Leta Madagascar

Eketie nte Ẹkwọ Ikwọ

AMI ye ebe mi ikoyom ndika obufa efakutom nnyịn ke isuo Madagascar. Ima ikọm mme ufan ye iman nnyịn unyọn̄, inyụn̄ isọn̄ idem nnyịn esịt nte ke Jehovah ayada nnyịn aka ebiet emi ọfọnde ye nnyịn.

Nnyịn idifreke akpa mbono esop emi ikodụkde ke Madagascar. Eketie nte eyenete emi ekenịmde ukpepn̄kpọ Enyọn̄-Ukpeme usen oro akada mme owo usụn̄ ke ikwọ. Sia nnyịn mîkopke usem mmọ, eketie nnyịn nte mmọ ẹkwọ ikwọ. Ayada nnyịn ini mbemiso ikopde se mmọ ẹtịn̄de.

Ekem ẹma ẹbụp mbụme oro n̄kopde, ndien uyo ama ọbọhọ mi inikiet inikiet. Mbon emi ẹketiede ẹkpere mi ẹma ẹkop, ntre mma mfụk ubọk ke inua nsak. Bụt ama anam mi, edi esịt ama enem mi nte ke mmosụk n̄kop n̄kpọ kiet ke ofụri se ẹkenemede.

Utu ke ami ndin̄wam nditọete ke utom ukwọrọikọ, mmọ ẹkekam ẹn̄wam mi. Mmọ ẹma ẹkpep mi nte n̄kpọkwọrọde ikọ ke usụn̄ emi an̄wan̄ade owo, ẹteme mi se n̄kpetịn̄de ye itie N̄wed Abasi emi n̄kpokotde.

Usen kiet, ke ini n̄kosụk n̄kwọrọde ikọ, ekpri eyen kiet ama ada ofiori ete, “Vazaha! Vazaha!” Nte mbon Madagascar ẹsikotde mbakara edi oro. Nnyịn ima itọn̄ọ ndisọp isan̄ mbak nditọwọn̄ en̄wen ẹditiene ẹkot mi ntre. Ekem eyenọwọn̄ en̄wen ama aduat enye ete, “Sion̄o idem kpọn̄ mma mbon, udiọn̄ọke ke enye etie nte eyen nnyịn idahaemi, okop usem nnyịn.” Eyenete an̄wan emi akasan̄ade ye ami akakabade se mmọ ẹketịn̄de emi ọnọ mi sia n̄kokopke se mmọ ẹketịn̄de ke ntak emi mmọ ẹkesọpde-sọp inua. Esịt ama enem mi sia oro ọkọwọrọ ke mmọtọn̄ọ ndikop usem emi. Ama ọtọn̄ọ ndinem mi ndidụn̄ ke Madagascar.

Ediwak ini, ke ini n̄kopde ndobo, ekpri eyenọwọn̄ esidi edimụm mi ubọk, ndien  mmesikụt ke enye enem esịt ndikụt mi kpa ye mmen̄kemeke ndineme nneme ye enye. N̄kpri nditọ ke esop nnyịn ẹdi enọ Abasi. Hasina, ekpri eyenete an̄wan kiet ke esop nnyịn esikabade ikọ ọnọ mi. Ikọ mi esisọp an̄wan̄a enye idem ekpededi in̄wan̄ake owo ndomokiet. Enye esin̄wam mi ke ini ndomode ndineme nneme ye mme ufan mi ke esop, anam se ntịn̄de an̄wan̄a mmọ.

Nnyịn ikodu ke esop emi ẹkeyomde ndibahade, ntre akana nditọete ẹkpọn̄ mbon emi mmọ ẹsikpepde Bible, emi mîdụhe ke efakutom mmọ ẹnọ mbon emi ẹkwọrọde efakutom oro. Eyenete an̄wan kiet ama ọkpọn̄ esie kiet ọnọ mi. Mma ndọhọ enye ke ndikemeke ndikpep owo oro Bible, ke nsụk n̄kpekpep usem mmọ, edi enye ama eyịre ete n̄kpep. Enye ọkọdọhọ mi ete ke Jehovah ayan̄wam mi n̄kpep. Enye ama etịn̄ sụn̄sụn̄ nte ke ibịghike ke nyọtọn̄ọ ndikpep mme owo n̄kpọ nte n̄kpamade ndikpep. Ikọ esie emi ama enen̄ede ọsọn̄ọ mi idem.

Owo emi ẹkedọhọde n̄kpep Bible mi enen̄ede anam n̄kọri. Mma n̄kop enye okotde mi usen kiet. Enye ye ebe esie ẹkeka ndisịn ndọ mmọ ke n̄wed. Ebe esie n̄ko ama ọtọn̄ọ ndikpep Bible, ndien mmọ ẹbiere ndinam se Bible ọdọhọde, utọ nte edina baptism. Esịt ama enen̄ede enem mi kpa ye oro mfiọkde ke Jehovah esidụri mme owo ọnọ idem esie.

Imekpep ediwak n̄kpọ ke obufa efakutom nnyịn emi. Okposụkedi emi mme ufan ye iman nnyịn ẹsidọn̄de nnyịn itọn̄ ndusụk ini, esitie nnyịn nte ke ndusụk mmọ mmọmi ye nnyịn. Imesiwak nditịn̄ mban̄a mmọ nnọ nditọete nnyịn mi ndien nditọete emi ẹsikam ẹbụp ẹban̄a mmọ ye nte n̄kpọ etiede ye mmọ. Enen̄ede ọdọn̄ nnyịn ndikụt ini emi nnyịn ye mme ufan nnyịn mi ke Madagascar idisobode ye mme iman nnyịn.

Ke ini mme owo ẹtịn̄de ikọ, ke osụk etetie mi nte mmọ ẹkwọ ikwọ. Edi idahaemi, mmokop nsịtnsịt se mmọ ẹtịn̄de. Ndien ọdọn̄ mi nditiene ntịn̄ ikọ emi edinem edinem nte mmọ. Jesus ọkọdọhọ ete: “Ẹkûtịmede esịt ẹban̄a n̄kpọn̄, koro n̄kpọn̄ eyenyene editịmede esịt esie. Afanikọn̄ usen ekem ye usen.” (Matthew 6:34) Ntre, nnyịn iyaka iso ikpep usem emi. Se nnamde idahaemi edi ndinen̄ede n̄kpan̄ utọn̄ man n̄keme ndinam utom ye ndima nditọete emi ẹnyenede ime mi ke Madagascar.

[Ndise ke page 25]

Ami ye Hasina ke ikwọrọ ikọ