Papila Leri Humaka eMadagascar

Ririmi Ra Ximalagasi Ri Twala Ku Fana Ni Vuyimbeleri Byo Saseka

MINA ni nuna wa mina a hi ya exiavelweni xa hina lexintshwa xa vurhumiwa—exihlaleni xa Madagascar. Hi lele swirho swa ndyangu wa hina ni vanghana va hina kutani hi ringeta ku va ni xivindzi xo tshemba leswaku Yehovha u hi hlawulele xiavelo lexi hi fanelaka naswona u ta hi pfuna leswaku hi humelela.

A hi nge pfuki hi yi rivarile minhlangano ya hina yo sungula ya vandlha ya le xiavelweni xa hina lexintshwa. Makwerhu loyi a a fambisa Dyondzo ya Xihondzo xo Rindza a a vonaka onge u fambisa vuyimbeleri bya okhestra. Ririmi leri a ri vulavuriwa kwalaho a hi nga ri tivi lerova hi twa onge i vuyimbeleri byo saseka. A swi hi tekela nkarhi wo leha ku va hi tiyiseka hileswi a swi vuriwa.

Loko ndzi twisisa xivutiso lexi nga tsariwangiki eka ndzimana, hi ku hatlisa ndzi nambe ndzi xi hlamula hi rito ra le henhla. Loko lava tshameke na mina va swi twa, ndzi boheke ku tipfala nomu hikuva a ndzi khomiwe hi mafenya. A ndzi khomiwe hi tingana kambe hi hala tlhelo a ndzi tsakile hileswi ndzi twisiseke leswi vuriweke!

Ematshan’weni ya leswaku ku va mina loyi a vekelaka van’wana xikombiso ensin’wini, ndzi twe onge a ku ri mina loyi a a pfuniwa. Hi ndlela ya rirhandzu, vamakwerhu va ndzi dyondzise xingheniso lexi vanhu va nga ta xi twisisa ensin’wini swin’we ni matsalwa lawa ndzi nga ma tirhisaka.

Ndzi tsundzuka siku rin’wana loko ndzi ri ensin’wini, xifanyetana xin’wana xi huwelele xi ku, “Vazaha! Vazaha!” Leri a ku ri rito leri tolovelekeke ra Ximalagasi leri vulaka “muhlapfa.” Hi nambe hi sungula ku ganyula hikwalaho ko ehleketa leswaku vana van’wana na vona va nga ta kutani va sungula ku huwelela marito wolawo. Hiloko mufana un’wana a holovela xifanyetana xexo a xi hi huwelela. U te: “A hi muhlampfa, wa swi kota ku vulavula ririmi ra hina!” Makwerhu wa xisati loyi a ndzi famba na yena wa le ndhawini yoleyo a boheka ku ndzi tolokela leswi a va swi vula hikuva a va vulavula hi ku hatlisa kutani a ndzi nga swi twi leswi va swi vulaka. Hambiswiritano, ndzi titwe ndzi enerisekile. Eku heteleleni, ndzi titwe ndzi ri ekaya loko ndzi ri eMadagascar.

Hakanyingi loko ndzi titwa ndzi ri ni xivundza, a ndzi khutazeka loko vantshwa va ndzi kombisa leswaku va ndzi rhandza hambileswi a ndzi nga swi koti kahle ku vulavurisana na vona. Vantshwa  lava nga evandlheni i nyiko leyi humaka eka Yehovha. Makwerhu wa xisati laha riki muntshwa, la vuriwaka Hasina, u ve toloki ya mina. Loko ku nga ri na munhu ni un’we la twaka leswi ndzi swi vulaka, a ndzi tolokela. Hakanyingi a ndzi pfuna loko ndzi ringeta ku vulavula ni vanghana va mina evandlheni, a va hlamusela leswi entiyisweni ndzi vulaka swona.

Mina ni nuna wa mina a hi hlanganyela evandlheni leri a ri lava ku avanyisiwa hi le xikarhi leswaku ku sunguriwa rin’wana lerintshwa. Leswi a swi vula leswaku swin’wana swa swichudeni swa hina swa Bibele a hi fanele hi swi nyika van’wana leswaku va ya na swona emahlweni hikuva a swi tshama ensin’wini leyi averiweke vandlha lerintshwa. Makwerhu un’wana wa xisati u ndzi khutaze ku dyondza ni xin’wana xa swichudeni swakwe. A ndzi chava naswona ndzi n’wi byele leswaku a ndzi nga si lunghekela ku fambisa dyondzo ya Bibele, kambe u ndzi khutaze leswaku ndzi yi fambisa. U ndzi tiyisekisile leswaku Yehovha u ta ndzi pfuna. Hi ku olova ni hi mahlo lama kombisaka musa ni hi ririmi leri olovaka, u ndzi byele leswaku ku nga ri khale ndzi ta swi kota ku dyondzisa van’wana hi ndlela leyi ndzi lavaka ku va dyondzisa ha yona. Marito wolawo ma ndzi khutazile.

Ku sukela kwalaho, munhu loyi a ndzi dyondza na yena u endle nhluvuko wa kahle. Siku rin’wana loko ndzi ri karhi ndzi famba, u ndzi huwelerile. Yena ni nuna wakwe a va ri endleni yo ya tsarisa vukati bya vona. Nuna wakwe na yena u sungule ku dyondza naswona va ni tipakani to hlayanyana ta swilo swa moya leti va ringetaka ku ti fikelela, ku katsa ni pakani yo khuvuriwa. Sweswo swi ndzi tsakisile, hambileswi ndzi swi tivaka leswaku Yehovha hi yena la kokelaka vanhu eka yena, ku nga ri hina.

Hi dyondze swo tala eka xiavelo lexi lexintshwa. Hambileswi hi tsundzukaka vanghana ni maxaka ya hina, hi titwa onge hi na vona. Hi tala ku vulavula ha vona ni vamakwerhu naswona sweswi va hi vutisa ha vona nileswaku va pfuke njhani. Hi wu langutele hi mahlo-ngati nkarhi lowu mindyangu ya hina yi nga ta hlangana.

Hambi ku ri sweswi, loko vanhu va kona va vulavula ndzi twa onge vo yimbelela. Kambe sweswi ndza swi twisisa leswi va swi vulaka. Ndzi wu langutele hi mahlo-ngati nkarhi lowu ndzi nga ta vulavula kahle, ku fana ni vuyimbeleri lebyi ndzi byi tweke loko van’wana va vulavula. Yesu u te: “Mi nga tshuki mi vilela hi siku leri tlhandlamaka, hikuva siku leri tlhandlamaka ri ta va ni mivilelo ya rona.” (Matewu 6:34) Kutani hi ta ya emahlweni hi dyondza ririmi leri kumbe rito rin’we hi nkarhi wun’we. Sweswi ndzi ta hambeta ndzi antswisa ndlela leyi ndzi twaka ha yona ni leyi ndzi ehleketaka ha yona leswaku eku heteleleni ndzi kota ku vulavula ririmi leri hi ndlela leyi khulukaka ku fana ni vamakwerhu lava lehisaka mbilu va tlhela va va ni rirhandzu laha Madagascar.

[Xifaniso lexi nga eka tluka 25]

Ndzi ri eku chumayeleni na Hasina