Revareva Ta Madagascar Amo

Miusiki Namo Hereana Bamona

LAU bona egu adavana be emai misinari gaukara totona Madagascar dekenai ai lao. Emai famili bona turadia ai bamahuta henia bona mai lalogoada ida ai lao, Iehova dekenai ai tabekau, badina ai diba Ia ese ai do ia durua.

Unai gabu matamata dekenai ai abia hebou ginigunana ai laloaboio diba lasi. Toana be Gima Kohorona Stadi ia naria tadikakana be miusiki oreana ta ia hakaua noho. Ai be unai gado ai lalopararalaia momokani lasi, to ai kamonai herevadia edia regena be miusiki namo hereana ena rege bamona. Idia gwauraia gaudia be nega daudau murinai do ai lalopararalaia!

Nega ginigunana henanadai ta be lau lalopararalaia neganai, lau haere badabada. Lau badinai idia helai taudia be unai idia kamonai, bona lau kiri dainai egu imana amo egu uduna lau koua. Lau hemarai, to lau moale badina idia herevalaia gauna ta lau lalopararalaia!

Ena be lau ese haheitalai namona be ma haida dekenai lau hahedinaraia be namo, to lau mamia idia ese lau idia durua. Tadikaka taihu be mai lalokau ida lau idia durua, haroro gaukara ai dahaka do lau herevalaia bona edena siri do lau gaukaralaia totona.

Lau laloatao dina ta haroro gaukara ai, natu maragina ta ia boiboi, “Vazaha! Vazaha!” Unai be Malagasy gado ai idia gwauraia herevana, ena anina be “idau tano tauna.” Ai raka haraga matamaia, badina ai ura lasi natudia ma haida idia mai bona unai hereva tamona idia boiboilaia. Bena mero ta be unai natu maragina ia gwau henia, ia gwau, “Ia be idau tano hahinena lasi, iseda gado ia herevalaia diba!” Unai gabu dekenai ia noho taihuna ta be lau dekenai edia hereva ia hahanaia, badina idia hereva haraga dainai lau laloparara lasi. To lau moale badina edia gado lau diba matamaia. Madagascar be egu noho gabuna bamona lau laloa matamaia.

Nega momo lau mamia lau be sibona neganai, maragidia be lau dekenai idia mai, egu  imana idia dogoatao, ena be edia gado lau diba namonamo lasi. Kongrigeisen lalonai idia noho natudia be Iehova ena harihari gaudia. Taihu matamata ta, Hasina, ese egu hereva ia hahanaia. Ta ese lau ia lalopararalaia lasi neganai, Hasina ese lau ia lalopararalaia. Nega momo kongrigeisen lalonai lau be turadia ida lau herevahereva neganai, ia ese lau ia durua bona idia dekenai lau gwauraia hereva ena anina ia gwauraia.

Lau bona egu adavana ai noho kongrigeisen be idia hapararaia, bona kongrigeisen ma ta idia hamatamaia. Anina be emai Baibel stadi haida be tadikaka taihu haida dekenai ai henia, badina idia be kongrigeisen matamata ena teritori ai idia noho. Taihu ta ese lau ia hagoadaia ena Baibel stadi ta do lau karaia totona. Lau gari bona lau gwau lau do hegeregere lasi, to ia ese lau ia hagoadaia stadi do lau karaia. Bona lau ia hamaoroa Iehova ena heduru amo unai stadi do lau karaia. Mai hebogahisi ida, lau ia hamaoroa, kahirakahira lau ura dalana hegeregerenai ma haida lau hadibaia diba. Unai hereva ese lau ia hagoadaia.

Gabeai lau stadi henia hahinena ia goada ia lao. Dina ta ruma murimurinai lau noho neganai, egu ladana ia boiria. Ia bona ena adavana idia lao edia headava idia hamaoromaoroa totona. Ena tau ia stadi matamaia, bona idia ruaosi be tahua gaudia haida idia atoa, unai tahua gauna ta be bapatiso. Unai ese lau ia hamoalea, ena be ai diba ai ese taunimanima ai veria lasi, to Iehova ese ia veria mai.

Inai gabu matamatana dekenai gau momo ai dibaia. Ena be emai famili bona turadia ai reaia bada, to ai mamia idia be ai danu inai gabu dekenai ai noho bamona. Nega momo tadikaka taihu dekenai idia ai herevalaia, bona hari emai turadia iniseniai be idia totona idia henanadai. Inai famili rua idia hedavari heheni negana be mai moale ida ai naria.

Inai gabu taudia idia hereva neganai, miusiki ena regena lau do kamonai noho. To, hari edia hereva lau lalopararalaia. Lau ura momokani nega ta unai gado​—regena be miusiki namona bamona​—do lau herevalaia namonamo. Iesu ia gwau: “Kerukeru totona umui lalohekwarahi lasi, badina kerukeru danu be mai ena lalohekwarahi.” (Mataio 6:34) Unai dainai metairametaira, unai gado ena hereva ta ta lau dibaia noho. Bona hari, lau gaukara goada noho egu kamonai karana bona laloa dalana lau hanamoa totona, unai amo Madagascar ai idia noho lalokau tadikaka taihu ida do ai gaukara hebou noho.

[Foto Rau Ai 25]

Hasina ida lau haroro