Mukanda Kufuma kuMadagascar

Datiyakeneña Neyi Kamina Kakawahi

AMI ninfumwami twadiña halwendu lwakuya kumudimu wetu wawuha wawumishonali, hachitutu chaMadagascar. Twashikili chisaka chetu niamabwambu nawa twadikolesheli, nakukuhwelela netu Yehova natwinki mudimu watutelela nawa wukutukwasha kuzata chiwahi.

Hitwamba kavulamena ifuku ditwapompeli katachi mumudimu wetu wawuhaku. Mana kwetu walombweleña Kaposhi Kakutalila wamwekeneña neyi kwiji nakulombola añimbi. Twelukili wanyi idimi denidi chakwila yuma yahosheleñawu yatiyakeneña neyi kamina kakawahi. Mwahitili mpinji yeneni hakwila nawu tutachiki kutiya yuma yahosheleñawu.

Ifuku datachi ehwili lwihu lwabuliluwu kusoneka mumagazini, nakwili chatiyakana chakubula kwiluka. Antu inadikumini nawu antiyili nawa najikili kukanwa nachikasa muloña nakeñeleña kuseha. Natiyili nsonyi hampinji yoyimu nazañaleli muloña natiyili yuma yahosheleñawu.

Chatela nimikileña amakwawu chakutalilahu mumudimu wamwiha, natoñojokeleña nami yami anakukwashawu. Amana kwami niahela andizishili kushimwina chiwahi mumudimu wamwiha, nikunleja chakuhosha ninsona yakutaña.

Inakwanuka ifuku dimu dinadiña mumudimu wamwiha, mwana wumu wadiña nakubilela nindi “Vazaha! Vazaha!” Idi hiizu davula kuzatishawu mwidimi daMalagasy hakutena “ñinza.” Twatachikili kwanda swayi-swayi nakuchina netu anyana amakwawu keña enzi nakubilela chochimu. Kansi weyala wumu wamuzuwilili ona mwana wadiña nakubilela. Wahosheli nindi, “Hiñinza wanyi, wahoshaña idimi detu!” Muhela inadiña nindi walumbulwili chahosheleñawu muloña ahosheleña swayi-swayi chakwila nakañenyi kutiya. Hela chochu natiyili kuwaha. Natachiki kumona neyi kuMadagascar hikumukala wetu.

Mpinji yikwawu neyi natiyi wuudi, atwansi ankolesheleña hampinji yamwekesheleñawu  nawu akeña hela chakwila hinahosheleña idimi dawu chiwahuku. Nelukili nami ankeña muloña adiña nakunkwata kuchikasa. Twakooleka chikupu muloña Yehova watwinka atwansi muchipompelu. Muhela wakansi wejina daHasina, diyi wankwashaña kulumbulula yuma yinahoshaña. Neyi kwosi muntu wunatiyi chinahoshi yena wantiyaña. Kakavulu wankwashaña neyi inakuhanjeka nawamabwambu kuchipompelu, wayilumbulwilaña yuma yinahoshaña.

Ami ninfumwami twadiña muchipompelu chadiña kwakwihi nakwambuka kulonda atuñi chipompelu chachiha. Dichi nateleleli kuhana atudizi aBayibolu amakwawu kulonda ayilomboleña kudi acheñi, muloña atudizi ashakamineña mwiluña dachipompelu chachiha. Muhela wumu walejeli nindi nidizeña nakadizi windi wumu. Natiyili woma nawa namulejeli nami nikutwesha wanyi, ilaña wanshinjilili nindi nilomboleña. Wankolesheli nindi Yehova wukunkwasha nikutwesha kumudizisha. Wahosheli nezu dawunda iku nankutala nawa wazatishili idimi dapela kutiya hakunleja nindi keña nitachiki kudizisha antu neyi chinakeñaña. Awa mazu ankolesheli chikupu.

Kufuma tuhu hayina mpinji ona kadizi nayiluku hambidi chiwahi. Ifuku dimu nadiña hanzi wantambikili hejina. Adiña hamu nanfumwindi, ayileña nakusonekesha maluwi awu. Iyala niyena natachiki kudiza nawa anemiki yikonkwanyi yayivulu yakuspiritu yinakufwilawu kushikijawu, kushilahu nikupapatishewa. Chumichi chanzañalesheli hela chakwila neluki nami Yehova diyi wakokolaña antu kudi yena, bayi etuku.

Tunadizi yuma yayivulu nankashi muniwu mudimu wetu wawuha. Hela chakwila twanukaña chisaka niamabwambu amwituña detu, twatiyaña neyi kwiji twekala nawu kunu. Kakavulu twahanjekaña nawamana kwetu niahela hadi antaña niamabwambu jetu, nawa chayinu mpinji amana kwetu ehulaña chinakuhandawu. Twatalilaña mpinji yitwakashakama hamu mukunuñañana nachisaka chetu chakunu kuMadagascar nichisaka chetu chakumujimba.

Nichidi kutiya “kamina” neyi antu anakuhosha. Ichi dinu natiyaña chahoshañawu. Natalilaña mpinji yinakatachika kuhosha chiwahi neyi kamina kinatiyaña neyi antu anakuhosha. Yesu wahosheli nindi: “Bayi mwakama ifuku dakumadikuku, muloña ifuku dakumadiki dikudakama dadeni.” (Matewu 6:34) Dichi tukutwalekahu kudiza izu dimu hampinji. Nawa nikutwalekahu nakusha muchima kumazu inatiyaña nikutoñojoka kulonda nitachiki kuhosha chiwahi neyi amana kwami nawahela akunu kuMadagascar.

[Mwevulu wudi hefu 25]

Tunakushimwina naHasina