Sondzela KuNkulunkulu

LOMUNYE make longumKhristu lobesabeketelele kucindzeteleka kuphila kwakhe konkhe, watsi: “Angeke kwenteke kutsi Jehova angitsandze.” Abecabanga kutsi Jehova abekhashane naye. Jehova ukhashane yini vele netinceku takhe leticindzetelekile? Imphendvulo ledvudvutako itfolakala emavini laphefumulelwe emhlabeli Davide, lakuTihlabelelo 34:18.

Davide bekati kutsi kucindzeteleka lokukhulu bekungaba namuphi umphumela encekwini yaJehova leyetsembekile. Ngesikhatsi aselijaha, abephila njengembaleki, acoshwa nguSawula inkhosi lenemona lebeyifuna kumbulala. Wabalekela endzaweni labecabanga kutsi Sawula abengeke amfune kuyo​—edolobheni lakaGathi, lelisendzaweni yemaFilisti. Kodvwa kwatsi lapho sebamtfola, wakhona kuphunyula ngekutsi atente umuntfu lohlanyako. Davide wadvumisa Nkulunkulu ngekumsindzisa kwakhe, futsi ngesizatfu saloko lokwenteka, wabhala incwadzi yeTihlabelelo 34.

Davide abecabanga kutsi Nkulunkulu ukhashane yini nalabo lokutsi nabacindzetelekile, bative balahliwe futsi bangawufanelekeli umusa waKhe? Wabhala: “Simakadze uhlala asedvute nabo labanetinhlitiyo letephukile uyabasindzisa labanemoya lowephukile.” (Livesi 18) Asesihlole indlela lamavi lasiniketa ngayo indvudvuto kanye nelitsemba.

“Simakadze uhlala asedvute.” Lenye incwadzi itsi lamavi “achaza kutsi Nkulunkulu uyasinaka futsi uyasigadza, uhlale akulungele kusita kanye nekuvikela bantfu bakhe.” Kuyasicinisa kwati kutsi Jehova uyabagadza bantfu bakhe. Uyatibona tinkinga labahlangabetana nato ‘kulamalanga ekugcina,’ futsi uyayati nendlela labativa ngayo.​—2 Thimothi 3:1; Imisebenti 17:27.

“Labanetinhlitiyo letephukile.” Kulamanye emave, emavi latsi ‘inhlitiyo lephukile’ asho kungatsandvwa. Nanobe kunjalo, lesinye sati sitsi: Emavi emhlabeli achaza “lusizi kanye netinyembeti letivamile.” Ngaletinye tikhatsi, ngisho netinceku taNkulunkulu letetsembekile tingahlangabetana nebumatima lobephula tinhlitiyo tato.

“Labanemoya lowephukile.” Bantfu labadvumatekile bangase batibone bangakabaluleki futsi bangase balahlekelwe litsemba ngekushesha. Incwadzi yebahumushi beliBhayibheli itsi lamavi angase abekwe ngalendlela: “Bantfu labete intfo labangayilangatelela.”

Yini Jehova layentela bantfu ‘labanetinhlitiyo nobe umoya lowephukile’? Uyatikhweshisa yini kubo, ngobe atsi abalufanelekeli lutsandvo lwakhe kanye nekunakwa nguye? Cha! Kodvwa njengemtali lobamba futsi advudvute umntfwana wakhe locindzetelekile, Jehova usedvute netikhonti takhe letifuna lusito lwakhe. Utimisele kudvudvuta tinhlitiyo kanye nemoya wato lowephukile. Angakwati kutinika kuhlakanipha kanye nemandla letiwadzingako kute tibeketelele nobe nganguluphi lushushiso letihlangabetana nalo.​—2 Khorinte 4:7; Jakobe 1:5.

Kungani ungahloli indlela longasondzela ngayo kuJehova? LoNkulunkulu loneluvelo uyasetsembisa: “Ngihlala . . . nakuye lodzabukile nalotfobekile emoyeni, kutewuvuselela umoya walabatfobekile nekuvuselela tinhlitiyo talabephukile emoyeni.”​—Isaya 57:15.