Lugwalo Kuzwa ku Madagascar

Mwaambo Waci Malagasy Wakali Kulimvwisya Mbuli Lwiimbo Lubotu

MEBO abalumi bangu twakali kuunka kumulimo wesu wabumisyinali kucilawo cipya—kunsumbu ya Madagascar. Twakabalaya bamukwasyi wesu abeenzuma, akuliyumya katusyomede kuti Jehova watupa mulimo uutweelede alimwi uyootugwasya kuzwidilila.

Tatukalubi ciindi cakusaanguna ncotwakaunka kumuswaangano wambungano mucilawo cesu cipya. Mukwesu wakali kweendelezya Ciiyo ca Ngazi Yamulindizi wakali kulibonya mbuli kuti wakali kusololela baimbi bakali kwiimba nyimbo ibakali kubelesya ziimbyo ziindene-indene. Mwaambo ooyu tiitwakali kuumvwisya kabotu aboobo majwi aakali kwaambwa akali kulimvwisya mbuli kuti ndwiimbo lubotu. Cakatola ciindi cilamfwu kuti tutalike kumvwa cini cakali kwaambwa.

Ciindi cakusaanguna nindakamvwa mubuzyo watakali kuzwa mumuncali, ndakawiingula cakupozya kakunyina kuzyiba. Bakakkede munsi lyangu bakandimvwa kumane ndakalisekela cansoni. Ndakafwa nsoni pele ndakakkomana kuti ndakacimvwa cakali kwaambwa.

Muciindi cakuti kube ndime uutondezya cikozyanyo cibotu kuli bamwi mumulimo wakukambauka, ndakalimvwa mbuli kuti ndime ndakali kugwasyigwa. Caluyando, bakwesu abacizyi bakanditondezya mbondikonzya kukambauka mumulimo wamumuunda, akundaambila ncindeelede kwaamba alimwi alugwalo ndundeelede kubelesya.

Ndilayeeya bumwi buzuba nindakali mubukambausi mwana umwi naakandiita kuti, “Vazaha! Vazaha!” Oobu mbobamwiita muntu “muzwakule” mumwaambo waci Malagasy. Twakafwambaana kweenda kutegwa bana abamwi batataliki kundiita mbubwenya. Kumane mulombe umwi wakabwentela mwana wakali kwiita. Mulombe ooyu wakaamba kuti: “Tabali bamuzwakule, baluuzyi mwaambo wesu!” Mucizyi ngotwakalilimwi wamucisi mumonya wakandipandulwida ncobakali kwaamba nkaambo bakali kufwambaana kwaambaula aboobo tiindakamvwide nzyobakali kwaamba. Nokuba boobo, ndakalimvwa kuti ndakali kuyabuuzyiba mwaambo. Ndakatalika kuyabuzyibila mucisi ca Madagascar.

Kwaziindi zinji nindakali kulimvwa kulendelelwa, ndakali kukulwaizyigwa abana basyoonto  nobakali kutondezya kuti balandiyanda akundijatilila kukwaanza nokuba kuti tiindakali kukonzya kubandika kabotu abalo. Bana basyoonto mumbungano ncilongezyo ncobeni kuzwa kuli Jehova. Umwi mucizyi mukubusi wazyina lya Hasina nguwakaba musanduluzi wangu. Ciindi bamwi nobatakali kumvwa ncindakali kwaamba walo wakali kundimvwa. Wakali kundigwasyilizya ciindi coonse nindakali kubandika abeenzuma mumbungano, akubapandulwida ncindakali kwaamba.

Mebo abalumi bangu twakali mumbungano iyakali aafwaafwi kwaandanizyigwa akupanga imbi. Aboobo eeci cakapa kuti ziiyo zya Bbaibbele zimwi zipegwe kubantu bamwi kutegwa kabazyeendelezya nkaambo basikwiiya banji bakali kukkala mucilawo cambungano mpya. Mucizyi umwi wakandilomba kuti kandinooyiisya ciiyo cakwe comwe. Ndakayoowa alimwi ndakamwaambila kuti tiindakalina libambila, pele walo wakandikombelezya. Wakandaambila kuti Jehova uyoondigwasya, ndiyoocikonzya. Calubomba alimwi mumwaambo muuba-uba ngundakali kukonzya kumvwa, wakandaambila kuti ino-ino ndiyoocikonzya kuyiisya bantu mbuli mbondiyanda. Majwi aaya akandikulwaizya kapati.

Kuzwa ciindi eeco, sikwiiya ooyu ngwaakandipa wayaambele. Bumwi buzuba nindakali aanze, ndakamumvwa kandiita zyina. Wakali kwiinka kuyoolembesya cikwati cabo amulumaakwe. Mulumaakwe awalo wakatalika kwiiya Bbaibbele alimwi bakajisi mbaakani zinji zyakumuuya nzyobakali kuyanda kuzuzikizya, mbuli yakubbapatizyigwa. Eeci cakandipa kukondwa nokuba kuti ndilizyi kuti Jehova nguukwela muntu kuli nguwe kutali ndiswe.

Twaiya zyintu zinji kapati mumulimo wesu ooyu mupya. Nokuba kuti tulabayeeya beenzuma abamukwasyi mbotwakasiya kucisi cesu, tulimvwa mbuli kuti tulilimwi okuno. Akaambo kakuti kanji-kanji tulabaambila bakwesu abacizyi okuno kujatikizya beenzuma abamukwasyi mbotwakasiya, mazuba aano bakwesu abacizyi aaba balatubuzya mbobapona. Tulangila kumbele ciindi notuyooba antoomwe amikwasyi yesu.

Ndiciimvwa “nyimbo” ciindi nobaambaula bantu. Pele mazuba aano ndilamvwa nzyobaamba. Ndilangila kumbele ciindi nondiyoocizyiba kukanana kabotu mwaambo wabo kutali kuumvwa mbuli kuti ndwiimbo buyo lubotu ciindi nobaambaula bamwi. Jesu wakaamba kuti: “Mutani kulibiliki zyabuzuba butobela, nkaambo buzuba butobela bunooli azyakulibilika zyambubo.” (Matayo 6:34) Pele tulazumanana buyo kwiiya bbala lyomwe aciindi comwe. Kwacino ciindi, ndilazumanana kubikkila maano nowaambaulwa mwaambo kutegwa nduuzyibe kabotu mbuli bakwesu abacizyi bakokuno ku Madagascar.

[Cifwanikiso icili apeeji 25]

Mubukambausi a Hasina