Vhurifhi Vhu Bvaho Madagascar

Lwo Vha Lu Tshi Tou Nga Muzika Wavhuḓi

NṊE na munna wanga ro vha ri lwendoni lwa u ya mushumoni washu muswa wa vhurumiwa ngei tshiṱangadzimeni tsha Madagascar. Ro onesana na miṱa yashu na khonani dzashu nahone ro lingedza u vha na tshivhindi, ri tshi fulufhela uri Yehova u ḓo ri ṋea mushumo wo ri lugelaho nahone u ḓo ri thusa uri ri bvelele.

Ri nga si vhuye ra hangwa muṱangano washu wa tshivhidzo wa u thoma tshumeloni yashu ntswa. Wahashu we a vha o fara Pfunzo ya Tshiingamo o vha a tshi pfala u nga u khou imbisa khwairi. Nga nḓila ye ra vha ri sa pfesesi ngayo luambo, musi vha tshi amba lwo vha lu tshi pfala u nga ndi muzika wavhuḓi. Zwo vha zwi tshi ḓo ri dzhiela tshifhinga uri ri kone u pfesesa uri vho vha vha tshi khou ri mini.

Ḓuvha ḽe nda thoma u pfesesa mbudziso ye ya vha i songo vhudziswa kha phara, ndo khakha nda i fhindulela nṱha. Vhe vha vha vho dzula tsini na nṋe vho mpfa nahone nda lingedza u thivha tshiseo nga tshanḓa. Ndo ḓipfa ndi na ṱhoni fhedzi ndo vha ndo takalela uri ndo pfesesa zwe zwa ambiwa!

Nṱhani ha u vhetshela vhaṅwe tsumbo vhuḓinḓani, ndo vha ndi tshi pfa u nga ndi nṋe ane a ṱoḓa thuso. Vhahashu vha tshinnani na vha tshisadzini vho nngudisa nga lufuno maambele ane a nga pfesesea vhuḓinḓani ha tsimu, vha ntsumbedza uri ndi nga ri mini na maṅwalo ane nda nga a shumisa.

Ndi kha ḓi humbula ḽiṅwe ḓuvha musi ndi tsimuni muṅwe ṅwana a tshi vhidzelela a ri, “Vazaha! Vazaha!” Eneo ndi maipfi o ḓoweleaho ngei Madagascar ane a amba u ri “mubvannḓa.” Ro mbo ḓi thoma u hwenya ri tshi humbula uri na vhaṅwe vhana vha nga thoma u vhidzelela-vho. Muṅwe mutukana o mbo ḓi kaidza we a vha a tshi khou vhidzelela. A ri “a si mubvannḓa, u a kona u amba luambo lwashu!” Muṅwe wahashu wa tshisadzini we nda vha ndi nae o mbo ḓi ṱalutshedza zwe zwa vha zwi tshi khou ambiwa ngauri vho vha vha tshi khou amba nga u ṱavhanya nahone ndi sa koni u vha gavha. Naho zwo ralo, ndo ḓipfa ndo fushea ngauri ndo ita mvelaphanḓa. Mafheleloni, Madagascar ho vha ho no tou vha hayani.

Kha zwiitea zwe nda vha ndi tshi ḓipfa ndi na vhuludu, ho vha hu tshi ḓo ḓa ṅwana muṱuku, a mpfara tshanḓa nahone ndi tshi mu sedza nda wana a tshi khou mwemwela o takalela u mbona  naho ro vha ri sa koni u davhidzana zwavhuḓi. Vhana vha tshivhidzoni ndi phaṱhutshedzo i bvaho ha Yehova. Muṅwe wahashu muswa ane a pfi Hasina, ndi ene we a vha a tshi nḓologela. Musi hu si na muthu ane a mpfesesa, ene o vha a tshi mpfesesa. Kanzhi ndi ene we a vha a tshi ḓa a nthusa uri ndi kone u davhidzana na khonani dzanga tshivhidzoni, a tshi vha ṱalutshedza uri ndo vha ndi tshi khou ri mini.

Nṋe na munna wanga ro vha ri tshivhidzoni tshe tsha vha tshi tshi khou ḓo fhandekanywa ha vha na tshiṅwe tshiswa. Zwenezwi zwo vha zwi tshi amba uri dziṅwe pfunzo dza Bivhili dzo vha dzi tshi fanela u fhiwa vhaṅwe nga ṅwambo wa uri dzo vha dzi tshi dzula kha tsimu yo avhelwaho tshivhidzo tshiswa. Muṅwe wahashu wa tshisadzini o nkhumbela uri ndi fare pfunzo yawe ya Bivhili. Ndo vha ndo tshuwa nahone ndo mu vhudza uri ndi nga si kone, fhedzi o nṱuṱuwedza uri ndi bvele phanḓa na onoyo muthu. O nkhwaṱhisedza uri ndi nga zwi kona nga thuso ya Yehova. A tshi amba na nṋe nga vhuthu nahone nga luambo lu leluwaho nga he zwa vha zwi tshi konadzea ngaho, o mmbudza uri hu si kale ndi ḓo kona u funza vhaṅwe nga nḓila ine nda ṱoḓa ngayo. Eneo maipfi o nṱuṱuwedza vhukuma.

U bva nga tshenetsho tshifhinga, onoyo mugudiswa o ita mvelaphanḓa yavhuḓi. Ḽiṅwe ḓuvha ndo ima nnḓa, ndo pfa a tshi khou mmbidzelela. Onoyo mugudiswa na munna wawe vho vha vha tshi khou ya u ṅwalisa mbingano yavho uri i vhe mulayoni. Munna wawe o vha o no thoma u guda Bivhili, nahone vho vha vho ḓivhetshela zwipikwa zwa muya zwo vhalaho zwe vha vha vha tshi khou lingedza u zwi swikelela, u katela na tshipikwa tsha u lovhedzwa. Zwenezwo zwo ita uri ndi takale, naho ndo vha ndi tshi zwi ḓivha uri ndi Yehova ane a kokodza muthu hu si riṋe.

Ro guda zwithu zwinzhi zwiswa kha wonoyu mushumo washu muswa. Naho ri tshi humbula khonani dzashu na miṱa yashu vhe ra vha sia hayani, ri pfa u nga ro ḓa navho henefha. Ri anzela u amba nga havho musi ri na vhahashu vha tshinnani na vha tshisadzini, nahone khonani dzashu dzi a ri vhudzisa nga havho. Ro ṱulutshelwa nga maṱo matswuku tshifhinga tshine “miṱa” yashu ya ḓo ṱangana ngatsho na khonani dzashu dza fhano Madagascar dzine ra vho dzi dzhia sa yone miṱa yashu.

Musi vhathu vha tshi amba ndi kha ḓipfa u nga ndi “muzika.” Fhedzi zwino ndi vho pfesesa zwine vha khou zwi amba. Ndo lindela tshifhinga tshine nda ḓo kona u amba zwavhuḓi, u fana na muzika une nda u pfa musi vhaṅwe vha tshi amba. Yesu o ri: “Ni songo vhilaela zwa matshelo, ngauri ḽa matshelo ḽi ḓo ḓi-vhilaelela zwaḽo.” (Mateo 6:34) Nga zwenezwo, ri ḓo bvela phanḓa ri tshi guda ipfi nga ḽithihi nga ḽithihi. Nahone zwa zwino, ndi ḓo bvela phanḓa ndi tshi khwinisa nḓila ine nda thetshelesa ngayo, na nḓila ine nda humbula ngayo, na mbilu yanga u itela uri ndi kone u shumisana na vhahashu vha tshinnani na vha tshisadzini vha sa fheli mbilu na vha re na lufuno vha fhano Madagascar.

[Tshifanyiso kha siaṱari 25]

Ndi tshi khou huwelela na Hasina