Lengwalo le le Tšwago Madagascar

Le be le Kwagala Eka ke Mmino o Mobose

NNA le monna wa ka re be re lebile kabelong ya rena e mpsha ya boromiwa—sehlakahlakeng sa Madagascar. Re ile ra laelana le ba lapa le bagwera le go leka go ba le sebete, re holofetše gore Jehofa o re neile kabelo yeo e re swanetšego le gore o be a tla re thuša go atlega.

Re ka se tsoge re lebetše seboka sa rena sa phuthego sa mathomo kabelong ya rena e mpsha. Ngwanabo rena yo a bego a swere Thuto ya Morokami e be eka o etelela pele sehlopha sa diletšo tša mmino. Kwešišo ya rena ka leleme e be e le e lekanyeditšwego kudu moo e lego gore mantšu ao a bego a bolelwa a be a kwala eka ke mmino o mobose. Go be go tla re tšea nako go kwešiša seo se bego se bolelwa.

Ka phošo ke ile ka araba ka go hlaboša ge ka lekga la pele ke be ke kwešiša potšišo yeo e bego e sa ngwalwa serapeng. Bao ba bego ba dutše kgauswi le nna ba ile ba nkwa, ka gona ke ile ka swanelwa ke go sega ke ithibile molomo ka diatla. Ke be ke na le dihlong eupša ka nako e swanago ke thabile ka gobane ke kwešišitše seo se bego se bolelwa!

Go e na le gore e be nna yo a beelago ba bangwe mohlala bodireding, ke ile ka kwa eka ke nna yo a bego a newa thušo. Bana babo rena le dikgaetšedi ka lerato ba ile ba mpontšha kamoo nka neago thero e kwešišegago tirelong ya tšhemo le go mpontšha seo ke swanetšego go se bolela le gore ke diriše mangwalo afe.

Ke gopola ka letšatši le lengwe ge ke be ke le bodireding, mošemanyana yo mongwe o ile a goeletša ka gore “Vazaha! Vazaha!” Le ke lentšu le le tlwaelegilego la Semalagasy bakeng sa “motho o šele.” Re ile ra thoma go sepediša re holofetše gore bana ba bangwe le bona ba ka se thome go dira se se swanago. Ke moka mošemane yo mongwe o ile a kgalema yo a bego a goeletša. O ile a re: “Ga se motho o šele, o kgona go bolela leleme la rena!” Kgaetšedi yo a bego a sepela le nna o ile a swanelwa ke go fetolela seo ba bego ba se bolela ka ge ba be ba bolela ka go akgofa e bile ke sa kwešiše seo ba bego ba se bolela. Lega go le bjalo, ke ile ka ikwa ke kgotsofetše. Mafelelong ke ile ka thoma go ikwa ke le gae mo Madagascar.

Ka makga a mantši ge ke be ke ikwa ke lewa ke bodutu, ke be ke ekwa seatlana se senyenyane se swara sa ka, ge ke lebelela fase ke gahlanetšwa ke  sefahlego sa mosetsanyana yo a myemyelago yoo a bego a thabišitšwe kudu ke go mpona gaešita le ge ke be ke sa kgone go boledišana le yena gabotse. Bana ba banyenyane ka phuthegong e tloga e le tšhegofatšo e tšwago go Jehofa. Kgaetšedi wa mofsa yo a bitšwago Hasina, o ile a ba mofetoledi wa ka. Ge ba bangwe ba be ba sa nkwešiše, yena o be a bonala a nkwešiša. Gantši o be a nthuša ge ke be ke leka go boledišana le bagwera ba ka ka phuthegong, a ba hlalosetša gabotse seo ke bego ke nyaka go ba botša sona.

Nna le monna wa ka re be re le phuthegong yeo e bego e le kgauswi le go arolwa gore go hlongwe e mpsha. Se se be se tla ra gore diithuti tše dingwe tša Beibele di fetišetšwe go ba bangwe ka ge diithuti tšeo di be di dula tikologong ya phuthego e mpsha. Kgaetšedi yo mongwe o ile a nkgothaletša gore ke sware e nngwe ya dithuto tša gagwe. Ke be ke tšhogile e bile ke gapeletša gore ga se ka tšwa ke swanelega, eupša o ile a tšwela pele a ntutueletša go swara thuto yeo. O ile a nkgodiša gore ka thušo ya Jehofa, ke tla kgona. Ka sefahlego seo se tletšego botho e bile a diriša polelo e bonolo, o ile a re go se go ye kae ke tla be ke kgona go ruta ba bangwe ka tsela yeo ke ratago go ba ruta ka yona. Mantšu ao a ile a nkgothatša kudu.

Ga e sa le go tloga ka nako yeo, seithuti seo se tšwetše pele gabotse. Ka letšatši le lengwe ge ke be ke le ka ntle, ke ile ka mo kwa a mpitša. Yena le monna wa gagwe ba be ba le tseleng ya go yo ngwadiša lenyalo la bona ka molao. Monna wa gagwe o be a thomile go ithuta gomme ba be ba ipeetše dipakane tša moya tšeo ba bego ba nyaka go di fihlelela, go akaretša le pakane ya go kolobetšwa. Seo se ile sa nthabiša, gaešita le ge ke tseba gore ke Jehofa yo a gogelago batho go yena e sego rena.

Re ithutile mo gontši kabelong ye e mpsha. Gaešita le ge re gopola bagwera le meloko morago kua gae, re ikwa eka re tlile le karolo e nngwe ya bona mo. Re bolela ka bona gantši ge re na le bana babo rena le dikgaetšedi ba mo e bile ga bjale ba re botšiša ka bona le gore ba tsoga bjang. Re lebeletše pele nakong yeo malapa a rena ka bobedi a tlago go kopana.

Ge batho ba bolela ke sa dutše ke ekwa eka ba a opela. Eupša ga bjale ke kwešiša mantšu ao ba a bolelago. Ke lebeletše pele nakong yeo le nna ke tlago go tlaleletša mminong ka go sepedišana le wona go e na le go lahlela dinnoto tše di swanago ka sewelo go swana le phalafala. Jesu o itše: “Le se ke la belaela ka letšatši le le latelago, gobane letšatši le le latelago le tla ba le dipelaelo tša lona.” (Mateo 6:34) Ka gona re tla tšwela pele re ithuta nnoto e tee goba lentšu le tee ganyenyane-ganyenyane. Eupša ge e le ga bjale, ke tla tšwela pele ke lokiša ditsebe tša ka, monagano le pelo e le gore ke kgone go šoma gotee le bana babo rena le dikgaetšedi bao ba sa felego pelo le ba nago le lerato ba mo Madagascar.

[Seswantšho go letlakala 25]

Ke le boboleding le Hasina