Matšeliso ho ba Lipelo li Robehileng
Atamela ho Molimo
Matšeliso ho ba Lipelo li Robehileng
‘LE KA mohla Jehova a ke ke a nthata.’ Ana ke mantsoe a ’mè e mong oa Mokreste ea ’nileng a loantšana le ho tepella maikutlo nako e telele bophelong ba hae. O ne a ipoleletse hore e tlameha ebe Jehova o hōle le eena. Na ka sebele Jehova o hōle le barapeli ba hae bao e ka ’nang eaba ba tepeletse maikutlo? Karabo e tšelisang e fumanoa mantsoeng a mopesaleme Davida, a tlalehiloeng ho Pesaleme ea 34:18.
Davida o ne a tseba hore na ho tšoenyeha haholo ho ka ama morapeli oa Jehova ea tšepahalang joang. Ha e sa le mohlankana, Davida e ile ea e-ba ’malehi ka nako e telele kaha Saule morena ea neng a le mōna, o ne a mo tsoma ka hohle, a ikemiselitse ho mo bolaea. Davida o ile a balehela sebakeng seo a neng a nahana hore e ka ba sa ho qetela seo Saule a ka mo batlang ho sona—motseng oa ba lireng oa Gathe, naheng ea Bafilista. Empa ka mor’a hore baahi ba moo ba mo lemohe, Davida o ile a pholoha ka lesoba la nale ka hore a iketse lehlanya. O ile a rorisa Molimo ka hore ebe o mo pholositse, e leng lona lebaka le ileng la etsa hore a ngole Pesaleme ea 34.
Na Davida o ne a lumela hore Molimo o hōle le bao ka lebaka la ho nyahama, ba ikutloang ba lahliloe kapa ba ikutloang eka Molimo a ke ke a ba hlokomela? Davida o ile a re: “Jehova o haufi le ba lipelo li robehileng; O pholosa ba sithabetseng moeeng.” (Temana ea 18) A re ke re boneng hore na mantsoe ao a fana ka matšeliso le tšepo joang.
“Jehova o haufi.” Buka e ’ngoe e hlalosa polelo ena e le “mokhoa o mong o hlalosang hore Morena o hlokomela batho ba hae ebile o ba behile leihlo, kamehla o lula a ikemiselitse ho ba thusa le ho ba pholosa.” Hoa khothatsa ho tseba hore Jehova o hlokomela batho ba hae. O bona lintho tse ba hlahelang ‘linakong tsena tse mahlonoko’ ’me o tseba kamoo ba ikutloang kateng botebong ba lipelo tsa bona.—2 Timothea 3:1; Liketso 17:27.
“Ba lipelo li robehileng.” Litsong tse ling, “pelo e robehileng” e amahanngoa le bohloko boo motho a bo utloang ha a rata e mong empa eo a sa mo rate. Empa setsebi se seng se re mantsoe ana a mopesaleme a bua ka “bohloko le mahlomola a tlisoang ke maemo a tloaelehileng.” Ka linako tse ling le bona barapeli ba tšepahalang ba Molimo ba ka ’na ba hlaheloa ke litsietsi tse boima tse ka ba robang lipelo.
“Ba sithabetseng moeeng.” Ba nyahameng ba ka ’na ba sithabela hoo ka nakoana ba ka hlokang tšepo ka ho feletseng. Buka e ’ngoe ea bafetoleli ba Bibele e re poleloana eo e ka bolela “bao ho seng letho le molemo leo ba le lebeletseng.”
Jehova o ikutloa joang ka ba “lipelo li robehileng” le “ba sithabetseng moeeng”? Na o ba hōle le bona, o bona e le batho ba sa tšoaneloeng ke hore a ba rate a be a ba hlokomele? Le hanyenyane! Joaloka motsoali ea lerato ha a sika ngoana oa hae ea mahlomoleng a bile a mo tšelisa, Jehova o haufi le barapeli ba hae ba llelang ho eena ho kōpa thuso. O ikemiselitse ho khothatsa le ho thoba lipelo tsa bona tse robehileng le moea oa bona o sithabetseng. A ka ba fa bohlale le matla ao ba a hlokang e le hore ba sebetsane le liteko leha e le life tseo ba tobaneng le tsona.—2 Bakorinthe 4:7; Jakobo 1:5.
Ke hobane’ng ha u sa ithute hore na u ka atamela joang ho Jehova? Molimo enoa ea nang le kutloelo-bohloko o tšepisitse: “Ke lula le ea hateletsoeng le ea moea o ikokobelitseng, hore ke hlasimolle moea oa ba ikokobelitseng le ho hlasimolla lipelo tsa ba hateletsoeng.”—Esaia 57:15.
Litemana tsa Bibele tseo u ka li balang ka June: