Marandu porã ikatúva ñandesalva
Marandu porã ikatúva ñandesalva
‘Pe marandu porãme [...] oĩ Ñandejára puʼaka osalva hag̃ua opaite ojeroviávape.’ (ROM. 1:16, NM)
1, 2. Mbaʼérepa japredika pe ‘marandu porã’, ha mbaʼépa ñamombeʼu jepi ñande rapichakuérape?
“CHEPYʼARORYETE ningo añeʼẽvo pe marandu porãre ára ha ára.” Oiméne jaʼe térã ñapensa jepi upéicha. Ñande jaservíva Jehovápe jaikuaa iñimportantetereiha ñamombeʼu pe ‘marandu porã oñeʼẽva Ñandejára Rréino rehe’. Katuete opavave ñanemanduʼa porã Jesús heʼivaʼekuére ko tembiapo rehe (Mat. 24:14, NM).
2 Ñamomarandu jave ‘umi mbaʼe porã Ñandejára Rréino ojapótava’, jasegiñaína jajapo pe tembiapo Jesús omoñepyrũvaʼekue (elee Lucas 4:43). Ñamombeʼu jepi ñande rapichakuérape koʼẽrõite Ñandejára oipeʼapaitetaha umi mbaʼe ombohasa asyetéva yvyporakuérape, ha pe ‘jehasa asy guasúpe’ katu oñehundipaitetaha umi rrelihión japu ha opaite iñañáva (Mat. 24:21). Katuete ñamombeʼu avei Ñandejára Rréino rupive, ko yvýgui oikotaha peteĩ lugár neporãmba jepéva, oĩtahápe pyʼaguapy ha vyʼa. Yma Ñandejára ‘omog̃uahẽvaʼekue Abrahánpe peteĩ marandu porã: “Opa tetã [oñevendesíta] nde rupi”’. Ko marandu apytépe oĩ avei ‘umi mbaʼe porã Ñandejára Rréino ojapótava’ (Gál. 3:8).
3. Mbaʼérepa jaʼekuaa Pablo omombaʼeterei hague pe marandu porã?
3 Ñamombeʼu jave pe marandu porã, ikatu ojehasa ñandehegui peteĩ mbaʼe ñande rapichakuéra tekotevẽva oikuaa. Apóstol Pablo ohaírõ guare ikuatiañeʼẽ umi kristiáno Romayguápe, oiporu 12 vése voi pe ñeʼẽ “marandu porã”, péro peteĩ hendápente pe ñeʼẽ “rréino” (elee Romanos 14:17). Mbaʼépa hína pe marandu porã haʼe oñeʼẽte hague, ha mbaʼérepa iñimportantete opavavépe g̃uarã? Mbaʼérepa tekotevẽ akóinte ñanemanduʼa upe mbaʼére ñamombeʼu jave ‘Ñandejára marandu porã’? (Mar. 1:14; Rom. 15:16; 1 Tes. 2:2.)
Mbaʼépa tekotevẽvaʼekue oikuaa umi Romaygua
4. Mbaʼe mbaʼérepa oñeʼẽ Pablo umi hudíope oĩ ypýrõ guare préso Rómape?
4 Hesakã porãve hag̃ua ñandéve mbaʼépa tekotevẽ oikuaa hikuái, ñahesaʼỹijovaʼerã mbaʼe mbaʼérepa oñeʼẽ Pablo oĩ ypýrõ guare préso Rómape. Ñandejára Ñeʼẽ omombeʼu umi hudío ohórõ guare ovisita chupe, haʼe ojapo hague mokõi mbaʼe: primero, oñeʼẽ “Ñandejára Rréino rehe”, ha segundo, ‘oñehaʼã ogueroviauka chupekuéra pe marandu porã oñeʼẽva Jesús rehe’. Mbaʼépa heʼi umi hudío? ‘Oĩ ogueroviáva Pablo heʼíva, ambue katu ndogueroviái’. Ha ojapoháicha voi jepi, haʼe peteĩchante “omog̃uahẽ opa umi ohóvape ohechávo chupe”. Primero, ‘omoherakuã Ñandejára Rréino’, ha segundo, omboʼe pe marandu oñeʼẽva ‘Jesucristo rehe’ (Hech. 28:17, 23-31, BNP). Jahechaháicha, Pablo akóinte oñeʼẽ Ñandejára Rréinore, péro mbaʼépa haʼe oipotavaʼekue ojekuaa porãve ko goviérnogui? Peteĩ mbaʼe iñimportantetereíva: Mbaʼépa Jesús ojapo oñekumpli hag̃ua Jehová rembipota.
5. Mbaʼépa Pablo ohechaukavaʼekue tekotevẽha ojapo opavave tapicha?
5 Opavave tapicha tekotevẽvaʼekue oikuaa Jesucrístope ha ojerovia hese. Upévare Pablo ohaírõ guare umi Romayguápe omyesakã porã upéva. Oñepyrũmírente ohaíma: ‘Ñandejárape g̃uarã ambaʼapo che pyʼaite guive amombeʼúvo pe marandu porã oñeʼẽva Taʼýra rehe’. Upéi heʼi: ‘Che naguerotĩri pe marandu porã; ipype oĩ Ñandejára puʼaka osalva hag̃ua opaite ojeroviávape’. Avei omombeʼu: ‘Ko marandu porã heʼiháicha, Jesucristo rupive Ñandejára ohusgáta opa yvypóra mbaʼe ñemi’. Ha omohuʼã hag̃ua heʼi: ‘Arahavaʼekue opárupi pe marandu porã oñeʼẽva Cristo rehe, Jerusalén guive Ilírico peve’ (Rom. 1:9, 16, NM; 2:16, BNP; 15:19, JMP). * Mbaʼére piko Pablo oñeʼẽtevaʼekue Jesucristo rehe umi Romayguápe?
6, 7. Mbaʼéichapa oñepyrũ kongregasión oĩva Rómape, ha mbaʼeichaguápa rakaʼe umi kristiáno upepegua?
6 Ndajaikuaái ningo mbaʼéichapa oñepyrũvaʼekue pe kongregasión oĩva Rómape. Ikatu oime umi hudío téra ambue tetãygua oikovaʼekue chuguikuéra kristiáno Pentecostés áño 33-pe, oho jey Rómape ha omoñepyrũ pe kongregasión (Hech. 2:10). Ikatu avei pe marandu porã og̃uahẽraʼe upépe umi kristiáno ombaʼevendéva térã oviaháva rupive. Tahaʼe haʼeháicha, Pablo ohaírõ guare chupekuéra amo áño 56 rupi, aréma oĩ hague pe kongregasión (Rom. 1:8). Mbaʼeichaguápa rakaʼe umi kristiáno upepegua?
7 Ijapytepekuéra oĩvaʼekue hudío. Pablo omomaitei Andrónico ha Júniaspe, ha ohenói chupekuéra “che pehẽnguekuéra”. Oiméne heʼi péicha hudío rupi hikuái, haʼeháicha avei Áquila ha Priscila (Rom. 4:1; 9:3, 4, JMP; 16:3, 7; Hech. 18:2). Péro amalisia umi ermáno Pablo omomaiteivaʼekue apytépe oĩ avei ndahaʼéiva hudío, pór ehémplo, ‘umi César rogayguakuéra’ térã umi ombaʼapóva pe mburuvicha guasu rógape, ha ikatu avei umi ombaʼapóva goviérnope g̃uarã (Fili. 4:22, JMP; Rom. 1:6; 11:13).
8. Mbaʼépa ombohovaivaʼerã umi kristiáno Romaygua?
8 Ñandéicha avei, entéro kristiáno oĩvaʼekue Rómape ombohovaivaʼerã peteĩ mbaʼe ijetuʼúva. Pablo heʼi: ‘Opavave ningo opeka ha mombyry oĩ Ñandejára rekomimbipágui’ (Rom. 3:23). Upévare tekotevẽvaʼekue umi ermáno Romaygua ohechakuaa opavave pekadorha, ha ojerovia Ñandejára omeʼẽvare oporosalva hag̃ua.
Jahechakuaavaʼerã ñande pekadorha
9. Pablo heʼi haguéicha, mbaʼéichapa ikatu oporopytyvõ pe marandu porã?
9 Ohai ñepyrũmírente ikuatiañeʼẽ, Pablo heʼi umi Romayguápe mbaʼeichaitépa ikatu oipytyvõ chupekuéra pe marandu porã imanduʼaiteha. Haʼe heʼi: ‘Che naguerotĩri pe marandu porã; ipype oĩ Ñandejára puʼaka osalva hag̃ua opaite ojeroviávape, hudiokuérape raẽ ha avei umi griégope’. Péicha ontendeka opavave ikatuha ojesalva, tahaʼe hudío térã hudioʼỹva, péro upearã tekotevẽ ohechauka hikuái ijerovia, ojeʼéma haguéicha Habacuc 2:4-pe. Pablo heʼi: “Hekojojáva, ojerovia rupi Ñandejárare, oikovevaʼerã” (Rom. 1:16, 17; Gál. 3:11; Heb. 10:38). Jahechaháicha pe marandu porã ikatu oporosalva, péro mbaʼéichapa oikóta upéva ‘opavave opekáramo’?
10, 11. Mbaʼérepa oĩ ontende pyaʼéva Romanos 3:23 heʼíva ha ambue katu hasypeve?
10 Peteĩ tapicha ohechakuaa raẽ vaʼerã pekadorha ikatu hag̃uáicha ojerovia ha ojesalva. Heta hénte ontende upéva oiko rupi umi lugár ojekuaahápe Ñandejárape ha ojeporu mimi la Biblia (elee Eclesiastés 7:20). Umichahárupi oĩ ndogueroviapáiva ‘opavave opekaha’ heʼi haguéicha Pablo, upéicharõ jepe ontende vai vai mbaʼépa haʼe heʼisevaʼekue (Rom. 3:23). Péro heta hendápe ermanokuéra ojuhu tapicha ni michĩmi nontendéiva mbaʼéicha rupípa ojeʼe ‘opavave opekaha’.
11 Heta tetãme umi hénte ni nopensái pekadorha ha ñagueronaseha pe pekádo. Upéicharamo jepe oikuaa ojavyha, nosẽporãiha chupe opa mbaʼe ha sapyʼánte ojapoha mbaʼe vai. Avei ohechakuaa opavavépe ojehuha upéicha. Péro pe lugár oikohápe noñemboʼéi mbaʼéicha rupípa entéro yvypóra ojavy. Ikatu voi iñeʼẽme ojeʼe pekadór umi naiñeʼẽrendúivapente, térã ojapóvape umi mbaʼe ivaietereíva, upévare ndohechakuaái haʼe avei pekadorha heʼi haguéicha Pablo.
12. Mbaʼérepa heta tapicha ndogueroviái opavave yvypóra pekadorha?
12 Heta tetãme umi tapicha heʼíva ijehe kristiáno jepe ndogueroviái ñagueronaseha pe pekádo. Mbaʼérepa opensa hikuái upéicha? Ohóramo jepe sapyʼapyʼa tupaópe, opensa umi mbaʼe la Biblia heʼíva Adán ha Évare kuénto reinteha. Oĩ katu okakuaáva umi lugár ndojejeroviaihápe Ñandejárare, upévare ndogueroviái oĩha ñande Apohare Ipuʼakapáva, ikatúva heʼi ñandéve mbaʼéichapa jaikovaʼerã ha japekahañaína nañaneñeʼẽrendúiramo chupe. Haʼete umi tapicha síglo primérope guare Pablo heʼi hague oikoha ‘ko yvy ári Ñandejára reheʼỹ ha ndorekoiha mbaʼeve ohaʼarõvaʼerã’ (Efe. 2:12, BNP).
13, 14. a) Mbaʼérepa ndoguerekói mbaʼeve heʼivaʼerã umi ndogueroviáiva Ñandejára oĩha ha ñanaseha pekadór? b) Mbaʼépa ojapo heta tapicha ndojeroviáigui Ñandejárare?
13 Románospe Pablo omombeʼu mokõi mbaʼe ohechaukáva mbaʼérepa ndaikatúi ñapensa upéicha, jaikóramo jepe peteĩ lugár ojegueroviahápe koʼã mbaʼe. Ñepyrũrã, ko arapýre voi jahecha oĩha peteĩ opa mbaʼe Apohare (elee Romanos 1:19, 20). Upéva jahechakuaa avei Pablo ohaivaʼekuére Hebréospe oĩrõ guare Rómape: “Opa óga oime ijapohare, [Ñandejára] katu opa mbaʼe Apohare” (Heb. 3:4). Ko téysto ohechauka oĩmantevaʼerãha ko arapy ha opa mbaʼe Apohare.
14 Ndareíringo Pablo ohai ‘ndoguerekoiha mbaʼeve heʼivaʼerã’ umi isrraelíta térã ambue tetãygua omombaʼeguasúva taʼanga rei. Ha upeichaite jaʼekuaa avei umi hénte hekokyʼávare, kuña oikóva kuñándi ha kuimbaʼe kuimbaʼéndi (Rom. 1:22-27). Pablo omyesakã rire koʼã mbaʼe heʼi “opavave hudíova ha hudioʼỹva oĩha [pekádo] poguýpe” (Rom. 3:9).
Mbaʼépa “ohechauka” ñane konsiénsia
15. Mbaʼépa oreko entéro yvypóra, ha mbaʼépa ohechakuaa upéicha rupi?
15 Pe kuatiañeʼẽ Pablo ohaivaʼekue umi Romayguápe omombeʼuve mbaʼérepa tekotevẽ jahechakuaa ñande pekadorha ha ñaikotevẽha ñanemosãsovaʼerã upévagui. Imanduʼávo pe léi Jehová omeʼẽvaʼekuére Israélpe, Pablo heʼi: “Opa umi opekavaʼekue oguereko riréma léi [...] léi rehe ojehusgavaʼerã” (Rom. 2:12, BNP). Upéi heʼi opavave tapicha ndoikuaáiva Ñandejára léi jepe “ohechauka oguerekoha ipyʼapýpe pe léi ojeruréva”. Upévare ohechakuaa ivaiha omonda, oporojuka ha oñeno ihéntendi. Mbaʼéicha rupípa? Heʼiháicha Pablo, opavave yvypóra ikonsiénsia (elee Romanos 2:14, 15).
16. Heʼisépa jareko haguére konsiénsia ndajajapomoʼãiha ivaíva?
16 Opavave jaikuaa ñane konsiénsia ikatuha heʼi ñandéve mbaʼépa oĩ porã térã mbaʼépa oĩ vai, péro upéva ndeʼiséi katuete ñahendutaha chupe. Ñapensamínte umi isrraelíta yma guarére. Haʼekuéra heta vése nopenái ikonsiénsiare ni pe Léi heʼívare, ndovaleiha ñamonda ha ñaporomoakãratĩ (Rom. 2:21-23). Upévare tuichaitevéntema opeka hikuái. Añetehápe, enterovéva hembiapo vai, ndoikói pe Léi ojerureháicha ni Ñandejára oipotaháicha, ha upéicha rupi koʼýte oñemoĩ vai hendive (Lev. 19:11; 20:10; Rom. 3:20).
17. Mbaʼéichapa ñanemokyreʼỹ Romanos?
17 Umi mbaʼe jahechavaʼekuére ikatu oĩ opensáva Romanos nañanemokyreʼỹiha, omombeʼu rupi mbaʼéichapa ñaime Ñandejára Ipuʼakapáva renondépe. Péro iporã jaikuaa Pablo imanduʼa hague avei Salmo 32:1,2-pe heʼívare: ‘Ovyʼaiténepa umi Ñandejára oheja rei vaʼekue chupe opa heko añangue, ha ombohasa reíva umi hembiapo vaikue. Ovyʼaiténepa pe yvypóra Ñandejára oheja reiha hembiapo vaikue’ (Rom. 4:7, 8). Jahechaháicha Jehová ikatu ombohasa rei ñande pekádo, ha haʼe voi ojapo tekotevẽva ñaneperdona hag̃ua.
Marandu porã oñeʼẽva Jesús rehe
18, 19. a) Mbaʼépa hína pe marandu porã Pablo hetaite oñeʼẽ hague Románospe? b) Mbaʼépa jajapovaʼerã jaikoséramo Ñandejára Rréino poguýpe?
18 Ñapensávo Jehová ojapovaʼekuére ikatu jaʼe: “Ajépa iporãite ko marandu!”. Upéva ñanemomanduʼa jey pe marandu porãre, Pablo hetaite oñeʼẽ hague umi ermáno Romayguápe. Jahecháma haguéicha haʼe ohai: ‘Che naguerotĩri pe marandu porã; ipype oĩ Ñandejára puʼaka osalva hag̃ua opaite ojeroviávape’ (Rom. 1:15, 16).
19 Pe marandu porã Pablo imanduʼaite hague omombeʼu mbaʼeichaitépa iñimportánte Jesús ojapóva oñekumpli hag̃ua Ñandejára rembipota. Pór ehémplo, haʼe omombeʼu ‘pe marandu porã heʼiháicha’ og̃uahẽtaha pe ára ‘Jesucristo rupive Ñandejára ohusgataha opa yvypóra mbaʼe ñemi’ (Rom. 2:16, BNP). Péva ndeʼiséi naiñimportanteiha ‘Cristo ha Ñandejára Sãmbyhy’ ni umi mbaʼe Jehová ojapótava pe goviérno rupive (Efe. 5:5). Heʼise uvei umi oikoséva guive Ñandejára Rréino poguýpe ha ohupytyséva umi mbaʼe porã, ojapovaʼerãha mokõi mbaʼe. Primero, ohechakuaavaʼerã pekadorha Ñandejára renondépe, ha segundo ohechaukavaʼerã ojeroviaha Jesucrístore oñeperdona hag̃ua chupe hembiapo vaikue. Ñantende porãramo koʼã mokõi mbaʼe ha jahechakuaáramo ikatuha jahupyty heta mbaʼe porã amo gotyove, katuete jaʼéta: “Ajépa iporãite ko marandu!”.
20, 21. Mbaʼéguipa nañanderesarairivaʼerã ñamombeʼu jave pe marandu porã, ha mbaʼépa ikatu jahupyty?
20 Nañanderesarairivaʼerã umi mbaʼe jahechavaʼekuégui ñamombeʼu jave pe marandu porã ñande rapichakuérape. Imanduʼávo Isaías heʼivaʼekuére, Pablo ohai: “Pe ojeroviáva [Jesús rehe] ndopytareirichéne” (Rom. 10:11; Isa. 28:16). Heta tetãme umi hénte oikuaa la Biblia omboʼeha yvypóra pekadorha, ha upéicha rupi ndahasýi chupekuéra oguerovia hag̃ua umi mbaʼe ñamboʼéva Jesucrístogui. Péro umi lugár ndojekuaguasuihápe Jesúspe, hasy umi hénte ontende hag̃ua ko marandu porã. Upévare koʼã tapicha oaprendévo la Biblia omboʼéva ha ojeroviávo Ñandejárare, tekotevẽ avei ñamyesakã porã chupekuéra mbaʼépa Jesús ojapo oñekumpli hag̃ua Jehová rembipota. Pe artíkulo oúvape oñehesaʼỹijóta pe marandu porã oñeʼẽva Jesucrístore, oñemombeʼuháicha Romanos kapítulo 5-pe. Upéva katuete ñanepytyvõta japredika jave ñande rapichakuérape.
21 Jahecháma haguéicha, Romanos oñeʼẽ heta vése pe marandu porã rehe ha heʼi: ‘Ipype oĩ Ñandejára puʼaka osalva hag̃ua opaite ojeroviávape’ (Rom. 1:16). Javyʼaite ningo jaikuaágui ko marandu porã ha ikatu haguére ñaipytyvõ ñande rapicha ipyʼaporãvape oikuaa hag̃ua avei! Katuete umi ogueroviáva ko marandu porã omboʼéva la Biblia heʼi avei Pablo heʼi haguéicha Romanos 10:15-pe: “Iporãite piko jahecháramo og̃uahẽ umi marandu porã oguerúva!” (Isa. 52:7).
[Nóta]
^ párr. 5 Ambue téysto oiporu avei pe ñeʼẽ ‘marandu porã oñeʼẽva Cristo rehe’ (Mar. 1:1; Hech. 5:42; 1 Cor. 9:12; Fili. 1:27).
Ñanemanduaʼápa koʼã mbaʼére?
• Mbaʼépa hína pe marandu porã oñeñeʼẽteha Románospe?
• Mbaʼépa tekotevẽ umi hénte ohechakuaa?
• Mbaʼépa jahupytýta pe ‘marandu porã oñeʼẽva Cristo rehe’ rupive?
[Porandu ñahesaʼỹijóva]
[Nóta oĩva taʼanga ndive páhina 9]
Opavave ñagueronase peteĩ mbaʼe ivaietereíva: pe pekádo
