Yonguwan musu teki dopu?

„MI BREITI srefisrefi taki mi umapikin na wan futuboi fu Yehovah now, èn mi sabi taki ensrefi breiti tu”, na so Carlos, wan Kresten papa na ini Filippijnen e taki. * Wan papa na ini Grikikondre ben skrifi: „Mi nanga mi wefi breiti srefisrefi taki den dri pikin fu wi ben teki dopu leki Yehovah Kotoigi di den ben de tini. Den e go na fesi na ini a tru anbegi, èn den e dini Yehovah nanga prisiri.”

Kresten papa nanga mama abi furu reide fu prisiri te den pikin fu den e teki dopu, ma son leisi den e frede pikinso. Wan mama ben taki: „Mi breiti srefisrefi, ma mi ben e broko mi ede trutru.” Fu san ede a ben e firi so? A e taki moro fara: „Mi ben frustan taki now a boi fu mi srefi ben o abi fu gi frantwortu na Yehovah.”

Ala yonguwan musu poti en leki marki fu dini Yehovah leki wan dopu Kotoigi fu en. Toku papa nanga mama di lobi Gado ben kan prakseri: ’Mi sabi taki a pikin fu mi go na fesi moi, ma mi no sabi efu a o man kakafutu gi tesi, so taki a e tan tyari ensrefi na wan fasi di Yehovah feni bun.’ Trawan ben kan aksi densrefi: ’Te a pikin fu mi o kisi tesi fu feti baka gudu, dan a o man tan dini Gado fayafaya èn nanga prisiri?’ Sobun, fa Bijbel kan yepi papa nanga mama fu kon sabi efu den pikin fu den doro den markitiki fu teki dopu?

Wan sma musu de wan disipel fu Krestes fu kan teki dopu

Gado Wortu no e taki omeni yari wan sma musu abi fu kan teki dopu, ma a e sori sortu markitiki wan sma musu doro fu man du dati. Yesus ben taigi den bakaman fu en: „Go na sma fu ala kondre èn meki den tron disipel, èn dopu den” (Mat. 28:19). Fu dati ede, soso sma di de disipel fu Krestes kaba, kan teki dopu.

San na wan disipel? A buku Inzicht in de Schrift e taki: „A wortu disi abi fu du nanga den wan di e bribi den leri fu Krestes, èn di e hori densrefi finifini tu na den leri dati.” A de so taki yongu pikin man de trutru disipel fu Krestes? Wan sisa di dini leki zendeling na ini Latijns-Amerika moro leki 40 yari, ben skrifi disi fu en nanga den tu sisa fu en: „Wi ben bigi nofo fu sabi taki wi ben wani  dini Yehovah èn taki wi ben wani libi na ini a Paradijs. Fu di wi ben gi wisrefi abra na Gado, meki wi ben man kakafutu gi den tesi di yonguwan e kisi. Wi no e sari fu di wi gi wisrefi abra na Gado di wi ben yongu.”

Fa yu kan sabi efu a pikin fu yu kon tron wan disipel fu Krestes? Bijbel e taki: „Den sani di wan boi e du, e sori suma a de trutru. Na so sma kan sabi efu a e du san reti èn efu a e du sani nanga wan krin ati” (Odo 20:11). Wi sa poti prakseri na wan tu sani di e sori efu wan yonguwan „e go na fesi” leki wan disipel.​—1 Tim. 4:15.

San e sori taki yu pikin na wan disipel fu Krestes?

A pikin fu yu e gi yesi na yu? (Kol. 3:20) A e du den wroko di a e kisi fu du na oso? Luku san Bijbel e taki fu Yesus di a ben abi 12 yari: ’A tan saka ensrefi na ondro en papa nanga mama’ (Luk. 2:51). A no de fu taki dati nowan pikin kan gi yesi na en papa nanga mama neleki fa Yesus ben du dati. Ma tru Kresten musu „waka soifri na [Yesus] baka”. Sobun, yonguwan di wani teki dopu musu de sma di e gi yesi na den papa nanga mama.​—1 Petr. 2:21.

Luku den aksi disi: A pikin fu yu ’e tan suku a Kownukondre fosi’ na ini a diniwroko? (Mat. 6:33) A de klariklari fu fruteri trawan a bun nyunsu, noso na yu musu sidon na en baka fu a go na ini a preikiwroko èn fu taki nanga sma te unu e preiki oso fu oso? A sabi sortu frantwortu a abi leki wan preikiman di no dopu? A de klariklari fu go baka na sma di wani sabi moro fu Bijbel? A e fruteri den pikin nanga den leriman na skoro taki en na wan Kotoigi fu Yehovah?

A e si en leki wan prenspari sani fu go na den gemeente konmakandra? (Ps. 122:1) A lobi fu gi piki na a Waktitoren-studie, èn na a Gemeente Bijbelstudie? A e teki prati fayafaya na a Theokrasia Diniwroko-skoro?​—Hebr. 10:24, 25.

A pikin fu yu e wai pasi gi takru kompe na skoro noso na tra presi, fu di a wani tyari ensrefi na wan fasi di fiti? (Odo 13:20) Sortu poku, felem, telefisi programa, nanga video game a lobi? Èn sortu sani a e go luku tapu Internet? Den sani di a e taki èn e du e sori taki a wani hori ensrefi na Bijbel gronprakseri?

A pikin fu yu sabi Bijbel bun? A man fruteri nanga en eigi wortu san a e leri te unu e hori na Osofamiri Anbegi? A man fruklari den moro prenspari leri fu Bijbel? (Odo 2:6-9) A lobi leisi Bijbel èn a lobi studeri den publikâsi di a getrow èn koni srafu e tyari kon na doro? (Mat. 24:45) A e poti aksi di abi fu du nanga Bijbel leri èn nanga Bijbeltekst?

Den aksi dati kan yepi yu fu kon sabi efu a pikin fu yu e go na fesi na ini a tru anbegi. Baka te yu poti prakseri na den aksi disi, dan kande yu sa feni taki wan tu sani de ete di a pikin  musu leri du moro bun, fosi a kan teki dopu. Ma efu a fasi fa a e tyari ensrefi e sori taki a de wan disipel fu Krestes èn taki a gi ensrefi abra na Gado trutru, dan kande yu sa feni taki a kan teki dopu.

Yonguwan kan gi Yehovah glori

Furu futuboi fu Gado ben e dini en nanga den heri ati èn den ben e tai hori na en di den ben de tini, noso di den ben moro yongu srefi. Prakseri Yosef, Samuel, Yosia, nanga Yesus (Gen. 37:2; 39:1-3; 1 Sam. 1:24-28; 2:18-20; 2 Kron. 34:1-3; Luk. 2:42-49). Èn a no de fu taki dati den fo umapikin fu Filipus di ben e taki profeititori, ben e kisi bun leri di den ben de yonguyongu ete.​—Tori. 21:8, 9.

Wan Kotoigi na ini Grikikondre ben taki: „Mi teki dopu di mi ben abi 12 yari. Noiti a hati mi taki mi teki a bosroiti dati. Dati ben de 24 yari pasa, èn 23 fu den yari dati mi dini na ini a furuten diniwroko. A lobi di mi abi gi Yehovah, ala ten yepi mi fu kakafutu gi den tesi di mi ben e kisi leki yonguwan. Di mi ben abi 12 yari, dan mi no ben sabi Bijbel so leki fa mi sabi en now. Ma mi ben sabi taki mi ben lobi Yehovah èn taki mi ben wani dini en fu têgo. Mi breiti taki a yepi mi fu tan dini en.”

Wan sma di e sori taki a de wan trutru disipel fu Krestes musu teki dopu, awinsi a yongu noso owru. Na apostel Paulus ben skrifi: „Nanga na ati wan sma e bribi, èn dati sa meki taki a o kon de regtfardiki, ma nanga a mofo a e meki bekènti na sma taki a e bribi, èn dati sa meki taki a o kisi frulusu” (Rom. 10:10). Te wan yongu disipel fu Krestes e teki a prenspari bosroiti fu teki dopu, dan en nanga en papa nanga mama doro wan prenspari marki. No meki nowan sani tapu yu nanga den pikin fu yu fu ondrofeni a prisiri di e wakti unu.

[Futuwortu]

[Faki na tapu bladzijde 5]

Wi musu abi a yoisti denki fu a teki di wi musu teki dopu

Son papa nanga mama e si en leki wan bun bosroiti taki den pikin fu den e teki dopu, ma den feni tu taki a sani dati kan tyari problema kon. Gi den, a de neleki te a pikin o go meki en rijbewijs. Ma a de so taki te wan pikin e teki dopu èn te a e du santa diniwroko, dan dati o meki taki a no o abi bun bakapisi na ini en libi? Bijbel e sori taki dati no de so. Odo 10:22 e taki: „A blesi fu Yehovah, na dati e meki sma kon gudu èn a no e meki den firi sari.” Èn luku san Paulus ben skrifi gi a yonguman Timoteyus: „A tru taki wan sma e kisi furu wini te a e dini Gado fayafaya, ma soso te a breiti nanga san a abi.”​—1 Tim. 6:6.

A tru taki a no makriki fu dini Yehovah. Yeremia ben kisi furu problema di a ben e dini leki profeiti fu Gado. Ma toku a ben skrifi disi fu na anbegi di a ben e anbegi a tru Gado: „Di mi feni den wortu fu yu, mi nyan den. Dan mi ati bigin prisiri. Iya, mi e prisiri srefisrefi, bika mi e tyari a nen fu yu, Yehovah, a Gado fu den legre” (Yer. 15:16). Yeremia ben sabi taki a sani di ben e gi en furu prisiri ben de a diniwroko fu Gado. A grontapu fu Satan e gi sma furu broko-ede. Papa nanga mama musu yepi den pikin fu den fu si a difrenti na mindri na anbegi fu Gado èn a grontapu fu Satan.​—Yer. 1:19.

 [Faki/​Prenki na tapu bladzijde 6]

Mi pikin musu wakti ete fosi a kan teki dopu?

Son tron, papa nanga mama kan bosroiti fu no meki a pikin fu den teki dopu ete, srefi te a pikin doro den markitiki kaba fu du dati. Fu san ede den ben kan du dati?

Mi e frede taki te mi pikin o teki dopu, dan bakaten a kan du wan seryusu sondu èn a kan puru fu a gemeente. A de wan yoisti sani fu bribi taki wan pikin di no e teki dopu ete no abi fu gi frantwortu na Gado fu a fasi fa a e tyari ensrefi? Salomo ben skrifi den wortu disi gi yonguwan: „Sabi taki gi ala den sani [di yu e du] a tru Gado o aksi yu frantwortu” (Preik. 11:9). Èn Paulus ben sori taki ala sma musu hori a sani disi na prakseri, awinsi omeni yari den abi: „Ibriwan fu wi o abi fu gi Gado frantwortu.”​—Rom. 14:12.

Awansi wan sma di e anbegi Gado dopu noso awansi a no dopu, toku a musu gi frantwortu na Gado. No frigiti taki Yehovah e kibri den futuboi fu en fu di a ’no sa meki den kisi tesi di hebi moro leki san den man frudrage’ (1 Kor. 10:13). Solanga den e „tan nanga krin frustan” èn e kakafutu gi tesi, den kan de seiker taki Gado o yepi den (1 Petr. 5:6-9). Wan Kresten mama ben skrifi: „Pikin di teki dopu abi moro reide fu tan farawe fu den ogri sani fu a grontapu. A boi fu mi di teki dopu di a ben abi 15 yari, feni taki a teki di a teki dopu de wan kibri gi en. A taki: ’Yu no e prakseri fu du wan sani di no e kruderi nanga den wet fu Yehovah.’ Dopu e gi wan sma deki-ati fu du san reti.”

Efu yu gi den pikin fu yu bun leri èn efu yu gi den wan bun eksempre, dan yu kan abi a frutrow taki den sa tan gi yesi na Yehovah baka te den teki dopu. Odo 20:7 e taki: „A reti ati sma e tyari ensrefi na wan reti fasi. Koloku fu den manpikin di a o kisi.”

Mi wani taki a pikin fu mi musu doro son marki fosi. Yongu sma musu leri fu wroko so taki den man sorgu gi densrefi te den kon moro bigi. Ma a kan tyari takru bakapisi kon te wi e gi den deki-ati fu teki heiskoro-leri èn fu wroko furu moni, na presi taki den e meki a tru anbegi tron a moro prenspari sani na ini den libi. Luku san Yesus ben taki fu wan „siri” di no e gro. A siri dati e prenki a Kownukondre boskopu: „A siri di sai na mindri den makabon, na a sma di e yere a wortu, ma den broko-ede fu a grontapu sistema disi, nanga a bedrigifasi fu gudu, e kiri a wortu, èn a no e meki froktu” (Mat. 13:22). Efu papa nanga mama e gi den pikin fu den deki-ati fu feti baka grontapu sani, dan dati o meki taki den pikin no e si a matifasi di den abi nanga Yehovah leki wan prenspari sani. Disi kan meki taki den pikin no o abi a firi moro fu dini Gado.

Wan lepi owruman ben taki disi fu den yonguwan di doro den markitiki fu teki dopu, ma di den papa nanga mama no e agri nanga dati: „Te papa nanga mama e tapu wan yonguwan fu teki dopu, dan dati kan meki taki a pikin no e go na fesi moro na ini a tru anbegi èn a kan lasi ati.” Wan kring-opziener ben skrifi: „Wan yonguwan kan bigin firi leki a no bun nofo fu dini Yehovah. A sani dati kan meki taki a e bigin poti marki di a kan doro na ini grontapu, so taki a kan firi taki a doro wan marki na ini en libi.”

[Prenki]

Na universiteit musu kon na a fosi presi?

[Prenki na tapu bladzijde 3]

Wan yonguwan kan sori taki a de wan disipel fu Krestes

[Prenki na tapu bladzijde 3]

A musu sreka ensrefi gi den gemeente konmakandra èn a musu teki prati na den

[Prenki na tapu bladzijde 4]

A musu gi yesi na en papa nanga mama

[Prenki na tapu bladzijde 4]

A musu teki prati na a preikiwroko

[Prenki na tapu bladzijde 4]

A musu begi Gado