Nga Aleke Bafwete Vubwa?

S E DIMOSI una vo Nkristu kuna Filipinas, nkumbu andi Carlos, * wavova vo: “Kiese ngina kiau wau vo mwan’ame ankento okitukidi se selo kia Yave, nzeye wo vo yandi mpe kiese kemonanga.” Se dimosi kuna Grécia wavova vo: “Mono yo nkaz’ame kiese tukalanga kiau wau vo wan’eto atatu bavubwa yo kituka Mbangi za Yave ekolo bakala aleke. Mu nungunuka bena muna mwanda yo mona kiese kia sadila Yave.”

Mase m’Akristu bavwidi kuma kia kala ye kiese vava wan’au bevubwanga, kansi ezak’e ntangwa e kiese kiaki ntelamwa moyo kitwasanga. Ngudi mosi wavova vo: “Kiese kiayingi yakala kiau, kansi yatokananga mpe.” Ekuma? “Yabakula vo mwan’ame se mbebe yampwena kena yau vana meso ma Yave.”

Aleke awonso bafwete kala y’ekani dia sadila Yave nze Mbangi zandi zavubwa. Kansi, mase bevuminanga Nzambi nanga balenda kiyuvula vo: ‘Nzeye wo vo mwan’ame mu nungunuka kena. Kansi, nga okala yo nkuma wa zizidila ntonta za tá zumba yo kwamanana kala wavelela vana ndose a Yave?’ Akaka balenda kiyuvula vo: ‘Avo mwan’ame obwidilu ntonta za vava kala ye mavwa mayingi, nga okwamanana sadila Yave kuna vema ye kiese?’ Nkia nkanikinu mia Nkand’a Nzambi milenda sadisa mase mu zaya kana vo wan’au bafwana muna vubwa?

Kala Nlongoki a Kristu i Diambu Diantete Divavwanga

Vana fulu kia yika e ntela ina muntu kafwete vubwa, Nkand’a Nzambi uvovanga vo o kala ye kimwanda kiambote i diau difwanisanga muntu muna luvubu. Yesu wakanikina alongoki andi vo: ‘Nukitula wantu a zula yawonso s’alongoki, nwabavuba.’ (Mat. 28:19) Muna kuma kiaki, awana kaka bena vo alongoki a Kristu bafwete vubwa.

Kala nlongoki aweyi disongele? O nkanda Estudo Perspicaz das Escrituras usasilanga vo: “E mvovo wau usadilwanga mu yika awonso bekwikilanga yo sadila malongi ma Kristu una ufwene.” Nga aleke bafwana kala alongoki akieleka a Kristu? Mpangi mosi ankento wasala mvu 40 muna salu kia misionario kuna nsi América Latina, wasoneka mu kuma kia yandi kibeni ye mpangi zandi zole  z’akento vo: “Twakala ye ntela yafwana mu zaya vo Yave tuzolele sadila yo zingila muna Paradiso. O kuyiyekola kwatusadisa mu zizidila ntonta zibwilanga aleke. Ke tukuyibanzanga ko wau twakiyekola kwa Yave muna kileke kieto.”

Aweyi olenda zayila vo mwan’aku wafwana kituka se nlongoki a Kristu? Nkand’a Nzambi uvovanga vo: “Kana kindende, okuzayisila muna mavangu mandi, kana fu yandi yavelela, kana yasonga.” (Nga. 20:11) Badika mavangu mesonganga vo nleke ‘mu songa kena lunungunuku lwandi’ nze nlongoki.—1 Tim. 4:15.

Ziku Kisonganga vo Mwan’aku Nlongoki a Kristu

Nga mwan’aku okulemvokelanga? (Kol. 3:20) Nga mwan’aku osalanga salu ya nzo? O Nkand’a Nzambi uvovanga mu kuma kia Yesu vava kakala ye mvu 12 vo: ‘Wakwamanana tumamena [mase mandi].’ (Luka 2:51) Kieleka vo o unu, ka vena mwana ko lenda lemvokela mase mandi mu mpila yalunga. Kansi, Akristu akieleka bafwete ‘landa ntambi za Yesu.’ Muna kuma kiaki, aleke bena ye luzolo lwa vubwa bafwete zayakana muna lemvo besonganga kwa mase mau.—1 Pet. 2:21.

Badika yuvu ilende: Nga mwan’aku ‘osianga Kintinu va fulu kiantete’ muna salanga kwayingi muna salu kia umbangi? (Mat. 6:33) Nga okalanga ye luzolo lwa samuna nsangu zambote kw’akaka yovo divavanga vo wateka kunzayisa kenda muna salu kia samun’e nsangu zambote yo sila umbangi mu nzo ye nzo? Nga ozeye e mbebe andi ya kala se nteleki walembi vubwa? Nga osonganga luzolo lwa vutuka kingula awana kesilanga umbangi muna zunga? Nga okuyisuzulanga kw’akundi andi a sikola ye alongi andi vo Mbangi a Yave?

Nga obadikilanga kwenda ku lukutakanu vo diambu diamfunu kwa yandi? (Nku. 122:1) Nga okalanga ye luzolo lwa vana mvutu mun’Elongi di’Eyingidilu ye mun’Elongi dia Nkand’a Nzambi dia Nkutakani? Nga okalanga ye kiese kia lungisa e kiyekwa kiandi muna Sikola ya Salu kia Kimfumu?—Ayib. 10:24, 25.

Nga mwan’aku osianga ngolo za kala wavelela muna venga yikundi yambi kuna sikola ye muna fulu yakaka? (Nga. 13:20) Nga osolanga nkunga miambote, filme, mambu mesongwanga muna televizau, vídeo game ye mpila kesadilanga Internet? Nga mvovo ye mavangu mandi mesonganga vo ozingilanga ngwizani ye nkanikinu mia Nkand’a Nzambi?

Nga mwan’aku otomene zaya Nkand’a Nzambi? Nga olenda sasila muna mvovo mia yandi kibeni mana kelongokanga muna Fuku wa Nsambila ya Esi Nzo? Nga olenda sasila malongi masina ma Nkand’a Nzambi? (Nga. 2:6-9) Nga ozolanga tanga Nkand’a Nzambi ye nkanda mia ntaudi akwikizi yo lulungalalu? (Mat. 24:45) Nga oyuvulanga yuvu mu  kuma kia malongi ye sono ya Nkand’a Nzambi?

E yuvu yayi ilenda kusadisa mu zaya lunungunuku lwa mwan’aku. Vava obadika yuvu yayi olenda zaya dina mwan’aku kalenda singika ekolo kavubilu ko. Kansi, avo mwene vo e mpila zingu kiandi kikumfwanisanga mu kala nlongoki ye wakiyekola kwa Nzambi, olenda yambula vo kavubwa.

Aleke Balenda Kembelela Yave

Selo yayingi ya Nzambi basonga kwikizi kiau tuka muna kileke. Badika mbandu a Yosefe, Samuele, Yosiya yo Yesu. (Etu. 37:2; 39:1-3; 1 Sam. 1:24-28; 2:18-20; 2 Tus. 34:1-3; Luka 2:42-49) Ka lukatikisu ko vo, wan’amakento yá a Filipo ana basakulanga, batoma longwa tuka muna kileke kiau.—Mav. 21:8, 9.

Mbangi mosi a Yave kuna Grécia wavova vo: “Yavubwa vava yakala ye mvu 12. Kikuyibanzanga ko muna nzengo yabaka. Tuka ntangwa yayina, mvu 24 miviokele kala, mvu 23 isalanga salu kia ntangwa ke ntangwa. Zola kwame muna Yave kwansadisa mu zizidila ntonta muna kileke. O zayi wa Nkand’a Nzambi ngina wau o unu, kiakala wau ko vava yakala ye mvu 12. Kansi, yazaya wo vo Yave yazolanga y’ekani dia kunsadila yakwele mvu. Ngina ye kiese wau vo okunsadisanga mu kwamanana mu salu kiandi.”

Kiakala nleke yovo mbuta, ndiona osonganga e ziku vo nlongoki akieleka, wafwana kwandi vubwa. Paulu wa ntumwa wasoneka vo: “Muna ntima i mukwikidilw’e nkwikil’a ndungidi; muna nua mpe i mutambulwidil’e ntambulwil’a luvuluku.” (Roma 10:10) Vava nleke una vo nlongoki a Kristu kekuyifwanisanga muna luvubu, yandi ye mase mandi diambu diamfunu balungisi. Kuyambula ko vo konso diambu diavunzanesa e kiese olenda mona kumosi yo wan’aku.

[Mvovo Vana Yand’a lukaya]

[Mvovo mia Fwaniswa mina muna lukaya lwa 5]

Nyindu Asikila mu Kuma kia Luvubu

Mase mayingi bebadikilanga luvubu lwa mwan’au nze diambu diamfunu kansi dilenda mpe twas’e vonza, nze muntu olongokanga nata ekalu. Nga luvubu ye salu kiavauka kilenda twasila muntu mpasi kuna sentu? Nkand’a Nzambi uvovanga vo ve. Muna Ngana 10:22 tutanganga vo: “O lusambulu lua Yave luvwamisanga: Ketensekanga ko mpasi ko.” Paulu wasonekena nleke Timoteo vo: “O vumina-Nzambi yo luyangalalu i ndandu kikilu.”—1 Tim. 6:6.

Dialudi vo, o sadila Yave ke diambu diasazu ko. Yeremiya wamona mpasi zayingi muna salu kiandi nze ngunz’a Nzambi. Kansi, wasoneka mu kuma kia nsambil’andi kwa Nzambi aludi vo: “O mambu maku masoloka, yadia mo; makala kwa mono s’eyangi ye kiese kia ntima: kadi nyikilu nkumbu aku, e Yave wa Nzambi a vu.” (Yer. 15:16) Yeremiya wazaya wo vo sadila Nzambi i tuku dia kiese kiandi. E nza ya Satana i tuku dia mpasi. Mase bafwete sadisa wan’au mu zaya nswaswani yayi.—Yer. 1:19.

[Mvovo mia Fwaniswa mina muna lukaya lwa 3]

Nleke osonganga vo nlongoki vava

[Mvovo mia Fwaniswa mina muna lukaya lwa 3]

Kekubikanga yo vana mvutu muna tukutakanu

[Mvovo mia Fwaniswa mina muna lukaya lwa 4]

Kelemvokelanga mase

[Mvovo mia Fwaniswa mina muna lukaya lwa 4]

Kesalanga salu kia umbangi

[Mvovo mia Fwaniswa mina muna lukaya lwa 4]

Kesambanga

 [Mvovo mia Fwaniswa mina muna lukaya lwa 6]

Nga Mwan’ame Kafwete Vingila Muna Vubwa?

Ezak’e ntangwa vava wana bekuyifwanisanga muna vubwa, mase mau balenda mona vo bafwete vingila. Ekuma beyindulwilanga e mpila yayi?

Wonga ikalanga wau yo yindula vo, avo mwan’ame ovubilu, olenda bwa mun’esumu diampwena yo vaikiswa muna nkutakani. Nga diansongi dia yindula vo kele vo nleke kavubilu ko, kalendi fundiswa ko kwa Nzambi mu kuma kia mavangu mandi? Solomo wavana luludiku lwalu kwa aleke vo: “Zaya vo muna [mavangu maku] mawonso o Nzambi okufila kuna mfundu.” (Kim. 11:9) Tala luludiku kavana Paulu kwa wantu a ntela zawonso vo: ‘Konso muntu vava twina, ofuta muna mpanga za yandi kibeni kwa Nzambi.’—Roma 14:12.

Awana balembi vubwa kumosi y’ana bavubwa, awonso fundiswa besinga fundiswa kwa Nzambi. Kuvilakani ko vo Yave otaninanga selo yandi yo lembi yambula vo ‘batontwa ntontwa iviokele ina ke belenda ko.’ (1 Kor. 10:13) Ekolo ‘belungalalanga’ yo zizidila ntonta, balenda kala ye vuvu vo Nzambi okubasadisa. (1 Pet. 5:6-9) Ngudi mosi una vo Nkristu wavova vo: “Aleke ana bavubwa, kuma yayingi bekalanga yau muna venga mavangu mambi ma nza. Mwan’ame ayakala wavubwa vava kakala ye mvu 15, wamona vo luvubu tanina lutaninanga. Wavova vo: ‘Kuyindula vanga diambu ko dilenda kulula nsiku a Yave.’ O luvubu i kuma kiampwena muna vanga edi diansongi.”

Avo olongele wan’aku muna mvovo ye mavangu mu lemvokela Yave, olenda kala ye vuvu vo bekwamanana wo vanga kunima luvubu. Muna Ngana 20:7 tutanganga vo: “O nsongi, okangadila muna ziku kiandi, o wan’andi, akwa nsambu kwau.”

Nzolele vo mwan’ame kalungisa ntete makani makaka. Aleke bafwete longoka sala, kimana kuna kukwiziwa bakala bafwana muna kilunga-lunga. Kansi, dilenda kala dia vonza dia kubakasakesa mu tanga sikola zandá yo sia mavwa va fulu kiantete muna zingu kiau ke mu mambu ma mwanda ko. Mu kuma kia “mbongo” yovo diambu dia Kintinu, ina ilembi yimanga, Yesu wavova vo: “Ona wakunwa muna nsende, i yandi yun’owidi e diambu, i bosi ntelameno a moyo mu mambu ma tandu kiaki, yo luvuki lua umvwama, lufinangese e diambu, yo lembi yima e mbongo.” (Mat. 13:22) Avo mase bekasakesanga mwan’au mu sia sungididi muna mambu ma nza yayi, dilenda kulula etima diau dia sadila Nzambi.

Mu kuma kia mase bevunzanesanga ekani dia wana ana bafwana mu vubwa, nkuluntu mosi wazikuka wavova vo: “O simba nleke kalembi vubwa, dilenda kakidila lunungunuku lwandi lwa mwanda yo kunkendeleka.” Nkengi mosi a zunga wavova vo: “O nleke olenda yindula vo kalendi nungunuka ko muna mwanda yo kumfila mu yantika sia sungididi muna mambu ma nza mu vava kala ye kiese.”

[Mvovo mia Fwaniswa mina muna lukaya lwa 6]

Nga mwana kafwete tanga ntete sikola zandá?