Ilawil a natsʼkaba tiʼ Dios

Junpʼéel baʼal jeʼel u yáantik le máaxoʼob lubaʼan yóoloʼoboʼ

«MAʼ U yaabiltmen Jéeobaiʼ.» Lelaʼ letiʼe baʼax tu yaʼalaj juntúul kiik yaan depresión tiʼoʼ. Letiʼeʼ jach tu yoksaj tu tuukul maʼ yaabiltaʼan tumen Diosiʼ. Baʼaleʼ Jéeobaeʼ, ¿ku pʼatik wa le máaxoʼob meyajtik ku lúubul u yóoloʼoboʼ? Le baʼax tu yaʼalaj David teʼ Salmo 34:18, ku yeʼesik bix u yilik Dios le máakoʼob beyaʼ.

Davideʼ u yojel kaʼach bix u muʼyaj juntúul máax meyajtik Dios ken jach lúubuk u yóol. Tu táankelmileʼ anchaj u púutsʼul tiʼ le rey Sauloʼ, tumen jach pʼektaʼan yéetel taak kaʼach u kíimsaʼal. Juntéenjeakeʼ bin u taʼakuba tu kaajil Gat tumen tu tukleʼ teʼeloʼ maʼ kun séeb kaxtbil tumen le reyoʼ. Baʼaleʼ maʼ bey úuchikiʼ, chéen tumen tu beetaj bey chokochajaʼan u pooleʼ béeychaj u púutsʼul. Yoʼolal baʼax úuch tiʼ David yéetel bix áantaʼabik tumen Dioseʼ tu kiʼikiʼtʼantaj yéetel tu tsʼíibtaj le Salmo 34.

¿Davideʼ ku tuklik wa kaʼach náach yanil Dios tiʼ le máaxoʼob ku lúubul u yóoloʼob yoʼolal le talamiloʼob ku máanskoʼob yéetel tumen ku tuklikoʼob maʼ tu páajtal u yaabiltaʼaloʼob tumen Diosoʼ? Davideʼ tu tsʼíibtaj: «Yuumtsil[eʼ] naatsʼ yanil utiaʼal u tok le máaxoʼob yaan yaj óolal tu puksiʼikʼaloʼob yéetel minaʼan [esperanza tiʼoboʼ]» (versículo 18, Los Salmos en Maya). Koʼox ilik bix jeʼel u yáantkoʼon le tʼaanoʼobaʼ.

«Yuumtsil[eʼ] naatsʼ yanil.» Junpʼéel libroeʼ ku yaʼalikeʼ le tʼaanaʼ, «junpʼéel bix u yaʼalaʼal jach ku chʼaʼik en cuentail máak Yuumtsil, yéetel jach mantatsʼ u kʼáat u yáant yéetel u salvar u kaajal». Jach ku líiʼsik k-óol k-ojéeltikeʼ Jéeobaeʼ ku kanáantik yéetel ku chʼaʼik xan en cuentail baʼax talamiloʼob ku aktáantik le máaxoʼob meyajtik teʼ «talam kiinoʼob[aʼ]», yéetel jach ku naʼatik bix u yuʼubikubaʼob (2 Timoteo 3:1; Beetaʼanoʼob [Hechos] 17:27).

«Yaan yaj óolal tu puksiʼikʼaloʼob.» Yaan tuʼuxoʼobeʼ le tʼaanoʼobaʼ ku meyaj utiaʼal u yaʼalaʼal loobiltaʼan u puksiʼikʼal wa máax tumen juntúul máax uts tu yich. Baʼaleʼ juntúul máak ku xokik u tʼaaniloʼob le Bibliaoʼ tu yaʼaleʼ le ka tu yaʼalaj David le tʼaanoʼobaʼ tu tsʼáaj naʼatbil «junpʼéel muʼyaj ku yúuchul yoʼolal uláakʼ baʼaloʼob». U jaajileʼ tak le máaxoʼob meyajtik Dios jeʼel u yantal «yaj óolal tu puksiʼikʼaloʼob» yoʼolal le talamiloʼob ku aktáantkoʼoboʼ.

«Minaʼan [esperanza tiʼob].» Le máaxoʼob lubaʼan u yóoloʼoboʼ yaan horaeʼ ku yuʼubikoʼob mix baʼal u biilaloʼob. Junpʼéel juʼun ku meyaj tiʼ le máaxoʼob sutik le Bibliaoʼ ku yaʼalikeʼ jeʼel u páajtal u suʼutul xan beyaʼ; «máaxoʼob mix baʼal maʼalob ku páaʼtkoʼob».

¿Bix u núukik Jéeoba u payalchiʼ le máaxoʼob «yaan yaj óolal tu puksiʼikʼaloʼob» yéetel «minaʼan [esperanza tiʼoboʼ]»? ¿Jéeobaeʼ maʼatech wa u yeʼesik u yaabilaj yéetel u kanáantik le máaxoʼob lubaʼan u yóoloʼob tumen ku tuklik maʼ u náajaltmoʼoboʼ? Jeʼex juntúul taatatsil jach yaan u yaabilaj ku méekʼik yéetel ku líiʼsik u yóol u hijoeʼ, Jéeobaeʼ naatsʼ yanil tiʼ le máaxoʼob meyajtik yéetel ku kʼáatkoʼob u yáantajoʼ. Letiʼeʼ jach u kʼáat u yáant le máaxoʼob «yaan yaj óolal tu puksiʼikʼaloʼob» yéetel «minaʼan [esperanza tiʼoboʼ]». Dioseʼ jeʼel u páajtal u tsʼáaiktiʼob le naʼat yéetel le muukʼ kʼaʼabéet utiaʼal u aktáantkoʼob jeʼel baʼalak talamiloʼ (2 Corintoiloʼob 4:7; Santiago 1:5).

¿Baʼaxten maʼ ta wilik bix jeʼel a maas natsʼkaba tiʼ Jéeobaeʼ? Letiʼeʼ yéetel yaabilajeʼ ku yaʼalik: «Teneʼ tiʼ [...] yanen tu yiknal óotsil ku mukʼyajeʼ, utiaʼal ka in tsʼáa u yóol yéetel ka in beet u chʼaʼik u yiikʼ» (Isaías 57:15).