Be Onego Obatis Rowere?

CARLOS, * ma en wuoro ma Jakristo e piny Philippines, wacho kama: “Amor ahinya nikech nyara sani en jatich Jehova kendo ang’eyo ni nyara bende mor nikech mano.” Wuoro moro ma wuok e piny Greece nondiko kama: “An kaachiel gi jaoda, wamor ahinya nikech nyithindwa adek ne obatisi mi gibedo Joneno mag Jehova ka pod gin rowere. Gitimo dongruok e wach Nyasaye kendo gimor nikech tiyo ne Jehova.”

Jonyuol ma Jokristo bedo mamor sama nyithindgi obatisi, kata kamano, nitie seche moko ma bende gibedo gi luoro moro. Miyo moro nowacho kama: “Ne amor ahinya, to bende ne an gi parruok ahinya.” Ang’o momiyo miyono ne nigi luoro kaka mano? Omedo wacho kama: “Ne ang’eyo ni wuoda koro ne dhi ting’o ting’ne owuon e nyim Jehova.”

Tiyo ne Jehova kaka achiel kuom Joneno mage mosebatisi en gombo ma rowere duto onego obedgo. Kata kamano, jonyuol ma Jokristo nyalo parore kama, ‘Ang’eyo ni nyathina osetimo dongruok maber, to kata kamano, be osebedo gi teko moromo mar kwedo tembe maricho kendo dong’ ka oler e wang’ Jehova? ’ Jonyuol moko nyalo penjore kama, ‘Be nyathina biro siko kotiyo ne Nyasaye gi mor kod kinda, sama oromo gi tembe mag hero mwandu? ’ Kuom mano, be nitie paro ma Muma chiwo manyalo konyo jonyuol mondo ging’e kabe nyithindgi oikore ne batiso?

Bedo Japuonjre Kristo e Gimaduong’ Madwarore

Wach Nyasaye ok oketo higini sie monego obatisi ng’ato, kar mano onyiso weche madwarore ng’ato ochopi eka obatise. Yesu nochiko jolupne niya: “Utim ogendini duto jopuonjrena, kubatisogi.” (Math. 28:19) Omiyo, batiso itimo ne jogo ma osebedo jopuonjre Kristo.

Bedo japuonjre Kristo tiende en ang’o? Bug Insight on the Scriptures lero kama: “Wachno itiyogo ahinya kuom jogo duto maok yie ayiea kuom puonj mag Kristo, to bende giluwo puonjgo machiegni ahinya.” Be jogo ma podi tindo nyalo bedo jopuonjre madier mag  Kristo? Nyaminwa moro ma osetiyo kaka jamisonari kuom higini 40 e piny moro mar Latin America, ndiko kuome owuon koda nyiminene ariyo kama: “Hikwa ne oromo miyo wang’e ni ne wadwaro tiyo ne Jehova kendo dak e Paradis. Chiwruokwa ne Jehova ne okonyowa bedo gi teko mar kedo gi tembe mayudo rowere. Ok waywag ang’e kata matin nikech chiwruok ne Nyasaye kane podi watindo.”

Ere kaka inyalo ng’eyo ka nyathini osebedo japuonjre Kristo? Muma wacho kama: “Nyathi ong’ere kuom timne; kata timne ler, kata timne owinjore.” (Nge. 20:11) Non ane moko kuom timbe manyalo nyiso ni rawera miyo ‘dongruok mare onenre’ kaka japuonjre Kristo.​​—⁠1 Tim. 4:⁠15.

Gik Manyiso ni Ng’ato En Japuonjre Kristo

Be nyathini winjoi? (Kol. 3:⁠20) Be otimo tije momiye e pacho? Muma wacho kuom Yesu kane en jahigini 12 kama: “Ne owinjogi [jonyuolne].” (Luka 2:⁠51) En adier ni e kindegi, onge nyathi manyalo winjo jonyuolne e okang’ makare chuth. To kata kamano, Jokristo madier onego ‘oluw ndach Yesu’ machiegni. Kuom mano, rowere magombo ni obatisgi onego ong’ere kaka joma winjo jonyuolgi.​​—⁠1 Pet. 2:⁠21.

Non ane penjo maluwogi: Be nyathini ‘dwaro mokwongo Pinyruoth’ kuom timo tij lendo? (Math. 6:⁠33) Be oikore lando ne jomoko wach maber, koso in ema nyaka ijiwe ahinya eka odhi e lendo kendo miyo owuo gi ji e ot ka ot? Be okawo gi pek ting’ne mar bedo jalendo mapok obatisi? Be en gi gombo mar dok limo jogo ma orwako wach ma oromogo e tij lendo? Be onyiso joskul wetene koda jopuonjne ni en Janeno mar Jehova?

Be oneno wach dhi e chokruoge kaka gimaduong’? (Zab. 122:1) Be ohero chiwo paro e Puonjruok mar Ohinga mar Jarito kod Puonjruok Muma e Kanyakla? Be otimo migepe mag Skul mar Tij Nyasaye ka en gi ilo?​—Hib. 10:24, 25.

Be nyathini temo ahinya dong’ koler maok odonj e timbe maricho kuom tang’ gi osiepe maricho e skul kata kuonde mamoko? (Nge. 13:20) Otimo yiero machalo nade e wi wach thumbe, sinembe, program mag televison, tuke mag vidio, kod tiyo gi Intanet? Be onyiso e wechene koda e timbene ni odwaro dak kaluwore gi puonj mag Muma?

Nyathini olony gi Muma e okang’ maromo nade? Be onyalo tiyo gi wechene owuon e lero gigo ma opuonjore e Lamo mar Joot? Be onyalo lero puonj michako ng’eyogo Muma? (Nge. 2:6-9) Be omor gi somo Muma kendo puonjore buge ma ogo gi kweth mar jatichno mogen kendo mariek? (Math. 24:45) Be openjo penjo e wi puonj mag Muma koda e wi ndiko moko?

 Penjogo nyalo konyi ng’eyo dongruok ma nyathini osetimo e wach Nyasaye. Bang’ nono penjogo, inyalo ng’ado ni nitie kuonde moko madwarore ni otimie dongruok kapok obatise. Kata kamano, ka kit ngimane nyiso ni en japuonjre Kristo kendo osechiwo ngimane ne Nyasaye, inyalo neno ni onego iweye mondo obatise.

Rowere Nyalo Pako Jehova

Jotich Nyasaye mang’eny ne oluore kendo chung’ motegno kane podi gin rowere kata nyithindo. Par ane Josef, Samuel, Josia, kod Yesu. (Chak. 37:2; 39:⁠1-3; 1 Sam. 1:⁠24-​28; 2:⁠18-​20; 2 Weche 34:⁠1-3; Luka 2:⁠42-​49) Nyaka bed ni nyi Filipo ma ne koro wach ne oyudo tiegruok maber kane podi gitindo ahinya.​​—⁠Tich 21:⁠8, 9.

Janeno moro e piny Greece nowacho kama: “Ne obatisa kane an gi higini 12. Pok aywago ang’e ngang’ nikech mano. Chakre kanyo, higini 24 osekalo, kendo asetiyo ne Jehova kuom thuolona duto kuom higini 23. Herana kuom Jehova osekonya kinde duto nyagore gi pek ma rowere romogo. Kane an jahigini 12, ne ok an gi ng’eyo ahinya e wi Ndiko kaka sani. Kata kamano, ne ang’eyo ni ne ahero Jehova kendo ne adwaro tiyone nyaka chieng’. Amor ahinya ni Jehova osekonya siko ka atiyone.”

Bed ni hik ng’ato ng’eny kata tin, ng’ato ang’ata ma kit ngimane nyiso ni en japuonjre Kristo, onego obatisi. Jaote Paulo nondiko kama: “Ng’ato oyie gi chunye mi odoko makare; kendo ohulo gi dhoge, mi irese.” (Rumi 10:10) Sama rawera ma en japuonjre Kristo obatisi, en kaachiel gi jonyuolne gisechopo e okang’ maduong’. Kik uwe gimoro amora omonu koda nyithindu, yudo mor maduong’ ma oritou.

[Weche moler piny]

[Sanduk manie ite mar 5]

Paro Makare e Wi Batiso

Jonyuol moko kawo batiso mar nyithindgi kaka okang’ maber ahinya mabende oting’o pek moko​​—⁠mana kaka bedo gi lesen mar riembo mtoka. Kata kamano, be batiso kod tiyo ne Nyasaye nyalo mono ngima ng’ato dhi maber e kinde mabiro? Dwoko mar Muma en, ooyo. Ngeche 10:22 wacho kama: “Hap Jehova e mokelo mwandu; kendo Jehova ok omiyo ji mwandu makelo parruok.” Paulo nondiko ne rawera Timotheo kama: “Adier, ka ng’ato gire orome, bedo jadini kelo ohala maduong’.”​—1 Tim. 6:6.

En adier ni tiyo ne Jehova ok yot. Jeremia noromo gi chandruoge mang’eny kotiyo kaka janabi mar Nyasaye. Kata kamano, nondiko e wi lamo mare kuom Nyasaye madier kama: “Wecheni noyudore, mi napidhora kodgi; kendo wecheni nomiya mor, chunya nomor kodgi: ni mar oluonga gi nyingi, A Jehova Nyasaye mar ogendini mag lueny.” (Yer. 15:16) Jeremia nong’eyo ni tiyo ne Nyasaye e gima ne kelone mor. Piny mar Satan ema kelo chandruoge. Dwarore ni jonyuol okony nyithindgi fwenyo mano.​​—⁠Yer. 1:⁠19.

 [Sanduk manie ite mar 6]

Be Nyathina Onego Orit Mondi Kapok Obatise?

Kinde ka kinde, kata ka nyithindo osechopo gigo mamiyo giwinjore gi batiso, jonyuolgi nyalo ng’ado ni girit mondi kapok obatisgi. Gin ang’o momiyo jonyuol timo kamano?

An gi luoro ni ka nyathina obatisi, to bang’e onyalo donjo e richo moro maduong’ kendo inyalo gole oko mar kanyakla. Be en gimaber paro ni kata ka ok obatis nyathi, ni to mano miyo obedo maonge gi ting’ e wang’ Nyasaye? Suleman nowacho ne rowere kama: “Ng’e ma, ni Nyasaye nong’adni bura kuom [timbeni] duto.” (Ekl. 11:9) Ka ok owuoyo kuom hik ng’ato, Paulo paronwa kama: “Ng’ato ka ng’ato kuomwa nowach wach man kuome owuon ni Nyasaye.”​​—⁠Rumi 14:12.

Jogo malamo Nyasaye, bed ni obatisgi kata podi, nigi ting’ e wang’ Nyasaye. Kik wiyi wil ni, Jehova rito jotichne kendo ‘ok noyie otem ng’ato moloyo tekrene.’ (1 Kor. 10:13) Tek mana ni ‘giritore’ kendo gikedo mondo gilo tembe, Nyasaye biro siro joma kamago. (1 Pet. 5:⁠6-9) Miyo moro ma Jakristo ndiko kama: “Nyithindo ma obatisi nigi gik mang’eny majiwogi tang’ gi gik maricho mag piny. Wuoda ma ne obatisi ka en jahigini 15, neno ni batiso miyo ng’ato rit. Wuodeno wacho kama: ‘Ok ipar kuom timo gimoro ma chik Jehova kwedo.’ Batiso en gima jiwo ng’ato ahinya mondo oluw tim makare.”

Ka isepuonjo nyithindi kokalo kuom wecheni koda ranyisi miketonegi mondo giluor Jehova, inyalo bedo gadier ni gibiro siko kamano kata mana bang’ batiso. Ngeche 20:7 wacho kama: “Ng’ato maluwo chik, mawuotho e yore makare, kosetho wahiche gibedo gi hawi.”

Daher neno ka nyathina ochopo chenro moko mokwongo. Rowere onego opuonjre tich, mondo omi gibi gibed joma ritore kendgi giwegi. Kata kamano, ok ber jiwogi mondo giluw kit ngima ma otenore mana kuom somo mar skul kod yore mag manyo yuto, kar jiwogi luwo lamo madier. Kowuoyo kuom “kodhi,” tiende ni wach Pinyruoth maok dongi, Yesu nowacho kama: “Ng’at mochwo e kudho, jali e en ma owinjo wach, eka parruok mar piny kod wuond mar mwandu thung’o wach, mi ok onyak.” (Math. 13:22) Chenro mamiyo ng’ato chiwo ngimane ahinya ne yore mag piny moloyo yore mag Nyasaye, nyalo thung’o kendo golo ei chuny rawera gombo mar tiyo ne Nyasaye.

Kowuoyo kuom rowere ma owinjore gi batiso to jonyuolgi podi geng’ogi, jaduong’ moro molony nowacho kama: “Geng’o rawera kuom batiso nyalo ketho siso ma en-go e luwo yore mag Nyasaye, kendo miyo chunye onyosre.” Kendo jarit moro malworo nondiko kama: “Rawera nyalo chako paro ni oyomyom kendo oonge gi nyalo mar rito winjruokne gi Jehova, kata ni orem. Onyalo chako luwo yore mag piny mondo owinj ni ochopo gimoro e ngima.”

[Picha]

Be somo mamalo ema onego oket mokwongo?

[Picha manie ite mar 3]

Rawera matin nyalo dak e kit ngima manyiso ni en japuonjre Kristo

[Piche manie ite mar 3]

Iko kendo chiwo paro e chokruoge

[Picha manie ite mar 4]

Luwo gima jonyuol nyise

[Picha manie ite mar 4]

Tiyo tij lendo

[Picha manie ite mar 4]

Lamo ma mare owuon