Nalefwaisha Ukula-angala Ifyangalo Fya Kupilibuka

Abashimika ili lyashi ni ba Zoya Dimitrova

Ilyo nalekumanya imyaka 15, ninshi ndacita ifyo nalefwaisha sana mu bumi. Nali mwi bumba lya ba fyangalo kabili twaleya mu ncende shalekanalekana. Lyena pa 4 September mu 1970, naliponenwe no busanso. Ilyo twalepilibuka mu muulu, nalishilepona.

NAFYELWE pa 16 December mu 1952. Twaleikala mu Sofia, ku Bulgaria, kabili twafyelwe fye babili na nkashi nandi. Pali ilya nshita, mu calo ca Bulgaria mwali imitekele ya Komyunisimu iishalekoselesha abantu ukulaya ku mapepo. Abengi tabasumine muli Lesa, kabili bamo abasumine muli Lesa tabalefwaya ukwishibikwa. Nangu ca kuti abafyashi bandi baleti ni ba Orthodox, tatwaleya ku calici kabili nshaishibe na Lesa.

Ilyo nali fye umwaice, nalitemenwe sana ifyangalo maka maka ubwangalo bwa kupilibuka mu muulu. Ilyo nali ne myaka 13, umwaume umo alishile pa sukulu nalesambilila, alefwaya umukashana uo bengakansha mu fyangalo fya kupilibuka. Bakafundisha abalesambilisha ifi fyangalo basalile ine. Pa kuntwala ku bakansha abantu muli ifi fyangalo pa kuti bamone nga nininga, bansendele muli motoka ya ba maneja. Nalyumfwile bwino ukwendelapo muli motoka iyo bapangile ku America. Ala mwandini nalitemenwe nga nshi ilyo bansalile. Ukufuma apa pene batampile ukunkansha sana kabili bankanshishe pa myaka ukucila ibili. Ilyo nali ne myaka 15, balipwishishe ukunkansha kabili natendeke ukulaya ku ncende shalekanalekana ne bumba lya balecita ifi fyangalo. Pa kubala, twaleya mu ncende shapusanapusana isha mu Bulgaria e lyo pa numa twatendeke ukuya mu fyalo fyalekanalekana ifyali kale Soviet Union ukubikako fye na ku Algeria, ku Hungary, ne calo baleita kale ukuti Yugoslavia.

Pa myaka itatu nali ne nsansa sana pantu nalecita ifyo nalefwaisha mu bumi bwandi. Bushiku bumo ilyo naleangala ici cangalo mu Titov Veles, ku Macedonia, ubusanso ubo nandilepo pa muulu bwalicitike. Twalepilibuka mu muulu no munandi. Umunandi uwakofeshe amolu ku mwalo e lyo alosha umutwe pa nshi alempoosa mu muulu kabili nalepilibuka e lyo naisamwikata ku maboko. Nomba naishilepusa ukumwikata kabili intambo bankakile iya kuncingilila yaliputwike. Awe e fyo naponene pa nshi apalepele amamita 6. Bambutushishe ku cipatala, uko bailesanga ukuti imbafu ishingi, ukuboko, e lyo no mungololo fyalikontweke. Pa nshiku ishinono nali mu koma kabili nshaishibe icacitike. Ilyo napupuutwike, naishileishiba ukuti umubili walilekele ukubomba ukufuma mu musana ukufika ku molu. Lelo, apo nali umwaice nalesubila ukuti nga bamombela, kuti natampa ukwenda na kabili no kutendeka ukula-angala ifyangalo fya kupilibuka.

 Pa myaka ibili ne myeshi 6 iyakonkelepo naleya ku fipatala ifyalekanalekana pantu nalesubila ukuti kuti naenda. Mu kuya kwa nshita, nasukile nasumina ukuti nshakatale mpola kabili nshakangalepo ifyangalo fya kupilibuka. Nomba nali no kulaendela fye pa ncinga ya balemana.

Ifyo Ubumi Bwandi Bwa-alwike

Apo nali uwacincila ilyo nali umutuntulu, nalemona kwati te kuti nkumanishe ukulaikala fye pa ncinga. Kabili ici calengele nalwala amasakamika. Mu 1977, umulumendo we shina lya kuti Stoyan alishile pa ng’anda. Ilyo naishibe ukuti ali mukalamba wa munandi, nalimwingishe mu ng’anda. Ilyo twalelanshanya, anjipwishe nga ca kutila nalesubila ukuti nkapola. Apo nali uwafuupuka, namwaswike ukuti nalilemana calipwa. Ilyo anjebele ukuti Lesa fye e wingangafwa, na-aswike bukali bukali ukuti, “Nga ca kutila Lesa e ko aba, bushe kuti ndecula ifi?”

Ifi fine e fyo Stoyan atendeke ukunondolwela cikuuku cikuuku ifyo Lesa atulaya mu Baibolo. Stoyan asangwike Inte ya kwa Yehova ilyo baile mu kwangala ifyangalo fya kupilibuka ku America. Nalitemenwe ukwishiba ukuti nomba line icalo cili no kuba paradaise. Ubulayo bwa kuti “imfwa tayakabeko na kabili, takwakabe no kuloosha nangu ukuteta nangu ukukalipwa na kabili,” bwalimfikile pa mutima. (Ukusokolola 21:4) Nalefwaisha ukuba umutuntulu na kabili! E co lilya line fye nalisumine ukulasambilila Baibolo lyonse. Awe e fyo ubumi bwandi bwa-alwike. Nasukile nasanga icilenga umuntu ukuba ne subilo line line!

Cila mulungu nalefwaisha ukusambilila Baibolo. Pa kubala nalesambilila na Stoyan kabili pa numa naishiletendeka ukusambilila na Totka, Nte uwali ne cikuuku nga nshi. Alingafwile ukwishiba ifya mu Baibolo mu nshita fye iinono, kabili napingwilepo ukupeela ubumi bwandi kuli Yehova Lesa. Pali iyi nshita, mu Sofia tamwali nangu umo uwalingile ukumbatisha, e ico nalilolelele mpaka munyina wa ku Macedonia aisa mu kutandalila iyi ncende. Ilyo papitile nalimo umwaka ukutula apo natendekele ukusambilila Baibolo, nalibatishiwe pa 11 September, mu 1978. Bambatishe mu ng’anda yandi mu cibafwa. Ilyo nabatishiwe no kuba Inte ya kwa Yehova, nalisangalele nga nshi kabili naishileba ne nsansa mu bumi.

Icine ca mu Baibolo ico nalesambilila calepya ngo mulilo mu mutima wandi. Naletemwa nga nshi ukwebako bonse abaleisa pa ng’anda ifyo nasambilile muli Baibolo. Lelo takwali nangu umo uwalebika amano ku fyo nalebashimikila, balemona kwati nalifulungene pa mulandu no busanso nalimo.

Nacita Icilubo Icikalamba

Pali iyi nshita, ba Nte mu Bulgaria balibabindile, kabili balimo fye abanono.  Tabalelongana pamo ku kupepa, kanshi nshaleya ukuli konse mu kulongana, kabili nshalesangwa sana na ba Nte banandi. Ukukanalongana e lyo no kwangala na bantu abashikonka amafunde ya mu Baibolo, kwalengele ukuti ncite icilubo icikalamba.

Lyonse fye kampingu yandi yalencusha, kabili naleumfwa sana ububi pa kutaluka kuli Yehova Lesa. Nalibipilwe sana pa fyo nacitile, e ico napepele kuli Yehova, ukumulomba ukuti ambelele uluse. Pa numa, baeluda ba mu cilonganino balingafwile ukubwelela kuli Lesa, kabili nalitendeke ukubombela Yehova ne nsansa. Nalitemwa nga nshi pe shuko nakwata ilya kubombela Yehova na kampingu yasanguluka no kula-ampana na bantu bakwe abasanguluka!

Naliba ne Nsansa Nangu ca Kuti Nalilemana

Ubusanso ubwancitikile imyaka 40 iyapita bwalenga ifyo nalefwaisha ukula-angala ifyangalo no kulaya mu ncende shalekanalekana fikaane ukucitika, kabili bwalenga ndeikala fye mu ncinga ya balemana. Nangu cabe fi, nshumfwa ububi sana nelyo ukumona kwati tapali ifyo nacita mu bumi. Nalemona kwati ukuba mu fyangalo fya kupilibuka kwali no kundetela insansa nga nshi, lelo ifyo nasambilila mu Baibolo fyalinenga ukwiluka ukuti ifi fintu tafileta insansa ishibelelela. Nalimona ifyo abo twali nabo muli ifi fyangalo baba na mafya kabili tababa ne nsansa. Lelo ine nalisanga icintu icacindama nga nshi, e kutila bucibusa na Kabumba wandi, Yehova Lesa. Ici calindetela insansa ishingi nga nshi isho nshali no kukwata nga ntwalilila ukuba muli filya fyangalo.

Na kabili, naliba sana ne nsansa ukumona na bambi abengi baishiba icine ca mu Baibolo no kupeela ubumi bwabo kuli Lesa wesu Yehova uwaba no kutemwa. Ilyo natendeke ukusambilila Baibolo mu 1977, mu Bulgaria mwali fye ba Nte abanono. Nangu fye ni mu 1991 ilyo ba Nte babasuminishe ukulapepa, lintu ubuteko bwa Komyunisimu bwapwile, ba Nte abali mu Bulgaria tabacilile na 100. Naliba sana ne nsansa ukumona uko abantu abashimikila pa Bufumu bwa kwa Lesa bafulilako, abali mupepi na 1,800!

 Mu Bulgaria mucili umulimo uukalamba uwa kubomba. Abengi balefwaya ukusambilila Icebo ca kwa Lesa. Icilelanga ifi ni mpendwa iikalamba iya basangilwe ku kwibukisha imfwa ya kwa Kristu mu 2010, abali 3,914. Ndatemwa nga nshi ukumona ubu bushininkisho ubulanga ukuti Yehova alipaala ba Nte mu Bulgaria abali fye abanono pa kutendeka. Naliimwena na menso uko “uwacepa” asanguka “uluko lwa maka,” nge fyo Esaya 60:22 yasobele.

Cimbi icikalamba icandetele insansa kukwata Baibolo ya Amalembo ya Calo Cipya mu ciBulgaria. Yafumine mu August 2009 pa Kulongana kwa Citungu ukwaleti “Mulelola!” ukwabelele mu Sofia. Ala caliweme ukukwata iyi Baibolo mu lulimi lwandi pantu e co nalefwaisha! Ukwabula no kutwishika ikalenga tukafwe abantu abengi mu Bulgaria ukwishiba icine ca mu Baibolo.

Nangu ca kutila nshishimikila sana imbila nsuma ya Bufumu pa mulandu wa kuti nalilemana, ndatemwa sana ukwebako abena mupalamano na bonse abesa pa ng’anda icine ca mu Baibolo. Bushiku bumo, ilyo nali pa lukungu naitile umwina mupalamano uwalepita mu nshila, na o alishile. Nalanshenye nankwe amashiwi yasuma aya mu Baibolo, kabili apo pene alisumine ukulasambilila Baibolo. Nalitemenwe nga nshi ilyo abatishiwe no kuba nkashi nandi mu citetekelo. Nalyafwa abantu bane ukuipeela kuli Yehova.

Icinkoselesha sana no kundetela insansa kusangwa lyonse ku kulongana pamo na ba bwananyina abacila pali 100, ababa fye kwati lupwa lwandi. Apo mu calo cesu ubuteko tabupekanya imyendele ku bakoloci na balemana, tacing’angukila ukuya ku kulongana. Lelo ndatasha nga nshi pa fyo munyina umo uwacaice ansakamana. Lyonse fye pa kuya mu kulongana, alesa mu kunsenda, ukumfumya mu ng’anda ukunyingisha muli motoka, no kumfumya muli motoka no kuntwala mu Ng’anda ya Bufumu, na pa kubwela acita cimo cine. Ala ndatasha Yehova pa kunenga ukuba mu lupwa lwakwe ulwa Bena Kristu abatemwana!

Nga natontonkanya pa fyancitikila mu bumi, ndamona ukuti ifyo ncita fyalipusana sana ne fyo nalefwaisha ukucita ilyo nali umwaice. Ukubombela Yehova kwalindetela sana insansa kabili kwalilenga naba ne subilo ilisuma nga nshi. Ubulayo bwa kwa Lesa ubwa kuti mu paradaise “uwalemana amolu akacilauka nge nsebula” bulansansamusha nga nshi. (Esaya 35:6) Ndalolela ilya nshita ilyo nkaba umutuntulu na kabili, ilyo nkaleka ukwendela mu cicinga ca balemana.

[Amashiwi pe bula 30]

“Icinkoselesha sana no kundetela insansa kusangwa lyonse ku kulongana”

[Amashiwi pe bula 31]

“Icikalamba icandetele insansa kukwata Baibolo ya Amalembo ya Calo Cipya mu ciBulgaria”

[Icikope pe bula 29]

Natendeke ukwangala ifyangalo fya kupilibuka ilyo nali ne myaka 15