Mvua musue kuikala kunyunguluka ne bena manaya a tutungu

Muyuki mulonda kudi Zoya Dimitrova

Pamvua ne bidimu 15, mvua ne disanka dia kumona bualu bumvua njinga bukumbane: kuikala kunaya ne kuenza ngendu ne bantu bavua banaya manaya a kuela tutungu. Kadi mu matuku 4/9/1970 ngakapeta njiwu. Umue musangu, ngakela katungu muulu ne disanka dionso. Kadi musangu mukuabu ngakakuluka bibi bitambe.

NDI muledibue mu dia 16/12/1952. Tuvua basombele mu Sofia, mu ditunga dia Bulgarie ne baledi banyi ne yayanyi. Tshikondo atshi, Bulgarie uvua ditunga dia ba-Communiste muvua mbulamatadi kayi mukandike bantu bua kutendelela kadi muikale ubatekesha mu mikolo. Bantu ba bungi kabavua bitabuja Nzambi to; bavua bamuitabuja kabavua basue bua bakuabu bantu bamanye malu adibu bitabuje to. Nansha muvua bena mu dîku dietu badiamba mudimu bena Ortodokse, kabavua bandongeshe malu a Nzambi ne tshivua mumanye tshintu to.

Ku buana buanyi mvua munange manaya bikole, nangananga a dibidija mubidi. Pamvua ne bidimu 13, muntu mukuabu wakalua mu kalasa ketu ukeba nsongakaji wa kulongesha manaya a tutungu. Bakansungula kudi mulongeshi uvua utulongesha manaya a dibidija mubidi. Mvua ne disanka dia kuendelaku panyi mu mashinyi a mulongeshi wa tutungu wa mu Amérique au bua kuyabu kungela nkonko ne mateta kudi balongeshi ba dinaya adi. Mvua ne disanka dia bungi bua muvuabu bansungule. Ke tshikondo tshingakatuadija kulonga ne kunaya manaya makole a diela tutungu mukantshi mua bidimu bipite pa bibidi. Kadi pamvua ne bidimu 15, ngakajikija kulonga manaya aa, meme kutuadija kuenza ngendu bua kuanaya mu matunga makuabu. Musangu wa kumpala, ngakaya mu Bulgarie ne mu matunga a Union soviétique wa kale, kuya too ne mu Algérie, mu Hongrie ne mu Yougoslavie wa kale.

Mu bidimu bisatu, mvua ne disanka dia kuendakana ne kunaya mumvua njinga. Pashishe, pamvua naya mu Titov Veles mu Macédoine, ngakapeta njiwu indi mumvuije ku ntuadijilu kua tshiena-bualu etshi. Mvua munkatshi mua diela tutungu kumpala kua bantu ba bungi. Utuvua tunaya nende uvua muele mikolu muulu mutu mutangile panshi, uvua unkupa mu lupepele pashishe unkuata pamvua mpueka. Mu dipueka, meme kupangila bua kumukuata ku tshianza, mukaba uvua unkuba kukosekawu, meme kufuma muulu ntanta wa metre asambombo ne kudizaka panshi. Bakaya nanyi ku lupitadi musangu umue, kusanganabu ne: mvua mutshibuke diboko, mbadi ne muongo. Biakashala binsama mukantshi mua ndambu wa matuku, meme kujimija lungenyi tshiyi mumanye tshivua tshimfikile to. Pakanduila lungenyi, ngakamone ne: mvua mushale mutekete kubangila mu tshimonu too ne ku bana ba nkasa. Bu muntshivua nsonga, mvua anu mutuishibue ne: bobu banguondope ne bampande, mvua mua kuenda kabidi ne koku mushindu, kupingana ku manaya anyi a diela tutungu.

Mu bidimu bibidi ne tshitupa biakalonda, bakanguondopa mu mpitadi ya bungi, mvua anu mujadike ne: nengumvue bimpe. Ndekelu wa bionso, meme kumona ne: kakuvua kabidi mushindu  wa meme kunaya kabidi bu mumvua njinga to. Mpindieu, mvua ne bua kumbusha lungenyi lumvua nalu lua kuikala kuenda kunyunguluka ne bedi ba tutungu ne kuitaba bua kutuadija kunyunguluka ne kakalu ka balema.

Ndi mutuadije nsombelu mupiamupia

Bu mumvua muibidile kunaya ne kuendakana, biakankolela bua kuitaba nsombelu mupiamupia eu. Bu mumvua mumone ne: tshiakuenda kabidi, biakanyingalaja bikole. Pashishe mu 1977, nsongalume mukuabu diende Stoyan wakakokola ku tshiibi tshianyi. Pangakamanya ne: uvua tutuende wa nsongakaji mukuabu utuvua tuela nende tutungu, ngakamuambila diakamue bua abuela mu nzubu. Mu diyukila nende, kungebejaye ne: baminganga mbambe ne: neupetulule makanda anyi? Bu muvua malu a panu mangela mâyi ku makasa, ngakamuambila ne: tshiena mumone ne: nengende kabidi to. Pavuaye mungambile ne: anu Nzambi ke uvua mua kungambuluisha, ngakamuandamuna ne tshiji ne: “Bu Nzambi muikalaku, bua tshinyi ndi mundi emu?”

Ngambila anu Stoyan nanku, bu muvuaye utshitambuilaku ne mulue Ntemu wa Yehowa pavuaye muye kunaya manaya a diela tutungu mu États-Unis, yeye kungumvuija mu bimpe malu mimpe adi Bible mulaye mu matuku adi kumpala. Mvua ne disanka dia kumanya ne: buloba bukadi pa kulua mparadizu. Mulayi wa mu Bible eu wakandenga ku muoyo: ‘lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi.’ (Buakabuluibua 21:4) Ndi muindile ne muoyo mujima bua kupetulula makanda a mubidi. Ngakitaba diakamue bua kuikala kulonga Bible. Meme kutuadija nsombelu mupiamupia. Ndekelu wa bionso, meme kumona ne: malu amvua ndonga ke avua afila ditekemena dilelela.

Lumingu luonso, mvua ngindila bua kulonga Bible ne muoyo kulukulu. Kumpala tuvua tulonga ne Stoyan, pashishe ne Totka, Ntemu mukuabu wa malu mimpe. Totka wakangambuluisha bua kuvudija dimanya dia mu Bible lukasa, meme kudilambula kudi Yehowa Nzambi. Tshikondo atshi, mu Sofia kamuvua muntu uvua mukumbane bua kuntambuisha to, mvua ne bua kuindila too ne pavua muanetu wa mu Macédoine uvua utukumbula ne bua kulua. Mu dia 11/9/1978, pabuipi ne tshidimu tshijima meme mumane kutuadija kulonga Bible, bakantambuishila mu nzubu muanyi mu dilongo dinene dia mu tshiowedi dintu ngowela mâyi. Ngakasanka bikole bua mumvua mutambule ne mulue Ntemu wa Yehowa, mpindieu ndi mumanye bua tshinyi ndi ne muoyo menemene.

Bulelela bua mu Bible bumvua mulonge budi bungosha bu kapia. Ndi ngambila bantu bonso badi balua kuntangila ditekemena dipiadipia dindi mupete ne muoyo mujima. Kadi bia dibungama, bidi bimueneka ne: kakuena muntu udi wangata bindi ngamba ne mushinga, badi pamuapa bela meji ne: bu mumvua mupete njiwu, ndi mua kuikala njimija lungenyi imue misangu.

 Ngakenza tshilema tshinene

Tshikondo kampanda, bavua bakandike Bantemu mu ditunga dia Bulgarie ne kuvua anu Bantemu bakese mu ditunga edi dijima. Kakuvua bisangilu bia tshisumbu bimvua mua kubuela to, kudisangisha ne bena Kristo nanyi kuvua kukese. Kubenga kubuela mu bisangilu ne kupanga kumanya njiwu idi ifuma ku didisangisha ne bantu badi benza malu adi abengangana ne Bible kuakamfikisha ku dienza tshilema tshinene.

Kondo kanyi ka muoyo kavua anu kampisha, meme kunyingalala bikole bua mumvua mumbuke kudi Yehowa Nzambi. Bu muvuabi bintonde ne bingenza bundu, ngakalomba Yehowa ne muoyo mujima, mmusengelela bua amfuile luse. Pashishe, bakulu bena Kristo bakangambuluisha ne dinanga, meme kupingaja malanda anyi ne Nzambi, kupingaja ne disanka dimvua nadi mu mudimu wa Yehowa. Ndi mupete diakalenga dinene dia kuenzela Yehowa mudimu ne kondo ka muoyo kimpe munkatshi mua bantu badi mu bulongolodi bukezuke.

Ndi ne disanka nansha mundi ne bulema

Njiwu imvua mupete kukadi bidimu 40 yakampangisha bua kunaya manaya ne kuenza ngendu, kunshiyayi mukulame mu kakalu ka balema. Kadi, tshiena nyingalala bua malu akadi mapita bienza bu ne: nkadi mupangile bualu to. Bulelela bua mu Bible mbungambuluishe bua kumona ne: dijinga dia kupeta disanka ne dia kuendakana ne bedi ba tutungu divua ne masanka a tshitupa tshîpi. Bakangambila muvua bantu batuvua tunaya nabu manaya a tutungu bavua bashala baanaya bedibue mâyi ku makasa. Kadi meme ngakapeta tshiuma tshia mushinga mukole, kuikala ne malanda mimpe ne Yehowa Nzambi mufuki wanyi. Bualu ebu buakampetesha disanka dinene dimvua tshiyi mua kupeta mu manaya a diela tutungu to.

Mvua kabidi mupete disanka dia kumona muvua bantu ba bungi bamanya malu a mu Bible ne balambula mioyo yabu kudi Nzambi wetu wa dinanga Yehowa. Pangakatuadija kulonga Bible mu 1977, mu Bulgarie muvua anu Bantemu ba Yehowa bakese. Nansha muakalua mbulamatadi kuanyishila Bantemu aba bua musangu wa kumpala mu 1991 bua kutendelelabu panyima pa dikuluka dia bukalenge bua ba-Communiste, mu Bulgarie mujima kamuvua Bantemu bapite pa lukama to. Pandi mumone mudi bamanyishi ba lumu luimpe bavulangane bikole ne batue mpindieu ku 1 800, bidi bingenza disanka dia bungi be!

 Kutshidi mudimu wa bungi wa kuenza mu Bulgarie. Bantu ba bungi batshidi bakeba bua kumanya Dîyi dia Nzambi. Tudi tuamba nanku bualu mu 2010 bantu 3 914 bavua babuele mu tshivulukilu tshia lufu lua Yezu. Ndi ne disanka dia kumona tshijadiki tshidi tshileja mudi Yehowa mubeneshe Bantemu bakese bakatuadije mu Bulgarie. Ndi mudimuene mudi “mutambe bukese” mmulue ‘tshisamba tshipite bukole,’ anu muvua Yeshaya 60:22 muambe.

Bualu bukuabu buvua bunsankishe ne bundenga ku muoyo bikole ndipatuka dia Bible wa Les Saintes Écritures​—Traduction du monde nouveau mu tshiena Bulgarie. Bakamupatula mu ngondo wa 8 wa 2009 mu mpungilu wa distrike uvuabu benzele mu Sofia uvua ne tshiena bualu ne: “Nuikale batabale.” Dijinga dianyi dia kupatulabu Bible eu mu muakulu wetu diakakumbana. Kakuyi mpata, Bible eu neambuluishe bantu ba bungi ba mu Bulgarie bua kumanyabu bulelela.

Nansha mundi tshiyi mua kuenda, ndi mua kuyisha lumu luimpe lua Bukalenge bua Nzambi; ndi ne disanka dia bungi pandi ngambila bena mutumba ne bantu bakuabu badi balua kuntangila bulelela bua mu Bible. Umue musangu pamvua musombe mu lutanda lua kuulu, ngakabikila muena mutumba nanyi uvua upita, yeye kubuela. Meme mumane kumuambila malu a mu Bible adi akolesha ku muoyo, kuitabaye bua meme kumulongesha Bible. Mvua ne disanka kadiyi kuamba pakatambulaye bua kulua muena Kristo nanyi. Mvua ne diakalenga dia kuambuluisha bantu banayi bua kudilambulabu kudi Yehowa.

Disanka dianyi dinene ne dikoleshibua ku muoyo bidi pamuapa bifumina ku dibuela mu bisangilu bia bena Kristo pa tshibidilu ne bana betu bapite pa lukama badi balue anu bu bena mu dîku dianyi. Mvua ne lutatu bua kuya mu bisangilu bualu mvua mu ditunga mudi mbulamatadi kayi muteke mashinyi adi mua kuambula bakulakaje ne balema. Kadi ndi ne dianyisha dia bungi bua mudi nsonga mukuabu muena Kristo ungambuluisha. Utu ulua kungambula, unteka mu mashinyi ende too ne ku Nzubu wa Bukalenge, pashishe umbuejamu; panyima uvua ulua kumpingaja kumbelu. Ndi ngela Yehowa tuasakidila bua diakalenga dindi nadi dia kuikala munkatshi mua bana betu bena Kristo badi ne dinanga.

Pandi mvuluka malu adi menzeke, ndi mumone ne: malu ki mmenzeke bu mumvua njinga pantshivua nsonga to. Kuenzela Yehowa mudimu kumpeteshe disanka divule mpindieu ne ditekemena dimpe bua matuku adi kumpala. Ndi nsanka bikole bua mulayi wa mu Bible wa ne: mu mparadizu walua pa buloba, ‘muntu mulema neatupike bu ngulungu.’ (Yeshaya 35:6) Ndi mutekemene ne dishindika dionso dituku dingajuka mu kakalu kanyi ka balema ne kutumpika; mpeta kabidi makanda a mubidi mimpe ne bukole.

[Lungenyi lunene lua mu dibeji 20]

“Disanka dianyi dinene ne dikoleshibua ku muoyo bidi bifumina ku dibuela mu bisangilu bia bena Kristo pa tshibidilu”

[Lungenyi lunene lua mu dibeji 21]

“Bualu buvua bundenga ku muoyo bikole ndipatuka dia Bible wa Les Saintes Écritures​—Traduction du monde nouveau mu tshiena Bulgarie”

[Tshimfuanyi mu dibeji 19]

Ngakabanga kunaya manaya a diela tutungu pamvua ne bidimu 15