Kalata Ukufuma ku Madagascar

Baleumfwika Kwati Baleimba Ulwimbo Ulusuma

INE na bena mwandi twali no kuba pa lwendo lwa kuya ku cishi ca Madagascar uko batutumine ukuyabombela bumishonari. Twalishalikepo balupwa ne fibusa kabili twacetekele ukuti Yehova ali no kutwafwa.

Tatwakalabe ifyo cali ilyo twasangilwe ku kulongana umuku wa kubalilapo. Munyinefwe uwaletungulula Isambililo lya Ulupungu lwa kwa Kalinda ali kwati aleimbisha ulwimbo. Tatwaleumfwapo nangu kamo ica kuti nga balelanda baleumfwika kwati baleimba ulwimbo ulusuma. Palipitile inshita iikalamba pa kuti tutendeke ukumfwa ifyo balelanda.

Umuku wa kubalilapo naumfwile ifyo balelanda, munyina uwaletungulula Ulupungu lwa kwa Kalinda aipwishe icipusho icishali mu paragrafu, kabili ukwabula no kwishiba naishilelanda icasuko. Abo napalamene nabo balyumfwile, kabili natendeke fye ukusekela mu kati ninshi ninjikata na pa kanwa. Nangu naumfwile insoni nalitemenwe pantu nalyumfwile ifyo balandile!

Mu nshita ya kuti nine ndeafwa abantu ukwishiba ifya kushimikila, nalemona kwati nine baleafwa. Aba bwananyina balenjeba ifya kuyalanda pa kushimikila pa kuti abantu bengomfwa, balenanga na malembo ya kuyabelenga.

Ndebukisha ubushiku bumo ilyo twaleshimikila, umwaice umo apundile ati, “Vazaha! Vazaha!” icipilibula ukuti “umutulatula.” Twalyendeshe pa kuti abaice na bambi betendeka ukupunda cimo cine. Lyena akalumendo kamo kalimukalipile, katile: “Te batulatula, balalanda icitundu cesu!” Nkashi umwina Madagascar uo nali na o alinondolwelele ifyo balandile pantu baleangufyanya sana pa kulanda ica kuti nshaumfwilepo nangu cimo. Na lyo line nalyumfwile bwino. Mu kuya kwa nshita, twalibelele ukwikala mu Madagascar.

Ilingi nga natendeka ukufuluka, utubana twaleisa no kunjikata ku kuboko, kabili nga natulolesha twaleseka kabili twaletemwa sana  ukumona nangu ca kutila nalefilwa ukulanda nato bwino. Abana abanono ababa mu cilonganino balatukoselesha sana, caba fye kwati ni Yehova abatuma. Umukashana umo, Hasina, alangafwa ukulanshanya na bambi. Bonse nga tabomfwile ifyo ndelanda, ena alomfwa. Kabili ilingi line alangafwa ukulanshanya ne fibusa fya mu cilonganino, alabalondolwela ifyo ndelandapo.

Ine na bena mwandi twali mu cilonganino ico bali no kupangamo icilonganino na cimbi. E co aba bwananyina balepeela bamo abo balesambilisha Baibolo kuli bambi pantu baleikala mu ncende umo aba mu cilonganino icipya baleshimikila. Nkashi umo anjebele ukulasambilisha uo alesambilisha Baibolo. Nalyumfwile umwenso kabili nalikeene ukuti nshaishiba ululimi, lelo akoselepo fye ukuti ndetungulula isambililo. Alinkoseleshe ukuti Yehova akangafwa. Cikuuku cikuuku, anjebele mu mashiwi aya-anguka ukumfwa ukuti tapali no kukokola nali no kulasambilisha abantu Baibolo mu nshila iyo ningatemwa. Aya mashiwi yalinkoseshe nga nshi.

Ukutula apo twatendekela ukusambilila nankwe, uyu mwanakashi alacita bwino sana. Bushiku bumo ilyo nali pa nse, naumfwile fye uko alenjita. Ena na bena mwakwe baleya mu kulembesha icupo. Abena mwakwe nabo balitendeka ukusambilila Baibolo, kabili balafwaya ukucita ifingi mu mulimo wa kwa Lesa, ukubikako fye no kubatishiwa. Ici calindetela insansa, nangu cingati nalishiba ukuti Yehova e ukulila abantu kuli ena, te ifwe iyo.

Twalisambilila ifingi nga nshi ku bantu ba kuli cino calo. Nangu ca kutila tulafuluka ifibusa fyesu na balupwa, tumfwa kwati bamo twaba fye nabo kuno kwine. Ilingi tulabalandapo ku ba bwananyina, kabili nabo nomba balepusha pali bena na pa fyo bali. Tulalolela inshita ilyo bamunyinefwe ba kuno bakeshibana na balupwa besu ne fibusa.

Na ino ine nshita abantu nga balelanda ng’umfwa kwati baleimba. Nomba ndomfwa ifyo balanda. Ndafwaisha ukuti na ine nkeshibe ukulanda ululimi bwino pa kuti na ine nga ndelanda cikaleumfwika kwati ndeimba ulwimbo ulusuma. Yesu atile: “Mwilasakamikwa pa bushiku bwa mailo, pantu ubwa mailo bukaba na masakamika ya buko.” (Mateo 6:34) E ico tukatwalilila ukusambilila ululimi panono panono. Lelo pali ino nshita nakulaya ndeishibilako pa kuti na ine nkalelanda bwino ulu lulimi nge fyo aba bwananyina kuno ku Madagascar balanda.

[Icikope pe bula 25]

Ndeshimikila na Hasina