi?” Okuti ukala kokule navo, okusoka okuti kavatokalele oluembia lwae nokuyungwa? Au, hatyoko! Ngetyi tyilinga he woluembia una upaka pekolo nokuungumanesa omona wae waihamenua, na Jeova ukahi popepi novafendi vae veliyavela okuita kwe ombatelo. Oe uhanda okuungumanesa nokutulisa omitima viovanthu vae, vaihamenwa nokuamona ononkhumbi. Upondola okuvepa onondunge nononkhono vesukisa opo vafinde kese tyitateka tyivetumbukila.—2 Coríntios 4:7; Tiago 1:5.

Oityi uhaovolela okufuena ku Jeova? Huku oo wokankhenda ulaa okuti: ‘Ame ndyikala . . . na una waihamenua nokueliola, opo ndyipameke omitima vio vokueliola no via vana vamoneswa emone.’—Isaías 57:15.