Ontumwafo ya za koMadagascar

Oshimalagasi ohashi inyenge sha fa omusika ombwanawa

NGAME nomusamane gwandje otwa li tu na okuya kontuntu yaMadagascar, omolwoshinakugwanithwa shetu oshipe shuutumwa. Otwa li twi ilaleke naakwanezimo nosho wo nookuume ketu notwa li twa kambadhala okukala tu na omukumo, molwaashoka otwa li tu na einekelo kutya Jehova okwe tu pa oshinakugwanithwa shoka sha li she tu opalela note ke tu kwathela tu pondole.

Ihatu dhimbwa nando esiku twa ya kokugongala oshikando shotango kokantuntu hoka. Pokugongala hoka, omumwatate ngoka a li ta kwatele komeho Ekonakono lyOshungolangelo okwa li a fa ta kwatele komeho ongundu yaaimbi. Osha li oshidhigu kutse noonkondo okuuva ko elaka ndyoka, nomolwaashoka sho aantu ya li taya popi otwa li owala tu uvite ya fa taya hiki omusika ombwanawa. Otwa li tu wete kutya otashi ke tu pula ethimbo ele opo tu uve ko elaka ndyoka.

Esiku limwe sho omumwatate a li a pula epulo lya gwedhwa po pokatendo kamwe, nziya onda li nda gandja eyamukulo newi lyomuule, molwaashoka osha li oshikando shandje shotango ndu uva ko omapulo ngoka. Mboka ya li ya kuutumba popepi nangame oya li yu uvu ndje, nonda li nda si iingungumika. Nonando onda li nda sa ohoni, onda li wo nda nyanyukwa sho ndu uva ko shoka omumwatate a popi.

Pehala lyokukala ongame tandi tulile po aamwatate oshiholelwa muukalele, onda li ndu uvite ongame tandi kwathelwa. Aamwatate naamwameme oya li ya lombwele ndje nohole nkene ndi na okuninga omafalomo ge shi okuuviwa ko muukalele, nokulombwela ndje shoka ndi na okupopya nomanyolo ngoka ndi na okulongitha.

Otandi dhimbulukwa esiku limwe sho nda li muukalele, okanona kokamati oka li taki ithana taka ti: “Vazaha! Vazaha!” Oshitya shika osha li hashi longithwa apuhe muMalagasi shoka tashi ti “omukwiilongo.” Otwa li twa tameke okweendelela molwaashoka otwa li twa tila kutya pamwe aanona yalwe otaye ya ye tu ule ngaashi hoka. Opo ihe okamati kamwe oka ganda hoka ka li taki igidha ndje. Oka ti: “Omuntu ngoka ke shi omukwiilongo naye oha popi elaka ndyoka hatu popi!” Omumwameme ngoka a li nangame okwa li a tolokele ndje shoka sha li tashi popiwa kaanona mboka, molwaashoka oya li taya popi neendelelo shoka she shi ningitha ndi kale kaandi uvite ko shoka taya popi. Nonando ongawo onda li ndi uvite kutya onda ninga ehumokomeho. Kanda li we ndi uvite nda fa omukwiilongo.

 Omathimbo gamwe ngele ndu uvite ezaza, shoka sha li hashi tsu ndje omukumo osha li aagundjuka mboka ya li hayu ulike kutya oye hole ndje, nonando katwa li hatu iyuvu nawa nayo ngele tatu kundathana, onda li ndi shi shi kutya oye hole ndje molwaashoka oya li haye ya kungame tayi imemeha nokukwata ndje moonyala. Aagundjuka yomegongalo lyetu oye li elalekonuuyamba lya za kuJehova. Omumwameme gumwe omugundjuka gwedhina Hasina, okwa li ha tolokele ndje nokwa li ha kala u uvite ko shoka nda hala okutya nokuli nonando yamwe kayu uvite ko. Olundji uuna tatu kundathana nookuume megongalo, ihe kayu uvite ko nawa, Hasina okwa li he ya okukwathela ndje noku ya yelithila shoka nda hala oku ya lombwela.

Ngame nomusamane gwandje otwa li megongalo ndyoka lya li li pokutopoka li ninge omagongalo gaali. Onkee ano, aakonakonimbiimbeli yamwe oya li ye na okugandjwa kuyalwe, molwaashoka ngaashingeyi aakonakoni mboka oye li koshitopolwa shegongalo ndyoka epe. Omumwameme gumwe okwa li a pula ndje ndi kale handi konakona nagumwe gwomaakonakoni ye. Molwaashoka onda li nda tila, onda li nde mu lombwele kutya itandi vulu natango okukonakona Ombiimbeli nomuntu. Ihe omumwameme okwa li a ladhipike ndje ndi zimine. Okwa li a shilipaleke ndje kutya Jehova ota ka kwathela ndje opo ndi pondole. Okwa tala ndje neho lyohenda nokulombwela ndje niitya yanathangwa kutya masiku otandi ka vula okulonga yalwe. Oohapu ndhoka odha li dha ladhipike ndje.

Omukonakonimbiimbeli ngoka okwa kala ta ningi ehumokomeho. Esiku limwe sho nda li pondje yegumbo, onda li ndu uvu ti ithana ndje. Okwa li a lombwele ndje kutya otaya yi ya ka hokane paveta nomusamane. Omusamane gwe naye okwa li a tameke okukonakona noya li yi itulila po omalalakano ogendji gopambepo ngoka ya li ya hala okwaadha, mwa kwatelwa okuninginithwa. Shika osha li she etele ndje enyanyu, nonando onda li ndi shi shi kutya Jehova oye ha hilile aantu kuye, ihe hatse.

Otwa li twi ilongo oshindji miilonga yuutumwa. Nonando otwa li twa yuulukwa ookuume naapambele yetu, natango otwa li hatu kala tu uvite twa fa tu li pamwe nayo. Olundji otwa kala hatu hokololele aamwatate kombinga yawo, nokuli ngashingeyi ohaya kala noku ya pula kutya oye li po ngiini. Otwa tegelela esiku uuna aapambele yetu taya ka hangana naamwatate mboka.

Natango Oshimalagasi ohashi inyenge sha fa omusika uuna yalwe taya popi. Ihe ngaashingeyi ohandi shi uvu nawa. Onda tegelela nondjuulukwe uuna ethimbo tandi ka vula okupopya nawa elaka ndyoka hali inyenge lya fa omusika ngaashi naanaa uuna tali popiwa kuyalwe. Jesus okwa ti: “Inamu sila esiku lyanofu oshimpwiyu, oshoka esiku lyanofu otali isile lyo lyene oshimpwiyu.” (Mateus 6:34) Onkee ano, otatu tsikile natango nokwiilonga iitya kooshimwe nooshimwe. Ngashingeyi otandi ende owala tandi ilongo nawa elaka ndyoka mokukala tandi pulakene nawa kuyamwe sho taya popi opo ndi kale handi li popi nawa ngaashi aamwatate naamwameme muka muMadagascar.

[Ethano pepandja 25]

Sho twa li tatu uvitha naHasina oshikando shimwe