Hakbesik ba Maromak

Ema neʼebé laran-susar hetan kmaan

‘HAʼU sente katak Maromak Jeová la simu no la hadomi haʼu.’ Neʼe mak liafuan husi feto kristaun ida neʼebé luta hasoru moras depresaun, ka laran-tun demais, iha ninia moris. Nia halo nia an fiar katak Maromak Jeová dook husi nia. Tuir loloos, Maromak Jeová dook husi fiar-naʼin neʼebé sai laran-tun ka lae? Ita bele hetan resposta neʼebé halo ita sente kmaan iha Maromak nia liafuan, neʼebé ninia atan, David hakerek iha Salmo (Mazmur) 34:18.

David hatene katak laran-susar bele hatodan Maromak Jeová nia atan sira. Kuandu David sei joven hela, nia tenkesér halai beibeik husi liurai Saul neʼebé hakaʼas an atu oho nia tanba laran-moras. David buka mahon iha fatin neʼebé nia hanoin katak Saul sei la hetan nia. Tan neʼe nia bá subar iha ema Israel sira-nia inimigu nia sidade, naran Gat, iha ema Filístia nia rai. Maibé inimigu sira-neʼe rekoñese David, no nia konsege halai husi neʼebá hodi finje hanesan ema bulak. Liutiha neʼe, David fó glória ba Maromak tanba salva nia husi inimigu nia liman, no nia hanoin kona-ba ninia esperiénsia neʼe kuandu nia hakerek liafuan iha Salmo 34.

David fiar katak Maromak dook husi sira neʼebé sente laran-tun tanba hasoru susar, ka sira neʼebé sente la iha folin, ka lae? David hakerek: “Jeová besik ba ema neʼebé sente susar iha laran, no salva ema neʼebé laran-kraik.” (Versíkulu 18) Mai ita haree oinsá mak liafuan sira-neʼe fó kmaan no esperansa ba ita.

“Jeová besik.” Livru ida esplika katak David uza liafuan neʼe atu hatudu kona-ba “Naʼi tau atensaun no haree didiʼak, sempre prontu atu ajuda no salva ninia povu”. Sin, ita bele sente kmaan atu hatene katak Maromak Jeová tau matan didiʼak ba ninia povu. Nia haree problema sira-neʼebé sira hasoru tanba moris iha tempu neʼebé “susar barak” mosu, no nia hatene oinsá sira sente.—2 Timoteo 3:1; Apostolu 17:27.

“Sira neʼebé sente triste iha laran.” Tuir matenek-naʼin ida, iha língua orijinál, David nia liafuan “triste iha laran”, iha arti “sente triste ka laran-tun”. Sin, dala ruma sira neʼebé adora Maromak hasoru susar neʼebé todan toʼo halo sira sente triste iha laran.

“Sira neʼebé laran-kraik.” Laran-tun bele halo ema sente sira-nia an la iha folin toʼo sira lakon esperansa ba tempu uitoan. Livru ida neʼebé fó matadalan kona-ba tradús Bíblia hatete katak liafuan neʼe bele tradús fali nuʼudar “sira neʼebé sente katak la iha buat diʼak ruma neʼebé sira hein”.

Oinsá mak Maromak Jeová sente kona-ba sira neʼebé “sente susar iha laran” no “laran-kraik”? Nia dook husi sira tanba hanoin katak sira la merese simu nia domin no atensaun? Lae duni. Hanesan aman ida neʼebé hadomi nia oan hodi besik no fó kmaan ba oan neʼebé sente triste, Maromak Jeová mós besik ba nia atan sira-neʼebé halerik hodi husu nia ajuda. Nia hakarak duni atu fó kmaan no hamenus sira-nia laran-triste no laran-kraik. Nia bele fó ba sira matenek no forsa atu tahan hasoru susar naran deʼit neʼebé sira hetan.—2 Korinto 4:7; Tiago 1:5.

Ita hakarak hatene oinsá mak Ita bele hakbesik ba Maromak Jeová, loos ka lae? Ita-nia Maromak neʼebé laran-diʼak neʼe fó promete furak neʼe: “Haʼu hela . . . hamutuk ho ema neʼebé laran-kanek no laran-kraik, atu hamosu fali ema kiʼik nia aten-barani no atu kura ema nia laran kuandu ema hakanek sira.”—Isaías (Yesaya) 57:15.