Walay Maong a Balita ya Kaukolan na Amin

“[Say] maong a balita . . . so pakapanyari na Dios parad kilalaban.”​—ROMA 1:16.

1, 2. Akin ya ipupulong moy “maong a balita na panarian,” tan antoran aspekto na satan so idadanet mo?

‘LABALABAY kon ipulong so maong a balita kada agew.’ Nayarin naisip o nibalikas mo la itan. Bilang matoor ya Tasi nen Jehova, antam a talagan importante so pangipulong ed “maong a balita na panarian.” Ompan memoryadom ni ingen imay impropesiya nen Jesus nipaakar ed satan a kimey.​—Mat. 24:14.

² Diad pangipupulong mo ed “maong a balita na panarian,” itutuloy mo imay kimey ya inggapo nen Jesus. (Basaen so Lucas 4:43.) Seguradon sakey ed saray teman ipupulong mo et say asingger lan isalet na Dios ed nagagawad mundo. Diad “baleg a kairapan” et panganggaen toy palson relihyon tan kaugsan. (Mat. 24:21) Nayarin ipupulong mo met ya ipawil na Panarian na Dios so Paraiso diad dalin pian niwalay deen tan liket. Diad tua, say “maong a balita na panarian” et kabiangan na “maong a balita [ya inyabawag la] ed si Abraham, salanti: ‘Diad panamegley mo et nabendisyonan so amin a nasyones.’”​—Gal. 3:8.

3. Akin et nibaga tayon indanet nen apostol Pablo so maong a balita diad libro na Roma?

³ Balet, posible kasi ya agtayo tanto naiikday imano so sakey ya importantin aspekto na maong a balita ya kaukolan na totoo? Diad sulat nen apostol Pablo ed saray taga Roma, aminpinsan ton inusar so salitan “panarian,” balet 12 danay ton inusar so balikas ya “maong a balita.” (Basaen so Roma 14:17.) Anton aspekto na maong a balita so aminpigan tinukoy nen Pablo ed satan a sulat to? Akin et talagan importante itan a maong a balita? Tan akin a nepeg tayon sankanonot itan legan tayon ipupulong so “maong a balita na Dios” diad teritorya tayo?​—Mar. 1:14; Roma 15:16; 1 Tes. 2:2.

No Antoy Kaukolan na Saray Taga Roma

4. Antoray teman impulong nen Pablo diad inmunan impakapriso tod Roma?

⁴ Pian naebatan iratan ya tepet, makatulong no imanoen tayo iray teman impaliwawa nen Pablo diad inmunan impakapriso tod Roma. Sanen binisita na dakel a Judio, sikatoy ‘sigpot a nantasi nipaakar ed (1) panarian na Dios tan inusar to ed sikara so pananangguyor nipaakar ed (2) si Jesus.’ Antoy resulta? “Walaray anisia ed saray imbaga to; balet say arum et agmanisia.” Kayari na satan, ‘maong so impangawat nen Pablo ed amin ya oonla ed sikato, ya impulong tod sikara so (1) panarian na Dios  tan makmakpel ton imbangat iray nipaakar ed (2) Katawan a Jesu-Kristo.’ (Gawa 28:17, 23-31) Talagan indanet sirin nen Pablo so Panarian na Dios. Anto ni balet so indanet to? Indanet to so bengatlan importante ed Panarian​—say betang nen Jesus ed gagala na Dios.

5. Antoy kaukolan a gawaen na totoo unong ed indanet nen Pablo diad libro na Roma?

⁵ Kaukolan ya naamtaan na totoo so nipaakar ed si Jesus tan nepeg ya nawalaan iray pananisia ed sikato. Impaliwawa iya nen Pablo diad libro na Roma. Diad bandad gapo, insulat to so nipaakar ed “Dios, a panlilingkoran kon masimsimoon nisengeg ed maong a balita nipaakar ed Anak to.” Inyarum to: “Agko ibabaing so maong a balita; diad tua, satan so pakapanyari na Dios parad kilalaban na amin a walaan na pananisia.” Tan tinukoy to so panaon na “pangukom na Dios ed saray maamot a bengatla na katooan, diad panamegley nen Kristo Jesus, unong ed maong a balita ya iyaabawag [to].” Insan oniay insalaysay to: “Sigpot kon nipulong so maong a balita nipaakar ed Kristo * manlapud Jerusalem angga ed amin a pasen a mamaarap ed Ilirico.” (Roma 1:9, 16; 2:16; 15:19) Diad padesir yo, akin et indanet nen Pablo ed saray taga Roma so nipaakar ed si Jesu-Kristo?

6, 7. Panon so posiblin inggapo na kongregasyon diad Roma tan sioparay kabiangan na satan?

⁶ Agtayo amta no panon so inggapo na kongregasyon ed Roma. Kasin walaray Judio tan proselita ya atasian da imay agawa nen Pentecostes 33 C.E. tan kapawil dad Roma et Kristiano la ra? (Gawa 2:10) Odino walaray Kristianon negosyante tan managbiahe ya angipulong na katuaan diad Roma? Antokaman so agawa, sanen insulat nen Pablo so libro na Roma nen manga 56 C.E., abayag lan niletneg so kongregasyon diman. (Roma 1:8) Sioparay kabiangan na satan a kongregasyon?

⁷ Say arum ed sikara et Judio. Singa bilang, kinomusta nen Pablo iray “kakanayon” ton si Andronico tan Junias. Mapatnag sirin ya kapara to ran Judio. Si Aquila tan say asawa ton si Prisca et Judio met, ingen ta manaayam irad Roma. (Roma 4:1; 9:3, 4; 16:3, 7; Gawa 18:2) Balet, dakel ed saray agagin kinomusta nen Pablo et Gentil. Ompan say arum ed sikara et “walad sankaabungan nen Cesar,” a nayarin ariripen odino opisyal nen Cesar.​—Fil. 4:22; Roma 1:6; 11:13.

8. Akin et nibagan pakaskasi iray Kristiano ed Roma?

⁸ Walad pakaskasin situasyon so kada Kristiano ed Roma, tan ontan met itayo natan. Oniay rason ya imbaga nen Pablo: “Amin et nankasalanan tan agmakadampot ed gloria na Dios.” (Roma 3:23) Malinew sirin ya saramay sinulatan nen Pablo et kaukolan dan bidbiren a makasalanan ira tan nepeg iran nawalaay pananisia ed solusyon ya ginawa na Dios pian nibulos irad satan a kipapasen.

Bidbiren a Makasalanan Itayo

9. Anton posiblin resulta na maong a balita so impaimano nen Pablo?

⁹ Diad bandad gapo na sulat nen Pablo ed saray taga Roma, imbaga toy maabig ya resulta na maong a balitan aminpiga ton sinalambit: “Agko ibabaing so maong a balita; diad tua, satan so pakapanyari na Dios parad kilalaban na amin a walaan na pananisia, unona saray Judio insan saray Griego.” On, posible so kilalaban. Balet, kaukolan so pananisia a singa samay imbaga nen Pablo ya inaon tod Habacuc 2:4: “Say matunong et manbilay lapud pananisia.” (Roma 1:16, 17; Gal. 3:11; Heb. 10:38) Balet, antoy koneksion na sayan maong a balita a manresultad kilalaban tan say katuaan ya “amin et nankasalanan”?

10, 11. Akin et walaray totoon anggan panon et natatalosan da imay Roma 3:23, balet akin ya agnatalosan itan na arum?

 ¹⁰ Antis ya say sakey a too et nawalaan na pananisia ya mangilaban ed sikato, kaukolan to nin bidbiren ya sikatoy makasalanan. Mainomay itan ya awaten na saramay manisia ed Dios nanlapu lad inkaugaw da tan saramay walay amta rad Biblia. (Basaen so Eclesiastes 7:20.) Balanglan miabobon ira o panduaruwaan da imay imbaga nen Pablo ya “amin et nankasalanan,” anggan panon et walay ideya ra no antoy labay ya ibaga na satan. (Roma 3:23) Balet, ompan walaray napulongan tayon agda natalosan itan.

¹¹ Diad arum a bansa, kaslakan ed saray totoo et agda isipen ya inyanak iran makasalanan, ya atawir day kasalanan. Tua, nayarin amta ran nalilingo ira, walaray aliwliwan ugali da, tan makakagawa ray makapuy. Tan naoobserbaan da met itan ed arum. Balet, lapud abangonan dan pananisia, agda natatalosan no akin ya ontan so situasyon na too. Diad tua, diad arum iran lenguahe, no ibagam ya say sakey ya too et makasalanan, isipen na arum ya satan a too et kriminal odino walay sinumlang ton ley. Kanian no ontan sirin so klase na pananisia ya abangonan na sakey ya too, agton talaga naisip ya sikatoy makasalanan a singa imbaga nen Pablo.

12. Akin et dakel so agmanisian amin tayo et makasalanan?

¹² Anggan ed saray bansan ibabaga ran Kristiano ira, dakel so agmanisia ed ideyan makasalanan ira. Akin? Ta anggano mimimisa met ira no maminsan, ipapasen da balet ya is-istorya o tongtong-basilyo labat so rekord na Biblia nipaakar ed si Adan tan Eva. Walara met so binmaleg ed pasen ya saray totoo et agmanisia ed Dios. Panduaruwaan da no kasin walay Dios, kanian mairap dan panisiaan a walay Sankatagyan a Persona ya angiter na moral iran estandarte, tan say agpangunor ed saratan et kasalanan. Kanian mipara irad saramay deniskribe nen Pablo nen inmunan siglo ya ‘anggapoy ilalo ra tan anggapoy Dios da.’​—Efe. 2:12, Say Biblia.

13, 14. (a) Antoy sakey a rason no akin ya anggapoy nibaraan na saramay agmanisia ed Dios tan saramay agda iisipen a makasalanan ira? (b) Antoy ginawa na arum lapud ag-ira manisia ed Dios?

¹³ Diad samay sulat nen Pablo ed saray taga Roma, imbaga to so duaran rason no akin ya anggapoy nibaraan na oniaran totoo. Say unona et papaneknekan a mismo na saray pinalsa a walay Amalsa. (Basaen so Roma 1:19, 20.) Mitunosan itan ed samay imbaga nen Pablo ed saray Hebreo: “On, kada abung et walay angipaalagey, balet say angipaalagey ed amin a bengatla et say Dios.” (Heb. 3:4) Papaneknekan na sayan panagkatunongan so punto a walay Amalsa ed interon uniberso.

¹⁴ Makatunongan sirin so punton insulat nen Pablo ed saray taga Roma sanen imbaga ton “anggapoy nibaraan” na anggan siopa ya mandadayew ed saray dirios, anggan saray Israelita nensaman. Anggapo met so nibaraan na saramay imoral so kagagawa ra, a “sinumlang day gagala na inkapalsa ra.” (Roma 1:22-27) Duga labat sirin imay konklusyon nen Pablo ya “walad silong na kasalanan so amin a Judio ontan met iray Griego.”​—Roma 3:9.

Say Betang na Konsiensia

15. Anto so walad amin a totoo, tan antoy epekto na satan?

¹⁵ Ibabaga na libro na Roma so sakey nin  rason no akin a nepeg tayon bidbiren a makasalanan tayo tan kaukolan tayoy nibulos ed sayan pakaskasin situasyon. Oniay insulat nen Pablo nipaakar ed saramay ganggan ya inter na Dios ed Israel nensaman: “Amin iramay nankasalanan a walad silong na ganggan et ukomen ed panamegley na ganggan.” (Roma 2:12) Intuloy to balet ya anggan saray “totoo na nasyones” ya agmakaamtad saratan ya ganggan et “sipor a manggagawa na saray bengatlan walad ganggan.” Singa bilang, isesebel day panasawa na sankanayon, panagpatey, tan panagtakew. Akin? Imbaga nen Pablo so rason: Walay konsiensia ra.​—Basaen so Roma 2:14, 15.

16. Akin a nibagan aliwan garantiya so konsiensia pian napaliisay pankasalanan?

¹⁶ Say konsiensia et aliling toy ukom ya walad dalem tayo. Balet, aliwan daput no say sakey et walay konsiensia to et unoren to lay idikta na satan. Paneknekan itan na agawad saray Israelita nensaman. Anggano walay konsiensia ra tan inikdan ira na Dios na espisipikon ganggan ya ag-ira mantatakew tan mikakalugoran, mabetbet dan sinumlang so konsiensia ra tan say Ganggan nen Jehova. (Roma 2:21-23) Talagan makasalanan ira ta doble-doble ginawa ran lingo, ya agda inunor so estandarte tan linawa na Dios. Lapud satan et talagan aderal so relasyon da ed Amalsad sikara.​—Lev. 19:11; 20:10; Roma 3:20.

17. Anton panamaseseg so nabasa tayo ed libro na Roma?

¹⁷ Base ed sarayan apantongtongan tayo ed libro na Roma, namoria tayon talagan pakaskasi so situasyon na totoo diad imaton na Dios. Balet, aglabat anganggad satan so impangipaliwawa nen Pablo. Inaon to iramay salita nen David diad Salmo 32:1, 2, ya inkuan ton: “Maliket iramay totoon aperdona so mauges iran gawa ra tan asakbongan iray kasalanan da; maliket so too ya aglan balot nonoten nen Jehova so kasalanan to.” (Roma 4:7, 8) On, walay ginawa nen Jehova ya legal ya uksoyan pian naperdona iray kasalanan tayo.

Say Maong a Balitan Akasentro ed si Jesus

18, 19. (a) Anton aspekto na maong a balita so indanet nen Pablo diad libro na Roma? (b) Antoy nepeg tayo nin bidbiren pian nagamoray bendisyon na Panarian?

¹⁸ No isipen mo iyan uksoyan a ginawa nen Jehova, nayarin nikuan mon, “Talagan maong a balita itan!” On, ipanonot na satan imay aspekto na maong a balita ya indanet nen Pablo diad libro na Roma. Singa nibaga la, oniay insulat nen Pablo: “Agko ibabaing so maong a balita; diad tua, satan so pakapanyari na Dios parad kilalaban.”​—Roma 1:15, 16.

¹⁹ Satan a maong a balita et akasentro ed betang nen Jesus diad pakasumpal na gagala na Dios. Iilaloan nen Pablo imay “agew [na] pangukom na Dios ed saray maamot a bengatla na katooan, diad panamegley nen Kristo Jesus, unong ed maong a balita.” (Roma 2:16) Diad impangibaga tod satan, agto leleglemewen so “panarian na Kristo tan say Dios” odino say gawaen na Dios panamegley na Panarian. (Efe. 5:5) Imbes, impamoria nen Pablo ya pian nagamoran tayoy bendisyon na Panarian na Dios, nepeg tayon bidbiren so (1) kipapasen tayo bilang makasalanan diad imaton na Dios tan (2) no akin a kaukolan tayoy pananisia ed Jesu-Kristo pian naperdonay kasalanan tayo. Sano natalosan tan awaten na sakey a too iratan ya aspekto na gagalay Dios tan say ilalon iter na satan diad arapen, nibaga to lad satan ya, “Talagan maong a balita itan!”

20, 21. Diad ministeryo tayo, akin ya nepeg tayon sankanonot imay maong a balita ya nidanet ed libro na Roma, tan antoy nayarin resulta na panggawa ed satan?

 ²⁰ Nepeg tayo sirin ya sankanonot iyan aspekto na maong a balita legan tayon susumpalen so ministeryo tayo bilang Kristiano. Diad impanukoy nen Pablo ed si Jesus, inaon to irayan salita nen Isaias: “Siopaman a walaan na pananisia ed sikato et agnadismaya.” (Roma 10:11; Isa. 28:16) Say mensahe nipaakar ed si Jesus et nayarin aliwa lan balo ed saramay amta ray ibabagay Biblia nipaakar ed kasalanan. Balet, sayan mensahe et ag-amta na arum odino lapud kultura da et agda panisiaan. Legan dan aaralen so nipaakar ed Dios tan manmamatalek ed Biblia, kaukolan tayon ipaliwawa ed sikara so betang nen Jesus. Naaralan ed ontumbok ya artikulo no panon ya impaliwawa na Roma kapitulo 5 iyan aspekto na maong a balita. Maseguron mausa-usar itan diad ministeryo yo.

²¹ Makapalikliket so itulong ed saramay malabay a makaamtad katuaan pian natalosan da imay maong a balitan aminpigan asalambit ed libro na Roma, say maong a balita ya “pakapanyari na Dios parad kilalaban na amin a walaan na pananisia.” (Roma 1:16) Likud ni ed pakagamor tayoy bendisyon, nanengneng tayoy piabobon na arum ed samay imbalikas nen Pablo diad Roma 10:15: “Agaylay dakep na saray sali na saramay mangiyaabawag na maong a balita nipaakar ed saray maong a bengatla!”​—Isa. 52:7.

[Paimano ed leksab]

Kasin Nanonotan Mo?

• Anton aspekto na maong a balita so nidanet ed libro na Roma?

• Anton katuaan so nepeg tayon ipamoria ed totoo?

• Panon ya say “maong a balita nipaakar ed Kristo” et mangitarok na bendisyon ed sikatayo tan ed arum?

[Tepetepet Parad Panagaral]

[Blurb ed pahina 8]

Say maong a balita ya nidanet ed libro na Roma et akasentrod importantin betang nen Jesus diad gagala na Dios

[Litrato ed pahina 9]

Amin tayo et nianak a makasalanan!