Jasin fɛ kun m’ɔ fata kɛ sran kwlaa si i’n
Jasin fɛ kun m’ɔ fata kɛ sran kwlaa si i’n
“Jasin fɛ’n [...] i yɛ ɔ ti fanngan nga Nyanmiɛn fa de sran nga be lafi i su’m be kwlaa-a.”—RƆM. 1:16.
1, 2. ?Ngue ti yɛ amun bo ‘Nyanmiɛn sielɛ’n i jasin fɛ’n’ niɔn? ?Yɛ i bolɛ nun ndɛ benin yɛ amun kan tin su ɔ?
‘KƐ M bo jasin fɛ’n cɛn kwlaa’n, ɔ yo min fɛ.’ Kɛlɛ amun a bu i sɔ akunndan’n le annzɛ amun a kan sɔ le. Kɛ mɔ amun ti Zoova i Lalofuɛ juejuefuɛ’n ti’n, amun si kɛ ‘Nyanmiɛn sielɛ’n i jasin fɛ’n’ i bolɛ’n ti cinnjin. Atrɛkpa’n, i sɔ yolɛ’n i su ndɛ nga Zezi kannin’n, ɔ o amun klun.—Mat. 24:14.
2 Kɛ amun bo ‘Nyanmiɛn sielɛ’n i jasin fɛ’n,’ ɔ ti kɛ nn like nga Zezi boli i bo laa’n, i yɛ amun su yo kɔ ɔ. (An kanngan Lik 4:43 nun.) Jasin fɛ’n i bolɛ’n nun’n, atrɛkpa’n ndɛ nga amun kan tin su’n, yɛle kɛ ɔ cɛ kaan sa’n, Ɲanmiɛn wá kpɛ́ i ɲin klɔ sran’m be su. Yɛle kɛ ‘nyrɛnnɛn dan’n’ nun’n, ɔ́ núnnún Ɲanmiɛn sulɛ wafa ng’ɔ timan su’n ɔ nin klunwi’n asiɛ’n su treketreke. (Mat. 24:21) Wie liɛ kusu’n, amun kan kɛ Ɲanmiɛn Sielɛ’n wá yó maan asiɛ’n káci mɛn klanman ekun. Ɔ maan bé dí fɔundi nin aklunjuɛ’n asiɛ wunmuan’n su. Ɲanmiɛn ‘boli ndɛ fɛ [kun] su kleli Abraam, ɔ seli i kɛ: “Ɔ ti’n, ń yó nvle-nvle’m be kwlaa be nunfuɛ’m be ye.”’ ‘Nyanmiɛn sielɛ’n i jasin fɛ’n’ ɔ o ndɛ fɛ sɔ’n nun wie.—Gal. 3:8.
3. ?Ngue ti yɛ e kwla se kɛ akoto Pɔlu kannin jasin fɛ’n i ndɛ tinnin su Rɔmfuɛ Mun fluwa’n nun ɔn?
3 Sanngɛ atrɛkpa’n, jasin fɛ’n i nun like cinnjin kpa kun o lɛ mɔ e ɲin kwla kpa su kan ɔn. Kɛ akoto Pɔlu klɛ́ Rɔmfuɛ Mun fluwa’n Glɛki aniɛn’n nun’n, ɔ kannin Ɲanmiɛn ‘Sielɛ’n’ i ndɛ kpɛ kunngba. Sanngɛ ndɛ “jasin fɛ’n” o nun kpɛ 12. (An kanngan Rɔmfuɛ Mun 14:17 nun.) ?Fluwa sɔ’n nun’n, jasin fɛ’n i nun like benin yɛ Pɔlu kɛnnin i ndɛ kpɛ sunman sɔ ɔ? ?Ngue ti yɛ jasin fɛ’n i nun like sɔ’n ti cinnjin kpa ɔ? ?Yɛ ngue ti yɛ kɛ é bó “Nyanmiɛn i jasin fɛ’n” é klé sran mun’n, ɔ fata kɛ i sɔ’n tran e klun ɔn?—Mar. 1:14; Rɔm. 15:16; 1 Tɛs. 2:2.
Like ng’ɔ fata kɛ Rɔmufuɛ’m be si i’n
4. ?Kɛ be wlali Pɔlu bisua klikli Rɔmu lɔ’n, jasin benin yɛ Pɔlu boli ɔ?
4 Kɛ be wlali Pɔlu bisua klikli Rɔmu lɔ’n, ndɛ ng’ɔ kannin be’n, be su like suanlɛ’n kwla uka e. E kɛnngɛn i kɛ i nun mɔ Zuifu wie’m be ko niɛnnin i osu’n, ɔ kannin ‘(1) Nyanmiɛn sielɛ ndɛ’n kleli be, yɛ ɔ kleli be weiin kpa kɛ (2) Jésus [su] ndɛ’n ti nanwlɛ.’ ?I sɔ’n i bo’n guali sɛ? “Be wie’m be fali ndɛ b’ɔ kannin’n su, sanngɛ be wie’m b’a fa-man su.” I sin’n, ‘be kwlaa nga be ba [Pɔlu] i wun wunlɛ’n, ɔ sɔ be nun. Ɔ kan (1) Nyanmiɛn sielɛ ndɛ’n kle be, yɛ ɔ kle (2) e Min Jésus-Krist i ndɛ’n.’ (Yol. 28:17, 23-31) Ɔ ti weiin kɛ Pɔlu fɛli i ɲin sieli i Ɲanmiɛn Sielɛ’n su. ?Sanngɛ ngue ekun su yɛ ɔ fali sran’m be ɲin sieli ɔ? Yɛle like kun m’ɔ ti cinnjin kpa Ɲanmiɛn Sielɛ’n nun’n. Like sɔ’n yɛle junman nga Zezi di i Ɲanmiɛn i klun sa’n i su kpɛnlɛ’n nun’n.
5. ?Rɔmfuɛ Mun fluwa’n nun’n, like ng’ɔ fata kɛ sran’m be si i mɔ Pɔlu kɛnnin i ndɛ’n yɛle benin?
5 Ɔ fata kɛ sran’m be ngba be si Zezi i su ndɛ’n naan be lafi i su. Rɔmfuɛ Mun fluwa’n nun’n, Pɔlu kɛnnin i sɔ liɛ’n i ndɛ. Ɔ dun mmua klɛli i kɛ: ‘Nyanmiɛn bɔ min akunndan’n kwlaa wo i sulɛ’n su’n, bɔ m bo i Wa’n i jasin fɛ’n.’ Yɛ ɔ kan guali su kɛ: “Nyannzuɛn kun-man min Jasin fɛ’n bolɛ nun. Afin i yɛ ɔ ti fanngan nga Nyanmiɛn fa de sran nga be lafi i su’m be kwlaa-a.” I sin’n, ɔ kannin blɛ nga “Nyanmiɛn maan Krist-Jésus wá nían sa kpa annzɛ sa tɛ nga sran’m be yo fia’n,” i ndɛ. Kpɛkun ɔ seli kɛ: ‘Kɛ m boli Krist i jasin fɛ’n * kwlakwlakwla sa. M boli i Zerizalɛm bue liɛ’n su lele fa juli Iliri.’ (Rɔm. 1:9, 16; 2:16; 15:19) ?Kɛ amun niɛn i sa’n, ngue ti yɛ Pɔlu kannin Zezi Klist i ndɛ kleli Rɔmufuɛ mun kpɛ sunman sɔ ɔ?
6, 7. ?Rɔmu lɔ asɔnun’n i bo bolɛ’n nin i nun sran’m be su ndɛ benin yɛ e kwla kan ɔn?
6 E siman wafa nga Rɔmu lɔ asɔnun’n boli i bo’n. Sɛ afuɛ 33 nun Zuifu nin be nga be timan Zuifu mɔ be ɔli Pantekɔtu dilɛ, mɔ be kacili Klistfuɛ’n, be yɛ be bali Rɔmu lɛ e. (Yol. 2:10) Sɛ kusu Klistfuɛ wie mɔ be ti aata difuɛ’n annzɛ be su kɔ lika’n yɛ be fali ndɛ nanwlɛ’n be truli Rɔmu lɛ e. I kwlaa sɔ’n e siman nun. Sanngɛ i kwlaa yoli o, kɛ Pɔlu klɛ́ fluwa’n afuɛ nga be flɛ i 56 nun’n, nn be takali lɔ asɔnun’n w’a cɛ. (Rɔm. 1:8) ?Sran wafawafa benin mun yɛ be o asɔnun sɔ’n nun ɔn?
7 Wie’m be ti Zuifu. Kɛ Pɔlu yó Andrɔnikisi nin Ziniasi be like’n, i waan be ‘ti i osufuɛ.’ Yɛle kɛ be ti Zuifu kɛ i sa. Akilasi m’ɔ yo tannin sua Rɔmu lɔ’n ɔ nin i yi Priska be ti Zuifu wie. (Rɔm. 4:1; 9:3, 4; 16:3, 7; Yol. 18:2) Sanngɛ aniaan kpanngban wie mɔ Pɔlu yoli be like’n, be timan Zuifu. Laa, be nun wie’m be ti ‘Sezar awlofuɛ.’ Atrɛkpa’n laa be ti Sezali i kanga annzɛ i komin.—Fil. 4:22; Rɔm. 1:5, 6; 11:13.
8. ?Sa benin yɛ ɔ o Rɔmufuɛ’m be su ɔ?
8 Ɲrɛnnɛn sa kunngba ng’ɔ tɔli Klistfuɛ kwlaa nga be o Rɔmu lɔ’n be su’n, ɔ o e su wie. Pɔlu kan sa sɔ’n i ndɛ se kɛ: “Sran’m be kwlaa be yoli sa tɛ, ɔ maan anyrunnyan nga Nyanmiɛn waan ɔ́ mán be’n, ɔ to fuannin be.” (Rɔm. 3:23) I sɔ’n kle weiin kɛ ɔ fata kɛ be ngba nga Pɔlu klɛli fluwa ko mannin be’n be wun i wlɛ kɛ be ti sa tɛ yofuɛ naan ɔ fata kɛ be lafi like nga Ɲanmiɛn waan ɔ́ fá dé be’n su.
Maan sran’m be wun i wlɛ kɛ be ti sa tɛ yofuɛ
9. ?Jasin fɛ’n i su ye benin yɛ sran’m be kwla ɲɛn i mɔ Pɔlu boli su ɔ?
9 Rɔmfuɛ Mun fluwa’n i su fitilɛ’n nun’n, jasin fɛ’n nga Pɔlu kɛnnin i ndɛ kpɛ sunman’n, i su ye nga sran’m be kwla ɲɛn i’n, ɔ boli su. I waan: ‘Nyannzuɛn kun-man min Jasin fɛ’n bolɛ nun. Afin i yɛ ɔ ti fanngan nga Nyanmiɛn fa de sran nga be lafi i su’m be kwlaa-a, Zuif’m be yɛ be ti klikli-ɔ, i sin be nga mun.’ Ɔ maan sran’m be kwla fin nun fite. Sanngɛ kɛ nga ndɛ cinnjin ng’ɔ o Abakik 2:4 nun’n fa kan’n sa’n, ɔ fata kɛ be lafi Ɲanmiɛn su. Ndɛ sɔ’n waan: “Sran ng’ɔ lafi n su b’ɔ maan ɔ kaci sran kpa’n, ɔ́ nyán nguan..” (Rɔm. 1:16, 17; Gal. 3:11; Ebr. 10:38) ?Sanngɛ ngue yɛ ɔ o jasin fɛ’n mɔ maan sran kwla ɲan nguan’n, ɔ nin kɛ ‘sran’m be kwlaa be yoli sa tɛ’n’ be afiɛn ɔn?
10, 11. ?Ngue ti yɛ sran wie’m be wun ndɛ ng’ɔ o Rɔmfuɛ Mun 3:23 nun’n i wlɛ mɔ wie’m be wunmɛn i wlɛ ɔ?
10 Ɔ fata kɛ sran kun dun mmua wun i wlɛ kɛ ɔ ti sa tɛ yofuɛ naan w’a kwla yi Ɲanmiɛn sulafilɛ m’ɔ man nguan’n i nglo. Be nga kɛ ɔ fɛ i be kaan nun lele be lafi Ɲanmiɛn su kɛ o lɛ sakpa’n, ɔ nin be nga be si Biblu’n nun ndɛ wie mun’n, be kwla wun i wlɛ kɛ be ti sa tɛ yofuɛ. (An kanngan Akunndanfuɛ’n 7:20 nun.) Pɔlu seli kɛ: “Sran’m be kwlaa be yoli sa tɛ.” (Rɔm. 3:23) Sɛ be bu i nanwlɛ o annzɛ be bumɛn i nanwlɛ o, i kwlaa yoli o, be wun Pɔlu i ndɛ’n i wlɛ. Sanngɛ jasin fɛ’n i bolɛ’n nun’n, e nin sran wie mɔ be wunman ndɛ sɔ’n i wlɛ’n, e kwla yia nun.
11 Nvle wie’m be nun’n, b’a kleman sran’m be kɛ be nin sa tɛ yolɛ’n fin be nin klun. I yo, sran sɔ’m be kwla wun i kɛ be fɔn, naan nzuɛn tɛ wie’m be o be nun, yɛ atrɛkpa’n be yoli ninnge tɛtɛ wie mun. Kpɛkun be wun i wlɛ kɛ i sɔ sa’n o be wiengu’m be su wie. Sanngɛ wafa nga be fa tali be’n ti’n be wunman like nga ti yɛ be nin be wiengu’m be ti sɔ’n i wlɛ. I kpa’n, aniɛn wie’m be nun’n, sɛ a se sran kun kɛ ɔ ti sa tɛ yofuɛ’n, sran uflɛ’m be kwla bu i kɛ a su se kɛ sran’n yo sa tɛ annzɛ ɔ fɔn mmla wie mun. Ɔ maan sran nga be tɛli i sɔ lika’n nun’n, ɔ kwlá bumɛn i wun kɛ ɔ nin sa tɛ yolɛ’n fin i nin klun kɛ nga Pɔlu fa kannin’n sa.
12. ?Ngue ti yɛ sran kpanngban be bumɛn i kɛ sran’m be ngba be ti sa tɛ yofuɛ ɔ?
12 Nvle nga be waan be ti Klistfuɛ nvle’n, be nun bɔbɔ’n, wie liɛ’n sran’m be bumɛn i kɛ be ti sa tɛ yofuɛ. ?Ngue ti ɔ? Yɛle kɛ kannzɛ be kɔ asɔnun cɛn kunngun’n, sanngɛ be bu i kɛ Adam nin Ɛvu be su ndɛ ng’ɔ o Biblu’n nun’n, ɔ ti kɛ ngua sa. Wie’m be liɛ’n kan nga be tali be lɛ’n, sran’m be waan Ɲanmiɛn nunman lɛ, annzɛ be waan like fi kleman kɛ Ɲanmiɛn o lɛ. I sɔ’n ti’n, be bɔbɔ’n b’a bumɛn i kɛ Ɲanmiɛn o lɛ kun. Ɔ maan kɛ be se kɛ sran kun mɔ like fi nunmɛn i sin’n o lɛ’n, naan ɔ kpɛ mmla man klɔ sran mun’n, naan sɛ be tɔn mmla sɔ mun’n nn b’a yo sa tɛ’n, be wunmɛn i wlɛ. Sɛ é kwlá sé’n, be ti kɛ Klistfuɛ klikli’m be blɛ sufuɛ nga Pɔlu kannin be ndɛ kɛ be ‘lɛ-man like bɔ be fa be wla gua su-ɔ,’ naan be ‘si-man Nyanmiɛn’n’ be sa.—Efɛ. 2:12.
13, 14. (a) ?Like benin ti yɛ be nga be lafiman Ɲanmiɛn su mɔ be bumɛn i kɛ be ti sa tɛ yofuɛ’n be leman ndɛ fi ɔ? (b) ?Kɛ be lafiman su sɔ’n ti’n, ngue sa mun yɛ be yo be ɔ?
13 Maan ɔ yo laa o i andɛ o, like nɲɔn mɔ be ti yɛ sran kun kwlá jranman wafa nga be fa tɛli i’n i su seman kɛ ɔ wunman sa tɛ yolɛ’n i wlɛ’n, Pɔlu kannin be ndɛ Rɔmfuɛ Mun fluwa’n nun. Like klikli’n yɛle kɛ ninnge nga Ɲanmiɛn yili be’n, be kle weiin kɛ Like Yifuɛ kun o lɛ. (An kanngan Rɔmfuɛ Mun 1:19, 20 nun.) I sɔ ndɛ’n, ɔ nin ndɛ nga Pɔlu kɛnnin i fluwa ng’ɔ klɛli ko mannin Ebre mun’n i nun’n, be kɔ likawlɛ. I nun ng’ɔ o Rɔmu lɔ’n yɛ ɔ klɛli be fluwa sɔ’n niɔn. Ɔ seli kɛ: “Sua nga be o lɛ’n, sran yɛ ɔ kplannin be kwlaa-a, sanngɛ Nyanmiɛn yɛ ɔ yili ninnge’n kwlaa-a.” (Ebr. 3:4) Ndɛ nga Pɔlu su kɛn i wa’n ɔ kle kɛ Like Yifuɛ kun m’ɔ yili nglo nin asiɛ’n ɔ o lɛ.
14 I sɔ’n ti’n, kɛ Pɔlu klɛ́ Rɔmfuɛ Mun fluwa’n, nán ngbɛn ti yɛ ɔ kannin ndɛ yɛ’n niɔn. Ɔ seli kɛ sran nga be su waka sran mun’n, maan be yo Izraɛlifuɛ laa o annzɛ sran uflɛ o, “be lɛ-man ndɛ fi.” Be nga be yo ɲannzuɛn sa mɔ be yaci bian annzɛ bla nna nga Nyanmiɛn sieli’n, kpɛkun be nin be wiengu yasua annzɛ bla be la’n, i sɔ ndɛ’n wɔ be wie. (Rɔm. 1:22-27) Ɔ maan Pɔlu guɛli i ndɛ’n i bo kɛ “sa tɛ’n w’a ka sran’m be kwlaa be nun, Zuif mun o, sran wie mun o.”—Rɔm. 3:9.
Like nga mɔ ‘maan e wun’ i wlɛ kɛ e ti sa tɛ yofuɛ’n
15. ?Ngue yɛ sran ngba le i ɔ? ?Ngue yɛ i sɔ’n yo maan be yo ɔ?
15 Like kun ekun mɔ i ti yɛ ɔ fata kɛ sran’m be wun i wlɛ kɛ be ti sa tɛ yofuɛ naan ɔ fata kɛ be de be’n, Rɔmfuɛ Mun fluwa’n kleli. Mmla nga Ɲanmiɛn kpɛli mannin Izraɛlifuɛ mun’n, i su ndɛ nga Pɔlu klɛli’n yɛ. I waan: “Be kwlaa nga be si mmla’n bɔ be yo sa tɛ’n, bé jrán mmla’n su yɛ bé dí be jɔlɛ nin-ɔn.” (Rɔm. 2:12) Ɔ kan guali su ekun kɛ be nga be timan Zuifu mɔ be siman Ɲanmiɛn i mmla’n, ɔ ju wie’n, “be yo sa nga be klɛli mmla’n nun kɛ sran yo’n.” ?Ngue ti yɛ lika sunman nun’n, plɔplɔ dilɛ nin sran kunlɛ nin awie wualɛ’n be ti tɛ ɔ? Pɔlu kleli like nga ti yɛ ɔ ti sɔ’n. I waan be klun akunndan’n ti ɔ.—An kanngan Rɔmfuɛ Mun 2:14, 15 nun.
16. ?Ngue ti yɛ be klun akunndan’n mɔ sran kun le i’n, ɔ kleman kɛ ɔ su yoman sa tɛ ɔ?
16 Sran’n i klun akunndan’n ti kɛ i klun lɔ like wie m’ɔ ukɛ i naan w’a wun sa wlɛ’n sa. Kannzɛ ɔ ti sɔ’n, sanngɛ atrɛkpa’n amun a sie i nzɔliɛ kɛ i sɔ’n kleman kɛ sran sɔ’n fá atin nga i klun akunndan sɔ’n kle i’n su. Laa Izraɛlifuɛ’m be su ndɛ’n yi i sɔ liɛ’n i nglo. Ɲanmiɛn mannin be be klun akunndan’n ɔ nin mmla’n kɛ ɔ́ fá sásá be awie’n nin be yi bo bla kunndɛlɛ’n annzɛ be wun bo bian kunndɛlɛ’n be lika. Ɔ nin i sɔ ngba’n, kpɛ sunman’n, b’a faman atin nga be klun akunndan’n kle be’n ɔ nin Zoova i mmla’m be su. (Rɔm. 2:21-23) I sɔ’n ti’n, be fɔnnin tratrali su, ɔ maan be yoli sa tɛ yofuɛ. Yɛle kɛ b’a kwlá nianman Ɲanmiɛn i mmla’n ɔ nin i klun sa’n su b’a nantiman. Ɔ maan be nin be Yifuɛ’n be afiɛn’n sacili tɛ kpa.—Sau. 19:11; 20:10; Rɔm. 3:20.
17. ?Ndɛ benin yɛ ɔ o Rɔmfuɛ Mun fluwa’n nun m’ɔ wla e fanngan ɔn?
17 Rɔmfuɛ Mun fluwa’n i nun ndɛ nga y’a koko be su yalɛ lɛ’n be ti’n, ɔ kwla yo e kɛ Ɲanmiɛn mɔ like fi nunmɛn i sin’n i ɲrun’n, e klɔ sran mun y’a mlin mlɔnmlɔn sa. Sanngɛ Pɔlu w’a jrɛnmɛn i ndɛ’n i lɛ. Ɔ boli Davidi i ndɛ ng’ɔ o Jue Mun 32:2 su. Ɔ klɛli i kɛ: “Be nga be tɔn mmla’n bɔ Nyanmiɛn yaci cɛ be’n, b’ɔ kata be sa nga be yoli i’n su’n, be liɛ su ti ye! Sran nga e Min Nyanmiɛn’n bu-mɛn i sa b’ɔ yo i’n i akunndan kun’n, i liɛ su ti ye!” (Rɔm. 4:7, 8) Ɲanmiɛn fali ajalɛ naan w’a yaci sran’m be sa tɛ mun w’a cɛ be, naan i sɔ yolɛ’n nun’n w’a fɔnmɛn i bɔbɔ i mmla mun.
Jasin fɛ mɔ i bo’n taka Zezi su’n
18, 19. (a) ?Rɔmfuɛ Mun fluwa’n nun’n, jasin fɛ’n i nun like benin su yɛ Pɔlu fɛli i ɲin sieli ɔ? (b) ?Sɛ e waan é ɲán Ɲanmiɛn Sielɛ’n i su mmlusuɛ’n wie’n, ngue yɛ ɔ fata kɛ e wun i wlɛ ɔ?
18 Kɛ e bu ajalɛ nga Zoova fali’n i akunndan’n, e kwla se kɛ “nanwlɛ i sɔ’n ti jasin fɛ!” Ɔ ti sɔ sakpa kusu. I sɔ’n fa e ɲin sie i jasin fɛ’n i nun like nga Pɔlu kɛnnin i ndɛ Rɔmfuɛ Mun fluwa’n nun’n, i su ekun. Kɛ nga e fa kannin’n sa’n, Pɔlu klɛli i kɛ: “Nyannzuɛn kun-man min Jasin fɛ’n bolɛ nun. Afin i yɛ ɔ ti fanngan nga Nyanmiɛn fa de sran nga be lafi i su’m be kwlaa-a.”—Rɔm. 1:15, 16.
19 Junman nga Zezi di i Ɲanmiɛn i klun sa’n i su kpɛnlɛ’n nun’n, i su yɛ jasin fɛ’n sɔ’n, i bo’n taka ɔ. Ɔ maan “cɛn nga Nyanmiɛn maan Krist-Jésus wá nían sa kpa annzɛ sa tɛ nga sran’m be yo fia’n,” Pɔlu i ɲin kwla tran i su ‘jasin fɛ’n b’ɔ kan’n’ i sin. (Rɔm. 2:16) I sɔ mɔ Pɔlu kannin’n, ɔ kleman kɛ ‘Krist nin Nyanmiɛn be sielɛ’n,’ yɛle kɛ like nga Ɲanmiɛn fɛ́ i Sielɛ’n yó’n, Pɔlu su fa trɛtrɛ i sa bɛ’n nun. (Efɛ. 5:5) Sanngɛ ɔ kleli kɛ aklunjuɛ nga be nga bé trán Ɲanmiɛn Sielɛ’n i bo’n bé dí’n, sɛ e waan é dí wie’n, ɔ fata kɛ e wun i wlɛ kɛ (1) Ɲanmiɛn ɲrun’n, e ti sa tɛ yofuɛ naan (2) ɔ fata kɛ e lafi Zezi Klist su naan w’a yaci e sa tɛ mun w’a cɛ e. Kɛ sran kun wun Ɲanmiɛn i klun sa sɔ’m be wlɛ m’ɔ wun wafa nga i sɔ’n yo maan ɔ kwla fɛ i wla guɛ i like kun su’n, ɔ kwla se kɛ: “Nanwlɛ, ɔ ti jasin fɛ sakpa!”
20, 21. ?Kɛ é dí Ɲanmiɛn junman’n, ngue ti yɛ ɔ fata kɛ jasin fɛ’n nga be kɛnnin i ndɛ kpɛ sunman Rɔmfuɛ Mun fluwa’n nun’n, ɔ tran e klun titi ɔ? ?Yɛ wafa sɛ yɛ i sɔ’n i bo’n kwla gua ɔ?
20 Kɛ é dí e Klistfuɛ junman’n, maan jasin fɛ’n i nun like sɔ’n tran e klun titi. I nun mɔ Pɔlu kán Zezi i ndɛ’n, ɔ boli Ezai i ndɛ yɛ’n su. I waan: “Sran kwlaa ng’ɔ lafi i su’n, i nyin su gua-man ase.” (Rɔm. 10:11; Eza. 28:16) Andɛ’n, be nga be si ndɛ nga Biblu’n kɛn i sa tɛ’n su’n, be si Zezi i su ndɛ’n kan. Sanngɛ sran uflɛ’m be liɛ’n be nin a timan ndɛ sɔ’n le. Yɛle kɛ lika nga be tali be lɔ’n, be simɛn i sɔ ndɛ’n annzɛ sran’m be lafiman su. Kɛ i sɔfuɛ’m be ko lafi Ɲanmiɛn nin Biblu’n su’n, ɔ fata kɛ e yiyi junman nga Zezi di’n i nun e kle be. Like suanlɛ ng’ɔ́ bá lɛ’n, ɔ́ wá kán wafa nga Rɔmfuɛ Mun ndɛ tre 5 yiyi jasin fɛ’n i nun like sɔ’n nun’n i ndɛ. É wá wún i kɛ like suanlɛ sɔ’n úka e kpa jasin fɛ’n i bolɛ’n nun.
21 Nanwlɛ, jasin fɛ’n nga be kɛnnin i ndɛ kpɛ sunman Rɔmfuɛ Mun fluwa’n nun’n, kɛ e uka sran kpa mun mɔ be wun i wlɛ’n, e ɲan su ye dan. Yɛle kɛ jasin fɛ’n sɔ’n yɛ ɔ “ti fanngan nga Nyanmiɛn fa de sran nga be lafi i su’m be kwlaa-a.” (Rɔm. 1:16) Kɛ e ko ɲɛn i sɔ mmlusuɛ liɛ’n, sran uflɛ mɔ Pɔlu i ndɛ ng’ɔ kɛnnin i Rɔmfuɛ Mun 10:15 nun’n ti be liɛ’n su’n, é wún be wie. I waan: “Be bɔ be ba jasin fɛ bolɛ’n, be balɛ’n yo sran’m be fɛ.”—Eza. 52:7.
[Ja ngua lɛ ndɛ’n]
^ Ndɛ kɛ ngalɛ’n sa’n wie o Biblu’n nun fluwa uflɛ wie’m be nun.—Mar. 1:1; Yol. 5:42; 1 Kor. 9:12; Fil. 1:27.
?Amun wla kwla kpɛn su?
• ?Jasin fɛ’n i nun like benin yɛ be kɛnnin i ndɛ Rɔmfuɛ Mun fluwa’n nun ɔn?
• ?Ngue yɛ ɔ fafa kɛ e uka sran mun naan be wun i wlɛ ɔ?
• ?Wafa sɛ yɛ e nin sran uflɛ mun e kwla ɲan “Krist i jasin fɛ’n” i su ye ɔ?
[Kosan mun]
[Ndɛ kwle, bue 16]
Jasin fɛ’n nga be kɛnnin i ndɛ Rɔmfuɛ Mun nun’n, ɔ kan junman cinnjin nga Zezi di i Ɲanmiɛn i klun sa’n i su kpɛnlɛ’n nun’n.
[Foto, bue 17]
Kɛ bé wú e’n, fɔ o e nun, yɛle kɛ e ti sa tɛ yofuɛ!