Joven sira presiza hetan batizmu ka lae?

AMAN kristaun ida naran Carlos, * husi rai-Filipinas, hatete: “Haʼu kontente tebes katak haʼu-nia oan-feto agora sai Maromak Jeová nia atan, no haʼu hatene katak nia mós kontente.” Aman ida husi rai-Grésia hatete: “Haʼu ho haʼu-nia kaben haksolok tebes tanba ami-nia oan naʼin-tolu hetan batizmu nuʼudar Testemuña ba Jeová kuandu sira-nia tinan seidauk toʼo 20. Sira laʼo ba oin didiʼak iha lia-loos no sira kontente atu serbí Maromak Jeová.”

Inan-aman kristaun iha razaun diʼak atu sente haksolok kuandu sira-nia oan hetan batizmu, maibé dala ruma sira mós sente laran-susar. Inan ida hatete: “Maski haʼu sente kontente tebes, maibé haʼu mós sente laran-susar.” Tansá mak inan neʼe sente hanesan neʼe? Nia hatete: “Tanba haʼu hatene katak agora haʼu-nia oan tenke hatán ba Maromak Jeová kona-ba buat hotu neʼebé nia halo.”

Serbí Maromak Jeová nuʼudar ninia Testemuña neʼebé hetan ona batizmu mak planu diʼak neʼebé joven sira hotu presiza halo. Maski nuneʼe, inan-aman balu karik hanoin: ‘Haʼu hatene katak haʼu-nia oan laʼo ba oin ho didiʼak, maibé nia iha forsa ka lae atubele tahan hasoru tentasaun kona-ba buat neʼebé la morál no atu sai moos nafatin iha Maromak Jeová nia oin?’ Inan-aman seluk karik husu sira-nia an: ‘Se haʼu-nia oan hasoru tentasaun ruma kona-ba hakarak atu hetan sasán, nia sei kontinua atu serbí Maromak ho haksolok no laran-manas ka lae?’ Nuneʼe, matadalan saida husi Bíblia mak bele ajuda inan-aman atu hatene se sira-nia oan prontu atu hetan batizmu ka seidauk?

Sai dixípulu mak importante liu

Maromak nia Liafuan la hatete kona-ba tinan hira mak ema ida bele hetan batizmu, maibé hatudu saida mak ema presiza halo atubele hetan batizmu. Jesus haruka sira neʼebé tuir nia: “Hanorin ema husi nasaun hotu-hotu atu sai dixípulu, sarani sira.” (Mt 28:19, MF) Nuneʼe, ema neʼebé sai ona Kristu nia dixípulu mak bele sarani ka hetan batizmu.

Saida mak dixípulu? Livru Pemahaman Alkitab esplika: “Liafuan neʼe aplika liuliu ba sira neʼebé fiar Kristu nia hanorin, maibé mós halo tuir didiʼak ninia hanorin.” Ema neʼebé sei idade kiʼik bele sai Kristu nia dixípulu neʼebé loos ka lae? Irmán ida neʼebé serbí nuʼudar misionáriu iha Amérika Latina durante tinan 40 liu hatete  kona-ba ninia an no ninia alin-feto naʼin-rua: “Maski ami sei tinan kiʼik, maibé ami hatene katak ami-nia hakarak mak serbí Maromak Jeová no moris iha Paraízu iha mundu foun. Ami-nia dedikasaun ajuda ami atu hamriik metin kuandu ami hasoru tentasaun neʼebé baibain joven hotu hasoru. Ami la sente katak ami lakon buat ruma hodi dedika an ba Maromak kuandu ami sei tinan kiʼik.”

Oinsá mak inan-aman bele hatene se sira-nia oan sai ona Kristu nia dixípulu? Bíblia hatete: “Liuhusi labarik-mane nia hahalok sira mak ema sei hatene se buat neʼebé nia halo mak moos no loos ka lae.” (Prov 20:11) Hanoin toʼok kona-ba hahalok balu neʼebé hatudu se joven ida “laʼo ba oin” didiʼak nuʼudar dixípulu.—1 Tim 4:15.

Saida mak hatudu se oan sai dixípulu ona?

Ita-nia oan halo tuir Ita ka lae? (Kol 3:20) Ita-nia oan halo ninia serbisu iha uma laran ka lae? Kuandu Jesus tinan 12, Bíblia hatete: “Jesus . . . halo tuir [ninia inan-aman] sira-nia hakarak.” (Lc 2:51) Klaru katak ohin loron la iha oan ida neʼebé sei halo tuir ninia inan-aman iha dalan loos kona-ba buat hotu. Maibé, ema kristaun loos tenke “laʼo tuir [Jesus] nia ain-fatin”. Nuneʼe, atu joven sira bele hetan batizmu, ema seluk presiza haree katak sira halo tuir sira-nia inan-aman.—1 Ped 2:21.

Hanoin toʼok kona-ba pergunta sira tuirmai: Ita-nia oan ‘buka uluknanain Maromak nia Reinu’ hodi hola parte iha serbisu haklaken ka lae? (Mt 6:33) Nia prontu atu fahe lia-foun diʼak ho ema seluk, ka Ita mak tenke obriga nia atu bá haklaken ka atu koʼalia ba uma-naʼin sira? Nia kaer didiʼak ninia responsabilidade nuʼudar haklaken-naʼin neʼebé seidauk hetan batizmu ka lae? Nia hakarak atu vizita fali ema neʼebé hatudu interese ka lae? Nia fó sai ba ninia kolega eskola no mestre sira katak nia Testemuña ba Jeová ka lae?

Ita-nia oan sente katak importante atu tuir reuniaun sira ka lae? (Sal 122:1) Nia gosta atu fó komentáriu iha Estudu Livru Haklaken no Estudu Bíblia iha Kongregasaun ka lae? Nia hola parte ho laran-manas iha Eskola Serbisu Kristaun ka lae?—Ebr 10:24, 25.

Ita-nia oan hakaʼas an atu sai moos nafatin iha dalan morál hodi sees an husi ransu hamutuk ho kolega eskola ka kolega seluk neʼebé ladiʼak? (Prov 13:20) Múzika, filme, programa husi televizaun, ka video game saida mak nia gosta liu, no saida mak nia gosta haree iha internét? Ninia liafuan no hahalok hatudu katak nia hakarak moris tuir Bíblia nia matadalan ka lae?

Ita-nia oan hatene didiʼak Bíblia ka lae? Nia hatene uza ninia liafuan rasik atu esplika buat neʼebé nia aprende iha imi-nia Adorasaun Família nian? Nia hatene esplika lia-loos neʼebé importante husi Bíblia ka lae? (Prov 2:6-9) Nia gosta atu lee Bíblia no estuda livru sira husi atan laran-metin no matenek ka lae? (Mt 24:45) Nia husu pergunta kona-ba hanorin ka eskritura ruma husi Bíblia ka lae?

Pergunta sira-neʼe bele ajuda Ita atu hatene se Ita-nia oan laʼo ba oin iha lia-loos ka lae. Karik  hodi hanoin didiʼak kona-ba pergunta sira-neʼe, Ita sei haree katak Ita-nia oan bele hadiʼa hahalok ruma hodi nia bele hetan batizmu. Maibé, se ninia moris tomak hatudu katak nia Kristu nia dixípulu ona no katak nia dedika tiha ona ninia moris ba Maromak, Ita bele sente katak Ita bele husik nia hetan batizmu.

Joven sira bele hahiʼi Maromak Jeová

Maromak nia atan barak hatudu laran-metin husi tempu neʼebé sira sei joven ka kiʼik. Hanoin toʼok kona-ba José, Samuel, Josias, no Jesus. (Gên 37:2; 39:1-3; 1 Sam 1:24-28; 2:18-20; 2 Crôn 34:1-3; Lc 2:42-49) Hanoin mós kona-ba Filipe nia oan-feto naʼin-haat. Sira halo profesia, no ida-neʼe hatudu ho klaru katak sira hetan treinu diʼak husi tempu neʼebé sira sei kiʼik.—Apos 21:8, 9.

Testemuña ida husi rai-Grésia hatete: “Haʼu hetan batizmu kuandu haʼu tinan 12. Haʼu nunka sente katak haʼu halo desizaun neʼebé sala. Husi tempu neʼebá toʼo agora hamutuk tinan 24 ona, no durante tempu neʼe haʼu uza tinan 23 hodi halo serbisu tempu-tomak ba Maromak. Haʼu-nia domin ba Maromak Jeová sempre ajuda haʼu atu hasoru susar neʼebé haʼu hetan nuʼudar joven. Kuandu haʼu tinan 12, haʼu ladún hatene buat barak kona-ba Bíblia. Maibé, buat neʼebé haʼu hatene mak haʼu hadomi Jeová no katak haʼu hakarak serbí nia ba nafatin. Haʼu kontente tebes tanba nia ajuda haʼu atu kontinua serbí nia.”

Ema neʼebé hatudu katak nia Kristu nia dixípulu loos, maski nia joven ka idade ona, nia tenke hetan batizmu. Apóstolu Paulo hatete: “Basá ema fiar ho fuan no nuneʼe ema hetan justisa, no ema haklaken ho ibun no nuneʼe mak hetan maksoin.” (Rom 10:10) Kuandu joven ida neʼebé sai ona Kristu nia dixípulu foti desizaun atu hetan batizmu, ida-neʼe mak akontesimentu neʼebé importante tebes iha joven no mós iha inan-aman sira-nia moris. Nuneʼe, keta husik buat naran deʼit atu hanetik Ita no mós Ita-nia oan atu haksolok ho futuru kapás tebes neʼebé atu mai.

[Nota–rodapé]

[Kaixa iha pájina 5]

Hanoin loos kona-ba batizmu

Maski inan-aman balu hanoin katak diʼak ba sira-nia oan atu hetan batizmu, maibé sira mós taʼuk, hanesan kuandu oan hetan karta kondusaun. Maibé, se ema ida hetan batizmu no serbí Maromak, ida-neʼe sei hanetik nia atu hetan futuru neʼebé diʼak ka lae? Bíblia fó resposta katak lae. Provérbios 10:22 hatete: “Bensaun husi Maromak Jeová, neʼe mak halo ema riku, no nia la aumenta buat neʼebé halo laran-susar.” No Paulo mós hatete ba Timóteo: “Relijiaun [“laran-metin ba Maromak”, MF] lori duni mai moris diʼak, maibé ba sira deʼit neʼebé laran-haksolok ho buat neʼebé sira iha ona.”—1 Tim 6:6.

Tebes duni, la fasil atu serbí Maromak Jeová. Porezemplu, kuandu Jeremias halaʼo Maromak nia serbisu nuʼudar profeta, nia hasoru susar barak. Maski nuneʼe, kona-ba ninia adorasaun ba Maromak, nia hatete: “Ita-nia liafuan sai buat neʼebé halo haʼu-nia laran ksolok no kontente; tanba haʼu lori Ita-nia naran, oh, Jeová, Maromak tropa nian.” (Jer 15:16) Jeremias hatene katak ksolok neʼebé nia sente mai husi serbisu neʼebé nia halaʼo ba Maromak. Maibé, susar oioin mai husi Satanás nia mundu. Inan-aman presiza ajuda sira-nia oan atu hatene tansá mak buat rua neʼe la hanesan.—Jer 1:19.

 [Kaixa/Dezeñu iha pájina 6]

Haʼu-nia oan presiza hein kleur atu hetan batizmu ka lae?

Dala ruma, maski oan sira kumpre ona kritériu atubele hetan batizmu, maibé sira-nia inan-aman deside katak oan presiza hein tempu uitoan tan. Tanba razaun saida mak inan-aman hanoin hanesan neʼe?

Haʼu taʼuk katak se haʼu-nia oan hetan batizmu, ikusmai nia sei monu ba sala boot no kongregasaun sei hasai nia. Maibé, se joven ida dada tempu kleur atu hetan batizmu, neʼe la dehan katak nia sei la hatán ba Maromak kona-ba ninia hahalok. Liurai Salomão hatoʼo liafuan tuirmai ba joven sira, hodi dehan: “Maibé hatene bá katak kona-ba [ó-nia hahalok sira], Maromak neʼebé loos sei tesi lia ba ó.” (Ecle 11:9) No mós, apóstolu Paulo fó-hanoin ba ema hotu, inklui joven sira, katak “ita ida-ida sei hatán kona-ba nia an ba Maromak”.—Rom 14:12.

Ema hotu sei hatán ba Maromak, maski hetan ona batizmu ka seidauk. Keta haluha katak Maromak Jeová proteje ninia atan sira hodi ‘la husik sira hetan babeur neʼebé boot liu fali sira-nia kbiit’. (1 Kor 10:13) Bainhira Maromak nia atan sira “matan-moris” nafatin no luta hasoru tentasaun, sira bele fiar katak Maromak sei ajuda sira. (1 Ped 5:6-9) Inan kristaun ida hatete: “Oan sira neʼebé hetan ona batizmu iha razaun barak atu hadook an husi buat aat mundu neʼe nian. Haʼu-nia oan-mane, neʼebé hetan batizmu kuandu nia tinan 15, nia sente katak batizmu mak protesaun ba nia. Haʼu-nia oan dehan: ‘Haʼu la hanoin atu halo buat ruma neʼebé kontra Maromak Jeová nia ukun-fuan.’ Batizmu fó forsa duni ba nia atu halo buat neʼebé loos.”

Se Ita hanorin tiha ona Ita-nia oan sira liuhusi Ita-nia liafuan no ezemplu atu halo tuir Maromak Jeová, Ita bele fiar katak depois sira hetan tiha batizmu, sira sei kontinua atu halo ida-neʼe. Provérbios 20:7 hatete: “Ema laran loos laʼo ho laran-metin. Haksolok ba ninia oan sira neʼebé mai husi nia.”

Haʼu hakarak haree uluk haʼu-nia oan kumpre planu balu. Maski joven sira tenke aprende atu halo serbisu ruma hodi bele hetan buat neʼebé sira presiza ba sira-nia moris loroloron nian, maibé perigu se inan-aman fó laran-manas ba sira atu buka deʼit edukasaun boot ka osan barak duké adora Maromak. Jesus koʼalia kona-ba “fini”, ka liafuan Reinu nian, neʼebé la buras, hodi dehan: “Fini neʼebé monu iha ai-tarak laran mak ida neʼebé rona liafuan maibé knaar sira no rikusoi mundu neʼe nian hanehan liafuan neʼe; halo nia la fó fuan.” (Mt 13:22) Se inan ka aman fó laran-manas ba nia oan atu halo planu tuir buat mundu nian hodi halo nia oan haree ninia relasaun ho Maromak Jeová nuʼudar buat ida neʼebé ladún importante, ida-neʼe bele halakon oan nia hakarak atu serbí Maromak.

Irmaun ida neʼebé serbí nuʼudar katuas, kuandu nia koʼalia kona-ba joven sira neʼebé kumpre ona kritériu atubele hetan batizmu maibé sira-nia inan-aman la hanoin hanesan, nia dehan: “Hapara joven ida atu hetan batizmu bele hanetik dalan neʼebé nia laʼo ba oin iha lia-loos no bele halo nia sente laran-tun.” Irmaun ida neʼebé iha knaar atu vizita kongregasaun sira mós hatete: “Joven ida bele sente katak buat neʼebé nia halo iha lia-loos latoʼo no katak nia ladún iha folin. Ida-neʼe bele book nia atu buka buat mundu neʼe nian, atubele sente katak nia hetan susesu.”

[Dezeñu]

Tenkesér estuda uluk iha universidade ka lae?

[Dezeñu iha pájina 3]

Joven ida bele hatudu katak nia sai ona Kristu nia dixípulu

[Dezeñu iha pájina 3]

Prepara ba reuniaun no hola parte iha reuniaun

[Dezeñu iha pájina 4]

Halo tuir inan-aman

[Dezeñu iha pájina 4]

Hola parte iha serbisu haklaken

[Dezeñu iha pájina 4]

Halo orasaun rasik