Naa Vhaswa Vha Fanela U Lovhedzwa?

CARLOS * khotsi wa Mukriste wa ngei Philippines o ri: “Ndo takala nga maanḓa uri zwino ṅwananyana wanga o no vha mushumeli wa Yehova, nahone ndi a zwi ḓivha uri na ene o takala.” Muṅwe khotsi wa ngei Greece o ṅwala uri: “Nṋe na mufumakadzi wanga ro takala vhukuma uri vhana vhashu vhararu vho lovhedzwa sa Ṱhanzi dza Yehova musi vha tshee vhaswa. Vha khou ita mvelaphanḓa yavhuḓi muyani nahone vha a takalela u shumela Yehova.”

Vhabebi vha Vhakriste vha na tshiitisi tsha u takala musi vhana vhavho vha tshi lovhedzwa, fhedzi naho vha tshi takala nga zwiṅwe zwifhinga vha ḓipfa vha songo vhofholowa. Muṅwe mme o ri: “Ndo vha ndo takala vhukuma fhedzi ndi na mbilaelo.” Ndi ngani o vha a tshi ḓipfa nga nḓila yo raloho? O ri: “Ndi nga nṱhani ha uri ndo vha ndi tshi pfesesa uri zwino murwa wanga o vha o no vha na vhuḓifhunduleli tshoṱhe kha Yehova.”

U shumela Yehova sa Ṱhanzi yawe yo lovhedzwaho ndi tshipikwa tshine vhaswa vhoṱhe vha fanela u ḓivhetshela tshone. Naho zwo ralo, vhabebi vhane vha ofha Mudzimu vha nga kha ḓi ri, ‘Ndi a zwi ḓivha uri ṅwana wanga o no ita mvelaphanḓa yavhuḓi, fhedzi naa u ḓo kona u iledza mitsiko ya u ḓifara luvhi nahone a kona u dzula o kuna phanḓa ha Yehova?’ Vhaṅwe vha nga kha ḓi ḓivhudzisa uri, ‘Musi a tshi sedzana na mulingo wa u funesa zwithu zwi vhonalaho, naa ṅwana wanga u ḓo kona u bvela phanḓa a tshi takalela na u fhisetshela u shumela Mudzimu?’ Ndi vhulivhisi vhufhio vhu re Bivhilini ho teaho, vhune ha nga thusa vhabebi uri vha kone u vhona arali vhana vhavho vho no lugela u lovhedzwa?

U Vha Mufunziwa Wa Kristo—Ndi Zwa Ndeme Vhukuma

Nṱhani ha u vhea miṅwaha ine muswa a fanela u vha nayo u itela uri a kone u lovhedzwa, Ipfi ḽa Mudzimu ḽi ṱalusa vhuimo ha lwa muya ha vhane vha fanelea u dzhia vhukando honoho. Yesu o laedza vhatevheli vhawe a ri: “Ni ite vhathu vhoṱhe vhafunziwa nga u vha lovhedza.” (Mat. 28:19) Nga zwenezwo, hu lovhedzwa vhathu vho no ḓi vha ho vhafunziwa vha Kristo.

Mufunziwa ndi mini? Insight on the Scriptures i a ṱalutshedza: “Mubulo wonoyu u shuma zwihuluhulu kha vhathu vhoṱhe vhane vha sa sokou tenda fhedzi zwe Yesu a zwi funza, fhedzi vhane vha tevhedza pfunzo dzawe nga vhuronwane.” Naa vhana vhane vha kha ḓi vha vhaṱuku vha nga kona u vha vhafunziwa vha Kristo vha vhukuma?  Wahashu wa tshisadzini o no fhedzaho miṅwaha i fhiraho 40 a tshi khou shuma sa murumiwa ngei Latin America o ṅwala zwi tevhelaho malugana na ene muṋe, mukomana wawe na murathu wawe: “Ro vha ro no aluwa lune ra kona u ḓivha uri ri ṱoḓa u shumela Yehova na u tshila Paradisoni. U ḓiṋekedza hashu zwo ri thusa uri ri kone u ima ro khwaṱha musi ri tshi sedzana na milingo yo ḓoweleaho kha vhaswa. A ri ḓisoli nge ra ḓiṋekedzela kha Mudzimu ri tshi kha ḓi vha vhaṱuku.”

Ni ḓo zwi ḓivha hani uri ṅwana waṋu o no vha mufunziwa wa Kristo? Bivhili i ri: “Na mutukana, kana mishumo yawe i tshi ḓo naka ya luga, u ḓihwa nga zwiito zwawe.” (Mir. 20:11) Ṱhogomelani zwiṅwe zwithu zwine zwa sumbedza uri muswa u khou ita uri ‘a vhoniwe uri o no ita mvelaphanḓa’ ya u vha mufunziwa.—1 Tim. 4:15.

Vhuṱanzi Ha Uri O No Vha Mufunziwa

Naa ṅwana waṋu u a ni thetshelesa? (Vha-Kol. 3:20) Naa u a ita mishumo ye a ṋewa yone henefho hayani? Bivhili i amba zwi tevhelaho nga ha Yesu we a vha e na miṅwaha ya 12: “A dzula a tshi vha pfa [vhabebi vhawe].” (Luka 2:51) Ndi ngoho uri a hu na ṅwana ṋamusi ane a nga thetshelesa vhabebi vhawe nga ho fhelelaho. Fhedzi Vhakriste vha ngoho vha tea u “tevhela ṋayo dza [Yesu]” nga vhuḓalo. Ngauralo, vhaswa vhane vha ṱoḓa u lovhedzwa vha fanela u ḓivhiwa sa vhane vha thetshelesa vhabebi vhavho.—1 Pet. 2:21.

Ṱhogomelani mbudziso dzi tevhelaho: Naa ṅwana waṋu u dzula a tshi ‘ṱoḓa muvhuso wa Mudzimu’ u thoma vhuḓinḓani? (Mat. 6:33) Naa o ḓiimisela u vhudza vhaṅwe mafhungo maḓifha kana ni fanela u thoma na mu ṱuṱuwedza vhukuma uri a ye tshumeloni ya tsimu na uri a ambe na vhathu? Naa u a ḓivha vhuḓifhinduleli hawe sa muhuweleli a songo lovhedzwaho? Naa u na dzangalelo ḽa u ita nyendo dza u vhuyelela kha vhathu vhe a vha wana tsimuni? Naa u a vhudza vhane a dzhena navho tshikolo na vhadededzi vhawe uri u Ṱhanzi ya Yehova?

Naa u vha hone miṱanganoni ya tshivhidzo ndi zwa ndeme khae? (Ps. 122:1) Naa u a takalela u fhindula kha Pfunzo ya Tshiingamo na kha Pfunzo ya Bivhili ya Tshivhidzo? Naa u a ṱanganela nga mafulufulu kha Tshikolo tsha Vhuḓinḓa ha lwa Ṱaḓulu?—Vha-Heb. 10:24, 25.

Naa ṅwana waṋu u lwela u dzula e na vhuḓifari ho kunaho nga u iledza u vhumba vhukonani vhu si havhuḓi na vhane a dzhena navho tshikolo kana huṅwe fhethu? (Mir. 13:20) Ndi mini zwine a zwi khetha malugana na muzika, dzimuvi, mbekanyamushumo dza thelevishini, mitambo ya vidio, nahone u shumisa hani Inthanethe? Naa zwine a zwi amba na zwine a zwi ita zwi ṋea vhuṱanzi ha uri u ṱoḓa u tevhedza zwilinganyo zwa Bivhili?

Naa ṅwana waṋu u ḓivha Bivhili zwavhuḓi? Naa a nga kona u amba nga maipfi awe zwine a zwi guda kha Vhurabeli ha vhoiwe ha Muṱa ha nga madekwana? Naa u a kona u ṱalutshedza mafhungo-ngoho a mutheo a re Bivhilini? (Mir. 2:6-9) Naa u a takalela u vhala Bivhili na u guda khandiso dzo gandiswaho nga mukoma a fulufhedzeaho na wa vhuṱali? (Mat. 24:45) Naa u a vhudzisa nga ha zwine zwa funzwa Bivhilini na ndimana dzayo?

Dzenedzo mbudziso dzi ḓo ni thusa uri ni kone u vhona uri ṅwana waṋu o no ita mvelaphanḓa ya  lwa muya lungafhani. Musi no no dzi ṱolisisa, ni nga kha ḓi phetha nga uri hu na hune a fanela u khwinisa hone musi a sa athu lovhedzwa. Naho zwo ralo, arali matshilele awe a tshi sumbedza uri o no vha mufunziwa na uri o no ṋekedza vhutshilo hawe kha Mudzimu, ni nga kha ḓi vhona zwo tea u mu tendela uri a lovhedzwe.

Vhaswa Vha Nga Hulisa Yehova

Vhashumeli vhanzhi vha Mudzimu vho fulufhedzea musi vha tshee vhaswa. Edzani u humbula nga ha Yosefa, Samuele, Yosia, na Yesu. (Gen. 37:2; 39:1-3; 1 Sam. 1:24-28; 2:18-20; 2 Koron. 34:1-3; Luka 2:42-49) Nahone vhananyana vhaṋa vha Filipo vhe vha vha vha tshi porofita vha fanela u vha vho gudiswa zwavhuḓi vhukuma vha tshi kha ḓi vha vhaṱuku.—Mish. 21:8, 9.

Iṅwe Ṱhanzi ya ngei Greece yo ri: “Ndo lovhedzwa ndi na miṅwaha ya 12. A thi athu vhuya nda ḓisola nga phetho yanga. U bva tsheetsho, ho no fhela miṅwaha ya 24, nahone ya 23 kha yeneyo ndo i fhedza ndi tshumeloni ya tshifhinga tsho ḓalaho. U funa hanga Yehova zwo nthusa uri ndi kone u sedzana na khaedu dza vhuswa. Musi ndi tshee na miṅwaha ya 12, ndo vha ndi si na nḓivho nnzhi ya Maṅwalo u fana na ine nda vha nayo zwino. Fhedzi ndo vha ndi tshi zwi ḓivha uri Yehova ndi a mu funa na uri ndi ṱoḓa u mu shumela lini na lini. Ndi a takala vhukuma ngauri o nthusa uri ndi bvele phanḓa tshumeloni yawe.”

Hu sa londwi uri ndi muhulwane kana ndi muṱuku, muthu ane a zwi sumbedza uri u mufunziwa wa vhukuma u a fanelea uri a nga lovhedzwa. Muapostola Paulo o ṅwala uri: “Muthu u tenda nga mbilu, a kona u ḓo itwa o lugaho; muthu a ṱanziela nga mulomo, a kona u ḓo tshidzwa.” (Vha-Roma 10:10) Musi muswa ane a vha mufunziwa wa Kristo a tshi dzhia vhukando ha ndeme ha u lovhedzwa, ene na vhabebi vhawe vha vha vho swikelela tshipikwa tshavhuḓi vhukuma. Ni songo tendela hu tshi vha na tshithu tshine tsha ḓo thivhela inwi kana vhana vhaṋu u swikelela dakalo ḽo raloho ḽi swayeaho vhukuma.

[Ṱhaluso i re magumoni a siaṱari]

[Bogisi kha siaṱari 5]

Mavhonele O Teaho Nga Ha Ndovhedzo

Vhaṅwe vhabebi vha vhona u nga u lovhedzwa ndi u dzhia vhukando havhuḓi fhedzi vhu re na khombo—u fana na u dzhia ḽaisentsi ya u reila. Fhedzi naa u lovhedzwa na tshumelo khethwa zwi nga vhea vhutshilo ha muthu na vhumatshelo hawe khomboni ya uri a si bvelele? Bivhili a i tendelani na zwenezwo. Mirero 10:22 i ri: “Tshi pfumisaho ndi dziphaṱhutshedzo dza Yehova; a dzi ingiwi nga u ḓi-tambudza.” Nahone Paulo o ṅwalela Timotheo we a vha a tshee muswa a ri: “Hone ḽí bindu ḽihulu u ofha Mudzimu arali hú na u ḓi-takalela.”—1 Tim. 6:6.

Ndi ngoho uri u shumela Yehova a zwi leluwi. Yeremia o sedzana na vhuleme vhunzhi kha mushumo wawe sa muporofita wa Mudzimu. Naho zwo ralo, o ṅwala nga ha u shumela hawe Mudzimu wa ngoho a ri: “Nde’ ndó laiwa nga Iwe, mbilu yanga ya ḓi-phiṋa ya takala; nga u’ nda vhidzwa nga dzina ḽau, Yehova Mudzimu wa Mavhuthu.” (Yer. 15:16) Yeremia o vha a tshi zwi ḓivha uri u shumela Mudzimu ndi zwone zwine zwa mu ḓisela dakalo. Shango ḽa Sathane ndi ḽone ḽine ḽa ri ḓisela vhuleme. Vhabebi vha fanela u thusa vhana vhavho uri vha kone u ṱhogomela phambano i re hone kha u shumela Mudzimu na u sa mu shumela.—Yer. 1:19.

 [Bogisi/Tshifanyiso kha siaṱari 6]

Naa Ṅwana Wanga U Fanela U Thoma A Imanyana A Sa Athu Lovhedzwa?

Nga zwiṅwe zwifhinga, vhabebi vha nga kha ḓi phetha uri vhana vhavho vha thome u imanyana vha sa athu lovhedzwa, naho vha tshi fanelea. Zwiitisi zwavho zwi nga vha zwi zwifhio?

Ndi ofha uri arali ṅwana wanga a lovhedzwa, a nga kha ḓi ita tshivhi tshihulwane nga murahu nahone a bviswa tshivhidzoni. Naa zwi a pfala u humbula uri muswa ane a thoma a imanyana a sa athu lovhedzwa ha na vhuḓifhinduleli ha vhuḓifari hawe kha Mudzimu? Salomo o vhudza vhaswa maipfi a tevhelaho: “Hone, U ḓivhe zwauri Mudzimu u ḓo U sengisa hezwi [zwiito zwau] zwoṱhe.” (Muh. 11:9) Nahone Paulo ho ngo amba nga ha miṅwaha ine muthu a fanela u vha nayo musi a tshi ṋea nyeletshedzo ine ya ri: “Muthu washu u ḓo tou ḓi-fhindulela nga eṱhe Mudzimuni.”—Vha-Roma 14:12.

Vhashumeli vha Mudzimu vho lovhedzwaho na vha songo lovhedzwaho vha na vhuḓifhinduleli khae. Ni songo hangwa uri Yehova u tsireledza vhashumeli vhawe nga u sa ‘tenda vha tshi lingiwa luné vha sa ḓo lu kona.’ (1 Vha-Kor. 10:13) Arali vha ‘dzula vho fhaṱuwa’ nahone vha lwisana na milingo, vha nga lavhelela uri Mudzimu a vha tikedze. (1 Pet. 5:6-9) Muṅwe mme wa Mukriste o ṅwala uri: “Vhaswa vho lovhedzwaho vha na zwiitisi zwinzhi zwa u sa ṱanganela kha u ita zwithu zwivhi zwa shango. Murwa wanga we a lovhedzwa e na miṅwaha ya 15 u vhona uri u lovhedzwa zwi a tsireledza. O ri: ‘A ni vhuyi na ṱoḓa u humbula nga ha u ita zwithu zwi sa tshimbidzani na mulayo wa Yehova.’ U lovhedzwa zwi a ni thusa uri ni ḓiimisele tshoṱhe u ita zwo lugaho.”

Arali na gudisa vhana vhaṋu u thetshelesa Yehova nga zwine na zwi amba na nga tsumbo ine na vha vhetshela yone, ni nga vha na vhungoho ha uri na musi vho no lovhedzwa vha ḓo bvela phanḓa vha tshi mu thetshelesa. Mirero 20:7 i ri: “Muvhuya mu-tevhedza-lukuna, vhana vha sala vhe vha mashudu” kana vha tshi mu edzisa.

Ndi nga ṱoḓa ṅwana wanga a tshi thoma a swikelela zwiṅwe zwipikwa. Vhaswa vha fanela u guda u shuma u itela uri nga u ya ha tshifhinga vha kone u ḓiṱhogomela. Fhedzi hu nga vha na khombo arali ra vha ṱuṱuwedza uri vha tovhole pfunzo na u ṱoḓa tsireledzo kha zwa dzitshelede nṱhani ha u tovhola vhurabeli ha ngoho. Musi a tshi amba nga ha “mbeu” kana fhungo ḽa Muvhuso ḽi sa aṋwi mitshelo, Yesu o ri: “Yo zwalwaho mipfani i fanyisa muthu ané a ri u̗ pfa fhungo, u̗ vhilaelela vhutshilo vhuno na vhufhura ha lupfumo zwa pwanyeledza fhungo, zwa ḽi kundisa u aṋwa mitshelo.” (Mat. 13:22) Arali mubebi a ṱuṱuwedza ṅwana wawe uri a ḓivhetshele zwipikwa zwa shango nahone a sa dzhiele nṱha vhushaka hawe na Yehova, zwenezwi zwi nga ita uri ṅwana onoyo a si tsha vha na lutamo lwa u shumela Mudzimu.

Musi a tshi amba nga ha vhaswa vhane vha fanelea u lovhedzwa fhedzi vhane vhabebi vhavho vha sa tendelane nazwo, muṅwe muhulwane a re na tshenzhelo o ri: “U thivhela muswa uri a lovhedzwe zwi nga ita uri a si tsha bvela phanḓa zwavhuḓi ngohoni nahone zwa mu kula nungo.” Nahone mulavhelesi a dalelaho zwivhidzo o ṅwala uri: “Muswa a nga kha ḓi thoma u sa ḓifulufhela nga lwa muya kana u ḓipfa a sa fanelei. A nga kha ḓi thoma u tovhola zwithu zwa shango nga nṱhani ha u ṱoḓa u pfa u nga hu na zwine a khou bvelela khazwo.”

[Tshifanyiso]

Naa u ya yunivesithi ndi zwone zwine zwa fanela u ḓa u thoma?

[Tshifanyiso kha siaṱari 3]

Muswa a nga sumbedza uri o no vha mufunziwa wa Kristo

[Zwifanyiso kha siaṱari 3]

U lugiselela na u fhindula miṱanganoni

[Tshifanyiso kha siaṱari 4]

U thetshelesa vhabebi

[Tshifanyiso kha siaṱari 4]

U ṱanganela vhuḓinḓani

[Tshifanyiso kha siaṱari 4]

U rabela e eṱhe