Kũrĩ na Ũhoro Mwega Ũrĩa Andũ Othe Marabatara
Kũrĩ na Ũhoro Mwega Ũrĩa Andũ Othe Marabatara
‘Ũhoro-ũcio-Mwega-rĩ, nĩguo hinya wa Ngai wa kũhonokania.’— ROM. 1:16.
1, 2. Nĩ kĩĩ gĩtũmaga ũhunjie “Ũhoro-ũyũ-Mwega wa ũthamaki,” na nĩ maũndũ marĩkũ maguo wee ũtĩtĩrithagia?
NO KŨHOTEKE wanekora ũgĩciria kana ũkiuga ciugo ici; ‘Hingo ciothe njiguaga ndĩ na gĩkeno ngĩhunjia ũhoro ũrĩa mwega.’ Ũrĩ Mũira wa Jehova wĩrutĩire-rĩ, nĩ ũĩ atĩ kũhunjia “Ũhoro-ũyũ-Mwega wa ũthamaki” nĩ kwa bata mũno. Kwahoteka no ũcokere ta rũĩmbo ũrathi wa Jesu ũrĩa warĩtie ũhoro wĩgiĩ wĩra ũcio.—Mat. 24:14.
2 Rĩrĩa ũrahunjia “Ũhoro-ũrĩa-Mwega wa ũthamaki,” ũkoragwo ũgĩtwarithia na mbere wĩra ũrĩa Jesu aambĩrĩirie. (Thoma Luka 4:43.) Hatarĩ nganja, kaũndũ kamwe ũtĩtĩrithagia nĩ atĩ ica ikuhĩ Ngai nĩ arĩingĩrĩra mĩtabarĩre ya andũ. Hĩndĩ ya ‘thĩna ũrĩa mũnene’ nĩ akaniina ndini ya maheeni na eherie waganu thĩinĩ wa thĩ. (Mat. 24:21) Ningĩ no kũhoteke nĩ wĩraga andũ atĩ Ũthamaki wa Ngai nĩ ũgaacokia Paradiso gũkũ thĩ nĩguo kũgĩe na thayũ na gĩkeno. Ma nĩ atĩ, “Ũhoro-ũrĩa-Mwega wa ũthamaki” nĩ ũmwe wa ‘ũhoro-ũrĩa-mwega’ wahunjĩirio Iburahimu o mbere, atĩ, “Ndũrĩrĩ ciothe nĩ ikarathimwo nĩ ũndũ waku.”—Gal. 3:8.
3. Nĩ kĩĩ kĩngĩtũma tuuge atĩ mũtũmwo Paulo nĩ aatĩtĩrithirie ũhoro ũrĩa mwega thĩinĩ wa ibuku rĩa Aroma?
3 O na kũrĩ ũguo-rĩ, hihi no kũhoteke atĩ harĩ ũndũ wa bata wĩgiĩ ũhoro ũrĩa mwega twagaga gũtaarĩria andũ na nĩ maraũbatara? Marũa-inĩ make kũrĩ Aroma mũtũmwo Paulo aahũthĩrire kiugo “ũthamaki” o rita rĩmwe tu, no akĩhũthĩra ciugo “Ũhoro-ũrĩa-Mwega” maita 12. (Thoma Aroma 14:17.) Nĩ ũndũ ũrĩkũ wĩgiĩ ũhoro ũrĩa mwega Paulo aagwetire maita maingĩ thĩinĩ wa ibuku rĩu? Ũhoro ũcio mwega nĩ wa bata nĩkĩ? Na twagĩrĩirũo nĩ kũririkana ũndũ ũcio nĩkĩ tũkĩhunjia “Ũhoro-ũrĩa-Mwega wa Ngai” matũũra-inĩ maitũ?—Mar. 1:14; Rom. 15:16; 1 Thes. 2:2.
Kĩrĩa Atũũri a Roma Maabataraga
4. Rĩrĩa Paulo ohetwo thĩinĩ wa Roma rita rĩa mbere-rĩ, aahunjirie ũhoro ũrĩkũ?
4 Kũmenya maũndũ marĩa Paulo aarĩrĩirie rĩrĩa ohetwo thĩinĩ wa Roma rita rĩa mbere no gũtũteithie. Tũthomaga atĩ hingo ĩrĩa Ayahudi amwe maamũcereire-rĩ, ‘aamahunjĩirie’ ũhoro wa (1) ũthamaki wa Ngai na akĩmaringĩrĩria metĩkie ũhoro wa (2) Jesu.’ Moimĩrĩro maarĩ marĩkũ? “Amwe ao magĩĩtĩkia mohoro marĩa maaheanirũo, na amwe makĩaga gwĩtĩkia.” Thutha ũcio Paulo nĩ ‘aamũkagĩra arĩa othe maathiaga kũrĩ we, na akamahunjĩria ũhoro wa (1) ũthamaki wa Ngai akĩmarutaga maũndũ megiĩ (2) Mwathani Jesu Kristo.’ (Atũm. 28:17, 23-31) Hatarĩ nganja-rĩ, Paulo nĩ aaririe ũhoro wa Ũthamaki wa Ngai. No nĩ ũndũ ũrĩkũ ũngĩ aatĩtĩrithirie? Aatĩtĩrithirie ũndũ wa bata mũno wĩgiĩ Ũthamaki—Itemi rĩa Jesu harĩ muoroto wa Ngai.
5. Nĩ ũndũ ũrĩkũ wabataranagia mũno Paulo aaririe ũhoro waguo ibuku-inĩ rĩa Aroma?
5 Andũ othe nĩ marabatara kũmenya na gwĩtĩkia Jesu. Thĩinĩ wa ibuku rĩa Aroma, Paulo nĩ aarĩrĩirie ũhoro ũcio. Hau kabere nĩ aakoretwo andĩka ũũ: “Ngai, ũcio ndungatagĩra na roho wakwa ngĩhunjia Ũhoro-ũrĩa-Mwega wa Mũrũwe.” Agĩcoka akiuga ũũ: “Nĩ ũndũ Ũhoro-ũcio-Mwega-rĩ, ndingĩũconokera, tondũ nĩguo wĩ na hinya wa Ngai wa gũtũma mũndũ o wothe ũrĩa ũwĩtĩkĩtie ahonoke.” Thutha ũcio nĩ aaririe ũhoro wa “mũthenya ũrĩa Ngai agakinyia cira wa maũndũ ma hitho marĩa me ngoro-inĩ cia andũ, ekĩre ũhoro wamo ituĩro e thĩinĩ wa Jesu Kristo, o ta ũrĩa Ũhoro-ũrĩa-Mwega uugĩte, ũcio niĩ hunjagia.” Aatarĩirie ũũ: “Kwarũma Jerusalemu ona kũrigicũka kinya Iluriko, nĩndĩkĩtie gũkũiyũria Ũhoro-ũrĩa-Mwega wa Kristo.” a (Rom. 1:9, 16; 2:16; 15:19) Hihi ũgwĩciria nĩ kĩĩ gĩatũmire Paulo aarie mũno ũhoro wa Jesu Kristo kũrĩ Aroma?
6, 7. Tũngiuga atĩa ũhoro wĩgiĩ kwambĩrĩria gwa kĩũngano kĩa Roma na ũrĩa andũ a kĩo maatariĩ?
6 Tũtiũĩ ũrĩa kĩũngano kĩu kĩa Roma kĩambĩrĩirie. Hihi Ayahudi kana andũ a ndũrĩrĩ arĩa maarĩ kuo hĩndĩ ya Bendegothito ya 33 Mahinda Maitũ (M.M.) nĩo maacokire Roma thutha wa gũtuĩka Akristiano? (Atũm. 2:10) Kana hihi nĩ Akristiano arĩa maarĩ ahũri biacara na Agendi maahunjirie ũhoro wa ma kũu Roma? O ũrĩa kũngĩkorũo kwarĩ-rĩ, gũkinyĩria hĩndĩ ĩrĩa Paulo aandĩkire ibuku rĩu, mwaka-inĩ wa 56 M.M., kĩũngano kĩu nĩ gĩakoretwo kĩĩhandĩte. (Rom. 1:8) Nĩ andũ a mũthemba ũrĩkũ maarĩ thĩinĩ wa kĩũngano kĩu?
7 Amwe maarĩ Ayahudi. Akĩgeithia Anderoniko na Juniasi, Paulo aametire “a mũhĩrĩga witũ,” kwoguo kwahoteka maarĩ Ayahudi a mbarĩ ciao. Akula mũtumi wa hema na mũtumia wake Pirisila, arĩa maaikaraga Roma, o nao maarĩ Ayahudi. (Rom. 4:1; 9:3, 4; 16:3, 7; Atũm. 18:2) Ĩndĩ aarĩ na ariũ a Ithe witũ aingĩ arĩa Paulo aatũmĩire ngeithi-rĩ, kwahoteka maarĩ a Ndũrĩrĩ. No kũhoteke amwe ao maarĩ “a mũciĩ wa Kaisari,” hihi ndungata cia Kaisari na arĩa maarĩ na ũnene.—Afil. 4:22; Rom. 1:6; 11:13.
8. Atũũri a Roma maakoragwo hatĩka-inĩ ĩrĩkũ?
8 Akristiano othe thĩinĩ wa Roma maakoragwo hatĩka-inĩ o ta ĩrĩa na ithuĩ tũkoragwo nayo. Paulo oigire ũũ: “Andũ othe maanahĩtia, magakĩaga gũkinyĩrĩra riri wa Ngai.” (Rom. 3:23) Ma nĩ atĩ, andũ arĩa othe Paulo aandĩkĩire nĩ mabataraga kũmenya atĩ maarĩ ehia na no mũhaka mangĩonanirie wĩtĩkio harĩ mũbango wa Ngai wa kũmehereria mehia.
Andũ nĩ Marabatara Kũmenya atĩ nĩ Ehia
9. Paulo aarĩrĩirie moimĩrĩro marĩkũ marĩa mangiumana na ũhoro ũrĩa mwega?
9 Kĩambĩrĩria-inĩ kĩa marũa make kũrĩ Aroma, Paulo nĩ onanirie moimĩrĩro mega marĩa mangĩoimanire na ũhoro ũrĩa mwega aahunjagia: “Ũhoro-ũcio-Mwega-rĩ, ndingĩũconokera, tondũ nĩguo wĩ na hinya wa Ngai wa gũtũma mũndũ o wothe ũrĩa ũwĩtĩkĩtie ahonoke, o mbere Ayahudi, na thutha wao Ayunani.” Ĩĩni, nĩ kũngĩahotekire andũ mahonokio. O na kũrĩ ũguo-rĩ, wĩtĩkio nĩ wabataranagia, kũringana na ma ĩno ĩrĩ thĩinĩ wa Habakuku 2:4 atĩ: “Mũndũ ũrĩa mũthingu agatũũrio muoyo nĩ ũndũ wa gwĩtĩkia gwake.” (Rom. 1:16, 17; Gal. 3:11; Ahib. 10:38) No ũhoro ũcio mwega ũrĩa ũngĩrehera andũ ũhonokio ũkonainie atĩa na ũũma wa atĩ “andũ othe maanahĩtia”?
10, 11. Nĩkĩ gĩtũmaga andũ amwe mataũkĩrũo nĩ ũndũ ũrĩa ũgwetetwo nĩ Aroma 3:23 nao angĩ makaga gũtaũkĩrũo?
10 Mbere ya mũndũ gũkũria wĩtĩkio ũrĩa ũngĩmũhonokia-rĩ, no mũhaka etĩkĩre atĩ nĩ mwĩhia. Ũndũ ũcio ti mũgeni harĩ andũ arĩa makũrĩte metĩkĩtie Ngai na magakorũo na ũmenyo mũnyinyi wa Bibilia. (Thoma Kohelethu 7:20.) Metĩkie kana marege, nĩ moĩ ũrĩa Paulo eendaga kuuga rĩrĩa oigire ũũ: “Andũ othe maanahĩtia.” (Rom. 3:23) O na kũrĩ ũguo, rĩrĩa tũrĩ wĩra-inĩ wa kũhunjia no tũcemanie na andũ aingĩ matataũkĩirũo nĩ ciugo icio.
11 Mabũrũri-inĩ mamwe, andũ matikũraga moĩ atĩ o maaciarĩrũo marĩ na mehia, atĩ nĩ maagaire mehia. No kũhoteke mũndũ amenye atĩ nĩ ahĩtagia, nĩ arĩ mĩerekera ĩtarĩ mĩega, na hihi aaneka maũndũ mooru. Na akeyonera atĩ o na andũ angĩ noguo matariĩ. O na kũrĩ ũguo nĩ ũndũ wa ũrĩa aarerirũo, akaaga gũtaũkĩrũo kĩrĩa gĩtũmĩte we na andũ arĩa angĩ makorũo matariĩ ũguo. Ma nĩ atĩ, kũringana na thiomi imwe, ũngiuga mũndũ nĩ mwĩhia, andũ mahota gwĩciria ũroiga atĩ mũndũ ũcio nĩ kĩmaramari kana mũndũ wagararĩte watho mũna. Hatarĩ nganja, mũndũ ũrereirũo kũndũ ta kũu no aage kwĩyona arĩ mwĩhia na njĩra ĩrĩa Paulo aaragia ũhoro wayo.
12. Nĩ kĩĩ gĩtũmaga andũ aingĩ maage gwĩtĩkia atĩ andũ othe nĩ ehia?
12 O na mabũrũri-inĩ marĩa andũ meĩtaga Akristiano, aingĩ matiĩtĩkĩtie atĩ o nĩ ehia. Nĩkĩ gĩtũmi? O na gũtuĩka rĩmwe na rĩmwe nĩ mathiaga kanitha-rĩ, metĩkĩtie atĩ ũhoro ũrĩa Bibilia ĩheanĩte wĩgiĩ Adamu na Hawa no rũgano tu. Nao angĩ mareragĩrũo kũndũ andũ matetĩkĩtie atĩ Ngai arĩ kuo. Nĩ ũndũ ũcio makaga gwĩtĩkia atĩ nĩ kũrĩ Ngai, na kwoguo makaga kũmenya atĩ Ũrĩa Mũnene kũrĩ othe nĩ aigĩire andũ ithimi cia mĩtugo na atĩ kwaga gũcirũmĩrĩra nĩ mehia. Na njĩra ĩngĩ-rĩ, matariĩ ta andũ a karine ya mbere arĩa Paulo oigire atĩ ‘matiarĩ na kĩĩrĩgĩrĩro’ na ‘matiarĩ na Ngai.’—Ef. 2:12.
13, 14. (a) Nĩ gĩtũmi kĩrĩkũ kĩonanagia atĩ arĩa matetĩkĩtie Ngai na arĩa matetĩkĩtie nĩ ehia matirĩ na kĩĩgwatio? (b) Kwaga wĩtĩkio gũtũmĩte andũ aingĩ meke atĩa?
13 Akĩandĩkĩra Aroma, Paulo aarutire itũmi igĩrĩ kuonania atĩ mũrerere wa mũndũ ti kĩĩgwatio. Gĩtũmi kĩa mbere nĩ atĩ ũũmbi guo mwene nĩ wonanagia atĩ Mũũmbi arĩ kuo. (Thoma Aroma 1:19, 20.) Ũndũ ũcio ũringaine na ũrĩa Paulo aagwetire rĩrĩa aandĩkagĩra Ahibirania arĩ Roma: “Nĩ ũndũ-rĩ, gũtirĩ nyũmba ĩtarĩ na ũrĩa wamĩakire; ĩndĩ mwaki wa indo ciothe no Ngai.” (Ahib. 3:4) Ihooto icio aarutire cionanagia atĩ nĩ kũrĩ Mũũmbi ũrĩa waakire, kana ũrĩa watũmire kũgĩe igũrũ na thĩ.
14 Kwoguo Paulo aarĩ na gĩtũmi kĩiganu gĩa kwandĩkĩra Aroma atĩ, mũndũ o wothe, nginya Aisiraeli a tene—arĩa maathathayagia mĩhianano ĩtarĩ muoyo ‘matiarĩ na kĩĩgwatio.’ Noguo kũrĩ harĩ arĩa meingĩragia thĩinĩ wa mĩtugo ya ngomanio iria itagĩrĩire makagarũra mũtugo wa ndũire ũhoro-inĩ wĩgiĩ mwĩrĩ wa mũthuri na mũtumia. (Rom. 1:22-27) Akĩarĩrĩria o ũndũ ũcio Paulo aarĩkĩrĩirie na kuuga atĩ, ‘Ayahudi o hamwe na Ayunani, othe, matũire magũĩte mehia-inĩ.’—Rom. 3:9.
“Thamiri”
15. Nĩa mahetwo thamiri, na ĩtũmaga meke atĩa?
15 Ibuku rĩa Aroma nĩ rĩtũheaga gĩtũmi kĩngĩ kĩonanagia atĩ andũ nĩ magĩrĩirũo nĩ kũmenya atĩ nĩ ehia na nĩ marabatara kũrutwo kuuma thĩna-inĩ ũcio. Kũringana na watho ũrĩa Ngai aaheete Aisiraeli a tene, Paulo aandĩkire ũũ: “Arĩa magakorũo mehĩtie marĩ watho-inĩ-rĩ, acio magatuĩrũo kũringana o na watho ũcio.” (Rom. 2:12) Agĩthiĩ na mbere gũtaarĩria ũndũ ũcio, oigĩte atĩ andũ a ndũrĩrĩ, arĩa matoĩ watho wa Ngai kaingĩ nĩ “mekaga maũndũ marĩa watho uugĩte.” Nĩkĩ andũ ta acio kaingĩ mareganaga na ũũragani, ũici, na ngomanio cia andũ a mbarĩ ĩmwe? Paulo nĩ onanirie gĩtũmi: Nĩ marĩ thamiri.—Thoma Aroma 2:14, 15.
16. Nĩkĩ gũkorũo na thamiri ti kuuga atĩ mũndũ nĩ ethemete mehia?
16 Ĩndĩ, kwahoteka nĩ wĩyoneire atĩ, mũndũ gũkorũo na thamiri ĩrĩ ta mũira thĩinĩ wake ti kuuga atĩ nĩ ekũrũmĩrĩra ũtongoria wayo. Ũhoro wa Aisiraeli a tene nĩ wonanagia ũguo. O na gũtuĩka Ngai nĩ aamaheete thamiri, hamwe na watho ũrĩa wamakaanĩtie kũiya na ũtharia-rĩ, kaingĩ nĩ maakararagia thamiri ciao na makaagarara Watho wa Jehova. (Rom. 2:21-23) Maarĩ na mahĩtia maita merĩ kwoguo maarĩ ehia, makaga gwĩka kũringana na wendi na ithimi cia Ngai. Ũndũ ũcio ũgĩthũkia mũno ũkuruhanu wao na Mũũmbi wao.—Alaw. 19:11; 20:10; Rom. 3:20.
17. Nĩ ũndũ ũrĩkũ wa gũtwĩkĩra ngoro ũrĩ thĩinĩ wa ibuku rĩa Aroma?
17 Maũndũ macio twarĩrĩria thĩinĩ wa ibuku rĩa Aroma, no moneke ta maronania mbica njũru mũno ya ũrĩa andũ othe o hamwe na ithuĩ matariĩ, maitho-inĩ ma Mwene-Hinya-Wothe. Ona kũrĩ ũguo, Paulo ndaatigĩire hau. Agĩcokera ciugo cia Daudi thĩinĩ wa Thaburi 32:1, 2, mũtũmwo ũcio aandĩkire: “Gũkena, nĩ arĩa moheirũo mawaganu mao, mehia mao magakĩhumbĩrũo. Gũkena-rĩ, nĩ mũndũ ũrĩa Mwathani atangĩtua mwĩhia.” (Rom. 4:7, 8) Ĩĩni, Ngai nĩ abangĩte njĩra ĩrĩa yagĩrĩire kũringana na watho ya kuohera andũ mehia.
Ũhoro Mwega Wĩgiĩ Jesu nĩ wa Bata
18, 19. (a) Nĩ ũndũ ũrĩkũ wĩgiĩ ũhoro ũrĩa mwega Paulo aarĩrĩirie thĩinĩ wa Aroma? (b) Nĩguo tũkaagaya irathimo cia Ũthamaki, no mũhaka tũmenye maũndũ marĩkũ?
18 Wahota kuuga, “Kaĩ ũcio nĩ ũhoro mwega-ĩ!” Hatarĩ nganja nĩ ũhoro mwega, tondũ ũtũcokagia harĩ ũhoro mwega ũrĩa Paulo aarĩrĩirie thĩinĩ wa ibuku rĩa Aroma. Ta ũrĩa hekũgwetetwo-rĩ, Paulo aandĩkire ũũ: “Ũhoro-ũcio-Mwega-rĩ, ndingĩũconokera, tondũ nĩguo wĩ na hinya wa Ngai wa gũtũma mũndũ o wothe ũrĩa ũwĩtĩkĩtie ahonoke.”—Rom. 1:15, 16.
19 Ũhoro ũcio mwega wahutĩtie itemi rĩa Jesu harĩ kũhingio kwa muoroto wa Ngai. Paulo nĩ aatanyaga “mũthenya ũrĩa Ngai agakinyia cira wa maũndũ ma hitho marĩa me ngoro-inĩ cia andũ, ekĩre ũhoro wamo ituĩro e thĩinĩ wa Jesu Kristo, o ta ũrĩa Ũhoro-ũrĩa-Mwega” watariĩ. (Rom. 2:16) Akiuga ũguo-rĩ, Paulo ti kũhũthia aahũthagia ‘ũthamaki wa Kristo na wa Ngai’ o na kana maũndũ marĩa Ngai akaahingia kũgerera Ũthamaki ũcio. (Ef. 5:5) Ĩndĩ nĩguo tũgaatũũra na tũkenere irathimo iria ikaarehwo nĩ Ũthamaki wa Ngai, onanirie atĩ no mũhaka tũmenye (1) tũrĩ ehia maitho-inĩ ma Ngai na (2) nĩkĩ nĩ tũrabatara kuonania wĩtĩkio harĩ Jesu Kristo nĩguo tuoherũo mehia maitũ. Rĩrĩa mũndũ ataũkĩrũo na etĩkia maũndũ macio megiĩ muoroto wa Ngai na akagĩa na kĩĩrĩgĩrĩro kĩa ihinda rĩũkĩte kiumanĩte na ũndũ ũcio-rĩ, no oige, “Nĩ ma, ũcio nĩ ũhoro mwega!”
20, 21. Rĩrĩa tũrĩ ũtungata-inĩ-rĩ, twagĩrĩirũo nĩkĩ kũririkana ũhoro ũrĩa mwega ũgwetetwo maita maingĩ thĩinĩ wa ibuku rĩa Aroma, na moimĩrĩro mangĩkorũo marĩ marĩkũ?
20 Hatarĩ nganja nĩ twagĩrĩirũo kũririkana ũndũ ũcio ũkoniĩ ũhoro ũrĩa mwega rĩrĩa tũrĩ ũtungata-inĩ wa Gĩkristiano. Akĩaria ũhoro wa Jesu, Paulo nĩ aacokerire ciugo ici cia Isaia: “Mũndũ o wothe ũmwĩhokete-rĩ, ndarĩ hĩndĩ agaconorithio.” (Rom. 10:11; Isa. 28:16) Ũhoro ũkoniĩ Jesu no ũkorũo ũtarĩ mũgeni harĩ arĩa moĩ ũrĩa Bibilia yugaga igũrũ rĩa mehia. O na kũrĩ ũguo-rĩ, harĩ andũ angĩ ũhoro ũcio nĩ mũgeni biũ, nĩ ũndũ ũtoĩo kana ũtetĩkĩtio kũrĩa maikaraga. Rĩrĩa andũ ta acio maambĩrĩria gwĩtĩkia Ngai na kwĩhoka Maandĩko-rĩ, nĩ tũkũbatara kũmataarĩria itemi rĩa Jesu. Gĩcunjĩ kĩrĩa kĩrũmĩrĩire nĩ kĩarĩrĩirie ũrĩa Aroma mũrango wa 5 ũtaarĩirie makĩria ũndũ ũcio ũkoniĩ ũhoro ũrĩa mwega. No kũhoteke weruta ũhoro ũcio nĩ ũkuona ũrĩ na ũguni ũtungata-inĩ waku.
21 Na githĩ ndũkĩrĩ ũndũ mwega gũteithia andũ a ngoro njega mataũkĩrũo nĩ ũhoro ũcio mwega, ũrĩa ũgwetetwo maita maingĩ thĩinĩ wa ibuku rĩa Aroma! Ũhoro ũcio mwega-rĩ, ti itherũ nĩ “hinya wa Ngai wa gũtũma mũndũ o wothe ũrĩa ũwĩtĩkĩtie ahonoke.” (Rom. 1:16) Makĩria ma kũheo ngerenwa ĩyo-rĩ, nĩ tũrĩĩyonagĩra andũ magĩtĩkania na ciugo iria Paulo aagwetire thĩinĩ wa Aroma 10:15: “Magũrũ ma andũ arĩa mahunjagia ũhoro wĩ gĩkeno ũrĩa wa maũndũ mega, kaĩ nĩmaagĩrĩire-ĩ!”— Isa. 52:7.
[Kohoro ka magũrũ-inĩ]
a Ciugo ingĩ ta icio nĩ cionekaga thĩinĩ wa mabuku mangĩ marĩa matongoretio na roho.—Mar. 1:1; Atũm. 5:42; 1 Kor. 9:12; Afil. 1:27.
Hihi nĩ Ũraririkana?
• Nĩ ũndũ ũrĩkũ ũtĩtĩrithĩtio ibuku-inĩ rĩa Aroma wĩgiĩ ũhoro ũrĩa mwega?
• Nĩ maũndũ marĩkũ ma ma tũrabatara gũteithia andũ arĩa angĩ mataũkĩrũo?
• “Ũhoro-ũrĩa-Mwega wa Kristo” ũngĩtũrehera irathimo irĩkũ ithuĩ ene o hamwe na andũ angĩ?
[Ciũria cia wĩruti]
[Mbica karatathi ka 16]
Ũhoro ũrĩa mwega ũrĩa ũtĩtĩrithĩtio thĩinĩ wa Aroma ũkoniĩ itemi rĩa Jesu harĩ muoroto wa Ngai
[Mbica karatathi ka 17]
Ithuothe tũciarĩtwo tũrĩ na thĩna mũũru mũno—mehia!