Sena Bakubusi Baleelede Kubbapatizyigwa?

BA CARLOS * bausyi mwana baku Philippines bakaamba kuti: “Ndakkomana kuti mwanaangu musimbi waba mubelesi wa Jehova alimwi ndilizyi kuti awalo ulikkomene.” Muntu umwi waku Greece wakalemba kuti: “Mebo amukaintu wangu tulikkomene kuti bana besu botatwe bakabbapatizyigwa kuba Bakamboni ba Jehova nibakacili bakubusi. Bacita kabotu kumuuya alimwi balikkomene kubelekela Jehova.”

Bazyali Banakristo balijisi kaambo kabapa kukkomana ciindi bana babo nobabbapatizyigwa, pele zimwi ziindi nokuba kuti balakkomana balalibilika. Muzyali umwi mukaintu wakaamba kuti: “Ndakalikkomene kapati pele ndakalilibilikide.” Ino nkaambo nzi ncaakalimvwa boobo? Bakati: “Ndakazyiba kuti mwanaangu lino unoolyaambilila kuli Jehova.”

Kubelekela Jehova kabali Bakamboni babbapatizyidwe yeelede kuba mbaakani yabana boonse. Nokuba boobo, bazyali Banakristo balakonzya kulibilika kabati, ‘ndilizyi kuti mwanaangu ucita kabotu, pele sena uyakucikonzya kulilemeka akuzumanana kusalala mumeso aa Jehova?’ Bamwi balakonzya kulibuzya kuti, ‘Ikuti naa wasunkwa kuyandisya zyintu zyakumubili, sena mwanaangu uyakuzumanana kubelekela Leza cabusungu alimwi kakkomene?’ Aboobo, ino mbusolozi nzi bwamu Bbaibbele bukonzya kugwasya bazyali kuzyiba naa bana babo balilibambilide kubbapatizyigwa?

Kuba Sikwiiya wa Kristo Nceciyandika Kapati Kuti Muntu Abbapatizyigwe

Ijwi lya Leza nolyaamba uukonzya kweelela kubbapatizyigwa talyaambi myaka muntu njayelede kuba aanjiyo kutegwa abbapatizyigwe. Jesu wakalailila basikumutobela kuti: “[A]mukagwasye bantu bamisyobo yoonse kuba basikwiiya, akubabbapatizya.” (Mt. 28:19) Aboobo, kubbapatizyigwa nkwabaabo bakaba kale basikwiiya ba Kristo.

Ino sikwiiya nguni? Bbuku lya Insight on the Scriptures lilapandulula kuti: “Eeli bbala libelesyegwa kapati kuli baabo batasyomi buyo nzyayiisya Kristo pele bazitobela.” Sena bacili bana balakonzya kuba basikwiiya beni-beni  ba Kristo? Mucizyi iwabeleka myaka iili 40 kali misyinali mu Latin America wakalemba ncobakacita walo abanabokwabo basimbi bobilo, wakati: “Twakali bapati cakuti twakalizyi kuti tuyandika kumubelekela Jehova akupona mu Paradaiso. Ikulyaaba kwesu kwakatugwasya kuti tuliyumye mumapenzi nitwakacili bakubusi. Tatuuside kuti twakalyaaba kuli Leza katucili bana.”

Ino mbuti mbomukonzya kuzyiba kuti mwanaanu waba sikwiiya wa Kristo? Ibbaibbele lyaamba kuti: “Naba mwana ulazibwa kumilimo yakwe, na ncacita cililuleme akusalala.” (Tus. 20:11) Amubone zyintu zimwi zikonzya kutondezya kuti mwana “uyaambele” kali sikwiiya wa Kristo.—1 Ti. 4:15.

Citondezya Kuti Mwanaanu ngu Sikwiiya wa Kristo

Sena mwanaanu ulamumvwida? (Kol. 3:20) Sena ulaicita milimo njapegwa aŋanda? Ibbaibbele lyaamba Jesu wakali amyaka iili 12 kuti: “Wakazumanana kubamvwida [bazyali bakwe].” (Lk. 2:51) Nokuba boobo, taaku mwana uukonzya kubamvwida bazyali bakwe cakumaninina. Pele Banakristo bakasimpe beelede ‘kwiitobela mikondo ya Jesu.’ Aboobo bana bayanda kuti babbapatizyigwe beelede kumvwida bazyali babo.—1 Pe. 2:21.

Amulange-lange mibuzyo iitobela: Sena mwanaanu ‘ulazumanana kuyandaula Bwami’ kwiinda mukukambauka? (Mt. 6:33) Sena ulayanda kwaambila bamwi makani mabotu naa sena muyandika kuyuma buya kumukulwaizya kuti aunke mukukambauka? Mbwali sikumwaya uutanabbapatizyigwa, sena uluuzyi mukuli ngwajisi? Sena ulayanda kupilukila kuli baabo bakatondezya luyandisisyo mucilawo mukambaukilwa? Sena ulabaambila basicikolonyina abamayi kuti ngu Kamboni wa Jehova?

Sena kujanika kumiswaangano yambungano ncintu ciyandika kapati kulinguwe? (Int. 122:1) Sena cilamukkomanisya kwiingula muciiyo ca Ngazi Yamulindizi alimwi a Ciiyo ca Bbaibbele Cambungano? Sena musungu kutola lubazu mu Cikolo Camulimo Weendelezyegwa a Leza?—Heb. 10:24, 25.

Sena mwanaanu ulamvwana abantu batalilemeki kabotu kucikolo naa kuli koonse nkwabede? (Tus. 13:20) Ino uyandisya nyimbo zyamusyobo nzi, zisobano nzi zyaacipeku-peku, mavidiyo nzi ngayandisya alimwi wiibelesya buti Intaneti? Sena mbwaambaula ambwacita zyintu ulatondezya kuti ulayanda kuzitobela njiisyo zyamu Bbaibbele?

Ino mwanaanu ulizyi buti Bbaibbele? Sena ulakonzya kwaamba mumajwi aakwe nzyomwiiya ciindi ca Kukomba Mumukwasyi? Sena ulakonzya kupandulula makani aantalisyo amu Bbaibbele? (Tus. 2:6-9) Sena cilamukkomanisya kubala Bbaibbele amabbuku aamuzike musyomesi uucenjede? (Mt. 24:45) Sena ulabuzya mibuzyo iijatikizya njiisyo zyamu Bbaibbele alimwi atupango tumwi ntwatazyi?

Mibuzyo eeyi ilakonzya kumugwasya kuzyiba mwanaanu mpaendela kumuuya. Mwamana  kumubuzya-buzya mulakonzya kubona mpakonzya kubelekela katanabbapatizyigwa. Kuti naa watondezya kuti ngusikwiiya wa Kristo kweelana abukkale bwakwe alimwi waaba buumi bwakwe kuli Leza, mulakonzya kumuzumizya kuti abbapatizyigwe.

Bana Balakonzya Kumutembaula Jehova

Babelesi ba Leza banji bakali kusyomeka nibakali kukomena. Amubayeeye ba Josefa, Samuele, Josiya alimwi a Jesu. (Matl. 37:2; 39:1-3; 1 Sam. 1:24-28; 2:18-20; 2 Mak. 34:1-3; Lk. 2:42-49) Alimwi kuboneka kuti bana ba Filipi basimbi bone bakaliyiisyidwe kabotu kuzwa kubwana.—Mil. 21:8, 9.

Kamboni umwi waku Greece wakaamba kuti: “Ndakabbapatizyigwa nondakali amyaka iili 12 yakuzyalwa. Tanduuside akaambo kakusala ooku. Kuzwa ciindi eeco ndali kubeleka mumulimo waciindi coonse kwamyaka iili 23, lino ndili amyaka iili 24 kuzwa nindakabbapatizyigwa. Akaambo kakumuyanda Jehova, lyoonse cakali kundigwasya kuzunda mapenzi aakali kundisikila nindakacili mukubusi. Nindakali amyaka iili 12 tiindakajisi luzyibo lwa Magwalo mbuli ndondijisi mazuba aano. Pele ndakalizyi kuti ndakali kumuyanda Jehova alimwi ndakali kuyanda kumubelekela lyoonse. Ndilikkomene kuti wandigwasya kuti ndizumanane mumulimo wakwe.”

Ibana naa bapati ibatondezya kuti mbaasikwiiya beni-beni ba Kristo beelede kubbapatizyigwa. Mwaapostolo Paulo wakalemba kuti: “Muntu utondezya lusyomo ndwajisi mumoyo kutegwa abe mululami, pele amulomo wakwe ulaambilizya antangalala kutegwa ajane lufwutuko.” (Lom. 10:10) Kuti sikwiiya wa Kristo uucili mwana wabbapatizyigwa, walo abazyali bakwe balakkomana nkaambo baizuzikizya mbaakani iiyandika kapati. Taaku ceelede kumulesya kukkomana nywebo naa bana banu akaambo kacintu eeci cacitika mumukwasyi.

[Bupanduluzi buyungizidwe]

[Kabbokesi kali apeeji 5]

Mbotweelede Kukubona Kubbapatizyigwa

Bazyali bamwi babona kuti kubbapatizyigwa kwabana babo ncintu cimwi cigwasya pele cilibilisya—mbuli mbocilibilisya kubweza cipepa cizumizya kweenzya mootokala. Pele sena kubbapatizyigwa akucita mulimo uusetekene zilakonzya kusinkilila muntu kuti atakazwidilili? Bbaibbele liingula kuti peepe. Bbuku lya Tusimpi 10:22 lyaamba kuti: “Lulongezyo lwa-Jehova lulavubya, alimwi tayungizyi mause kulindulo.” Alimwi Paulo wakalembela Timoteo kuti: “Ncobeni, kuli mpindu mpati mukubelekela Leza cakulyaaba, ikuti naa twakkutila azyintu nzyotujisi.”—1 Ti. 6:6.

Masimpe, kubelekela Jehova cilakatazya. Jeremiya wakajana mapenzi manji mumulimo wakwe kali musinsimi wa Leza. Nokuba boobo, kujatikizya bukombi bwakwe kuli Leza wakalemba kuti: “Majwi aako naakajanwa, ndakaalya, nkabela majwi aako akandibeda lukondo abusekelezi bwamoyo, nkaambo ndaambwa muzina lyako, O Jehova Leza wamakamu.” (Jer. 15:16) Jeremiya wakalizyi kuti mulimo wa Leza ngowakali kumupa kukkomana. Inyika ya Saatani njiileta mapenzi. Bazyali beelede kubagwasya bana babo kuzyiba kwiindana ooku.—Jer. 1:19.

 [Kabbokesi/Cifwanikiso icili apeeji 6]

Sena Mwanaangu Weelede Kulindila-lindila Katanabbapatizyigwa?

Zimwi ziindi nokuba kuti bana balakonzya kweelela kubbapatizyigwa, bazyali babo balakonzya kwaamba kuti balindile-lindile. Nkaambo nzi?

Ndiyoowa kuti naa mwanaangu wabbapatizyigwa, ndiza ulakonzya kucita cibi cipati cikonzya kumupa kugusyigwa mumbungano. Sena ncamaano kuyeeya kuti, ikuti mwana katanabbapatizyigwa wabisya, takapegwi mulandu a Leza? Solomoni wakaamba majwi aatobela kubana naakati: “Koziba kuti nkaambo kazintu ezi zyoonse Leza ulakubeteka.” (Muk. 11:9) Paulo wakali kwaambila bamisela yoonse naakaamba kuti: “Aboobo Leza uyoobeteka umwi aumwi wesu kweelana amilimo yakwe.”—Lom. 14:12.

Boonse babbapatizyidwe abatabbapatizyidwe baya kulivwiilila kuli Leza. Mutalubi kuti Jehova ulabakwabilila babelesi bakwe kwiinda ‘mukutabalekela kuti basunkwe kwiinda nguzu zyabo pe.’ (1 Ko. 10:13) Kufwumbwa buyo kuti ‘kabalibatamika,’ bantu bali boobu balakonzya kusyoma Leza kuti uyakubagwasya kuzunda masunko. (1 Pe. 5:6-9) Mukaintu Munakristo wakalemba kuti: “Bana babbapatizyidwe balicizyi ncobateelede kucitila zibi zicitika munyika. Mwanaangu wakabbapatizyigwa kali amyaka iili 15 yakuzyalwa ulimvwa kuti kubbapatizyigwa kulamukwabilila. Wakaamba kuti: ‘Tokonzyi kuyeeya kucita cintu ciindene amulawo wa Jehova.’ Kubbapatizyigwa kupa kuti muntu kacita kabotu.”

Kuti naa mwabayiisya bana banu kwiinda mukubandika ambabo akucita zyintu kweelana ambwayanda Jehova, mulakonzya kusyoma kuti baakubbapatizyigwa bayoozumanana kunoocita mbubwenya oobo. Bbuku lya Tusimpi 20:7 lyaamba kuti: “Muntu uululeme uuenda cakoololoka, bali acoolwe bana bakwe baboola musule lyakwe.”

Ndiyanda kuti mwanaangu asaangune kuzuzikizya mbaakani zimwi. Bana beelede kwiiya milimo kutegwa baakukomena bakacikonzye kulibelekela. Pele kuli mapenzi kuti naa mwabakulwaizya kuti baiye akujana mali manji muciindi cakubikkila maano kubukombi bwakasimpe. Jesu naakali kwaamba “mbuto” naa jwi lya Bwami litakomeni wakaamba kuti: “Lino eeyo yakaminzwa mumamvwa, ngooyo uumvwa majwi, pele kulibilika kwamubweende bwazyintu oobu akweena kwabuvwubi zilaasyanikizya majwi, aboobo tazyali micelo.” (Mt. 13:22) Kuti naa muzyali wakulwaizya mwanaakwe kuti abe ambaakani zyakunyika akubona kuti milimo ya Jehova taiyandiki kapati, eeci cilakonzya kupa kuti mwana atamubelekeli kabotu Leza.

Mwaalu umwi uucibwene naakali kwaamba bazyali bakasya bana babo beelela kubbapatizyigwa wakaamba kuti: “Kukasya mwana kuti abbapatizyigwe kulakonzya kumutyompya akumupa kutacita kabotu.” Alimwi mulangizi weendeenda wakalemba kuti: “Mwana ulakonzya kulimvwa kuti takwabilidwe alimwi akuti tacimugwasyi kuzibikkila kapati maano zyintu zyakumuuya. Aboobo ulakonzya kubona kuti izyintu zyakunyika zilakonzya kumugwasya.”

[Cifwanikiso]

Sena kuya kucikolo cipati yeelede kuba mbaakani yanu?

[Cifwanikiso icili apeeji 3]

Mukubusi ulakonzya kutondezya kuti ngusikwiiya wa Kristo

[Zifwanikiso izili apeeji 3]

Kulibambila alimwi akutola lubazu amiswaangano

[Cifwanikiso icili apeeji 4]

Kumvwida bazyali

[Cifwanikiso icili apeeji 4]

Kutola lubazu mukukambauka

[Cifwanikiso icili apeeji 4]

Kupaila