Wẹndagbe He Gbẹtọ Lẹpo Tindo Nuhudo Etọn
Wẹndagbe He Gbẹtọ Lẹpo Tindo Nuhudo Etọn
‘Wẹndagbe lọ na nugbo tọn, wẹ huhlọn Jiwheyẹwhe tọn na whlẹngán.’—LOM. 1:16.
1, 2. Naegbọn hiẹ do nọ lá “wẹndagbe ahọluduta” lọ tọn, podọ adà etọn tẹlẹ ji wẹ a nọ zinnudo?
‘HOMẸ ṣie nọ hùn nado lá wẹndagbe lọ to azán dopodopo ji.’ Hiẹ lọsu sọgan ko tindo numọtolanmẹ enẹ kavi zan hogbe enẹlẹ pọ́n. Taidi Kunnudetọ Jehovah tọn mẹdezejotọ de, hiẹ yọ́n lehe yẹwheho “wẹndagbe ahọluduta lọ tọn” didọ yin nujọnu do. A tlẹ sọgan hia dọdai Jesu tọn gando mọwiwà go sọn tamẹ.—Mat. 24:14.
2 Eyin a nọ dọyẹwheho “wẹndagbe ahọluduta” lọ tọn, be a to nukọnzindo to nuhe Jesu bẹjẹeji lọ mẹ niyẹn. (Hia Luku 4:43.) Matin ayihaawe, dopo to nuhe ji a nọ zinnudo hugan lẹ mẹ wẹ yindọ, Jiwheyẹwhe na dádo whẹho gbẹtọvi lẹ tọn mẹ to madẹnmẹ. To “nukunbibia daho” lọ whenu, e na hẹn opodo wá na sinsẹ̀n lalo bo de ylanwiwa sẹ̀ sọn aigba ji mlẹnmlẹn. (Mat. 24:21) Vlavo hiẹ sọ nọ zinnudeji dọ Ahọluduta Jiwheyẹwhe tọn na hẹn Paladisi gọwá aigba ji na jijọho po ayajẹ po nido sọgan gbayipe. Na nugbo tọn, “wẹndagbe ahọluduta” lọ tọn yin apadewhe “wẹndagbe lọ [he yin lilá] jẹnukọn hlan Ablaham dọmọ: ‘Gbọn hiẹ gblamẹ wẹ akọta lẹpo na yin didona te’” tọn.—Gal. 3:8.
3. Naegbọn mí sọgan dọ dọ apọsteli Paulu zinnudo wẹndagbe ji to owe Lomunu lẹ tọn mẹ?
3 Ṣigba, be enẹ dohia dọ ayidonugo vude poun wẹ mí nọ na adà titengbe wẹndagbe he gbẹtọ lẹ tindo nuhudo etọn lọ tọn ya? To wekanhlanmẹ etọn hlan Lomunu lẹ mẹ, whladopo gee wẹ apọsteli Paulu yí hogbe lọ “ahọluduta” zan, ṣigba e yí hogbe lọ “wẹndagbe” zan whla 12. (Hia Lomunu lẹ 14:17.) Adà wẹndagbe lọ tọn tẹwẹ Paulu dlẹnalọdo whlasusu to owe enẹ mẹ? Naegbọn wẹndagbe vonọtaun enẹ do yin nujọnu? Podọ naegbọn mí dona nọ hẹn ẹn do ayiha mẹ dile mí to yẹwheho “wẹndagbe Jiwheyẹwhe tọn” dọ na gbẹtọ lẹ to aigba-denamẹ mítọn ji?—Malku 1:14; Lom. 15:16; 1 Tẹs. 2:2.
Nuhe Klistiani He to Lomu lẹ Tindo Nuhudo Etọn
4. To whenue Paulu yin wiwle do gànmẹ whla tintan to Lomu, etẹlẹ ji wẹ e dọyẹwheho do?
4 Mí na plọn nususu eyin mí na ayidonugo hosọ he ji Paulu zinnudo lẹ to whenue e yin wiwle do gànmẹ whla tintan to Lomu. Mí hia dọ to whenue Ju delẹ wá dla ẹ pọ́n, e ‘dekunnu mlẹnmlẹn gando (1) ahọluduta Jiwheyẹwhe tọn go bo diọlinlẹnna yé gando (2) Jesu go.’ Etẹwẹ yin kọdetọn lọ? “Mẹdelẹ jẹ nuhe dọ e te lẹ yise ji; mẹdevo lẹ ma yise.” Enẹgodo, Paulu ‘nọ do homẹdagbe hia mẹhe wá e dè lẹpo, bo nọ to yẹwheho (1) ahọluduta Jiwheyẹwhe tọn dọ hlan yé bosọ nọ to nuhe gando (2) Oklunọ Jesu Klisti go lẹ plọnmẹ.’ (Owalọ 28:17, 23-31) E họnwun dọ Paulu na ayidonugo Ahọluduta Jiwheyẹwhe tọn. Ṣigba onú devo tẹ ji wẹ e sọ zinnudo? Nude he yin adà titengbe Ahọluduta lọ tọn—yèdọ azọngban Jesu tọn to lẹndai Jiwheyẹwhe tọn mẹ.
5. Nuhudo tangan tẹ ji wẹ Paulu zinnudo to owe Lomunu lẹ tọn mẹ?
5 Gbẹtọ lẹpo wẹ dona yọ́n Jesu bo do yise hia to ewọ mẹ. Paulu zinnudo nuhudo ehe ji to owe Lomunu lẹ tọn mẹ. To bẹjẹeji, e wlanwe do “Jiwheyẹwhe, mẹhe [e] to sinsẹ̀nzọn wiwe wà na, bo to nulẹpo wà na wẹndagbe lọ he gando Visunnu etọn go” ji. E yidogọ dọmọ: “Winyan wẹndagbe lọ tọn ma hù mi; na nugbo tọn, ehe wẹ huhlọn Jiwheyẹwhe tọn na whlẹngán na mẹlẹpo he tindo yise.” To godo mẹ, e dlẹnalọdo ojlẹ lọ “to whenuena Jiwheyẹwhe na gbọn Klisti Jesu gblamẹ dawhẹna onú whiwhla gbẹtọvi lẹ tọn, sọgbe hẹ wẹndagbe he [e] lá.” Podọ e dọmọ: “Yẹn dọyẹwheho wẹndagbe tọn to gigọ́ mẹ gando Klisti go sọn Jelusalẹm podọ kaka gbọn lẹdo Illilikumi tọn lẹpo pete mẹ.” a (Lom. 1:9, 16; 2:16; 15:19) Naegbọn Paulu do zinnudo Jesu Klisti ji na Lomunu lẹ?
6, 7. Etẹwẹ mí sọgan dọ gando bẹjẹeji agun Lomu tọn po mẹhe tin to e mẹ lẹ po go?
6 Mí ma yọ́n lehe agun Lomu tọn bẹjẹeji do. Be Ju po mẹdiọzun Juvi he tin to hùnwhẹ Pẹntikọsti 33 W.M. tẹnmẹ lẹ po lẹkọyi Lomu taidi Klistiani lẹ wẹ ya? (Owalọ 2:10) Kavi be Klistiani ajọwatọ po tomẹyitọ lẹ po wẹ hẹn nugbo lọ gbayipe to Lomu ya? Depope he whẹho lọ yin, to whenue Paulu wlan owe lọ to nudi 56 W.M., agun lọ ko yin didoai hoho. (Lom. 1:8) Gbẹtọ wunmẹ tẹlẹ wẹ tin to agun lọ mẹ?
7 Mẹdelẹ yin Ju. To nudọdomẹ Paulu tọn hlan Andloniku po Junia po mẹ, e dlẹnalọdo yé taidi “hẹnnumẹ ṣie lẹ,” ehe sọgan zẹẹmẹdo hẹnnumẹ he yin Ju hatọ lẹ. Akuila he yin gòhọ-gbátọ de to Lomu po asi etọn Pliskila po sọ yin Ju ga. (Lom. 4:1; 9:3, 4; 16:3, 7; Owalọ 18:2) Ṣigba, e taidi dọ susu mẹmẹsunnu po mẹmẹyọnnu po he Paulu do nudọdomẹ etọn hlan lẹ tọn wẹ yin Kosi. Mẹdelẹ sọgan ko tin “to whédo Sesali tọn mẹ,” vlavo afanumẹ Sesali tọn lẹ po ahọluzọnwatọ flinflin lẹ po.—Flp. 4:22; Lom. 1:6; 11:13.
8. Ninọmẹ sinsinyẹn tẹwẹ mẹhe tin to Lomu lẹ pehẹ?
8 Klistiani he tin to Lomu lẹpo wẹ pehẹ ninọmẹ sinsinyẹn de he mílọsu to pipehẹ. Paulu do ehe hia dọmọ: “Mẹlẹpo wẹ ko waylando bo whete do gigo Jiwheyẹwhe tọn go.” (Lom. 3:23) E họnwun dọ, mẹhe hia wekanhlanmẹ Paulu tọn ehe lẹpo dona kẹalọyi dọ yé yin ylandonọ bosọ dona do yise hia to awuwledainanu Jiwheyẹwhe tọn mẹ nado sọgan duto ninọmẹ enẹ ji.
Gbẹtọ lẹ Dona Kẹalọyi Dọ Yé Yin Ylandonọ
9. Kọdetọn he wẹndagbe lọ sọgan hẹn yọnbasi tẹ ji wẹ Paulu zinnudo?
9 To bẹjẹeji wekanhlanmẹ etọn tọn hlan Lomunu lẹ mẹ, Paulu donù kọdetọn jiawu he sọgan wá sọn wẹndagbe he e to lilá lọ mẹ go dọmọ: “Winyan wẹndagbe lọ tọn ma hù mi; na nugbo tọn, ehe wẹ huhlọn Jiwheyẹwhe tọn na whlẹngán na mẹlẹpo he tindo yise, yèdọ na Ju lẹ whẹ́ podọ na Glẹkinu lẹ ga.” Mọwẹ, e yọnbasi nado mọ whlẹngán. Etomọṣo, yise yin dandannu, sọgbe hẹ nugbo sisosiso he go Paulu donù dọmọ: “Dodonọ na nọgbẹ̀ gbọn yise etọn dali.” (Lom. 1:16, 17; Gal. 3:11; Heb. 10:38) Ṣigba, nawẹ wẹndagbe enẹ he sọgan planmẹ jẹ whlẹngán kọ̀n, gando nugbo lọ go dọ “mẹlẹpo wẹ ko waylando” gbọn?
10, 11. Naegbọn nuhe yin didọ to Lomunu lẹ 3:23 mẹ ma nọ paṣa mẹdelẹ ṣigba bo nọ yinmọ na mẹdevo lẹ?
10 Whẹpo mẹde nado wleawuna yise gbẹwhlẹngán tọn, e dona yọnẹn dọ emi yin ylandonọ. Linlẹn lọ dọ mí yin ylandonọ ma na paṣa mẹhe tindo yise to Jiwheyẹwhe mẹ sọn ovu bosọ jẹakọ hẹ Biblu lẹ gba. (Hia Yẹwhehodọtọ 7:20.) Vlavo gbẹtọ lẹ kẹalọyi kavi tindo ayihaawe, e whè gbau yé na tindo linlẹn de do nuhe dọ Paulu te ji to whenue e dọmọ: “Mẹlẹpo wẹ ko waylando.” (Lom. 3:23) Etomọṣo, to lizọnyizọn mítọn mẹ, mí sọgan dukosọ hẹ mẹsusu he ma mọnukunnujẹ hodidọ enẹ mẹ.
11 To otò delẹ mẹ, gbẹtọ lẹ to paa mẹ ma nọ yin pinplọn whẹ́n po linlẹn lọ po dọ yé yin jiji taidi ylandonọ, kavi dọ yé dugu ylando tọn gba. Na taun tọn, yé yọnẹn dọ yé nọ ṣinuwa, tindo jijọ ylankan lẹ, bo sọgan ko wà onú ylankan delẹ. Podọ yé nọ doayi e go dọ mẹdevo lẹ lọsu tin to ninọmẹ dopolọ mẹ. Ṣigba, na lẹdo he mẹ yé wá sọn wutu, yé ma nọ mọnukunnujẹ nuhewutu yewlẹ po mẹdevo lẹ po do tin to ninọmẹ mọnkọtọn mẹ. Na nugbo tọn, to ogbè delẹ mẹ, eyin a dọ dọ mẹde yin ylandonọ, mẹdevo lẹ sọgan lẹndọ a to didọ dọ ewọ yin danuwatọ kavi dọ mẹlọ ko gbà osẹ́n delẹ. Matin ayihaawe, e na vẹawuna mẹhe whẹ́n to lẹdo mọnkọtọn mẹ de nado lẹndọ emi yin ylandonọ sọgbe hẹ nuhe dọ Paulu te.
12. Naegbọn mẹsusu ma yise dọ gbẹtọ lẹpo wẹ yin ylandonọ?
12 Etlẹ yin to otò he mẹ sinsẹ̀n Mẹylọhodotọklisti tọn gbayipe te lẹ mẹ, mẹsusu ma nọ yise dọ yé yin ylandonọ. Etẹwutu? To whenuena e yindọ vlavo wẹ yé nọ yì ṣọṣi, yé nọ pọ́n kandai Biblu tọn gando Adam po Evi po go taidi otangblo de poun. Mẹdevo lẹ yin pinplọn whẹ́n to mẹhe jẹagọdo Jiwheyẹwhe lẹ ṣẹnṣẹn. Yé tindo ayihaawe gando tintin Jiwheyẹwhe tọn go, ehe zọ́n bọ yé ma mọnukunnujẹemẹ dọ Nupojipetọ de ze nujinọtedo walọ dagbe tọn lẹ dai na gbẹtọvi lẹ bọ awugbopo nado hodo nujinọtedo enẹlẹ zẹẹmẹdo ylando. To linlẹn de mẹ, yé taidi omẹ owhe kanweko tintan tọn lẹ he Paulu basi zẹẹmẹ yetọn di mẹhe ma tindo “todido depope” bo “ma tindo Jiwheyẹwhe to aihọn mẹ.”—Efe. 2:12.
13, 14. (a) Etẹwẹ yin dopo to whẹwhinwhẹ́n he wutu mẹhe ma yise to Jiwheyẹwhe mẹ podọ to ylando mẹ lẹ ma tindo whẹjijọ lẹ mẹ? (b) Etẹ kọ̀n wẹ yise matindo plan mẹsusu jẹ?
13 To wekanhlanmẹ etọn hlan Lomunu lẹ mẹ, Paulu na whẹwhinwhẹ́n awe he wutu lẹdo mọnkọtọn mẹ wiwá sọn ma sọgan yin whẹjijọ de—to ojlẹ enẹ mẹ kavi to egbehe. Whẹwhinwhẹ́n tintan wẹ yindọ nudida lẹ lọsu nọ dekunnu dọ Mẹdatọ de tin. (Hia Lomunu lẹ 1:19, 20.) Ehe tin to kọndopọ mẹ hẹ ayidonugo Paulu tọn to whenue e to wekanhlan Heblu lẹ sọn Lomu dọmọ: “Ohọ̀ lẹpo wẹ nọ yin gbigbá gbọn mẹde dali, ṣigba mẹhe basi onú lẹpo wẹ Jiwheyẹwhe.” (Heb. 3:4) Aliho hoyijlẹdohogo tọn enẹ dohia dọ Mẹdatọ de tin he wleawuna wẹkẹ lọ blebu kavi hẹn ẹn wá aimẹ.
14 Enẹwutu, owhẹ̀ Paulu tọn whẹ́n to whenue e kanwehlan Lomunu lẹ dọ mẹdepope—etlẹ yin Islaelivi hohowhenu tọn lẹ—he nọ sẹ̀n boṣiọ tata lẹ “ma tindo whẹjijọ.” Nudopolọ sọgan yin didọ gando mẹhe nọ jo yede na fẹnnuwiwa zanhẹmẹ tọn he jẹagọdo yizan agbasa sunnu po yọnnu po tọn to jọwamọ-liho lẹ go. (Lom. 1:22-27) To alọdindlẹndo nuhe e dọ wayi lẹ mẹ, Paulu wá tadona lọ kọ̀n po gbesisọ po dọ “Ju lẹ podọ Glẹkinu lẹ, yèdọ mẹlẹpo wẹ to ylando glọ.”—Lom. 3:9.
‘Kunnudetọ’ De
15. Etẹwẹ gbẹtọ lẹpo tindo podọ nawẹ e nọ yinuwado yé ji gbọn?
15 Owe Lomunu lẹ tọn sọ do whẹwhinwhẹ́n devo hia he wutu gbẹtọ lẹ dona kẹalọyi dọ yé yin ylandonọ bo tindo nuhudo nado tọ́n sọn ninọmẹ sinsinyẹn enẹ mẹ. Gando todohukanji osẹ́n tọn he Jiwheyẹwhe na Islaeli hohowhenu tọn go, Paulu wlan dọmọ: “Mẹhe waylando to osẹ́n glọ lẹpo na yin whẹdana gbọn osẹ́n dali.” (Lom. 2:12) E zindonukọn to hoyijlẹdohogo etọn mẹ bo dohia dọ gbẹtọ akọta lẹ tọn he ma jẹakọ hẹ todohukanji osẹ́n tọn he Jiwheyẹwhe wleawuna enẹ lẹ nọ saba “wà nuhe yin osẹ́n tọn lẹ gbọn jọwamọ dali.” Naegbọn omẹ mọnkọtọn lẹ nọ dapana zanhẹmẹ hẹnnumẹ tọn, mẹhuhu, po ajojijẹ po to jọwamọ-liho? Paulu do whẹwhinwhẹ́n lọ hia: Yé tindo ayihadawhẹnamẹnu.—Hia Lomunu lẹ 2:14, 15.
16. Naegbọn ayihadawhẹnamẹnu tintindo ma zẹẹmẹdo dọ mẹde na dapana ylando wiwà dandan?
16 Etomọṣo, hiẹ sọgan ko mọdọ ayihadawhẹnamẹnu he to azọ́nwa taidi kunnudetọ homẹ tọn de tintindo ma zẹẹmẹdo dọ mẹde na nọ hodo anademẹ etọn gba. Apajlẹ Islaeli hohowhenu tọn do enẹ hia. Dile etlẹ yindọ Jiwheyẹwhe na Islaelivi lẹ ayihadawhẹnamẹnu de gọna osẹ́n tangan delẹ gando ajojijẹ po ayọdide po go, whlasusu wẹ yé gbẹ́ anademẹ ayihadawhẹnamẹnu yetọn tọn bosọ gbà Osẹ́n Jehovah tọn. (Lom. 2:21-23) Yé hùwhẹ do whla awe ji, ehe dohia dọ yé yin ylandonọ na nugbo tọn, bo whete do nujinọtedo po ojlo Jiwheyẹwhe tọn lẹ po go. Ehe hẹn haṣinṣan he yé tindo hẹ Mẹdatọ yetọn gble pete.—Lev. 19:11; 20:10; Lom. 3:20.
17. Homẹmiọnnamẹ tẹwẹ mí mọ to owe Lomunu lẹ tọn mẹ?
17 Nuhe mí gbadopọnna sọn owe Lomunu lẹ tọn mẹ sọgan to ninọmẹ blawu gbẹtọvi lẹ tọn to Ganhunupotọ lọ nukọn dohia kakajẹ mílọsu tọn ji. Ṣigba, Paulu ma nọte do finẹ. Apọsteli lọ yihodọ sọn ohó Davidi tọn mẹ to Psalm 32:1, 2 mẹ dọmọ: “Ayajẹnọ wẹ mẹhe walọ sẹ́nhẹngba tọn yetọn lẹ ko yin jijona podọ mẹhe ylando yetọn lẹ ko yin nuṣinyọndo; ayajẹnọ wẹ omẹ lọ he Jehovah ma na hia ylando etọn dokọna to aliho depope mẹ.” (Lom. 4:7, 8) Mọwẹ, Jiwheyẹwhe ko wleawu aliho he sọgbe hẹ osẹ́n de tọn nado jo ylando mítọn lẹ na mí.
Wẹndagbe He Sinai Do Jesu Ji
18, 19. (a) Adà wẹndagbe lọ tọn tẹ ji wẹ Paulu zinnudo to owe Lomunu lẹ tọn mẹ? (b) Nado mọ dona Ahọluduta lọ tọn lẹ yí, etẹwẹ mí dona kẹalọyi?
18 Eyin hiẹ lẹnnupọndo awuwledainanu Jehovah tọn lọ ji, hiẹ sọgan yigbe dọ, “Wẹndagbe de wẹ ehe yin nugbonugbo!” Na taun tọn mọ wẹ e yin, ehe hẹn mí nado flin adà wẹndagbe lọ tọn he ji Paulu zinnudo to owe Lomunu lẹ tọn mẹ. Dile e yin didọ do, Paulu wlan dọmọ: “Winyan wẹndagbe lọ tọn ma hù mi; na nugbo tọn, ehe wẹ huhlọn Jiwheyẹwhe tọn na whlẹngán.”—Lom. 1:15, 16.
19 Wẹndagbe enẹ sinai do azọngban Jesu tọn to lẹndai Jiwheyẹwhe tọn hinhẹndi mẹ ji. Paulu sọgan pọ́n nukọn hlan “azán lọ gbè to whenuena Jiwheyẹwhe na gbọn Klisti Jesu gblamẹ dawhẹna onú whiwhla gbẹtọvi lẹ tọn, sọgbe hẹ wẹndagbe” lọ. (Lom. 2:16) To whenue e dọ enẹ, e ma to nukunpẹvi yí do pọ́n “ahọluduta Klisti tọn po Jiwheyẹwhe tọn po” kavi nuhe Jiwheyẹwhe na wà gbọn Ahọluduta lọ gblamẹ gba. (Efe. 5:5) Ṣigba, e dohia dọ eyin mí na nọgbẹ̀ bo duvivi dona he na gbayipe to Ahọluduta Jiwheyẹwhe tọn glọ lẹ tọn, mí dona kẹalọyi dọ (1) mí yin ylandonọ to nukun Jiwheyẹwhe tọn mẹ podọ (2) yise to Jesu Klisti mẹ yin dandannu eyin mí na mọ jona ylando mítọn lẹ tọn. Eyin mẹde wá mọnukunnujẹemẹ bo kẹalọyi adà lẹndai Jiwheyẹwhe tọn enẹlẹ bosọ mọ sọgodo he tin to nukọnna ẹn, ewọ sọgan dọ po gbesisọ po dọ “Mọwẹ, wẹndagbe de wẹ ehe yin nugbonugbo!”
20, 21. To lizọnyizọn mítọn mẹ, naegbọn mí dona hẹn wẹndagbe lọ he yin nùzindeji to owe Lomunu lẹ tọn mẹ do ayiha mẹ, podọ kọdetọn tẹwẹ e sọgan hẹnwa?
20 Mí dona hẹn adà wẹndagbe lọ tọn ehe do ayiha mẹ hezeheze dile mí to lizọnyizọn Klistiani tọn mítọn hẹndi. Paulu yihodọ sọn owe Isaia tọn mẹ nado dlẹnalọdo Jesu dọmọ: “Mẹdepope he ze yise etọn sinai do ewọ ji ma na jẹflumẹ.” (Lom. 10:11; Isa. 28:16) Owẹ̀n titengbe lọ gando Jesu go sọgan nọma yin nupaṣamẹ na mẹhe jẹakọ hẹ nuhe Biblu dọ gando ylando go lẹ. Ṣigba, onú yọyọ pete wẹ owẹ̀n ehe na yin na mẹdevo lẹ, yèdọ nuhe yé ma yọnẹn kavi ma yise to aṣa yetọn mẹ. Dile omẹ mọnkọtọn lẹ wá yise to Jiwheyẹwhe mẹ bo dejido Owe-wiwe lẹ go, mí dona basi zẹẹmẹ azọngban Jesu tọn na yé. Hosọ he bọdego na gbadopọnna lehe Lomunu lẹ weta 5 basi zẹẹmẹ do adà wẹndagbe lọ tọn ehe ji do. Matin ayihaawe, hiẹ na mọdọ nupinplọn enẹ na yọ́n-na-yizan to lizọnyizọn towe mẹ.
21 Lehe mí na mọaleyi do sọ dile mí to alọgọna ahunjijlọnọ lẹ nado mọnukunnujẹ wẹndagbe he yin nùdego whlasusu to owe Lomunu lẹ tọn mẹ, yèdọ wẹndagbe he “na nugbo tọn, [yin] huhlọn Jiwheyẹwhe tọn na whlẹngán na mẹlẹpo he tindo yise.” (Lom. 1:16) Gbọnvona ale he mí na mọyi, mí na mọ mẹdevo lẹ he na kọngbedopọ hẹ numọtolanmẹ Paulu tọn he tin to Lomunu lẹ 10:15 mẹ dọmọ: “Lehe afọ mẹhe to wẹndagbe onú dagbe lẹ tọn lá tọn lẹ yọnwhanpẹ do sọ!”—Isa. 52:7.
[Nudọnamẹ odò tọn]
a Hogbe mọnkọtọn lẹ sọawuhia to owe gbọdo devo lẹ mẹ.—Malku 1:1; Owalọ 5:42; 1 Kọl. 9:12; Flp. 1:27.
Be Hiẹ Flin Ya?
• Adà wẹndagbe lọ tọn tẹ ji wẹ owe Lomunu lẹ tọn zinnudo?
• Nugbo tẹwẹ mí dona gọalọna mẹdevo lẹ nado mọnukunnujẹemẹ?
• Nawẹ ‘wẹndagbe gando Klisti go’ sọgan yin dona na míwlẹ po mẹdevo lẹ po gbọn?
[Kanbiọ Oplọn tọn lẹ]
[Yẹdide to weda 8]
Wẹndagbe he ji owe Lomunu lẹ tọn zinnudo lọ gando azọngban titengbe Jesu tọn to lẹndai Jiwheyẹwhe tọn mẹ go
[Yẹdide to weda 9]
Mí yin jiji po oblọ he nọ hẹn okú wá de po—yèdọ ylando!