Wan brifi fu Madagaskar

A ben de leki moi poku

MI NANGA mi masra ben e go na a èilanti Madagaskar, pe wi ben o dini leki zendeling. Wi taigi den famiri nanga mati fu wi adyosi èn wi pruberi fu no krei ma fu sori deki-ati. Wi ben abi a frutrow taki Yehovah ben o meki wi go wroko na wan presi di bun gi wi èn pe wi ben kan yepi trawan.

Noiti wi o frigiti a fosi gemeente konmakandra fu wi na ini a presi disi pe wi go dini. A brada di ben hori a Waktitoren-studie ben taki so moi, dati a ben gersi leki a ben teki fesi gi wan grupu pokuman di ben e prei moi poku. Fu di wi ben frustan wan tu wortu nomo fu a tongo, meki a fasi fa den sma ben taki ben de leki moi poku gi wi. A ben o teki langa fosi wi ben o man frustan den sma bun.

A fosi leisi di mi ben frustan wan aksi di no ben skrifi na ini a paragraaf, mi taki a piki wantronso. Den sma di ben sidon krosibei fu mi ben yere dati, èn mi ben abi fu poti mi anu na fesi mi mofo fu no meki sma yere taki mi e lafu. Mi ben syen, ma toku mi ben breiti taki mi ben frustan wan sani di ben taki na a konmakandra!

Na presi taki mi ben de a sma fu yepi trawan na ini a preikiwroko, mi ben firi leki na mi ben kisi yepi. Na wan lobi-ati fasi den brada nanga sisa taigi mi fa fu taki na so wan fasi dati sma kan frustan mi na ini a preikiwroko. Boiti dati, den sori mi san mi ben musu taki èn sortu Bijbeltekst mi ben musu gebroiki.

Mi e memre wan dei di mi ben de na ini a preikiwroko, di wan pikin boi ben bari „Vazaha! Vazaha!” Na so sma e kari wan „trakondre sma” na ini Malagasitongo. Wi bigin waka moro esi fu di wi no ben wani taki den tra pikin ben o kon èn bari a srefi sani tu. Ne wan tra boi bari a boi dati. A taigi en: „Na uma disi, a no wan trakondre sma, a man taki a tongo fu wi!” A sisa di ben wroko nanga mi ben vertaal gi mi san den boi ben taki, fu di den ben taki so esi dati mi no ben man frustan den. Ma toku mi ben firi leki mi ben go na fesi. Te fu kaba, mi bigin si Madagaskar leki mi eigi kondre.

 Moro leki wán leisi a ben pasa taki di mi ben firi leki mi de mi wawan, wan fu den pikin ben hori mi anu. Te mi ben luku a lafu fesi fu den pikin di ben breiti fu si mi aladi mi no ben man taki a tongo so bun, dan dati ben gi mi deki-ati. Den yonguwan na ini a gemeente na wan blesi fu Yehovah trutru. Wan yongu sisa di nen Hasina, gwenti fu vertaal gi mi. Te nowan sma e frustan mi, a gersi leki na en wawan e frustan mi. Nofo tron a e yepi mi te mi e pruberi fu taki nanga den mati fu mi na ini a gemeente, fu di a e taigi den san mi wani taki.

Mi nanga mi masra ben de na ini wan gemeente di ben o prati, fu di a ben bigi tumusi. Disi ben wani taki dati tra sma ben sa musu teki son Bijbelstudie abra, fu di den studenti ben libi na ini a kontren pe a nyun gemeente musu wroko. Wan sisa aksi mi fu hori wan fu den studie fu en. Mi ben frede èn mi taigi en taki mi no de so fara ete fu du dati. Ma a sisa gi mi deki-ati fu hori a studie. A gi mi a dyaranti taki nanga yepi fu Yehovah mi ben o man hori a studie. Na wan switi fasi èn nanga makriki wortu, a taigi mi taki heri esi mi o man gi trawan leri na wan bun fasi. A sani dati di a taki gi mi deki-ati trutru.

Sensi a ten dati, a studenti go moi na fesi. Wan dei di mi ben de na dorosei, mi yere a studenti kari mi nen. En nanga en masra ben de fu go trow na lanti. A masra fu na uma bigin studeri èn den e pruberi fu doro wan tu marki na ini a tru anbegi. Wan fu den marki na taki den wani teki dopu. A sani disi gi mi prisiri, aladi mi sabi taki a no wi, ma na Yehovah e hari sma kon na en.

Wi leri so furu sani na a presi disi pe wi e dini. Aladi wi e misi den mati nanga famiri fu wi di wi libi na baka, toku wi e firi leki den de dyaso nanga wi. Nofo tron wi e fruteri den brada nanga sisa dyaso fu den mati nanga famiri fu wi. Disi meki taki now den e aksi srefi fa den famiri fu wi e meki en. Wi sa breiti srefisrefi te den famiri fu wi man miti den mati fu wi dyaso wan dei.

Te now ete a de leki wan moi poku gi mi te den sma e taki. Ma now mi e frustan den. Mi e howpu taki heri esi mi o man taki a tongo so bun leki den sma dyaso. Yesus ben taki: „Noiti un musu broko un ede nanga tamara, bika tamara sa abi en eigi broko-ede. Ibri dei abi nofo fu en eigi ogri” (Mateyus 6:34). Sobun, safrisafri wi o leri fu taki a tongo. Mi o tan du muiti fu arki bun èn fu denki bun so taki mi o man taki a tongo èn wroko makandra nanga den brada nanga sisa fu wi di abi pasensi. Iya, den lobi brada nanga sisa fu wi dyaso na ini Madagaskar.

[Prenki na tapu bladzijde 25]

Mi e preiki makandra nanga Hasina