Amaniɛbɔɔ Ni Jɛ Madagascar

Wiemɔ lɛ Tamɔ Lala ko ni Ŋɔɔ

MI KƐ miwu yi mli kɛmiiya wɔyasɔmɔ akɛ maŋsɛɛ shiɛlɔi yɛ Madagascar ŋshɔkpɔ lɛ nɔ. Wɔkɛ wɔwekumɛi kɛ wɔnanemɛi ye shɛɛ nɔ ni ji naagbee nɔ̃, ni wɔkɛ nuufeemɔ shi amɛ ejaakɛ wɔle akɛ Yehowa kɛ wɔ baatsu nii ni ebaaha wɔye omanye.

Wɔhiɛ kpaŋ klɛŋklɛŋ asafoŋ kpee ni wɔtee yɛ Madagascar lɛ nɔ kɔkɔɔkɔ. Wɔna nyɛmi nuu ni kwɛ Buu-Mɔɔ Nikasemɔ lɛ nɔ lɛ oookɛɛ eekwɛ lalɔi akuu ko nɔ. Akɛni wɔnuuu wiemɔ lɛ kwraa hewɔ lɛ, efee tamɔ nɔ ni aala lala ko ni ŋɔɔ waa. Wɔsɛɛ tsɛ yɛ maŋ nɛɛ nɔ dani wɔbɔi amɛwiemɔ lɛ shishi numɔ.

Gbi klɛŋklɛŋ ni abi sane ko ní minu shishi yɛ asafoŋ kpee ko shishi lɛ, miha hetoo waa ní mihiɛ bɛ mihe nɔ beni atsɛko mi. Mɛi ni tara mimasɛi lɛ nu, ni mikɛ miniji bumɔ minaabu bɔni afee ni akanu akɛ miiŋmɔ. Mihiɛ gbo, ni kɛlɛ mimii shɛ mihe akɛ minu nɔ ni awieɔ lɛ eko shishi!

Yɛ nɔ najiaŋ ni mi moŋ matsɔɔ mɛi bɔ ni ashiɛɔ lɛ, minu he tamɔ nɔ ni amɛ moŋ amɛhiɛɔ minineshi kɛyaa shiɛmɔ. Nyɛmimɛi lɛ jɛɔ suɔmɔ mli amɛtsɔɔ mi nɔ ni makɛɛ kɛ ŋmalɛi ní esa akɛ mikɛtsu nii yɛ shiɛmɔ nitsumɔ lɛ mli.

Mikaiɔ akɛ gbi ko beni minyiɛ shiɛmɔ nitsumɔ lɛ nɔ lɛ, gbekɛ ko bo etsɛ mi akɛ:“Vazaha! Vazaha!” Yɛ Malagasy wiemɔ mli lɛ eshishi ji “gbɔ.” Wɔsha wɔhe kɛshi jɛmɛ dani gbekɛbii krokomɛi abafata ehe kɛbolɔ. Kɛkɛ ni gbekɛ nuu ko bo ewo mɔ ni bolɔɔ lɛ yi. Ekɛɛ lɛ akɛ: “Jeee gbɔ ji lɛ, ebaanyɛ ewie wɔmaŋ wiemɔ lɛ!” Nyɛmi yoo ni mikɛnyiɛ shiɛmɔ lɛ nɔ lɛ tsɔɔ mi nɔ ni amɛwieɔ lɛ shishi, ejaakɛ amɛwie lɛ oyayaayai tsɔ. Ni kɛlɛ mitsui nyɔ mimli akɛ miinu wiemɔ lɛ fiofio. Agbɛnɛ lɛ, mihiɛ miimɛ Madagascar fiofio.

Bei komɛi kɛ́ minu he akɛ mihe efee shoo lɛ, gbekɛbii lɛ ateŋ mɔ ko bamɔɔ minineshi, ni beni mama miyi shi makwɛ lɛ lɛ eeŋmɔ muɛɛ, ni no haa minuɔ he akɛ eŋɔɔ enaa akɛ ena mi, tsɛ minyɛɛɛ wiemɔ lɛ mawie jogbaŋŋ.  Eji jɔɔmɔ akɛ Yehowa eha wɔ gbekɛbii ni tamɔ nakai yɛ asafo lɛ mli. Nyɛmi yoo fioo ko ni atsɛɔ lɛ Hasina lɛ batsɔ mɔ ni wieɔ ehaa mi. Kɛ́ miwie ni mɔ ko mɔ ko nuuu shishi lɛ, enuɔ shishi. Ni bei pii kɛ́ miikɛɛ minanemɛi ni yɔɔ asafo lɛ mli lɛ nɔ ko ní amɛnuuu shishi lɛ, Hasina baa ebatsɔɔ amɛ nɔ ni mikɛɔ lɛ shishi.

Abɔi gbɛjianɔtoo koni atsé asafo hee kɛjɛ asafo ní mikɛ miwu yɔɔ mli lɛ mli. Enɛ hewɔ lɛ, ehe bahia koni mɛi ni eyaje asafo hee lɛ mli lɛ kɛ amɛ-Biblia mli nikaselɔi ni yɔɔ he ni wɔshiɛɔ yɛ lɛ aha mɛi ni yɔɔ wɔsafo lɛ mli lɛ, koni wɔ hu wɔfee nakai nɔŋŋ. Nyɛmi yoo ko bi koni mikɛ e-Biblia mli nikaselɔi lɛ ekome akase nii. Mitsui fã ni mikɛɛ lɛ akɛ minyɛŋ, shi etee nɔ ewo mi hewalɛ koni makpɛlɛ nɔ. Eha mile akɛ Yehowa baaye ebua mi koni manyɛ mafee. Ekɛ naajɔlɛ kɛɛ mi akɛ etsɛŋ kwraa ni matsɔɔ mɛi anii bɔ ni mitaoɔ lɛ, ni ekɛ wiemɔi ni shishinumɔ waaa tsu nii. Nakai wiemɔi lɛ wo mi hewalɛ waa.

Kɛjɛ nakai beaŋ kɛbaa nɛɛ, nikaselɔ lɛ efee tsakemɔi babaoo yɛ eshihilɛ mli. Gbi ko beni miyɔɔ agbo lɛ naa lɛ, minu ni eetsɛ́ mi. Ekɛ ewu nyiɛ gbɛ kɛmiiya koni amɛkɛ amɛgbalashihilɛ lɛ ayawo mla shishi. Ewu lɛ ebɔi Biblia lɛ kasemɔ, ni amɛkɛ mumɔŋ otii srɔtoi ní amɛmiibɔ mɔdɛŋ akɛ amɛshɛ he emamɔ amɛhiɛ, ni eko ji baptisimɔ. Eyɛ mli akɛ mile akɛ Yehowa ji mɔ ni gbalaa mɔ ko kɛbaa eŋɔɔ moŋ, shi enɛ ha mimii shɛ mihe waa.

Wɔkase nibii babaoo yɛ Madagascar. Eyɛ mli akɛ wɔhiɛ tséɔ wɔnanemɛi kɛ wɔwekumɛi ni wɔshi yɛ wɔmaŋ lɛ moŋ, shi wɔnuɔ he oookɛɛ amɛkɛ wɔ yɛ biɛ. Wɔfɔɔ amɛhe wiemɔ wɔtsɔɔ nyɛmimɛi ni yɔɔ biɛ lɛ, ni amrɔ nɛɛ amɛbiɔ amɛshi po yɛ wɔdɛŋ. Wɔhiɛ kã nɔ akɛ gbi ko kɛ̃ lɛ, weku ni wɔná yɛ biɛ lɛ kɛ wɔweku ni wɔshi yɛ wɔmaŋ lɛ baana amɛhe ní amɛfee ekome.

Malagasy wiemɔ lɛ kã he egbɛɔ yɛ mitoiiaŋ tamɔ lala. Shi agbɛnɛ lɛ, minuɔ wiemɔi lɛ ashishi. Mihiɛ kã nɔ akɛ wɔsɛɛ lɛ, mi hu mawie wiemɔ lɛ oookɛɛ miilá, ni mikɔlɔŋ wiemɔi lɛ ekomekome taakɛ mifeɔ amrɔ nɛɛ. Yesu kɛɛ akɛ: “Nyɛkahaoa nyɛhe nyɛtoa wɔ́; ejaakɛ wɔ́ diɛŋtsɛ aaahao yɛ enii ahe.” (Mateo 6:34) No hewɔ lɛ, wɔbaakã he wɔshara wiemɔi lɛ ekomekome. Mitswa mifai shi akɛ maya nɔ mikɛ mitoi, mijwɛŋmɔ, kɛ mitsui fɛɛ akase wiemɔ lɛ bɔni afee ni mihe asa tamɔ nyɛmimɛi ni yɔɔ biɛ, yɛ Madagascar, ní sumɔɔ wɔ, ní toɔ amɛtsui shi amɛhaa wɔ lɛ.

[Mfoniri ni yɔɔ baafa 25]

Mi kɛ Hasina miishiɛ