Ka Papetito Ainei te Au Mapu?

“MATAORA tikai au e e tavini no Iehova taku tamaine i teianei, e kua kite au e te mataora katoa ra aia,” i karanga ai a Carlos, * e metua tane Kerititiano i te Piripine. Kua tata tetai metua tane no Ereni mai e: “Mataora maua ko taku vaine kua papetitoia ta maua tamariki e toru ei Au Kite no Iehova i to ratou mapu tamarikianga. Te tere ra ratou i te pae vaerua e te tavini mataora ra ia Iehova.”

E rekareka ana te au metua Kerititiano me papetitoia ta ratou tamariki, i tetai taime ra ka mataora e ka taitaia ratou. Kua karanga tetai metua vaine e: “Kua mataora au e kua taitaia.” Eaa ra i tuke ei te manako o te metua vaine? “Kua marama au e e apainga tikai ta taku tamaiti i teianei ki mua ia Iehova.”

E akakoroanga na te au mapu ravarai i te tavini ia Iehova ei Au Kite papetito. Ka manako ekoko te au metua e, ‘Kua kite au e te tere meitaki ra taku tamaiti ki mua, inara ka maroiroi ainei aia i te patoi i te au taomianga tau kore e kia vai ma ua i mua ia Iehova?’ Penei ka ui tetai pae kia ratou uaorai e, ‘Me ka timataia mai e te au apinga materia, ka tavini rekareka ainei taku tamaiti i te Atua ma te maroiroi?’ No reira, eaa te aratakianga Pipiria ka tauturu i te au metua kia papu e kua papa ta ratou tamariki i te papetito?

Pipi na Karaiti​—Umuumuanga Puapinga

Kare te Tuatua a te Atua i akataka mai i te mataiti ka papetitoia, te akamarama maira ra i te tu o te aronga ka akatikaia kia papetitoia. Kua ikuiku a Iesu i tana au pipi e: “E akariro i to te pa enua katoa ei pipi; ka bapetizo atu ei ia ratou.” (Mata. 28:19) Ko te papetitoanga, no te aronga tei riro takere ei au pipi na Karaiti.

Eaa te aiteanga kia riro ei pipi? Te akamarama maira te Insight on the Scriptures e: “Te tau ra teia ki te aronga e irinaki ra i te au apiianga a Karaiti e te aru vaitata ra i te reira.” Ka tau ainei te au mapu tamariki kia riro mai ei au pipi tika tikai na Karaiti? Kua tata tetai tuaine tei tavini ana ei mitinari i Marike Ratino e 40 mataiti no runga iaia e tona tuakana e te teina e: “Kua kite matou e ka inangaro  matou i te tavini ia Iehova e te noo ki roto i te Parataito. Kua akaketaketa mai to matou akatapuanga ia matou i te patoi atu i te au timataanga o te au mapu. Kare matou e tataraapa ana i ta matou akatapuanga ki te Atua mei te mapu tamarikianga.”

Akapeea koe e kite ei e kua papa taau tamaiti ei pipi na Karaiti? Te akakite maira te Pipiria e: “E kitea te tu o te tamaiti i tana au ravenga; i te meitaki anga e te tiratiratu.” (Mase. 20:11) Akamanako ana i tetai au angaanga te akaari maira tetai mapu e te ‘kiteia ra tona tupu anga’ ei pipi.—1 Timo. 4:15.

Akapapu Anga ei Pipi na Karaiti

Te akarongo ra ainei taau tamaiti kia koe? (Kolo. 3:20) Te rave ra ainei aia i tana angaanga i te kainga? Te akakite maira te Pipiria ia Iesu e 12 ona mataiti e: ‘Kua akarongo ua atu rai aia ki tona nga metua.’ (Luka 2:51) E tika, kare tetai au tamariki e akarongo ana ki to ratou metua i teia tuatau. Ka ‘aru ra te au Kerititiano mou i to Iesu takainga vaevae.’ Ka kiteaia mai te au mapu e inangaro ra kia papetitoia no to ratou akarongo i te metua.—1 Pete. 2:21.

Akamanako ana i te au uianga ka aru mai: Te ‘kimi ra ainei taau tamaiti i te basileia na mua’ i roto i te angaanga orometua? (Mata. 6:33) Te inangaro ra ainei aia i te akakitekite atu i te tuatua meitaki ki tetai ke, me kore naau roa e akaue iaia kia aere ki te angaanga orometua e kia tuatua i ko i te au ngutupa? Te kite ra ainei aia i tana apainga ei papuritia kare i papetitoia? Te inangaro ra ainei aia i te atoro akaou i te aronga tana i aravei ana i te ngai tutuanga? Kua akakite ainei aia ki tona au oa apii e te au puapii e e Kite aia no Iehova?

E puapinga ainei kiaia te aere anga ki te au uipaanga? (Sala. 122:1) Mataora ainei aia i te paupau mei te Apii Punanga Tiaki e te Apii Pipiria a te Putuputuanga? Te piri maroiroi ra ainei aia ki roto i te Apii Orometua Teokaratiki?—Ebe. 10:24, 25

Te tauta ra ainei taau tamaiti kia vai ma ua na te kopae anga i te au oa kino i te apii e tetai atu au ngai? (Mase. 13:20) Eaa te au imene, teata, porokaramu tivi, vitio kangakanga, e te Initaneti tana e reka ana? Te akapapu maira ainei tana au tuatua e te au angaanga e te aru ra aia i te au kaveinga Pipiria?

Kua kite meitaki ainei taau tamaiti i te Pipiria? Ka rauka ainei iaia i te tuatua ua mai i tana i apii mei te Akamorianga a te Ngutuare i te aiai? Ka rauka ainei iaia te akamarama mai i te au tuatua mou Pipiria? (Mase. 2:6-9) Inangaro ainei aia i te tatau i te Pipiria e te apii i te au puka a te pupu tavini akono meitaki e te pakari? (Mata. 24:45) E ui ana ainei aia i te au uianga no te au apiianga Pipiria e te au irava?

Penei ka tauturu taua au uianga ra ia koe kia kite e te tere ra taau tamaiti i te pae vaerua.  Muri ake te akamanako anga i te reira, penei ka ariki koe e e au ngai tetai ka akamako mai aia i mua ake ka papetito ei aia. Me akaari mai ra aia e kua tau aia ei pipi na Karaiti e kua akatapu i tona oraanga ki te Atua, e akatika koe iaia kia papetitoia.

Akapaapaa te Au Mapu ia Iehova

Maata te au tavini o te Atua tei akaari mai i te tu akarongo mou e te tiratiratu i to ratou mapu tamarikianga. Akamanako ana ia Iosepha, Samuela, Iosia, e ia Iesu. (Gene. 37:2; 39:1-3; 1 Samu. 1:24-28; 2:18-20; 2 Para. 34:1-3; Luka 2:42-49) Papu e kua tereni meitakiia te au tamariki tamaine e a a Philipa, tei totou ana mei te mapu tamarikianga.—Anga. 21:8, 9.

Kua tuatua tetai Kite i Ereni e: “E 12 oku mataiti i papetitoia ai au. Kare rava au i tataraara ana i taku ikianga. E 24 mataiti i topa, kua akapou au e 23 mataiti no te angaanga orometua tamou. No toku inangaro ia Iehova i tauturu ei iaku kia patoi i te au manamanata o te au mapu. Tae anga toku mataiti ki te 12, kare toku kite Tuatua Tapu i aite ki taku i kite i teianei. Kua kite au e e inangaro toku ia Iehova e te inangaro ra au i te tavini iaia e tuatau ua atu. Te rekareka nei au e kua tauturu mai aia iaku kia tavini ua rai iaia.”

Me e mapu me kore e ruaine, ko tetai tangata tei akapapu e e pipi tikai aia na Karaiti ka tau kia papetitoia. Kua tata te apotetoro ko Paulo e: “Ko te ngakau oki to te tangata nei e akarongo, e kia rauka atu te tuatua-tika: ko te vaa oki tei aaki te tuatua e kia rauka atu te ora.” (Roma 10:10) Me papetitoia tetai mapu ei pipi na Karaiti, kua taeria iaia e tona nga metua tetai takainga puapinga tikai. Eiaa rava tetai apinga e arai ia koe e taau tamariki kia kite i te mataora e tapapa atura kotou.

[Tataanga Rikiriki i Raro]

[Pia i te kapi 5]

Manako Tau no te Papetito

Te manako ra tetai au metua e takainga puapinga me papetitoia ta ratou tamariki te ka o mai te manamanata—mei te rauka anga tetai raitini akaoro. Ka takino ainei te papetitoanga e te angaanga tapu i te oraanga puapinga o tetai tangata no te tuatau ki mua? Te pau maira te Pipiria e kare. Te akakite maira a Maseli 10:22 e: “Na Iehova te meitaki i apingaʼi te apinga, kare oki e kapiti katoaia mai te kino i te reira.” E kua tata a Paulo ki te mapu ko Timoteo e: “Kareka te akono i te Atua e te mareka ua ra, ko te apinga maata ïa.”—1 Timo. 6:6.

E tika, kare i te mea mama i te tavini ia Iehova. Kua na roto ana a Ieremia i te au turanga ngata no tana angaanga ei peroveta no te Atua. Inara, kua tata aia no tana akamorianga i te Atua mou e: “Ko taau tuatua, ko toku ïa rekareka anga, e te pereperekavana anga o toku ngakau: kua tapaia oki au i toou ra ingoa, e te Atua Sabaota ra, e Iehova e.” (Iere. 15:16) Kua kite a Ieremia e ko te tavini anga i te Atua te tumu ia o tona mataora. Ko te ao o Satani ko te tumu ia o te au turanga ngata. E tauturu te au metua i ta ratou tamariki kia kite i te tuke o te reira.—Iere. 1:19.

 [Pia/Tutu i te kapi 6]

Ka Taroaroa Ainei Taku Tamaiti i te Papetito?

Tetai au taime, noatu kua tau te tamariki no te papetito, ka taroaroa to ratou metua i te reira. Eaa ra ratou i akapera ai?

Te mataku nei au e me papetitoia taku tamaiti, te openga ka rave aia i te kino e ka akaateaia ki vao. Ka tau ainei i te irinaki e me taroaroa tetai mapu i te papetito, kare te Atua e akava mai iaia no tona tu? Te tuatua maira a Solomona ki te au mapu e: ‘Kia kite mai oki kotou e no ta kotou i rave ka apaiia kotou e te Atua ki te akavaanga.’ (Kohe. 11:9) Kare a Paulo i taiku mai ana i te mataiti, kua oronga mai ra aia i te akamaara anga e: “Ka ope takiri rava tatou i te aaki i te tuatua iaia uaorai i te Atua ra.”—Roma 14:12.

Ko te aronga tei papetitoia e kare i papetitoia e apainga ta ratou ki te Atua. Akamaara ua rai e te paruru maira a Iehova i tona au tavini na te ‘kore anga e vaoo ia ratou kia timataia i te ka tika ia ratou kia akakoromaki.’ (1 Kori. 10:13) Me ‘manako meitaki’ ratou e me patoi i te timataanga, ka tauturu mai te Atua ia ratou. (1 Pete. 5:6-9) Kua tata tetai metua vaine Kerititiano e: “Ko te au tamariki tei papetitoia e au tumu tau to ratou kia kopae atu i te au mea kino o teianei ao. Kua papetitoia taku tamaiti i te 15 mataiti, e kua irinaki e e paruruanga te papetitoanga. ‘Kare koe e inangaro i te rave i tetai apinga te patoi ra i ta Iehova ture,’ i tuatua ai aia. E akakeu anga pakari te papetitoanga no te tuatua tika.”

Me kua tereni koe i taau tamariki na roto i te tuatua e te akaraanga kia akarongo kia Iehova, papu e ka rave ua rai ratou i te reira i muri ake i to ratou papetitoanga. Te akakite maira a Maseli 20:7 e: “E aere rai te tangata tuatua-tika ma te pikikaa kore: e meitaki tana au tamariki i muri ake.”

Inangaro au i te kite i taku tamaiti kia itae na mua i tetai au akakoroanga. E apii te mapu kia kite i te angaanga ei akono ia ratou uaorai. E kino ra te akamaroiroi ia ratou kia aruaru i tetai oraanga no runga i te apii e te turanga pae moni, kare ra i te akamorianga mou. No runga i te ua kare e tupu ana, kua tuatua a Iesu e: “Ko tei topa ki roto i te ngangaere ra, koia te tangata i akarongo i te tuatua; pokia atura te tuatua i te anoano maata i to teianei ao, e te pikikaa o te apinga, e kare atura i ua mai.” (Mata. 13:22) Te au parani no te au akakoroanga o teianei ao ka takore atu i te inangaro o te mapu i te tavini i te Atua.

Tuatua anga no runga i te au mapu tei tau kia papetitoia, kare ra te au metua e akatika ana, kua tuatua tetai tangata pakari tukatau e: “Me kare tetai mapu e akatikaia kia papetitoia, kare aia e tere ki mua e kare aia e inangaro i te papetito.” E kua tata tetai akaaere tutaka e: “Ka manako te mapu e kare aia e tau ana e kare aia e puapinga ana i te pae vaerua. Penei ka akara aia ki teianei ao kia puapingaia.”

[Tutu]

Na mua ainei te apii univetiti?

[Tutu i te kapi 3]

Akapapu tetai tamaiti e e pipi aia na Karaiti

[Tutu i te kapi 3]

Akapapa e e paupau i te au uipaanga

[Tutu i te kapi 4]

Akarongo ki te metua

[Tutu i te kapi 4]

Piri ki te angaanga orometua

[Tutu i te kapi 4]

Rave i te pure