Nutaarsiassaq nuannersoq kikkut tamarmik pisariaqartitaat

‘Iivangkiiliu tassaavoq Guutip pissaanera annassutissaq.’ — ROMAMIUT 1:16.

1, 2. Sooq ‘naalagaaffimmik iivangkiiliu’ oqaluussissutigisarpiuk, tamatumunngalu tunngasut suut erseqqissartarpigit?

‘IIVANGKIILIUP allanut oqaluttuarisarnera nuannaarutigisaqaara.’ Aamma illit taama eqqarsartarsimassagunarputit oqarlutilluunniit. Jehovamut nalunaajaasutut tunniusimasutut nalunngilat ‘naalagaaffimmik iivangkiiliup [nutaarsiassap nuannersup, NV]’ oqaluussissutiginissaa qanoq pingaaruteqartigisoq. Oqaluussinerput tamanna pillugu Jiisusip siulittuutaa alanngaarsinnaassagunarpat. — Matthæusi 24:14.

² ‘Naalagaaffimmik iivangkiiliup’ oqaluussissutigineratigut suliamut Jiisusip aallartitaanut peqataavutit. (Atuaruk Lukasi 4:43). Qularnanngitsumik erseqqissartakkavit ilagaat Guutip nunarsuarmi pissutsinut qanittukkut akuliunnissaa. Taassuma ‘naalliunnartoqangaarnissaani’ upperisarsiorneq eqqunngitsoq piujunnaarsissavaa nunarsuarlu ajortuerutsillugu. (Matthæusi 24:21) Aamma erseqqissartarsimassavat Guutip naalagaaffiata nunarsuarmi Paratiisi pilerseqqissagaa eqqissisimaffiulersillugu pilluarfiulersillugulu. ‘Naalagaaffimmik iivangkiiliu’ tamanna Aaperaamut nalunaajaatigineqartup nuannersup ilagaa. Ima nalunaarfigineqarpoq: “Ilikkut inuiaqatigiit tamarmik pilluaqqunarsissapput.” — Galatiamiut 3:8.

3. Sumit erserpa apustilip Paulusip Romamiunut allakkani iivangkiiliu pingaartikkaa?

³ Iivangkiiliumut tunngasoq inuit pisariaqartitaat pingaarutilik immaqa pingaartinngippallaartarparput. Apustilip Paulusip Romamiunut allakkamini ‘Guutip naalagaaffia’ ataasiaannarluni eqqaavaa, oqaaserli ‘iivangkiiliu’ aqqaneq-marloriarluni atorpaa. (Atuaruk Romamiut 14:17). Iivangkiiliumut tunngasoq sunaana Paulusip allakkamini taama eqqaasaqattaartigigaa? Sooq tamanna taama pingaaruteqartigaa? Aamma sooq tamanna eqqarsaatigisassavarput Guutip iivangkiiliua oqaluussiffigisartakkatsinniittunut oqaluussissutigigaangatsigu? — Markusi 1:14; Romamiut 15:16; 1 Thessalonikamiut 2:2.

Kristumiut Romamiittut suna pisariaqartikkaat

4. Paulusip Romami parnaarussaanermini siullermi suut eqqartortarpai?

⁴ Paulusip Romami parnaarussaanermini siullermi suut eqqartortarnerai atuarlugit paasisaqarnarpoq. Allassimavoq juutinit pulaartoqarami ‘nassuiaasoq nalunaajaallunilu (1) Guutip naalagaaffianik aamma (2) Jiisusimik qularunnaarsitsiniaasoq’. Tamanna qanoq kinguneqarpa? “Ilaat oqaasiinit qularunnaarsinneqarput, allalli uppinngillat.”  Oqaluttuami nangilluni oqaluttuarineqarpoq Paulusip ‘imminut orniguttut tamaasa ilassisarlugit (1) Guutip naalagaaffia oqaluussissutigisaraa aamma (2) Naalagaq Jiisusi-Kristusi ajoqersuutigisaraa’. (Apustilit Suliaat 28:17, 23-31) Erseqqippoq Paulusip Guutip naalagaaffia malugitinniaraa. Aammali allamik erseqqissagaqarpoq Guutip naalagaaffianut tunngasumik pingaarutilimmik, tassa Guutip siunertaani Jiisusip inissisimaneranik.

5. Paulusip pisariaqartitaq suna Romamiunut allakkani erseqqissarpaa?

⁵ Kikkut tamarmik Jiisusi pillugu ilisimasaqarnissaq taassumunngalu uppertuunissaq pisariaqartippaat. Tamanna Paulusip Romamiunut allakkani erseqqissarpaa. Allakkami aallaqqaataani allappoq Guutip ‘ernera pillugu nutaarsiassamut nuannersumut’ (NV) tunngatillugu Guuti illernartumik kiffartorfigalugu. Imalu nangippoq: “Iivangkiiliu kanngusuutiginngilara, tassaammat Guutip pissaanera uppertut kikkulluunniit annassutissaat.” Aamma eqqartorpaa ‘ullormi issumani Guuti inunni isertukkanik eqqartuussippat Kristusi-Jiisusikkut iivangkiiliu nalunaajaatigisani naapertorlugu’. Aamma ima allappoq: “Jerusalemimit Illyria allaat tikillugu Kristusip iivangkiiliuata [Kristusi pillugu nutaarsiassap nuannersup, NV] tamaginni tusarliunneqarnera naammassisimavara.” * (Romamiut 1:9, 16; 2:16; 15:19) Sooq Paulusip kristumiunut Romamiittunut Jiisusi Kristusi malugeqquaa?

6, 7. Ilagiit Romamiittut pilersimanerat pillugu qanoq oqarsinnaavugut, kikkuuppallu?

⁶ Ilagiit Romamiittut qanoq pilersimanersut naluarput. Juutit taakkualuunniit upperisaannut ilanngussimasut ukiumi 33-mi piinsip ulluani najuussimasut kristumiunngorlutik Romamut utersimappat? (Apustilit Suliaat 2:10, 11) Imaluunniit niuertut angalasullu kristumiut sallusuissut illoqarfimmut tassunga siaruarsimavaat? Qanorluunniit pilersimagaluarpata Paulusip Romamiunut allakkat ukiumi 56-imi allammagit ilagiit pioreerput. (Romamiut 1:8) Ilagiinniittut kikkuuppat?

⁷ Taakkua ilaat juutiupput. Paulusip Andronikosi Juniasilu ‘inuiaqatiminik’ taallugit inuulluaqquai, tamannalu isumaqarunarpoq juuteqatigalugit eqqarlerigai. Tupiliortut Akvila nulialu Priska aamma juutiupput. (Romamiut 4:1; 9:3, 4; 16:3, 7; Apustilit Suliaat 18:2) Qatanngutilli Paulusip inuulluaqqusaasa ilarpassui juutiugunanngillat. Taakkua ilaat immaqa ‘kaasarip illuaniittuupput’, tassaasimagunarpullu kaasarip inussiaatai atorfilittaalu. — Filippimiut 4:22; Romamiut 1:5, 6; 11:13.

8. Kristumiut Romamiittut qanoq atugaqarpat?

⁸ Kristumiut Romamiittut tamarmik alianartumik atugaqarput, aammami uagut. Paulusip tamanna ima allaatigaa: ‘Tamarmik ajortuliorput Guutimit naalannassuseq pigiunnaarlugu.’ (Romamiut 3:23) Erseqqippoq Paulusip allaffigisai tamarmik ajortuliortuunertik nassuerutigisariaqaraat Guutillu ilungersunartorsiornerannit annaassissutissaa upperisariaqarlugu.

Kikkut tamarmik ajortuliortuunertik nassuerutigisariaqarpaat

9. Paulusi iivangkiiliup sumik kinguneqarsinnaanera pillugu qanoq oqarpa?

⁹ Paulusip Romamiunut allakkami aallaqqaataanni iivangkiiliup eqqartukulasami kinguneriumaagassaa nuanningaartoq ima erseqqissarpaa: “Iivangkiiliu kanngusuutiginngilara, tassaammat Guutip pissaanera uppertut kikkulluunniit annassutissaat — juuteq siulliulluni, aammattaarlu grækereq.” Aap, annattoqarsinnaavoq. Paulusip Habakkuki 2:4 issuarlugu uppertuusariaqarnerup ilumoorluinnarnera erseqqissarpaa. Ima allappoq: “Iluartoq uppernikkut inuussaaq.” (Romamiut 1:16, 17; Galatiamiut 3:11; Hebræerit 10:38) Iivangkiiliu annaanneqarnermik kinguneqarsinnaasoq aamma inuit ‘tamarmik ajortuliortuunerisa’ ilumoortuunera imminnut qanoq attuumassuteqarpat?

10, 11. Sooq eqqarsaat Romamiut 3:23-mi allassimasoq inuit ilaasa eqqumiiginngikkaat allat eqqumiigaat?

¹⁰ Uppernermik annaanneqarnermik kinguneqarsinnaasumik ineriartortitsissagaanni ajortiliulluni nassuerutigeqqaartariaqarpoq. Ajortiliunerput pillugu eqqarsaat Guutimik upperinnittunit  Biibilimillu ilisimasaqartunit naluneqanngilaq. (Atuaruk Oqaluussisartup oqaasii 7:20). Ajorti pillugu Biibilimi allassimasut isumaqatigigaluarunikkit isumaqatiginngikkaluarunikkilluunniit Paulusip suna pigaa nalussanngilaat ima allammat: ‘Tamarmik ajortuliorput.’ (Romamiut 3:23) Ilaannikkulli oqaluussinitsinni oqaatsinik taakkuninnga paasinninngitsunik naapitaqartarpugut.

¹¹ Nunat ilaanni ajortiliusutut inunngorneq, imaluunniit ajortip kingornussaanera, pillugu eqqarsaat inuppassuarnit ilisimaneqanngilaq. Kukkusarnertik, kissaatiginanngitsunik pissuseqarnertik immaqalu ajortuliortarnertik nassuerutigisaraluarpaat. Tunuliaqutartilli pissutigalugu paasinngilaat sooq namminneq allallu taamaattuunertik. Allaat oqaatsit ilaanni oqaraanni inuk ajortuliortuusoq isumaqartoqarsinnaavoq oqaatiginiarneqartoq inuk taanna pinerluttuusoq inatsisinilluunniit unioqqutitsisuusoq. Taamatut tunuliaqutaqarluni peroriartortup imminut ajortilittut isiginaviarunanngilaq oqaatsimik Paulusip atuineratut isumalimmik.

12. Sooq inuit tamarmik ajortiliunerannik eqqarsaat inuppassuarnit upperiumaneqanngila?

¹² Aammami nunani kristumiuunerartuni ajortiliunitsinnik eqqarsaat inuppassuarnit upperineqanngilaq. Sooq? Allaat naalagiartartut ilaasa Adamimik Evamillu oqaluttuaq oqaluttualiaannaasoraat. Allat upperisaqanngitsut akornanni peroriartorput. Guutip piunera qularigamikku paasineq ajorpaat kinaassusillip qutsinnerusup inunnut najoqqutassiuisimanera taakkuninngalu unioqqutitsineq ajortuliornerusoq. Taakku Paulusip ukiuni hundredelinni siullerni ‘neriuutissaqannginneragaatut silarsuarmilu Guuteqannginneragaatut’ ipput. — Efesosimiut 2:12.

13, 14. (a) Guutimik inuillu tamarmik ajortiliunerannik upperinninngitsut utoqqatsissutissaqannginnerannut pissutaasut suna ilagaat? (b) Taamatut upperinninnginneq amerlasuunut qanoq sunniuteqarpa?

¹³ Paulusip Romamiunut allakkani tunuliaquttap — taamanikkut ullumikkulluunniit — utoqqatsissutigineqarsinnaannginneranut pissutaasut marluk eqqaavai. Pissutaasoq siulleq tassaavoq pinngortitarsuup Pinngortitsisoqarneranut uppernarsaataanera. (Atuakkit Romamiut 1:19, 20). Tamanna Paulusip Romamiitilluni hebræerinut ima allagaanut naapertuuppoq: “Illuliat tamarmik immikkut sanasoqartarput, tamanilli sanasoq tassaavoq Guuti.” (Hebræerit 3:4) Tunngavilersuut tamanna naapertorlugu Pinngortitsisup qilak nunarsuarlu sanavai, imaluunniit pinngortippai.

¹⁴ Taamaattumik Paulusi pissutissaqarluarluni kristumiunut Romamiittunut allappoq kinaluunniit — aamma itsaq Israelikkuugaluaruni — guutiliat assinginik uumassuseqanngitsunik pallorfiginninnittoq ‘patsisiginiagassaqanngitsoq’. Aamma taama oqaatigineqarsinnaapput angutit arnallu timiminnik pissusissamisuunngitsumik atuillutik kinguaassiuutitigut inuunerluttut. (Romamiut 1:22-27) Inuit ‘juutit grækerillu tamarmik ajortip ataaniinnerarlugit’ Paulusip isummernera ilumoorpoq. — Romamiut 3:9.

‘Tarningisami nalunngissusiat nalunaajaasuuvoq’

15. Kikkut nalunngeqatiginnissuseqarpat, qanorlu sunniuttarpa?

¹⁵ Romamiunut allakkani inuit ajortiliunerminnik alianartunillu atugaqarnerminnit annaanneqartariaqarnerminnik nassuerutiginnittariaqarnerannut pissutaasup aappaa eqqaaneqarpoq. Guutip itsaq Israelikkunnut inatsisigititai pillugit Paulusi ima allappoq: ‘Inatsisit ataanni ajortuliortut inatsisit tunngavigalugit eqqartuunneqarumaarput.’ (Romamiut 2:12) Paulusip tunngavilersuinini nangillugu allappoq naggueqatigiikkuutaat ‘Guutimilluunniit nalusut inatsisit [Guutip inatsisai] piginagit inatsisit peqqussutaat malillugit’ iliortartut. Inuit taamaattut qanigisariippallaat atoqatigiinnerat, inuarneq tillinnerlu inerteqqutigisarpaat. Sooq? Tamatumunnga pissutaasoq  Paulusip eqqaavaa: Nalunngeqatiginnissuseqarput. — Atuakkit Romamiut 2:14, 15.

16. Sooq nalunngeqatiginnissuseqaraluarluni ajortuliortoqartarpa?

¹⁶ Taamaattoq inuit ‘tarningisa nalunngissusiat’ eqqartuussisutullusooq ittaraluartoq ilisimaneqarluarpoq nalunngeqatiginnissusertik naapertorlugu iliortuaannanngitsut. Itsaq Israelikkut taamaattarput. Naak Jehovap nalunngeqatiginnissuseqartikkaluaraatik aamma tillinnermut allasiornermullu erseqqissunik inatsiseqartikkaluaraatik nalunngeqatiginnissutsiminnut Jehovallu inatsisaanut akerliusumik iliorajupput. (Romamiut 2:21-23) Marloriaammik pillagassaapput, taamaattumillu ajortuliortuunerat qularnanngivippoq — Guutip najoqqutassiai piumasaalu naapertorlugit inuunngillat. Pinngortitsisiminnut attaveqarnertik ajoquserluinnarpaat. — 3 Mosesi 19:11; 20:10; Romamiut 3:20.

17. Romamiunut allakkani suna qiimmaallannartuua?

¹⁷ Romamiunut allakkani sammisavut naapertorlugit inuit Ajugaqanngitsup isaani nikallornartunik atugaqarpasipput, aamma uagut. Paulusilli nikallornartut kisiisa eqqartunngilai. Daavip oqaasii Tussiaat 32:1-imi allassimasut issuarlugit ima allappoq: “Pilluarput unioqqutitsinerminnik isumakkeerfigineqartut, ajortuliaminnik matooriffigineqartut.” (Romamiut 4:7) Aap, Guutip najoqqutassiani naapertuilluartut unioqqutinnagit inuit ajortaannik isumakkeerfigineqarsinnaalersippai.

Jiisusi pillugu iivangkiiliu

18, 19. (a) Iivangkiiliumut tunngasoq suna Paulusip Romamiunut allakkamini erseqqissarpaa? (b) Guutip naalagaaffiata atuunnerani pilluaqquneqarumalluta suut nassuerutigisariaqarpavut?

¹⁸ Immaqa ima eqqarsarputit: ‘Tusarluarnassusia!’ Ilumummi. Tamatuma Paulusip Romamiunut allakkamini iivangkiiliumut tunngasumik erseqqissagaanik eqqaaseqqippaatigut. Soorlu eqqaaneqareersutut ima allappoq: “Iivangkiiliu kanngusuutiginngilara, tassaammat Guutip pissaanera uppertut kikkulluunniit annassutissaat.” — Romamiut 1:15, 16.

¹⁹ Jiisusi pillugu iivangkiiliu tassaavoq taassuma Guutip siunertaata naammassineqarnissaani inissisimanera. Paulusip qilanaaraa ‘ulloq Guutip inunni isertukkanik eqqartuussiffissaa Kristusi-Jiisusikkut iivangkiiliu naapertorlugu’. (Romamiut 2:16) Taama oqarnermigut ‘Kristusip Guutillu naalagaaffiat’ naalagaaffillu taanna iluaqutigalugu Guutip iliuusissaa suusupaginianngilai. (Efesosimiut 5:5) Ersersippaali inuuginnarumalluta Guutillu naalagaaffiata atuunnerani pilluaqqussutisiumalluta nassuerutigisariaqaripput (1) Guutip isaani ajortuliortuusugut, aamma (2) Jiisusi Kristusi upperisariaqaripput ajortuliatsinnik isumakkeerfigineqassagutta. Inuit tamanna paasileraangamikku akuerigaangamikkulu paasilertarpaat Guutip qanoq siunissaqartikkaatik, qularnanngivissumillu ima oqarumassapput: ‘Ilumut tusarluarnassusia!’

20, 21. Sooq allanut oqaluussigaangatta iivangkiiliumut tunngasoq Romamiunut allakkani erseqqissarneqartoq eqqarsaatigisassavarput, tamannalu qanoq kinguneqarsinnaava?

²⁰ Kristumiutut oqaluussinitsinni iivangkiiliumut tunngasup tamatuma eqqarsaatiginissaa pingaaruteqarpoq. Paulusip Esajap allagaaneersut Jiisusimut tunngatillugit ima issuarpai: “Kinaluunniit taassumunnga uppertoq pakatsisinneqassanngilaq.” (Romamiut 10:11; Esaja 28:16) Jiisusimut tunngatillugu tusarliussaq tunngaviusoq immaqa inunnit ajorti pillugu Biibilimi  allassimasunik ilisimasaqartunit naluneqanngilaq. Allalli immaqa tusarliussaq tamanna tusarsimanngilaat. Guutimik upperinninnerujartortillugit Biibilimillu tatiginninnerujartortillugit Jiisusip inissisimaneranik nassuiaattariaqassavavut. Allaaserisami tulliuttumi iivangkiiliumut tunngasoq tamanna Romamiunut allakkani kapitali 5-imi itisilerneqartoq sammissavarput. Qularnanngitsumik atuaqqissaarnermi taama ittumi ilikkakkatit oqaluussininni iluaqutigissavatit.

²¹ Iivangkiiliup Romamiunut allakkani arlaleriarluni eqqaaneqartup —  “Guutip pissaanera uppertut kikkulluunniit annassutissaat” pillugu iivangkiiliup — inunnut eqqortuliorusuttunut paasitinnera nalerisimaarnangaarpoq. (Romamiut 1:16) Aap, nuannerpoq tusarlugu allat Paulusip Esaja 52:7 issuarlugu allanneratut oqartut. Ima allappoq: “Ila tusarningaarami nalunaarummik nuannersumik aatsisut pisuppaluat!” — Romamiut 10:15.

[Quppernerup ataani ilanngussaq]

Eqqaamavigit?

• Iivangkiiliumut tunngasoq suna Romamiunut allakkani erseqqissarneqarpa?

• Oqaluussiffigisavut sumik paasitinniartariaqarpavut?

• Kristusi pillugu nutaarsiassaq nuannersoq uagutsinnut allanullu qanoq iluaqutaalersinnaava?

[Atuaqqissaarnermi apeqqutit]

[Qupp. 14-mi issuagaq]

Iivangkiiliumut Romamiunut allakkani eqqaaneqartumut ilaavoq Guutip siunertaani Jiisusip inissisimanera pingaarutilik

[Qupp. 15-mi assiliartaq]

Tamatta inunnguuseraarput innarluut toqussutaasartoq — ajorti!