O se Tusi Mai Madagascar

O se Gagana e Manaia i le Faalogo

UA MA sauni ma laʻu tane e ō atu i lo ma tofiga fou faamisionare i le motu o Madagascar. Ua ma faatofā atu ma loimata i o ma aiga, ma taumafai ia lototetele i le iloa o le a fesoasoani mai Ieova ia ma taulau manuia i lo ma tofiga.

E lē galo iā i maʻua la ma uluaʻi sauniga i se faapotopotoga a Molimau a Ieova. Sa pei le uso na faia le Suʻesuʻega o le Olomatamata o se fuataimi i se fāʻili. Ona e ma te lē malamalama i le gagana, na pei ai talanoaga a tagata o se musika mālie. E umi se taimi faatoʻā ma malamalama i tala o loo fai.

Ina ua ou malamalama i se fesili faaopoopo na fai mai i le suʻesuʻega, na mao laʻu tali atu. Na lagona mai aʻu e i latou sa i oʻu autafa, o lea na tuu oʻu lima i loʻu gutu e pupuni ai laʻu ata. Na ou lagona le mā ae na ou fiafia foʻi, ona ua ou malamalama i se tala o fai mai!

Nai lo o le avea o sē e faataatia se faataʻitaʻiga mo isi i le talaʻiga, na ou lagona e peiseaʻī o aʻu lea e manaʻomia le fesoasoani. Na fesoasoani mai ma le agalelei uso ma tuafāfine i le auala e talaʻi atu ai, i le taʻu mai o tala e fai atu ma mau e faaaogā, ina ia malamalama ai tagata.

Ou te manatua se aso na ou alu ai i le talaʻiga, na valaau mai se tamaitiiti “Vazaha! Vazaha!” O le upu lenā i le gagana Malakasi mo “papalagi.” Na matou topetope ese ina neʻi valaau mai foʻi isi tamaiti i lea lava tala. Ae na ote se tama i le tamaitiiti na valaau mai ma fai i ai: “E lē o se palagi, e malamalama i le gagana!” Na faaliliu tala a tamaiti e le tuafafine Malakasi na ma toʻalua, ona ou te leʻi malamalama i le vave tele o le la tautatala. Peitaʻi, sa ou fiafia ona ua amata ona ou malamalama i le gagana, ma ua ou lagona foʻi, ua pei Madagascar o loʻu atunuu moni.

E iai taimi ou te misia ai oʻu aiga, ae ou te fiafia pe a sau se tamaitiiti e uu loʻu lima ma  ataata mai e ui ina lē lelei laʻu tautala i le gagana. O talavou i le faapotopotoga o se faamanuiaga tele mai iā Ieova. Sa faamatala upu mo aʻu se tuafafine talavou e igoa ia Hasina. E malamalama o ia i aʻu tala faa-Malakasi, e ui ina lē malamalama isi. E masani foʻi ona fesoasoani mai iā te aʻu i le faamatala atu i uso ma tuafāfine aʻu tala, pe a lē malamalama i latou i laʻu faa-Malakasi.

Ua lata ona vaeluaina le faapotopotoga lea sa ma iai ma laʻu tane, e amata ai se faapotopotoga fou. O lea la, e tatau ona faia e Molimau a Ieova i le faapotopotoga fou lesona a tagata o loo nonofo i nuu a lenā faapotopotoga. Na tuu mai e se tuafafine se tasi o ou te faia ana lesona. Sa ou popole ma ou fai atu ou te lē agavaa e faia lesona i le gagana Malakasi, ae sa ia fai mai pea ou te taumafai, ona e fesoasoani mai Ieova iā te aʻu. Na fai mai o ia ma le agalelei i se gagana faigofie, e lē o toe umi ae ou agavaa i le gagana Malakasi ma aʻoaʻo lelei le Tusi Paia i isi. Sa matuā faalaeiauina aʻu i ana upu.

O loo sologa lelei taumafaiga a le tamaʻitaʻi lea ou te faia ana lesona. I se isi aso a o ou i fafo o loʻu fale, na savavali ane ai ma lana tane ma valaau mai, o la e ō e faaipoipo i le malo. Ua amata foʻi lesona a lana tane ma e iai ni o la sini faaleagaga, e aofia ai ma le papatisoina. Na matuā faafiafiaina aʻu i lea mea, e ui ou te iloa o Ieova e tosina maia tagata iā te ia ae lē o i tatou.

E tele mea ua ma aʻoaʻoina mai i lo ma tofiga fou. E ui e ma te misia o ma aiga ma uō, ae e pei lava o loo matou faatasi ma i latou i inei. E masani ona ma talanoa e faatatau i o ma aiga i uso ma tuafāfine, ma e fesilisili mai foʻi le ʻauuso e uiga iā i latou ma po o faapefea mai. E ma te tulimataʻia le taimi o le a feiloaʻi ai o ma aiga moni ma o ma aiga fou i inei.

E manaia pea i laʻu faalogo le gagana pe a tautatala tagata, ae o lea ua ou malamalama nei i a latou tala. Ou te tepa taulaʻi atu i le taimi e mafai ai ona lelei laʻu tautala i le gagana e pei o tagata o le atunuu. Na fetalai Iesu: “Ia aua neʻi outou popole mo le aso a taeao, auā e iai foʻi popolega o le aso a taeao.” (Mataio 6:34) O lea, e faasolosolo pea ona ma aʻoaʻoina le gagana. Ou te faalogologo lelei pea ma faaleleia loʻu manatuaina o mea, ina ia mafai ona ou tautala atu ma le manino e pei o Molimau a Ieova o le atunuu.

[Ata i le itulau 25]

Talaʻi ma Hasina