Naalimunaw ang Akon Handum

Panugiron ni Zoya Dimitrova

Sang 15 anyos ako, nalab-ot ko ang akon handum nga mag-entra sa sirkos kag magkadto sa iban nga lugar. Pero, sang Septiembre 4, 1970, naaksidente ako. Samtang nagaeksibisyon sa hangin gulpi lang ako nahulog.

NATAWO ako sang Disiembre 16, 1952, kag nag-istar upod sa akon mga ginikanan kag magulang nga babayi sa Sofia, Bulgaria. Sadto nga tion, ang Bulgaria isa ka Komunista nga pungsod, diin ang gobierno indi pabor sa relihion pero ginatugutan nila ini. Wala nagapati sa Dios ang kalabanan nga tawo, kag kon may nagapati gid man, ginatago lang nila ini. Bisan ang akon pamilya mga Ortodokso, wala nila ako gintudluan parte sa Dios.

Halin sang bata pa ako, mahilig gid ako sa tanan nga sports labi na sa gymnastics. Sang 13 anyos ako, may nagkadto nga tawo sa amon eskwelahan nga nagapangita sang bata nga babayi nga hanason sa sirkos. Ginrekomendar ako sang akon maestro sa gymnastics. Nalipay gid ako nga makasakay sa malahalon nga awto sang manedyer, para interbyuhon kag testingan sang isa ka grupo sang mga trainer. Grabe gid ang akon kalipay sang napilian ako. Sugod sadto, ginhanas ako sing maayo sa sulod sang sobra duha ka tuig. Sang 15 anyos ako, natapos ang paghanas sa akon kag nag-upod na ako sa sirkos. Naglakbay kami sa bilog nga Bulgaria kag sa mga pungsod sang anay Union Sobyet kag subong man sa Algeria, Hungary, kag sa anay Yugoslavia.

Sa sulod sang tatlo ka tuig, malipayon gid ako kay nalab-ot ko ang akon handum. Pero, sang may palaguaon kami sa Titov Veles, Macedonia, natabo ang aksidente nga ginsambit sa umpisa. Nagaeksibisyon ako sa hangin nga ginaitsa kag ginasalo sang akon partner. Pero wala ko mauyatan ang iya kamot kag nautod ang akon higot. Gani nahulog ako sa kataason nga 6 metros. Gindalagan ako sa ospital, kag nakita sa eksamin nga nabali ang akon butkon, gusok, kag taludtod. Pila ka adlaw nga wala ako sing animo. Sang naumpawan ako, nahibaluan ko nga paralisado na ako halin sa hawak paidalom. Pero, bangod pamatan-on pa ako, nagasalig ako nga magaayo sa terapiya ukon operasyon para makalakat liwat kag makabalik sa sirkos.

Sa sulod sang duha ka tuig kag tunga, nagpabulong ako sa pila ka ospital sa paglaum nga magaayo pa. Sang ulihi, nabaton ko nga indi ko na mapadayon ang akon handum. Subong, imbes nga magkadto sa iban nga lugar, indi na ako makahalin sa akon wheelchair.

 Ang Umpisa sang Bag-o nga Kabuhi

Nabudlayan ako mag-adjust sa akon bag-o nga kahimtangan. Nadulaan ako sing paglaum kag nakabatyag sing depresyon. Sang 1977, nagkadto sa balay ang isa ka pamatan-on nga lalaki nga si Stoyan. Sang nahibaluan ko nga utod sia sang upod ko anay sa sirkos, ginpasulod ko sia dayon. Sa amon pag-istoryahanay, ginpamangkot niya ako kon may paglaum pa ako nga makalakat. Bangod naluyahan na ako sing buot, nagsiling ako nga wala na sing paglaum. Sang ginsugiran niya ako nga ang Dios lamang ang makabulig sa akon, nagsiling ako, “Ti, kon may Dios gid man, ngaa amo sini ang akon kahimtangan?”

Ginpaathag sa akon ni Stoyan, nga nangin Saksi ni Jehova sang nag-obra sia sa sirkos sa Estados Unidos, ang matahom nga mga promisa sang Biblia. Nalipay gid ako sang nahibaluan ko nga mangin paraiso ang duta. Natandog gid ako sa promisa nga “wala na sing kamatayon, ukon paglalaw ukon paghibi ukon kasakit pa.” (Bugna 21:4) Ginapaabot ko gid ang tion nga magaayo na ako! Nagpasugot ako dayon nga magtuon sing regular sa Biblia. Amo ini ang umpisa sang akon bag-o nga kabuhi. Nakita ko na gid man ang matuod nga paglaum!

Ginakalangkagan ko gid ang akon pagtuon sa Biblia kada semana. Sang primero, gintun-an ako ni Stoyan, kag dayon ni Totka nga mabuot gid nga Saksi. Sa bulig ni Totka, nag-uswag ang akon ihibalo sa Biblia, kag gindedikar ko ang akon kabuhi kay Jehova nga Dios. Wala sadto sing kalipikado nga taga-Sofia nga magbawtismo sa akon, gani ginhulat ko nga magbisita ang isa ka utod halin sa Macedonia. Sang Septiembre 11, 1978, pagligad sang mga isa ka tuig nga pagtuon sa Biblia, ginbawtismuhan ako sa bathtub sa akon apartment. Nalipay gid ako nga mabawtismuhan bilang isa sa mga Saksi ni Jehova, kag may matuod na nga katuyuan ang akon kabuhi.

Daku gid ang epekto sa akon sang kamatuoran sa Biblia. Nalipay gid ako nga isugid ini sa tanan nga nagkadto sa amon balay. Makapasubo nga daw wala lang sa ila ang akon ginasiling, kay abi nila naapektuhan sang aksidente ang akon hunahuna.

Isa ka Mabug-at nga Sala

Ginadumilian sadto ang mga Saksi ni Jehova sa Bulgaria, kag diutay lamang ang mga Saksi sa bilog nga pungsod. Wala ako sing matambungan nga mga pagtilipon sang kongregasyon, kag limitado lamang ang akon pagpakig-upod sa pareho ko nga mga Saksi. Wala ko man narealisar ang katalagman sang pagpakig-upod sa mga wala nagasunod sang mga prinsipio sa  Biblia, gani nakahimo ako sing mabug-at nga sala.

Ginkonsiensia gid ako. Masakit gid nga mapahilayo kay Jehova nga Dios. Gani, ginpautwas ko kay Jehova ang akon ginabatyag paagi sa pangamuyo, kag nangayo sa iya sing kapatawaran. Sang ulihi, sa bulig sang mahigugmaon nga mga gulang sang kongregasyon, nabalik ang akon maayo nga kaangtanan kay Jehova kag ang akon kalipay sa pag-alagad sa iya. Ginapabaloran ko gid ang pribilehiyo nga maalagad si Jehova nga may maayo nga konsiensia upod sa iya matinlo nga organisasyon!

Malipayon Bisan Pa May mga Limitasyon

Kuarenta ka tuig na ang nagligad sugod sang naaksidente ako. Naga-wheelchair na lang ako kag naalimunaw na ang akon handum nga mag-entra sa sirkos kag magkadto sa iban nga lugar. Pero wala ko ginhinulsulan ang natabo sa akon. Sa bulig sang Biblia, narealisar ko nga ang kalipay nga ginahandum ko sa pag-entra sa sirkos temporaryo lamang. Nakita ko ang kapaslawan sa kabuhi sang mga upod ko anay sa sirkos. Sa akon bahin, nasapwan ko ang pinakamalahalon nga manggad, ang akon kaangtanan sa akon Manunuga, si Jehova nga Dios. Naghatag ini sa akon sing mas daku nga kalipay sangsa pag-entra sa sirkos.

Nalipay man ako nga makita ang madamo nga nagtuon sing kamatuoran sa Biblia kag nagdedikar sang ila kabuhi sa aton mahigugmaon nga Dios, si Jehova. Sang nagtuon ako sa Biblia sang 1977, diutay lamang ang mga Saksi ni Jehova sa Bulgaria. Bisan sang 1991, sang natapos ang paggahom sang Komunista kag narehistro na ang mga Saksi ni Jehova, sobra lamang 100 ang mga Saksi sa bilog nga pungsod. Makalilipay nga makita ang padayon nga pagdamo sang mga manugbantala sang Ginharian nga halos 1,800 na subong!

Daku pa ang hilikuton sa Bulgaria. Madamo ang gusto magtuon sa Pulong sang Dios. Ang pamatuod sini amo ang 3,914 nga nagtambong  sa anibersaryo sang kamatayon ni Jesus sang 2010. Nalipay ako kay ginpakamaayo gid ni Jehova ang iya katawhan sa Bulgaria nga diutay lang sang primero. Nasaksihan ko nga ‘ang diotay nanginmabakud nga pungsud,’ suno sa gintagna sang Isaias 60:22.

Daku man ang akon kalipay sang ginpagua ang Bulgarian nga New World Translation of the Holy Scriptures sang Agosto 2009 sa “Magpadayon sa Pagbantay!” Distrito nga Kombension sa Sofia. Natuman gid ang akon handum nga matigayon ini nga Biblia sa akon lenguahe! Makabulig gid ini sa madamo pa nga tawo sa Bulgaria nga makatuon sing kamatuoran sa Biblia.

Bisan pa nalimitehan sang akon kasablagan ang akon pagwali sang maayong balita sang Ginharian sang Dios, nalipay gid ako nga isugid ini sa akon mga kaingod kag sa tanan nga nagakadto sa balay. Isa ka bes, gintawag ko ang akon kaingod nga naglabay kag ginpasulod ko sia sa balay. Sa tapos ko sia masugiran parte sa Biblia, nagbaton sia sing pagtuon sa Biblia. Nalipay gid ako sang nabawtismuhan sia bilang utod ko sa pagtuo. Isa gid ka pribilehiyo nga mabuligan ang apat ka tawo nga magdedikar sang ila kabuhi kay Jehova.

Ang nagahatag sa akon sing daku nga kalipay kag kabakod amo ang pagtambong sing regular sa mga pagtilipon sang kongregasyon upod sa sobra isa ka gatos ka kauturan, nga daw pamilya ko na. Sa amon pungsod, wala sing pinasahi nga transportasyon para sa mga tigulang kag mga may kasablagan, gani nabudlayan ako magkadto sa mga pagtilipon. Maayo lang kay ginabuligan ako sang isa ka pamatan-on. Ginahakwat niya ako halin sa akon apartment pakadto sa iya salakyan kag ginadala sa Kingdom Hall. Pagkatapos sang pagtilipon, ginadul-ong niya ako pauli. Nagapasalamat gid ako kay Jehova nga nangin bahin ako sang mahigugmaon nga pamilya nga nagasimba sa iya!

Kon balikan ko ang nagligad, lain gid ang kabuhi ko subong sangsa kabuhi nga ginhandum ko sang pamatan-on pa ako. Nalipay gid ako sa pag-alagad kay Jehova kag may matahom ako nga paglaum sa palaabuton. Ginapabaloran ko ang promisa sang Dios nga sa paraiso “ang piang magalumpat subong sang usa.” (Isaias 35:6) Ginapaabot ko gid ang tion nga indi na ako mag-wheelchair, kundi mapagros na kag mapagsik.

[Blurb sa pahina 30]

“Ang nagahatag sa akon sing daku nga kalipay kag kabakod amo ang pagtambong sing regular sa mga pagtilipon sang kongregasyon”

[Blurb sa pahina 31]

‘Daku gid ang akon kalipay sang ginpagua ang Bulgarian nga New World Translation of the Holy Scriptures’

[Retrato sa pahina 29]

Nag-upod ako sa sirkos sang 15 anyos ako