Ndakali Kuyandisya Kweendeenda Kuyaabusobana Abasizisobano Zya Circus

Akaluulwa aba Zoya Dimitrova

Nindakali amyaka yakuzyalwa iili 15, ncindakali kuyanda cakacitika—ndakatalika kusobana muzisobano zya circus akweendeenda abasizisobano. Kumane mu September 4, 1970 kwakacitika ntenda. Cimwi ciindi nitwakali kusobana bakandiwaala mujulu mpoonya ndakawida aansi.

N dakazyalwa mu December 16, 1952 alimwi ndakali kukkala abazyali bangu amupati wangu musimbi mudolopo lya Sofia kucisi ca Bulgaria. Aciindi eeco, cisi ca Bulgaria cakali ca Kkomyunizimu mwalo mfulumende moyatakali kukulwaizya bantu kwiinka kuzikombelo nokuba kuti zyakaliko. Bunji bwabantu tiibakali kusyoma muli Leza pele kulibaabo bakali kumusyoma bakali kulisisa. Nokuba kuti mukwasyi wangu wakali wacikombelo ca Orthodox, kunyina nitwakali kuunka, aboobo tiindakamuzyi Leza.

Kandicili mwana, cakalibonya kuti ndakali kuyandisya zisobano ziindene-indene pele kapati cisobano cakusotooka. Nindakali amyaka yakuzyalwa iili 13, mwaalumi umwi wakaboola kucikolo cesu kuyandaula musimbi wakali kukonzya kuyiisyigwa muzisobano zya circus. Bayi bangu ibakali kundiyiisya cisobano cakusotooka bakasala ndime. Ndakakkomana kapati kweendela mumootokala wabapati bamulimo, imootokala wakapangilwa kwa America, kwiinka kukubuzyigwa-buzyigwa akusunkwa akabunga kabasikuyiisya zisobano. Icakandikkomanisya ncakuti, ndakasalwa. Aaya ngaakali matalikilo aakwiiya milawo yacisobano akulibambila ikwakatola myaka iinda kuli yobilo. Nindakasisya myaka yakuzyalwa iili 15, ndakamanizya lwiiyo lwangu akutalika mulimo wangu wakweendeenda—kweendeenda abasizisobano zya circus. Kumatalikilo, ndakeendeenda mucisi ca Bulgaria coonse mpoonya akumasi aakali aa Soviet Union kaindi, alimwi aku Algeria, Hungary, akucisi cakali kwiitwa kuti Yugoslavia kaindi.

Kwamyaka yotatwe, nzyondakali kuyanda zyakali kuzuzikizyigwa. Kumane nindakali kucita cisobano mudolopo lya Titov Veles, mucisi ca Macedonia, intenda yaambwa kumatalikilo yakacitika. Kandicita cisobano cakusotoka ndakawaalwa mujulu bantu kabalangilila. Ngotwakali kusobana limwi, kali mujulu alimwi kalanzyide mutwe aansi maulu mujulu, wakali kundizingulusya mujulu akundikwaba ndanoozya aansi. Ndakaaimpya maanza aakwe alimwi alutambo lwakali kundikwabilila lwakakosoka, kumane ndakawida aansi mamita aali 6. Cakufwambaana, bakanditola kucibbadela nkobakaakujana kuti ndatyoka kwaanza, mabambo aali mbwaabede, alimwi amoongolola. Ndakali zilukide kwamazuba masyoonto alimwi tiindakacizyi cakacitika. Nindakaba mbubo-mbubo, ndakazoozyiba kuti ndakali lebukide kuzwa mucikungu kuyaansi. Nokuba boobo, akaambo kakuti ndakacili mwana ndakali kuyeeya kuti ndaakumana kusilikwa naa kwaandulwa, ndiyoocikonzya kweenda alimwi akujokela kuzisobano zya circus.

 Kwamyaka yobilo acisela yakatobela, ndakasilikwa muzibbadela ziindene-indene kandiciyeeya kuti ndiyoopona. Mukuya kwaciindi, ndakabona kuti kunyina nendiyoocikonzya kusobana cisobano cangu alimwi. Lino ndakeelede kucinca “buumi bwangu bwa kweendeenda” akuba abuumi bwakweendela akacinga kabalema, ibwiindene ambondakali kuyanda.

Matalikilo Aabuumi Bupya

Akaambo kakuti ndakali kuyandisya zisobano, ndakayeeya kuti kucinca kwabuumi ooku tiikwali kukonzyeka. Akaambo kakuti buumi tiibwakacili mbuli mbondakali kubulangila, ndakatyompwa kapati. Kumane mu 1977, umwi mwaalumi wiitwa kuti Stoyan wakaboola kuŋanda yangu. Nindakazyiba kuti wakali mwanookwabo amweenzuma ngotwakali kusobana limwi, ndakamwaambila kuti anjile muŋanda. Mumubandi wesu wakandibuzya naa ndicilangila kuba kabotu. Kandityompedwe kapati akaambo kabuumi ndakamwaambila kuti tandilangilwi kuba kabotu. Naakandaambila kuti Leza alikke nguwakali kukonzya kundigwasya, ndakamwiingula cabukali kuti: “Ikuti naa Leza nkwali, nkaambo nzi ncendili bobuno?”

Akaambo kamajwi aaya, Stoyan, wakazwa akuba Kamboni wa Jehova ciindi naakali kubeleka kucisi ca United States kweendelezya zisobano zya circus, wakandipandulwida caluyando zisyomezyo zibotu zyakumbele zyamu Bbaibbele. Ndakakkomana kwiiya kuti ino-ino nyika iyooba paradaiso. Cisyomezyo cakuti “lufwu talukooyoobako limbi, akwalo koomoka, kulila nokuba kucisa takukooyoobako limbi” cakandinjila mumoyo. (Ciyubunuzyo 21:4) Elo kaka ndakaliyandide kuba kabotu alimwi! Mpoona-mpoona ndakazumina kuyiisyigwa Bbaibbele cakusitikila. Aaya ngaakali matalikilo aabuumi bwangu bupya. Lino ndakabujana bulangizi bwini-bwini!

Nsondo ansondo ndakali kulangila kapati kwiiya Bbaibbele. Kusaanguna ndakaiya a Stoyan kumane ndakaiya a Totka Kamboni wakajisi lubomba. Kwiinda mukugwasyigwa anguwe, luzyibo lwangu lwakasimpe kamu Bbaibbele lwakakomena cakufwambaana mpoonya ndakaaba buumi bwangu kuli Jehova Leza. Kuciindi eeco, kwakanyina wakali kweelela kundibbapatizya mudolopo lya Sofia aboobo ndakalindila mukwesu wakali kuzwa ku Macedonia. Nikwakainda mwaka omwe kuzwa ciindi nindakatalika kwiiya Bbaibbele, ndakabbapatizyigwa mubbafa muŋanda yangu mu September 11, 1978. Ndakakkomana kapati kubbapatizyigwa kuba Kamboni wa Jehova alimwi buumi bwangu bwakaba ampindu.

Kasimpe nkondakayiya mu Bbaibbele kakali kupya mbuli mulilo mucamba cangu. Bantu boonse ibakali kuboola kuŋanda yangu ndakali kubaambila cabusungu kasimpe nkondakayiya. Mukubula coolwe, kunyina wakali kubikkila maano kuzyintu nzyondakali kubaambila ambweni bakali kuyeeya kuti akaambo kantenda yakandicitikila, tindakacikkwene kabotu.

 Ndakalubizya Kapati

Ciindi Bakamboni ba Jehova nibakalesyedwe mulimo wabo mu Bulgaria, kwakali buyo Bakamboni basyoonto mucisi coonse. Kwakanyina miswaangano yambungano nkondakali kukonzya kuunka alimwi kuyanzana abasyomima kwakali kusyoonto. Ooku kubula miswaangano yambungano akutazyiba ntenda iboola akaambo kakuyanzana abaabo batatobeli zyeelelo zyamu Bbaibbele, kwakapa kuti ndilubizye kapati.

Manjezyeezya aangu akali kundikatazya lyoonse alimwi cakandicisa kapati kuzandulwa kuli Jehova Leza. Kandipengede mumoyo akuusa, ndakapaila kuli Jehova kulomba kuti andilekelele. Kwiinda mukugwasyigwa abaalu Banakristo, ndakatalika kucita kabotu kumuuya, aboobo cakandikkomanisya kutalika kubelekela Jehova alimwi. Eelo kaka ndilikkomene kuba acoolwe cakubelekela Jehova amanjezyeezya aasalala alimwi akuyanzana ambunga yakwe iisalala.

Ndilikkomene Nokuba Kuti Ndijisi Buyumuyumu

Intenda yakandicitikila myaka iili 40 yainda ngaakali mamanino aakuyaabweendeenda akucita zisobano zya circus nkaambo yakandipa kutalika kweendela akacinga kabalema. Pele taakwe nindilimvwa kuti buumi bwangu bunyina mpindu. Kasimpe kamu Bbaibbele kandigwasya kubona kuti zisobano zya circus tacikonzyi kundipa kukkomana lyoonse. Ndalibonena beenzuma bakazumanana muzisobano zya circus mbobatakkomene mubuumi bwabo. Kulubazu lumwi, ndajana cintu ciyandika kapati, icakuba acilongwe a Mulengi wangu, Jehova Leza. Eeci candipa kukkomana kapati kwiinda lukkomano ndundakali kukonzya kujana muzisobano zya circus.

Kuyungizya waawo, icandikkomanisya kapati nkubona bantu banji kabayiya kasimpe kamu Bbaibbele akwaaba buumi bwabo kuli Jehova Leza wesu siluyando. Nindakatalika kwiiya Bbaibbele mu 1977, kwakali buyo Bakamboni ba Jehova basyoonto mu Bulgaria. Nokuba kusikila mu 1991, ciindi Bakamboni ba Jehova nibakalilembya ciindi niyakamana nkamu ya Kkomyunizimu, kwakali Bakamboni bataindi kumwaanda mucisi coonse. Eelo kaka cilakkomanisya kubona mbobayaabuvwula basikumwaya ba Bwami, lino basika ku 1,800.

Kucili mulimo mupati weelede kucitwa mu Bulgaria. Bantu banji bayandaula luzyibo lujanwa mu Jwi lya Leza. Eeci cilalibonya kwiinda mumweelwe  wabantu bakajanika ku Ciibalusyo calufwu lwa Kristo mu 2010 ibali 3,914. Cilandikkomanisya kubona bumboni bwakuti Jehova waulongezya mulimo mu Bulgaria wakatalika buyo abantu basyoonto. Ndalibonena aameso “bantu bace” mbobaba “mukowa mupati,” mbuli mbokulembedwe mulugwalo lwa Isaya 60:22.

Acimwi cintu cakandikkomanisya mubuumi bwangu nkugusyigwa kwa Bbaibbele lya New World Translation of the Holy Scriptures lyamumwaambo waku Bulgaria. Eeci cakacitika mu August 2009 ku Muswaangano Wacooko wa “Amulangile!” wakacitilwa ku Sofia. Kugusyigwa kwa Bbaibbele mumwaambo wangu kwakazuzikizya cintu ncindakali kulangila lyoonse. Tacidoonekwi buya kuti liyakugwasya bantu banji baku Bulgaria kuzyiba kasimpe kamu Bbaibbele.

Nokuba kuti bulema bwangu bupa kuti kanditakambauki kapati makani mabotu aa Bwami bwa Leza, cilandikkomanisya kapati kubaambila kasimpe kamu Bbaibbele basimukoboma abaabo baboola kuŋanda yangu. Bumwi buzuba, kandikkede mukkoce lyaŋanda yangu ndakaita simukoboma naakali kwiinda. Wakazumina kuboola mpoonya nindakamana kubandika anguwe twaambo tunji tukulwaizya twamu Bbaibbele, wakazumina ciiyo ca Bbaibbele mpoonya-mpoonya. Ndakakkomana kapati ciindi naakabbapatizyigwa akuba mucizyi wangu wakumuuya. Ndaba acoolwe cakugwasya bantu bone kusikila aciimo cakwaaba buumi bwabo kuli Jehova.

Cindikkomanisya kapati akundikulwaizya nkujanika lyoonse kumiswaangano ya Bunakristo antoomwe abakwesu abacizyi bainda ku 100, balo ibaba mbuli mukwasyi wangu. Akaambo kakuti ndikkala mucisi munyina bubambe bwakugwasya bantu bacembeede abaciswa-ciswa mumakani aazyakweendela, cilandikatazya kuunka kumiswaangano yambungano. Pele ndilamulumba kapati mbwandibikkila maano umwi mukwesu uucili mukubusi. Kumuswaangano umwi aumwi, ulandibweza kuzwa muŋanda yangu kuya mumootokala wakwe, akuzwa mumootokala kuya mu Ŋanda ya Bwami alimwi akundipilusya kuŋanda. Eelo kaka ndilamulumba Jehova akaambo kakundipa coolwe cakuba mumukwasyi wakumuuya ooyu waluyando!

Ndayeeya zyamusyule, ndabona kuti zyintu mubuumi bwangu zilindene ambondakali kuyeeya nindakacili mukubusi. Ikubelekela Jehova cilandikkomanisya kapati lino alimwi candipa bulangizi bubotu bwakumbele. Cilandikkomanisya cisyomezyo ca Leza cakuti muparadaiso anyika, “cilema unooya busotauka mbuli insya.” (Isaya 35:6) Ndilangila kumbele ciindi nindiyooleka kweendela akacinga kabalema akuba abuumi buli kabotu anguzu.

[Majwi aakwelelezya sikubala aali apeeji 20]

“Cindikkomanisya kapati akundikulwaizya nkujanika lyoonse kumiswaangano ya Bunakristo”

[Majwi aakwelelezya sikubala aali apeeji 21]

“Cakandikkomanisya kapati mubuumi bwangu nkugusyigwa kwa Bbaibbele lya New World Translation of the Holy Scriptures lyamumwaambo waku Bulgaria”

[Cifwanikiso icili apeeji 19]

Ndakatalika mulimo wangu wakucita cisobano kandijisi myaka yakuzyalwa iili 15