May Maogmang Bareta na Kaipuhan kan Gabos

‘An totoo, an maogmang bareta iyo an kapangyarihan nin Dios para sa pagliligtas.’—ROMA 1:16.

1, 2. Taano ta ihinuhulit mo an “maogmang bareta kan kahadean,” asin anong mga aspekto kaiyan an idinodoon mo?

‘MAOGMA akong ipaabot an maogmang bareta kada aldaw.’ Posibleng marhay na naisip o nasabi mo na man an arog kaiyan. Bilang debotadong Saksi ni Jehova, aram mo kun gurano kahalaga na ihulit “an maogmang baretang ini kan kahadean.” Tibaad tuom mo an hula ni Jesus manongod sa paggibo niato kaiyan.—Mat. 24:14.

² Sa paghuhulit kan “maogmang bareta kan kahadean,” ipinapadagos mo an pinonan ni Jesus. (Basahon an Lucas 4:43.) Daing duda, an sarong punto na idinodoon mo iyo na sa dai na mahahaloy mainterbenir na an Dios sa mga gibo-gibo nin tawo. Sa “dakulang kahorasaan,” tataposon nia an falsong relihion asin hahaleon an karatan sa daga. (Mat. 24:21) Tibaad idinodoon mo man na ibabalik kan Kahadean nin Dios an Paraiso digdi sa daga tanganing magin lakop an katoninongan asin kaogmahan. An totoo, an “maogmang bareta kan kahadean” kabtang kan ‘maogmang bareta na patienot na ipinahayag ki Abraham, na an sabi: “Paagi sa saimo an gabos na nasyon bebendisyonan.”’—Gal. 3:8.

3. Taano ta masasabi niato na idinoon ni apostol Pablo an maogmang bareta sa libro nin Roma?

³ Pero, posible daw na daing gayo kita nagtatao nin atension sa sarong importanteng marhay na aspekto kan maogmang bareta na kaipuhan kan mga tawo? Sa surat sa mga taga Roma, sarong beses sanang ginamit ni apostol Pablo an tataramon na “kahadean,” alagad 12 beses niang ginamit an pananaram na “maogmang bareta.” (Basahon an Roma 14:17.) Anong aspekto kan maogmang bareta an parateng marhay na pinanonongdan ni Pablo sa librong iyan? Taano ta mahalagang marhay an partikular na maogmang baretang iyan? Asin taano ta maninigo niatong isaisip iyan mantang ihinuhulit niato an “maogmang bareta nin Dios” sa mga tawo sa satong teritoryo?—Mar. 1:14; Roma 15:16; 1 Tes. 2:2.

Kun Ano an Kaipuhan Kaidto kan mga Nasa Roma

4. Durante kan enot niang pagkabilanggo sa Roma, manongod sa ano naghulit si Pablo?

⁴ May manonodan kita kun mamangnohon niato an mga topikong tinawan nin atension ni Pablo kan enot siang mabilanggo sa Roma. Mababasa niato na kan magbisita sa saiya an dakol na Judio, sia ‘lubos na nagpatotoo mapadapit sa (1) kahadean nin Dios asin naggamit nin  pangongombensir sa sainda mapadapit ki (2) Jesus.’ Ano an resulta? “An nagkapira nagpoon na tumubod sa mga bagay na sinabi; an iba habong tumubod.” Pakatapos kaiyan, ‘maboot na inaako ni Pablo an gabos na nagduduruman sa saiya, na ihinuhulit sa sainda (1) an kahadean nin Dios asin itinotokdo an mga bagay mapadapit sa (2) Kagurangnan na Jesu-Cristo.’ (Gibo 28:17, 23-31) Malinaw nanggad, tinawan ni Pablo nin atension an Kahadean nin Dios. Alagad, ano pa an idinoon nia? Sarong bagay na mahalagang marhay sa Kahadean—an papel ni Jesus sa katuyohan nin Dios.

5. Anong mahalagang pangangaipo an tinawan nin atension ni Pablo sa libro nin Roma?

⁵ Kaipuhan kan gabos na tawo na maaraman an manongod ki Jesus asin magtubod sa saiya. Sa libro nin Roma, tinawan nin atension ni Pablo an pangangaipong ini. Sa kapinonan pa sana, nagsurat na sia dapit sa “Dios, na sakuyang tinatawan nin sagradong paglilingkod sa sakong espiritu may koneksion sa maogmang bareta manongod sa saiyang Aki.” Sia nagsabi pa: “Dai ko ikinakasupog an maogmang bareta; an totoo, iyan an kapangyarihan nin Dios para sa pagliligtas sa lambang saro na may pagtubod.” Kan huri, nasambit nia an panahon “na an Dios paagi ki Cristo Jesus mahokom sa hilom na mga bagay kan katawohan, oyon sa maogmang bareta na ipinapahayag ko.” Asin sinabi nia: “Magpoon sa Jerusalem asin sa sarong sirkito sagkod sa Ilirico lubos kong ikinahulit an maogmang bareta manongod sa Cristo.” * (Roma 1:9, 16; 2:16; 15:19) Sa paghona mo, taano ta idinoon ni Pablo si Jesu-Cristo sa mga taga Roma?

6, 7. Ano an masasabi niato dapit sa pagpoon kan kongregasyon sa Roma asin sa mga minakompuesto kaiyan?

⁶ Dai niato aram kun paano nagpoon an kongregasyon sa Roma. Nagbaralik daw sa Roma bilang mga Kristiano an mga Judio o proselito na yaon kan Pentecostes 33 C.E.? (Gibo 2:10) O an katotoohan daw pinalakop sa Roma kan mga Kristianong negosyante asin parabiahe? Ano man an kamugtakan, kan isurat ni Pablo an libro, mga 56 C.E., haloy nang naestablisar an kongregasyon. (Roma 1:8) Anong klaseng mga tawo an minakompuesto kan kongregasyon na iyan?

⁷ An nagkapira may dugong Judio. Si Andronico asin Junias inapod ni Pablo na “sakong mga paryente,” na posibleng marhay na mga paryente na Judio man. An paragibo nin tolda na si Aquila, na nasa Roma kaidto kaiba an agom niang si Priscila, Judio man. (Roma 4:1; 9:3, 4; 16:3, 7; Gibo 18:2) Alagad posibleng marhay na mga Hentil an dakol na tugang na pinaabotan ni Pablo nin pataratara. An nagkapira tibaad “mga kasararo sa harong ni Cesar,” na posibleng mga oripon ni Cesar asin mga opisyal nia na hababa an katongdan.—Fil. 4:22; Roma 1:6; 11:13.

8. Anong masakit na kamugtakan an napaatubang sa mga nasa Roma?

⁸ An lambang Kristiano sa Roma napaatubang sa masakit na kamugtakan na napapaatubang man sa kada saro sa sato. Dapit dian, arog kaini an sinabi ni Pablo: “An gabos nagkasala asin nagkulang sa kamurawayan nin Dios.” (Roma 3:23) Malinaw nanggad, kaipuhan na akoon kan gabos na sinuratan ni Pablo na sinda makasalan asin kaipuhan nindang magtubod sa paagi nin Dios na panigoan an pangangaipong iyan.

Akoon an Pagkamakasalan

9. Anong posibleng resulta kan maogmang bareta an tinawan nin atension ni Pablo?

⁹ Sa kapinonan kan surat sa mga taga Roma, sinambit ni Pablo an pambihirang epekto na posibleng magin resulta kan maogmang bareta na pirme niang sinasabi: “Dai ko ikinakasupog an maogmang bareta; an totoo, iyan an kapangyarihan nin Dios para sa pagliligtas sa lambang saro na may pagtubod, sa Judio nguna asin siring man sa Griego.” Iyo, posible an kaligtasan. Minsan siring, kaipuhan an pagtubod, kaoyon kan mahalagang  katotoohan na sinambit ni Pablo: “An matanos—paagi sa pagtubod sia mabubuhay.” (Roma 1:16, 17; Gal. 3:11; Heb. 10:38) Alagad paano an maogmang baretang iyan, na puedeng magresulta sa kaligtasan, konektado sa katunayan na “an gabos nagkasala”?

10, 11. Taano an ideya na sinambit sa Roma 3:23 ta bakong bago para sa nagkapira alagad sa iba iyo?

¹⁰ Bago an saro makapatalubo nin pagtubod na nagliligtas-buhay, dapat niang akoon na sia makasalan. An ideya nin pagkamakasalan bakong bago sa mga nagdakula na nagtutubod sa Dios asin medyo pamilyar sa Biblia. (Basahon an Eclesiastes 7:20.) Oyon man sinda o dai, maski paano may ideya sinda sa boot sabihon ni Pablo kan sia magsabi: “An gabos nagkasala.” (Roma 3:23) Pero, sa satong ministeryo, posibleng dakol an makaolay niato na dai nasasabotan an pananaram na iyan.

¹¹ Sa nagkapirang nasyon, an mga tawo pinadakula na mayo sa isip ninda na sinda namundag na makasalan, na sinda nagmana nin kasalan. Totoo, tibaad aram nin saro na sia nasasala, may bakong marahay na mga ugale, asin posibleng nakagibo nin maraot. Asin naoobserbaran nia na totoo man iyan sa iba. Pero, huli sa pinagdakulaan nia, dai talaga nia nasasabotan kun taano ta sia asin an iba arog kaiyan. Sa katunayan, sa nagkapirang lenguahe, kun sasabihon mo na an saro makasalan, tibaad isipon nin iba na an boot mong sabihon sia kriminal o may binalgang reglamento. Siempre, tibaad dai tolos isipon nin tawong nagdakula sa siring na kapalibotan na sia makasalan na arog kan boot sabihon ni Pablo.

12. Taano ta dakol an dai naniniwala na an gabos makasalan?

¹² Dawa sa mga nasyon na an kadaklan naghihingakong Kristiano, dakol an dai naniniwala sa ideya nin pagkamakasalan. Taano man? Dawa kun sinda nagsisimba paminsanminsan, ibinibilang nindang eroestorya sana an pagkasaysay kan Biblia dapit ki Adan asin Eva. An iba nagdakula sa sarong kapalibotan na bakong relihioso. Nagdududa sinda na nag-eeksister an Dios kaya dai ninda nasasabotan na an sarong Supremong Persona nagtao sa mga tawo nin mga pamantayan sa moral asin na kasalan kun dai iyan maaabot. Sa sarong paagi, sinda arog kan mga ilinadawan ni Pablo kan enot na siglo na ‘mayo nin paglaom’ asin “mayo nin Dios sa kinaban.”—Efe. 2:12.

13, 14. (a) Ano an sarong dahelan kun taano ta mayong sarahotan an mga dai naniniwala sa Dios asin sa kasalan? (b) Huli sa siring na kawaran nin paniniwala, ano an nangyari sa dakol?

¹³ Sa surat sa mga taga Roma, nagtao si Pablo nin duwang dahelan kun taano an siring na pinagdakulaan ta dai puedeng gibohon na sarahotan—kaidto man o ngonyan. An enot na dahelan iyo na an mga linalang mismo nagpapatotoo na may Kaglalang. (Basahon an Roma 1:19, 20.) Kaoyon ini nin obserbasyon ni Pablo kan sia magsurat sa mga Hebreo mantang sia nasa Roma: “An lambang harong igwa nin kaggibo, alagad an naggibo kan gabos na bagay iyo an Dios.” (Heb. 3:4) An pangangatanosan na iyan nagpapaheling na may Kaglalang na naggibo kan bilog na uniberso.

¹⁴ Kaya, may masarig na basehan si Pablo kan sia magsurat sa mga taga Roma na ‘mayo nin sarahotan’ an siisay man—kaiba na an mga Israelita kaidto—na nagtao kan saindang debosyon sa daing buhay na mga imahen. Totoo man iyan sa mga nagpadara sa imoral na mga gibo sa sekso na bakong kaoyon kan natural na gamit kan hawak nin lalaki asin babae. (Roma 1:22-27) Angay nanggad na nagkongklusyon si Pablo na “an mga Judio saka an mga Griego anas nasa irarom nin kasalan.”—Roma 3:9.

 “Nagpapatotoo”

15. Sairisay an may konsensia, asin ano an epekto kaini?

¹⁵ Sinasabi sa libro nin Roma an saro pang dahelan kun taano ta maninigong akoon nin mga tawo na sinda makasalan asin nangangaipo nin tabang tanganing makahale sa kamugtakan na iyan. Mapadapit sa mga ley na itinao nin Dios sa suanoy na Israel, si Pablo nagsurat: “An gabos na nagkasala sa irarom nin ley hohokoman paagi sa ley.” (Roma 2:12) Sa saiya pang pangangatanosan, sinabi nia na an mga tawo kan mga nasyon o grupong etniko na dai aram an siring na mga ley nin Dios parateng ‘minagibo, huli sa naturalesa, nin mga bagay na nasa ley.’ Taano ta parateng ibinabawal nin siring na mga tawo an insesto, paggadan, asin paghabon? Sinabi ni Pablo an dahelan: May konsensia sinda.—Basahon an Roma 2:14, 15.

16. Taano an pagkaigwa nin konsensia ta dai man nangangahulogan na dai na magkakasala an saro?

¹⁶ Minsan siring, posibleng marhay na naheling nindo na an pagkaigwa nin konsensia na nagseserbing tagapagpatotoo sa laog niato dai nangangahulogan na susunodon na nin saro an paggiya kaiyan. Maheheling iyan sa kamugtakan kan suanoy na Israel. Minsan ngani an mga Israelita tinawan nin Dios nin konsensia asin espesipikong mga ley na nagsasabing sala an paghabon asin pagsambay, parate nindang dai sinusunod an saindang konsensia asin an Ley ni Jehova. (Roma 2:21-23) Doble an pagkakasala ninda kaya talagang makasalan sinda, na dai nakaabot sa mga pamantayan asin kabotan nin Dios. Huli kaini, naraot na marhay an saindang relasyon sa Kaggibo sa sainda.—Lev. 19:11; 20:10; Roma 3:20.

17. Anong pamparigon sa boot an yaon sa libro nin Roma?

¹⁷ An napag-olayan niato sa libro nin Roma garo baga nagtatao nin mamondong paglaladawan kan kamugtakan nin tawo, kaiba na kita, sa atubangan nin Dios. Minsan siring, may sinabi pa si Pablo dapit dian. Sa pagkotar sa mga tataramon ni David sa Salmo 32:1, 2, an apostol nagsurat: “Maogma idtong an mga gibo nin paglapas pinatawad asin an mga kasalan tinahoban; maogma an tawo na an kasalan dai na nanggad iintindihon ni Jehova.” (Roma 4:7, 8) Iyo, an Dios nag-areglo nin legal asin tamang paagi nin pagpatawad sa mga kasalan.

Maogmang Bareta na Nakasentro ki Jesus

18, 19. (a) Sa anong aspekto kan maogmang bareta nagpokus si Pablo sa libro nin Roma? (b) Tanganing magkamit kan mga bendisyon kan Kahadean, ano an dapat niatong akoon?

¹⁸ Tibaad magsabi ka, “Maogmang bareta nanggad iyan!” Iyo nanggad, huling ipinapagirumdom kaiyan sa sato an aspekto kan maogmang bareta na idinoon ni Pablo sa libro nin Roma. Arog kan nasambit, si Pablo nagsurat: “Dai ko ikinakasupog an maogmang bareta; an totoo, iyan an kapangyarihan nin Dios para sa pagliligtas.”—Roma 1:15, 16.

¹⁹ An maogmang baretang iyan nakasentro sa papel ni Jesus sa pag-otob kan katuyohan nin Dios. Makakalaom si Pablo sa ‘aldaw na hohokoman nin Dios paagi ki Cristo Jesus an hilom na mga bagay nin katawohan, oyon sa maogmang bareta.’ (Roma 2:16) Sa pagsabi kaiyan, dai nia hinahale an halaga kan “kahadean kan Cristo asin nin Dios” o kan gigibohon nin Dios paagi sa Kahadean. (Efe. 5:5) Imbes, ipinaheling nia na tanganing mabuhay kita asin magkamit kan mga bendisyon sa irarom kan Kahadean nin Dios, dapat niatong akoon na (1) kita mga makasalan sa pagheling nin Dios asin (2) kaipuhan niatong magtubod ki Jesu-Cristo tanganing mapatawad an satong mga kasalan. Kun nasasabotan asin inaako nin saro an mga kabtang na iyan kan katuyohan nin Dios asin naheheling kun paano ini nagtatao sa saiya nin paglaom, makakasabi nanggad sia, “Iyo, maogmang bareta nanggad iyan!”

20, 21. Sa satong ministeryo, taano ta maninigo niatong isaisip an maogmang bareta na idinodoon sa libro nin Roma, asin ano an posibleng resulta?

 ²⁰ Maninigo nanggad niatong isaisip an aspektong ini kan maogmang bareta mantang inootob niato an satong Kristianong ministeryo. Mapadapit ki Jesus, kinotar ni Pablo an mga tataramon ni Isaias: “Mayo nin nagtutubod sa saiya na masusudya.” (Roma 10:11; Isa. 28:16) An pundamental na mensahe dapit ki Jesus tibaad bako nang bago para sa mga may aram na sa sinasabi kan Biblia manongod sa kasalan. Pero para sa iba, bago nanggad an mensaheng ini, mensahe na dai aram o sa pangkagabsan dai pinaniniwalaan sa kultura ninda. Kun sinda nagtutubod na sa Dios asin nagtitiwala sa Kasuratan, kaipuhan na niatong ipaliwanag an papel ni Jesus. Totokaron sa sunod na artikulo kun paano ipinapaliwanag sa Roma kapitulo 5 an aspektong ini kan maogmang bareta. Posibleng maheling nindo na kapakipakinabang sa saindong ministeryo an pag-adal na iyan.

²¹ Nakakakontento nanggad na makatabang sa mga sadiosan an puso na masabotan an maogmang bareta na paorootrong sinambit sa libro nin Roma, an maogmang bareta na, ‘an totoo, iyo an kapangyarihan nin Dios para sa pagliligtas sa lambang saro na may pagtubod.’ (Roma 1:16) Apuera sa pagigin kontento, maheheling niato an iba na minaoyon sa saboot na kinotar ni Pablo na mababasa sa Roma 10:15: “Abaang gayon kan mga bitis kan mga nagpapahayag kan maogmang bareta dapit sa marahay na mga bagay!”—Isa. 52:7.

[Nota sa Ibaba]

Nagigirumdoman daw Nindo?

• Anong aspekto kan maogmang bareta an idinodoon sa libro nin Roma?

• Kaipuhan niatong tabangan an iba na masabotan an anong katotoohan?

• Paano “an maogmang bareta manongod sa Cristo” makakatao nin mga bendisyon sa sato asin sa iba?

[Mga Hapot Para sa Pag-adal]

[Blurb sa pahina 8]

Kaiba sa maogmang bareta na idinodoon sa libro nin Roma an mahalagang marhay na papel ni Jesus sa katuyohan nin Dios

[Ritrato sa pahina 9]

Gabos kita namundag na may nakakagadan na depekto—an kasalan!