Adunay Maayong Balita nga Gikinahanglan sa Tanan
Adunay Maayong Balita nga Gikinahanglan sa Tanan
“Ang maayong balita . . . sa pagkatinuod, [maoy] gahom sa Diyos alang sa kaluwasan.”—ROMA 1:16.
1, 2. Nganong nagsangyaw ka man sa “maayong balita sa gingharian,” ug unsang mga bahin niana ang imong ginapasiugda?
‘MALIPAY ko nga magsangyaw sa maayong balita.’ Lagmit nakahunahuna o nakasulti ka na niana. Ingong debotadong Saksi ni Jehova, nahibalo ka nga hinungdanon gayod ang pagsangyaw sa “maayong balita sa gingharian.” Tingali namemorya nimo ang tagna ni Jesus bahin sa atong buluhatong pagsangyaw.—Mat. 24:14.
2 Sa dihang magsangyaw sa “maayong balita sa gingharian,” imong gipadayon ang buluhaton nga gisugdan ni Jesus. (Basaha ang Lucas 4:43.) Segurado, ang usa ka punto nga imong ginapasiugda mao nga ang Diyos hapit nang mangilabot sa tawhanong kalihokan. Sa “dakong kasakitan,” iyang taposon ang bakak nga relihiyon ug ang pagkadaotan sa yuta. (Mat. 24:21) Lagmit gipasiugda sab nimo nga ang Gingharian sa Diyos magpasig-uli sa Paraiso dinhi sa yuta aron mousbaw ang kalinaw ug kalipay. Sa pagkatinuod, ang “maayong balita sa gingharian” maoy bahin sa “maayong balita [nga gipahayag] kang Abraham, nga mao: ‘Pinaagi kanimo ang tanang nasod mapanalanginan.’”—Gal. 3:8.
3. Nganong makaingon kita nga gipasiugda ni apostol Pablo ang maayong balita diha sa basahon sa Roma?
3 Apan, duna bay usa ka hinungdanong bahin sa maayong balita nga gikinahanglan sa katawhan nga wala nimo mapasiugda? Sa sulat ngadto sa mga taga-Roma, si apostol Pablo kas-a lang naggamit sa pulong nga “gingharian,” apan 12 ka beses sa ekspresyong “maayong balita.” (Basaha ang Roma 14:17.) Unsang bahin sa maayong balita ang subsob nga gihisgotan ni Pablo sa maong basahon? Nganong hinungdanon ang maong bahin sa maayong balita? Ug nganong ato kanang hinumdoman samtang kita magsangyaw sa “maayong balita sa Diyos” sa atong teritoryo?—Mar. 1:14; Roma 15:16; 1 Tes. 2:2.
Ang Gikinahanglan sa Taga-Roma
4. Sa una niyang pagkabilanggo sa Roma, unsay gisangyaw ni Pablo?
4 Daghan kitag makat-onan sa mga ulohan nga gihisgotan ni Pablo sa una niyang pagkabilanggo sa Roma. Sa dihang daghang Hudiyo ang miduaw niya, siya ‘bug-os nga nagpamatuod sa (1) gingharian sa Diyos ug nagkombinsir kanila bahin kang (2) Jesus.’ Unsay resulta? “Dihay pipila nga mituo sa mga butang nga iyang gisulti; ang uban wala motuo.” Human niadto, si Pablo ‘nagdawat nga maluloton sa tanan nga nangadto kaniya, nga nagwali sa (1) gingharian sa Diyos kanila ug nagtudlo sa mga butang mahitungod sa (2) Ginoong Jesu-Kristo.’ (Buh. 28:17, 23-31) Tin-aw nga gipasiugda ni Pablo ang Gingharian sa Diyos. Apan unsa pay iyang gipasiugda? Usa ka hinungdanong bahin sa Gingharian—ang papel ni Jesus sa katuyoan sa Diyos.
5. Unsang panginahanglan ang gihisgotan ni Pablo sa basahon sa Roma?
5 Ang tanang tawo kinahanglang mahibalo bahin kang Jesus ug motuo kaniya. Kini gihisgotan ni Pablo sa basahon sa Roma. Sa sinugdan pa, siya misulat bahin sa “Diyos, nga akong gihatagan ug sagradong pag-alagad uban sa akong espiritu maylabot sa maayong balita bahin sa iyang Anak.” Siya midugang: “Wala ko ikaulaw ang maayong balita; kini, sa pagkatinuod, gahom sa Diyos alang sa kaluwasan sa matag usa nga may pagtuo.” Sa ulahi siya naghisgot sa panahon sa “dihang ang Diyos pinaagi ni Kristo Jesus magahukom sa tinagong mga butang sa katawhan, sumala sa maayong balita nga akong gipahayag.” Ug siya miasoy: “Gikan sa Jerusalem ug sa usa ka sirkito hangtod sa Ilirico bug-os ko nga giwali ang maayong balita bahin kang Kristo.” * (Roma 1:9, 16; 2:16; 15:19) Nganong gipasiugda ni Pablo si Jesu-Kristo ngadto sa mga taga-Roma?
6, 7. Unsay atong ikasulti bahin sa pagkatukod sa kongregasyon sa Roma ug sa mga sakop niana?
6 Wala kita mahibalo kon sa unsang paagi natukod ang kongregasyon sa Roma. Ang mga Hudiyo ug mga kinabig nga presente sa Pentekostes 33 K.P. namalik ba sa Roma ingong mga Kristohanon? (Buh. 2:10) O ang mga Kristohanong negosyante ug magpapanaw ba ang nagpakaylap sa kamatuoran diha sa Roma? Kon unsa man ugaling, sa dihang gisulat ni Pablo ang maong basahon sa mga 56 K.P., ang kongregasyon dugay nang natukod. (Roma 1:8) Unsay kagikan sa mga tawo nga naglangkob sa maong kongregasyon?
7 Ang pipila mga Hudiyo. Si Pablo nagtawag kang Androniko ug Junia nga “akong mga paryente,” nga lagmit nagkahulogan nga mga paryenteng isigka-Hudiyo. Ang tiggamag tolda nga si Aquila, nga didto sa Roma uban sa iyang asawa nga si Prisca, Hudiyo usab. (Roma 4:1; 9:3, 4; 16:3, 7; Buh. 18:2) Apan lagmit mga Hentil ang daghang igsoon nga gipangomosta ni Pablo. Ang uban tingali sakop sa “panimalay ni Cesar,” nga lagmit mga ulipon ug ubos nga opisyales ni Cesar.—Filip. 4:22; Roma 1:6; 11:13.
8. Sa unsang alaot nga kahimtang nahibanlod ang mga Kristohanon sa Roma?
8 Ang matag Kristohanon sa Roma nahibanlod sa alaot nga kahimtang, ug mao man usab kita. Si Pablo miingon: “Ang tanan nakasala ug wala makaabot sa himaya sa Diyos.” (Roma 3:23) Dayag nga ang tanang gisulatan ni Pablo kinahanglang moila nga sila makasasala ug magpakitag pagtuo sa gitagana sa Diyos aron sila maluwas sa maong kahimtang.
Kinahanglang Ilhon ang Pagkamakasasala
9. Unsang posibleng resulta sa maayong balita ang gipunting ni Pablo?
9 Sa sinugdan sa sulat ni Pablo sa mga taga-Roma, iyang gipunting ang kahibulongang resulta sa maayong balita nga subsob niyang gihisgotan: “Wala ko ikaulaw ang maayong balita; kini, sa pagkatinuod, gahom sa Diyos alang sa kaluwasan sa matag usa nga may pagtuo, una ngadto sa Hudiyo ug usab ngadto sa Grego.” Oo, posible ang kaluwasan. Apan, ang pagtuo gikinahanglan ug kini nahiuyon sa Habacuc 2:4: “Ang matarong—pinaagi sa pagtuo siya mabuhi.” (Roma 1:16, 17; Gal. 3:11; Heb. 10:38) Apan sa unsang paagi ang maong maayong balita, nga motultol sa kaluwasan, nalangkit sa kamatuoran nga “ang tanan nakasala”?
10, 11. Nganong dili bag-o alang sa pipila ang ideya sa Roma 3:23, apan katingad-anan sa uban?
10 Aron maugmad ang nagaluwas-sa-kinabuhi nga pagtuo, kinahanglang ilhon sa usa nga siya makasasala. Dili na kini bag-o alang niadtong nagdako nga may pagtuo sa Diyos ug may kahibalo sa Bibliya. (Basaha ang Ecclesiastes 7:20.) Uyon man sila o dili, sila may ideya na sa gipasabot ni Pablo sa dihang siya miingon: “Ang tanan nakasala.” (Roma 3:23) Apan sa atong pagsangyaw, tingali makahibalag tag mga tawo nga wala makasabot sa maong mga pulong.
11 Sa pipila ka nasod, ang kadaghanan wala magtuo nga sila natawo nga makasasala, ug nakapanunod sa sala. Lagmit ang usa makaamgo nga siya masayop, dunay dili maayong mga taras, ug tingali makahimog daotan. Ug iyang mamatikdan nga ang uban may susamang kahimtang. Apan tungod sa iyang kagikan, wala siya makasabot kon nganong siya ug ang uban ingon niana. Gani, sa pipila ka pinulongan, kon moingon ka nga ang usa makasasala, ang uban maghunahuna nga siya kriminal o nakalapas sa balaod. Dayag, ang tawong nagdako sa maong kahimtang dili dayon makahunahuna nga siya makasasala sa diwa nga gipasabot ni Pablo.
12. Nganong daghan ang wala magtuo nga ang tanan makasasala?
12 Bisan sa mga nasod sa Kakristiyanohan, daghan ang wala magtuo nga sila makasasala. Ngano? Bisag mosimba sila panagsa, giisip nila nga tumotumo lang ang asoy bahin kang Adan ug Eva. Ang uban nagdako diin daghan ang ateyista o agnostiko. Sila nagduhaduha sa paglungtad sa Diyos ug busa wala makasabot nga ang Supremong Usa nagtakdag moral nga mga sukdanan alang sa tawo ug ang dili pagsunod niana maoy sala. Sila nahisama niadtong gibatbat ni Pablo sa unang siglo ingong mga “walay paglaom” ug “mga walay Diyos dinhi sa kalibotan.”—Efe. 2:12.
13, 14. (a) Nganong walay ikapangatarongan kadtong wala magtuo sa Diyos ug sa sala? (b) Ang kawalay-pagtuo mitultol sa unsang mga buhat?
13 Sa iyang sulat sa mga taga-Roma, si Pablo naghatag ug duha ka rason nga ang maong kagikan dili katarongan—kaniadto man o karon. Ang unang rason mao nga ang kalalangan nagpamatuod nga adunay Maglalalang. (Basaha ang Roma 1:19, 20.) Nahiuyon kini sa gisulat ni Pablo sa Roma ngadto sa mga Hebreohanon: “Ang matag balay adunay nagtukod, apan siya nga nagtukod sa tanang butang mao ang Diyos.” (Heb. 3:4) Ang maong pangatarongan nagpunting nga adunay Maglalalang nga nagtukod sa tibuok uniberso.
14 Busa lig-on ang pasukaranan ni Pablo sa dihang nagsulat siya sa mga taga-Roma nga si bisan kinsa—apil ang karaang mga Israelinhon—nga nagsimba sa way-kinabuhing mga imahen “walay ikapangatarongan.” Kana ikaingon usab niadtong naghimog dili-kinaiyanhong seksuwal nga mga buhat. (Roma 1:22-27) Busa, si Pablo hustong mihinapos nga ang “mga Hudiyo ingon man ang mga Grego ngatanan nailalom sa sala.”—Roma 3:9.
Usa ka ‘Tigpamatuod’
15. Unsay nabatonan sa tanang tawo, ug unsay epekto niana?
15 Ang basahon sa Roma nagpaila sa laing rason nganong angayng ilhon sa mga tawo nga sila makasasala ug nagkinahanglag kaluwasan. Bahin sa mga balaod nga gihatag sa Diyos sa karaang Israel, si Pablo misulat: “Ang tanan nga nakasala ilalom sa balaod pagahukman sumala sa balaod.” (Roma 2:12) Siya padayong nangatarongan nga ang mga tawo sa kanasoran o mga tribo nga wala mahibalo sa mga balaod sa Diyos sagad “nagabuhat nga kinaiyanhon sa mga butang sa balaod.” Nganong gidili man nila ang pagpakigsekso sa suod nga kabanay, pagpatay, ug pagpangawat? Gipaila ni Pablo ang rason: Sila adunay tanlag.—Basaha ang Roma 2:14, 15.
16. Nganong ang pagbaton ug tanlag wala magpasabot nga ang usa dili gyod makasala?
16 Apan, lagmit namatikdan nimo nga bisag ang usa dunay tanlag nga nagalihok ingong tigpamatuod, kana wala magpasabot nga ang usa mosunod sa paggiya niini. Gipadayag kana sa kahimtang sa karaang Israel. Bisag ang mga Israelinhon gihatagan sa Diyos ug tanlag ug mga balaod batok sa pagpangawat ug pagpanapaw, subsob nilang gilapas ang ilang tanlag ug Balaod ni Jehova. (Roma 2:21-23) Doble ang ilang sala ug busa sila makasasala gayod, nga wala makatuman sa sukdanan ug kabubut-on sa Diyos. Kadto nakadaot sa ilang relasyon uban sa ilang Magbubuhat.—Lev. 19:11; 20:10; Roma 3:20.
17. Unsay gidasig sa basahon sa Roma?
17 Ang atong nahisgotan sa basahon sa Roma nagpaila sa alaot nga kahimtang sa tawo atubangan sa Labing Hataas, lakip kita. Apan, si Pablo nagpadayon ug iyang gikutlo ang mga pulong ni David sa Salmo 32:1, 2: “Malipayon kadtong kansang mga kalapasan gipasaylo ug kansang mga sala gitabonan na; malipayon ang tawo kansang sala dili gayod pagaisipon ni Jehova.” (Roma 4:7, 8) Oo, gihikay sa Diyos nga mapasaylo ang mga sala sa tawo nga dili ra sab malapas ang iyang mga balaod.
Maayong Balita Bahin Kang Jesus
18, 19. (a) Unsang bahin sa maayong balita ang gipasiugda ni Pablo sa mga taga-Roma? (b) Aron madawat ang mga panalangin sa Gingharian, unsay kinahanglan natong ilhon?
18 Lagmit makaingon ka, “Maayo gayod kana nga balita!” Tinuod kana, ug magpahinumdom kana kanato sa usa ka bahin sa maayong balita nga gipasiugda ni Pablo sa basahon sa Roma. Sa nahisgotan na, si Pablo misulat: “Wala ko ikaulaw ang maayong balita; kini, sa pagkatinuod, gahom sa Diyos alang sa kaluwasan.”—Roma 1:15, 16.
19 Ang maong maayong balita nagpunting sa papel ni Jesus sa katumanan sa katuyoan sa Diyos. Si Pablo makalaom sa “adlaw dihang ang Diyos pinaagi ni Kristo Jesus magahukom sa tinagong mga butang sa katawhan, sumala sa maayong balita.” (Roma 2:16) Sa pagsulti niana, wala niya pakamenosa ang “gingharian ni Kristo ug sa Diyos” o kon unsay buhaton sa Diyos pinaagi sa Gingharian. (Efe. 5:5) Apan iyang gipakita nga aron kita mabuhi ug makatagamtam sa mga panalangin ilalom sa Gingharian sa Diyos, kinahanglan natong ilhon (1) nga kita makasasala sa panan-aw sa Diyos ug (2) kon nganong gikinahanglan ang pagtuo kang Jesu-Kristo aron mapasaylo ang atong mga sala. Sa dihang masabtan ug dawaton sa usa ka tawo ang maong mga bahin sa katuyoan sa Diyos ug nga siya makabatog paglaom, siya makapatugbaw, “Kana tinuod gayod nga maayong balita!”
20, 21. Sa atong ministeryo, nganong angay natong hinumdoman ang maayong balita nga gipasiugda sa basahon sa Roma, ug unsay lagmit nga resulta niana?
20 Angay natong hinumdoman kining bahina sa maayong balita samtang kita nagasangyaw. Bahin kang Jesus, si Pablo nagkutlo sa mga pulong ni Isaias: “Walay usa nga magbutang sa iyang pagtuo kaniya ang mahigawad.” (Roma 10:11; Isa. 28:16) Ang mensahe bahin kang Jesus dili katingad-anan niadtong nahibalo sa giingon sa Bibliya bahin sa sala. Apan alang sa uban, kini nga mensahe tingali bag-o, nga wala mahibaloi o tuohi sa ilang kultura. Sa dihang ang maong mga tawo motuo sa Diyos ug mosalig sa Kasulatan, kinahanglang isaysay nato ang papel ni Jesus. Ang sunod artikulo maghisgot kon sa unsang paagi ang Roma kapitulo 5 nagpahayag niining bahina sa maayong balita. Tingali mapuslan nimo kini sa imong ministeryo.
21 Pagkamagantihon ang pagtabang sa mga tawong matinud-anon-ug-kasingkasing aron masabtan ang maayong balita nga subsob nga gihisgotan sa basahon sa Roma, ang maayong balita nga “sa pagkatinuod, gahom sa Diyos alang sa kaluwasan sa matag usa nga may pagtuo.” (Roma 1:16) Gawas nga kita pagagantihan, kita malipay usab nga makahibalag niadtong mouyon sa giingon ni Pablo diha sa Roma 10:15: “Pagkatahom sa mga tiil niadtong nagapahayag sa maayong balita sa maayong mga butang!”—Isa. 52:7.
[Footnote]
^ par. 5 Ang susamang mga ekspresyon makita sa ubang inspiradong basahon.—Mar. 1:1; Buh. 5:42; 1 Cor. 9:12; Filip. 1:27.
Nahinumdom Ka Ba?
• Unsang bahin sa maayong balita ang gipasiugda sa basahon sa Roma?
• Unsang kamatuoran ang angayng masabtan sa uban?
• Sa unsang paagi ang “maayong balita bahin kang Kristo” makahatag ug mga panalangin kanato ug sa uban?
[Mga Pangutana sa Pagtuon]
[Blurb sa panid 8]
Ang maayong balita nga gipasiugda sa basahon sa Roma naglangkit sa hinungdanong papel ni Jesus sa katuyoan sa Diyos
[Hulagway sa panid 9]
Kitang tanan natawo nga makasasala!
