“E bon notisia . . . ta e poder di Dios pa salba tur ku ta kere.”​—ROM. 1:16, BPK.

1, 2. Dikon bo ta prediká e bon notisia di reino, i na ki aspekto di dje bo ta duna mas atenshon?

‘MI TA kontentu ku tur dia mi por kompartí e bon notisia ku otro hende.’ Probablemente bo tambe a yega di sinti asina òf asta ekspresá e palabranan ei. Komo fiel Testigu di Yehova, bo sa kon importante ta pa prediká “e evangelio akí di e reino.” Kisas bo sa asta for di kabes loke Hesus a bisa na Mateo 24:14 relashoná ku e trabou akí. *

² P’esei ora bo ta prediká ‘e bon notisia tokante e reino,’ en realidat bo ta siguiendo ku e trabou ku Hesus a inisiá. (Lesa Lukas 4:43. *) I sin duda, un di e kosnan ku mas lo bo ta papia tokante dje ta ku pronto Dios lo intervení den asuntunan humano. Durante e “gran tribulashon,” lo e kaba ku religion falsu i eliminá tur maldat for di riba tera. (Mat. 24:21) Kisas bo ta enfatisá tambe ku bou di e Reino di Dios tera lo bira un paradeis, kaminda hende lo disfrutá di pas i felisidat pa semper. De echo, ‘e bon notisia tokante e reino’ ta parti di “e bon notisia” ku Dios a anunsiá ‘di antemano na Abraham,’ esta, ku ‘tur pueblo di mundu lo ta bendishoná pa medio di dje.’​—Gal. 3:8, BPK.

3. Dikon nos por bisa ku apòstel Pablo a enfatisá e ekspreshon bon notisia den su karta na e Romanonan?

³ Pero tin un aspekto klave di e bon notisia ku sigur nos no tin mag di lubidá. Ora apòstel Pablo a skirbi su karta na e Romanonan, den e idioma original el a menshoná e palabra “reino” un biaha so, ma e ekspreshon “bon notisia” el a menshoná 12 biaha. (Lesa Romanonan 14:17.) Awor, na ki aspekto di e bon notisia Pablo a referí asina tantu biaha den su karta? Dikon e bon notisia en partikular ei ta asina importante? I dikon nos tin ku tene esei na mente ora nos ta kompartí “e bon notisia di Dios” ku hende den nos teritorio?​—Mar. 1:14; Rom. 15:16, BPK; 1 Tes. 2:2.

Kiko e Kristiannan na Roma Mester A Haña Sa di Dje?

4. Tempu ku Pablo tabata será pa promé biaha na Roma, tokante kiko el a prediká?

⁴ Ora nos analisá e tópikonan ku Pablo a papia di dje tempu ku e tabata será pa promé biaha na Roma, nos por siña hopi. Dia un grupo  grandi di hudiu a bin bishit’é, el a duna ‘testimonio kabal tokante (1) e reino di Dios, i a trata di konvensé nan tokante (2) Hesus.’ Kon nan a reakshoná? ‘Loke el a bisa a konvensé algun di nan, ma otronan no kier a kere.’ Despues, Pablo ‘tabata risibí tur hende ku tabata bini serka dje, i e tabata prediká (1) e reino di Dios i tabata siña nan enkuanto (2) Señor Hesukristu.’ (Echo. 28:​17, 23-31) Ta bisto anto ku Pablo a hala atenshon na e Reino di Dios. Pero kiko mas el a enfatisá? Esei ta e aspekto prinsipal di e Reino, esta, e papel di Hesus den realisashon di Dios su propósito.

5. Segun e karta di Pablo na e Romanonan, kiko tur hende mester hasi?

⁵ Echo ta ku tur hende mester siña enkuanto Hesus i pone fe den dje. Pablo a elaborá riba e nesesidat ei den su karta na e Romanonan. El a kuminsá na bisa: ‘Mi ta sirbi Dios di kurason predikando e bon notisia tokante su Yu.’ Anto el a agregá: “Mi no tin bèrgwensa di prediká e bon notisia, pasobra e ta e poder di Dios pa salba tur ku ta kere.” Mas despues Pablo a papia tokante e tempu “ku Dios lo husga e sekretonan di hende pa medio di Kristu Hesus, segun [e] evangelio” ku el a prediká. I el a bisa: “For di Yerusalèm i tur rònt te na Ilíriko mi a prediká e evangelio di Kristu kompletamente.” * (Rom. 1:​9, 16, BPK; 2:16; 15:19) Pakiko bo ta kere ku Pablo a enfatisá e papel di Hesukristu asina tantu den su karta na e Romanonan?

6, 7. Kiko nos por bisa di e formashon di e kongregashon na Roma, i di ki tipo di hende e tabata konsistí?

⁶ Nos no sa kon e kongregashon romano a ser formá. Akaso ta e hudiunan òf prosélitonan ku tabata presente na Pentekòste di aña 33 di nos era a regresá Roma komo kristian? (Echo. 2:10) Òf ta komersiante i biahero kristian a plama e bèrdat na Roma? Sea kual sea e kaso, tempu ku Pablo a skirbi su karta na e Romanonan, alrededor di aña 56 di nos era, e kongregashon tabata eksistí pa basta tempu kaba. (Rom. 1:8) Awor, ki tipo di hende tabata forma parti di e kongregashon na Roma?

⁷ Wèl, algun tabata desendiente hudiu. Ora Pablo a manda kumindamentu pa Andróniko i Junias, el a referí na nan komo su “parientenan,” loke probablemente ta indiká ku nan tabata su famia i paisano hudiu. Akila ku su kasá Prisila tambe tabata hudiu. Nan tabata biba na Roma kaminda Akila tabata trahadó di tènt. (Rom. 4:1; 9:​3, 4; 16:​3, 7; Echo. 18:2) Pero hopi di e rumannan ku Pablo a manda kumindá probablemente a bini di e nashonnan pagano. Algun di nan kisas tabata hende “di e kas di Cesar;” podisé nan tabata esklabo di Cesar òf su funshonarionan di rango menor.​—Fil. 4:22; Rom. 1:​5, 6; 11:13.

8. Den ki situashon difísil e rumannan na Roma tabata?

⁸ Sea kual sea nan antesedensia, e kristiannan na Roma tabata den e mesun situashon difísil ku nos ta den awe. Pablo a deklará: “Tur [hende] a peka i ta falta e gloria di Dios.” (Rom. 3:23) Pues tur hende ku a lesa e karta akí di Pablo mester a rekonosé ku nan tabata pekadó i ku nan mester a pone fe den e medio ku Dios ta usa pa saka hende for di e situashon ei.

Nos Tur Tin ku Rekonosé Ku Nos Ta Pekadó

9. Segun Pablo, na ki maravioso bendishon e bon notisia por hiba?

⁹ Na komienso di Pablo su karta na e Romanonan, el a papia di un maravioso bendishon ku e bon notisia, ku el a menshoná bes tras bes, por a trese pa nan. El a bisa: “Mi no tin bèrgwensa di prediká e bon notisia, pasobra e ta e poder di Dios pa salba tur ku ta kere, na promé lugá hudiunan, pero tambe esnan no hudiu.” Sí, nan por a haña salbashon. Pero nan mester a “kere” òf ehersé fe, i esaki ta na  armonia ku un bèrdat profundo ku Habakuk 2:4 ta trese padilanti: “E hustu lo biba pa medio di su fe.” (Rom. 1:​16, 17, BPK; Gal. 3:11; Heb. 10:38) Awor, kiko e bon notisia ei, ku por hiba na salbashon, tin di haber ku e echo ku “tur [hende] a peka”?

10, 11. Dikon e idea ku tur hende ta pekadó, manera Romanonan 3:23 ta trese padilanti, no ta zona straño pa algun hende pero pa otronan sí?

¹⁰ Pa un hende por desaroyá e fe ku ta salba bida, e mester kuminsá na rekonosé ku e ta un pekadó. I e konsepto akí no ta nada straño pa un hende ku a lanta ta kere den Dios i ku tin un poko konosementu di Beibel. (Lesa Eklesiastés 7:20.) Sea ku e ta di akuerdo òf nò, e tin por lo ménos un idea kiko Pablo tabata ke men ora el a bisa: “Tur [hende] a peka.” (Rom. 3:23) Sinembargo, kisas nos ta topa hopi hende den sirbishi ku no ta komprondé esei.

¹¹ Den algun pais, por lo general hende no ta lanta ku e idea ku nan a nase pekadó, esta, ku nan a heredá piká. Kisas nan ta realisá sí ku nan sa faya, ku nan tin mal tendensia i ku nan a yega di hasi malu. I nan ta mira ku otronan tambe ta den e mesun situashon. Pero debí na e kultura ku nan a lanta aden, nan no ta komprondé realmente dikon nan i tambe otro hende ta asina. De echo, den algun idioma, si bo bisa ku un hende ta un pekadó, esaki por duna e impreshon ku e hende ei ta un kriminal òf ku el a kibra un ke otro lei. Ta opvio anto ku un persona ku a lanta den un kultura asina no ta mira su mes komo un pekadó den e sentido ku Pablo tabata ke men.

12. Dikon hopi hende no ta kere ku tur ser humano ta pekadó?

¹² Asta den paisnan di kristiandat, hopi hende no ta kere ku nan ta pekadó. Dikon nò? Pasobra te na ora mes nan ta bai misa de bes en kuando, nan ta konsiderá e relato di Adam ku Eva komo un simpel fábula òf mito. Otronan ta lanta den un komunidat ku no ta kere den Dios. Nan ta duda ku Dios ta eksistí i p’esei no ta komprondé ku un Ser Supremo a establesé normanan moral pa hende i ku ora nan keda sin kumpli ku esakinan nan ta peka. Den un sentido, nan ta manera e hendenan di promé siglo ku Pablo a deskribí komo hende “sin speransa i sin Dios.”​—Efe. 2:12.

13, 14. (a) Menshoná un motibu pakiko hende no tin èksküs pa no kere den Dios i rekonosé ku nan ta pekadó. (b) Na kiko e inkredulidat ei a hiba hopi hende?

¹³ Den e karta na e Romanonan, Pablo a menshoná dos motibu dikon hende ku a lanta den e sirkunstansianan ei no tin èksküs pa keda sin rekonosé ku nan ta pekadó, ni den su tempu ni awor. E promé motibu ta ku kreashon mes ta duna testimonio di ku ta eksistí un Kreador. (Lesa Romanonan 1:​19 i 20.) Esaki ta kuadra ku un opservashon ku Pablo mes a hasi ora el a skirbi e hebreonan tempu ku e tabata na Roma: “Tur kas ta wòrdu trahá dor di un hende, ma esun ku a traha tur kos ta Dios.” (Heb. 3:4) Segun e rasonamentu ei, mester tin un Kreador ku a traha henter e universo.

¹⁴ Pues Pablo tabatin bon motibu pa skirbi e romanonan ku ningun hende—ni e israelitanan di antigwedat—ku a adorá imágen “no tin èksküs.” Esaki ta konta tambe pa esnan ku a práktika inmoralidat seksual ku a bai kontra uso natural di e kurpa maskulino i femenino. (Rom. 1:​22-27) Pablo tabatin rason bèrdat ora el a yega na e siguiente konklushon: ‘Tantu hudiu komo griego, tur ta bou di piká.’​—Rom. 3:9.

 E Konsenshi Ta ‘Duna Testimonio’

15. Kiko tur hende tin, i ki influensia esei tin riba nan?

¹⁵ E karta na e Romanonan ta duna un di dos motibu pakiko hende mester rekonosé ku nan ta pekadó i ku nan tin mester di un salida pa e situashon difísil ku nan ta aden. Relashoná ku e kódigo di lei ku Dios a duna Israel di antigwedat, Pablo a skirbi: “Tur ku a peka bou di Lei lo wòrdu husgá dor di Lei.” (Rom. 2:12) Pablo a sigui rasoná ku asta hende di diferente kultura i nashonalidat ku no konosé e kódigo divino ei hopi biaha “di naturalesa ta hasi e kosnan di Lei.” Kon bin hende asina por lo general ta kondená insesto, asesinato i ladronisia? Pablo a duna e motibu: Nan tin un konsenshi.​—Lesa Romanonan 2:​14 i 15.

16. E echo ku hende tin un konsenshi ta nifiká ku outomátikamente nan no ta hasi piká?

¹⁶ Sinembargo, probablemente bo a ripará ku aunke hende tin un konsenshi ku ta ‘duna nan testimonio,’ no nesesariamente nan ta sigui su guia. Tuma por ehèmpel e israelitanan. Aunke Dios a duna nan un konsenshi i leinan spesífiko ku a kondená hòrtamentu i adulterio, tòg hopi biaha nan no a hasi kaso di nan konsenshi ni di e Lei ku Yehova a duna nan. (Rom. 2:​21-23) Pues nan tabata dòbel kulpabel i sin duda pekadó, ya ku nan a bai kontra e boluntat di Dios i a falta ku su normanan. Konsekuentemente, nan a daña nan relashon ku nan Kreador.​—Lev. 19:11; 20:10; Rom. 3:20.

17. Ki animashon nos ta haña den e karta na e Romanonan?

¹⁷ En bista di loke nos a kaba di konsiderá den e karta na e Romanonan, ta parse ku den bista di e Haltísimo kos ta pinta skur pa humanidat, inkluso pa nos komo kristian. Sinembargo, Pablo no a laga e asuntu te ei. Sitando e palabranan di David ku nos ta haña na Salmo 32:​1 i 2, e apòstel a skirbi: “Bendishoná ta esnan, kende nan transgreshonnan a wòrdu pordoná, i kende nan pikánan a wòrdu tapá. Bendishoná ta e hende, kende su piká SEÑOR no ta tuma na kuenta.” (Rom. 4:7, 8) Sí, Dios a perkurá un salida: un medio pa nos por haña pordon di piká sin kibra su leinan hustu.

Hesus Ta e Figura Sentral di e Bon Notisia

18, 19. (a) Ki aspekto di e bon notisia Pablo a resaltá den Romanonan? (b) Kiko nos mester rekonosé si nos ke risibí bendishonnan di Reino?

¹⁸ Ora bo haña sa ki salida Yehova a perkurá, sigur lo bo bisa: “Esei sí ta bon notisia!” I esei ta trese nos bèk na e aspekto di e bon notisia ku Pablo a resaltá den e karta na e Romanonan. Manera nos a mira kaba, Pablo a skirbi: “Mi no tin bèrgwensa di prediká e bon notisia, pasobra e ta e poder di Dios pa salba tur ku ta kere.”​—Rom. 1:​15, 16, BPK.

¹⁹ E bon notisia ei ta resaltá e papel ku Hesus ta hunga den realisashon di Dios su propósito. I Pablo por a anhelá “e dia ku Dios lo husga e sekretonan di hende pa medio di Kristu Hesus, segun [e] evangelio.” (Rom. 2:16) Ma ora el a bisa esei, e no tabata ke men sí ku “e reino di Kristu i [di] Dios” tabata algu di ménos importansia, òf ku loke Dios lo realisá pa medio di e Reino no ta konta mashá. (Efe. 5:5) Mas bien, e kier a mustra ku si nos ke biba pa semper i risibí e bendishonnan ku e Reino di Dios lo trese pa humanidat, nos mester rekonosé (1) ku den bista di Dios nos tur ta pekadó i (2) ku nos mester ehersé fe den Hesukristu pa nos por haña pordon di nos pikánan. Ta ora un persona komprondé i aseptá e aspektonan akí di Dios su propósito i kuminsá mira e maravioso futuro ku esaki ta trese kuné, e por tin motibu pa sklama: “Esta un bon notisia!”

20, 21. Den nos ministerio, pakiko nos mester tene na mente e bon notisia ku Pablo a enfatisá den e karta na e Romanonan, i ku ki posibel resultado?

 ²⁰ Ta bon bèrdat pa nos kòrda riba e aspekto akí di e bon notisia segun ku nos ta kumpli ku nos ministerio kristian. Refiriendo na Hesus, Pablo a sita e palabranan di Isaias: “Ken ku kere den dje lo no keda brongosá.” (Rom. 10:11; Isa. 28:16) Pa hende ku sa kiko Beibel ta bisa enkuanto piká, e mensahe básiko tokante Hesus kisas no ta nada straño. Ma pa otronan, e mensahe akí lo ta algu nobo, algu ku nunka nan a yega di tende di dje ni kere aden den nan kultura. Pero ku tempu, segun ku nan ta kuminsá kere den Dios i konfia den loke Beibel ta bisa, nos lo tin ku splika nan di e papel di Hesus. Romanonan kapítulo 5 ta bai mas den detaye riba e aspekto akí di e bon notisia. Nos lo mira esei den e siguiente artíkulo. Un análisis di e kapítulo akí lo ta un gran yudansa pa bo den bo ministerio.

²¹ Ta un goso pa yuda hende di kurason sinsero komprondé e bon notisia ku Pablo a menshoná bes tras bes den su karta na e Romanonan, esta, e bon notisia ku “ta e poder di Dios pa salba tur ku ta kere.” (Rom. 1:16, BPK) Pero mas importante ainda, nos lo tin e goso tambe di mira otro hende bai di akuerdo ku e palabranan ku Pablo a sita na Romanonan 10:15: “Ki bunita ta e pianan di esnan ku ta prediká e evangelio.”​—Isa. 52:7.

[Nota]

Bo Ta Kòrda?

• Ki aspekto di e bon notisia e karta na e Romanonan ta resaltá?

• Kiko nos tin ku yuda otro hende komprondé?

• Kon “e evangelio di Kristu” por nifiká bendishon pa nos i pa otro hende?

[Preguntanan di Estudio]

[Komentario na página 14]

E bon notisia ku Pablo a resaltá den Romanonan tin di haber ku e papel klave ku Hesus ta hunga den realisashon di e propósito di Dios

[Plachi na página 15]

Nos tur a nase ku un defisiensia fatal: piká!