Rongamwahu me Kitail Koaros Anahne

“Rongamwahwo . . . ih manaman en Koht me kin komourala koaros me kin pwoson.”​—ROM 1:16.

1, 2. Dahme kahrehda ke kin kalohki “Rongamwahu en Wehin Koht”? Ire dah kan me ke kin kalapw koasoia me pid met?

‘I KIN perenki ehukihong meteikan rongamwahwo rahn koaros.’ Ele ke kin medemedewe de pil nda lepin lokaia pwukat. Nin duwen Sounkadehdehn Siohwa poadidi men, ke kin ese uwen kesempwal en kalohki “Rongamwahu en Wehin Koht.” Mwein ke kak nda dahme ke wadlikihla duwen sapwellimen Sises kokohp me pid atail kin wia met.​—Mad. 24:14.

² Ni omw kin kalohki “Rongamwahu en Wehin Koht,” ke kin pousehlahte wiewia dahme Sises ketin tapiada mahs. (Wadek Luk 4:43.) Ele ehu ire me ke kin kalapw koasoia iei me Koht pahn ketin kereniong wekidala koasoandi oh wiewia kan en aramas. Ni “kahn kamakam kowahlap,” e pahn ketin kasohrala pelien lamalam likamw kan oh eri kamwakelehsang suwed kan nin sampah. (Mad. 24:21, NW) Ele ke pil kin kasalehda me Wehin Koht pahn pwurehng wiahda Paradais nin sampah pwe popohl oh nsenamwahu en kak mihla wasa koaros. Ni mehlel, “Rongamwahu en Wehin Koht” kin wia kisehn “rongamwahwo mahso” me kowohng Eipraam me mahsanih: “Pwehki kowe me Koht pahn ketin kapaiahkihda aramas koaros nin sampah.”​—Kal. 3:8.

3. Dahme kahrehda kitail kak nda me wahnpoaron Pohl kin kasalehda kesempwalpen “Rongamwahu” nan pwuhken Rom?

³ Ahpw ia duwe, kitail kakete sohte tehk mwahu ire kesempwal ieu duwen rongamwahu me aramas akan anahne? Nan nah kisinlikou ong mwomwohdisohn Rom me ntingdi ni lokaiahn Krihk, wahnpoaron Pohl doadoahngki lepin lokaia “Wehin Koht” pakete ehu, ahpw e doadoahngki lepin lokaiao “Rongamwahu” pak 12. (Wadek Rom 14:17.) Ire dahieu duwen ‘Rongamwahwo’ me Pohl kin kalapw koasoia nan pwuhk wet? Dahme kahrehda “Rongamwahu” wet kesempwal? Oh dahme kahrehda kitail anahne tamataman met ni atail kin kalohki “Rongamwahu en Wehin Koht” ong aramas akan nan atail wasahn kalohk?​—Mark 1:14; Rom 15:16; 1 Des. 2:2.

Dahme Irail kan nan Rom Anahne

4. Erein tepin eh selidi nan Rom, dahme Pohl kin wie padapadahngki?

⁴ E wia mehn kasukuhl en tehk ire kan me Pohl koasoia ni tepin eh selidi nan Rom. Kitail kin wadek me ahnsou me ekei mehn Suhs ko mwemweitla reh, e kin kadehdehda douluhl duwen (1) wehin Koht oh kihda mehn kadehde duwen (2) Sises. Ia duwen aramas akan arail mwekidki met? “Ekei irail kamehlele eh koasoi kan, a ekei sohte kamehlele.” Mwurin met, Pohl ‘kin kasamwo koaros me kin pwarala reh. E ahpw padapadahkihong aramas akan duwen (1) Wehin Koht; oh e kin . . . kapahrengki duwen (2) Kaun Sises Krais.’ (Wiewia 28:17, 23-31) Eri, e sansal me Pohl kin keieu kasalehda duwen Wehin Koht. Ahpw dahme e pil kasalehda? E pil kasalehda mehkot kesempwal duwen Wehio, me iei pwais me Sises sapwellimanki me pid kupwuren Koht.

5. Anahn dahieu me Pohl koasoia duwe nan pwuhken Rom?

⁵ Aramas koaros anahne esehla duwen Sises oh pwosonla ih. Nan pwuhken Rom, Pohl kin koasoia duwen anahn wet. Mwowe, e ntingihedi met: “Koht me I kin papah sang nan mohngiongi unsek ni ei kin lohkiseli Rongamwahu duwen Sapwellime Iehros.” E doula koasoia: “I uhdahn koapworopworki mehlel Rongamwahwo;  pwe ih manaman en Koht me kin komourala koaros me kin pwoson.” Mwuhr, e koasoia duwen ahnsou me “Koht pahn ketin kadeikada madamadau rir nan mohngiong en aramas akan rehn Sises Krais” nin duwen rongamwahu me e kin lohkiseli. Eri e koasoia: “Sang Serusalem lao lel Ilirikum, I kalohkiselier wasa koaros Rongamwahu unsek duwen Krais.” * (Rom 1:9, 16; 2:16; 15:19) Ia omw madamadau, dahme kahrehda Pohl kin kasalehda uwen kesempwal en Sises Krais ong mwomwohdisohn Rom?

6, 7. Ia mwomwen mwomwohdisohn Rom eh miehla? Ihs me wia kisehn mwomwohdiso wet?

⁶ Kitail sehse ia mwomwen mwomwohdisohn Rom eh tepida. Ia duwe, mehn Suhs kan de mehn liki kan me wekiong lamalam en mehn Suhs me iang tuhpene ni Pendekos en pahr 33 pwurala Rom nin duwen Kristian kei? (Wiewia 2:10, 11) De Kristian kan me kin seiloak oh soun pesines Kristian kan wahla padahk mehlelo nan Rom? Sohte lipilipil dahme wiawi, ahnsou me Pohl ntingihedi pwuhko mpen pahr 56, mwomwohdisohn Rom mieier wereilahr. (Rom 1:8) Soangen aramas dah kei me kin iang mwomwohdiso wet?

⁷ Ekei irail mehn Suhs. Pohl rahnmwahwih Andronikus oh Sunias nin duwen ‘kompoakepah mehn Suhs.’ Akwila oh eh pwoud, Persila, me mi Rom, ira koaros pil mehn Suhs. (Rom 4:1; 9:3, 4; 16:3, 7; Wiewia 18:2) Ahpw Kristian tohto me Pohl kadarala eh rahnmwahu rehrail wia mehn liki kei. Ekei irail ele wia “kisehn tehnpas en Sihsar,” me kakete wehwehki re wia nein Sihsar lidu oh tohndoadoahk kei.​—Pil. 4:22; Rom 1:5, 6; 11:13.

8. Kahpwal dahieu me Kristian koaros nan Rom ahneki?

⁸ Kristian koaros nan Rom ahneki kahpwal ehu me kitail pil kin ahneki. Pohl koasoia: “Aramas koaros wiadahr dihp, oh irail koaros dohsangehr sapwellimen Koht lingan.” (Rom 3:23) E sansal me irail koaros me Pohl ntinglahng uhdahn anahne mehkot. Irail anahne pohnese me irail aramas dipan kei oh anahne pwosonla dahme Koht ketin koasoanehdi pwehn kaitarala anahn wet.

Aramas Anahne Pohnese me Re Dipan

9. Dahme Pohl kasalehda duwen “Rongamwahwo” eh kak wiahiong aramas?

⁹ Nin tepin nah kisinlikou ong Kristian kan nan Rom, Pohl kasalehda kamwahu me kohsang rongamwahu me e kin koasoakoasoia: “I uhdahn koapworopworki mehlel Rongamwahwo; pwe ih manaman en Koht me kin komourala koaros me kin pwoson, mehn Suhs mahs, oh pil mehn liki kan.” Ei, aramas akan kak komourala. Ahpw,  Pohl kasalehda me re anahne pwoson me pahrekiong ire mehlel me kohsang nan Apakuk 2:4 ni eh koasoia: “Me pwungla rehn Koht pwehki pwoson pahn mourla.” (Rom 1:16, 17; Kal. 3:11; Ipru 10:38) Ahpw ia duwen “Rongamwahwo” me kak komourala eh kin pid ire mehlel me “aramas koaros wiadahr dihp”?

10, 11. Dahme kahrehda ekei kak wehwehki madamadau me Rom 3:23 kasalehda a ekei soh?

¹⁰ Mwohn aramas emen eh kak kakairada pwoson me kak komourala ih, e anahne pohnese me ih aramas dipan men. Madamadau wet sohte pahn kapwuriamwei ong irail akan me tikida kamehlele Koht oh ekis wehwehki Paipel. (Wadek Eklesiasdes 7:20.) Mehnda ma re pwungki de soh, re kak wehwehki dahme Pohl koasoia: “Aramas koaros wiadahr dihp.” (Rom 3:23) Ahpw, ni atail kin kalohk, ele kitail kin tuhwong me tohto me sohte wehwehki ire wet.

¹¹ Nan ekei sahpw, aramas akan sohte tikida ahneki madamadau me re ipwidi wia aramas dipan kei me sohsohki dihp. Mehlel me e pohnese me e kin wiahda sapwung kan, e pil kin ahneki irair kan me e sohte men ahneki oh ele wiahda ekei soahng suwed kan. Oh e kin kilang me meteikan pil ahneki soangen irairohte. Ahpw pwehki mwomwen eh tikida, e sohte uhdahn wehwehki dahme kahrehda ih oh meteikan mi nan soangen irairo. Ni mehlel, nan ekei lokaia kan, ma ke nda me aramas men dipan, ele ekei pahn medewe me ke ndinda me ih aramas men me kin kauwehla kosonned kan. E sansal me aramas men me tikida nan soangen irairo ele sohte kak medewe me ih soangen aramas dipan me pahrekiong dahme Pohl koasoia.

12. Dahme kahrehda me tohto sohte kin kamehlele me aramas koaros dipan?

¹² Pil nan ekei sahpw me pali moron en aramas akan kin nda me irail Kristian kei, tohto irail sohte kin kamehlele me irail aramas dipan kei. Dahme kahrehda? Mehnda ma ekei pak re kin kohla sarawi, re kin medewe me koasoipen Adam oh Ihp kin wiahte soai pwoat. Ekei kin tikida nanpwungen aramas akan me sohte kin kamehlele Koht. Re kin peikasalki me mie Koht oh re sohte wehwehki me mie Emen me Keieu Lapalap me kin ketikihong aramas akan koasoandi kan me pid dahme mwahu oh dahme suwed, oh ma re sohte kapwaiada koasoandi pwukat, re pahn dipada. Re duwehte irail ako ni mwehin wahnpoaron ko me Pohl koasoiahki me ‘sohte arail koapworopwor oh pil sohte iang ahneki Koht.’​—Ep. 2:12.

13, 14. (a) Ia ehu kahrepe me irail akan me sohte kin kamehlele Koht oh me re dipan sohte ahneki kahrepe mwahu ren medewe met? (b) Dahme madamadau wet kin kahrehiong me tohto ren wia?

¹³ Nan nah kisinlikou ong Kristian kan en Rom, Pohl kasalehda kahrepe riau me soangen tikida pwukat sohte kak kihong emen kahrepe mwahu en sohte kamehlele Koht de Paipel, ni ahnsowo oh pil nan atail ahnsou. Kahrepe keieu iei me soahng koaros me Koht ketin kapikada kin kadehdehda me e kin ketin ieias. (Wadek Rom 1:19, 20.) Met pahrekiong dahme Pohl kasalehda nan nah kisinlikou me e kadarasang Rom ong Kristian en Ipru kan me koasoia: “Aramas akan me kin kauwada ihmw​—ahpw Koht, iei ih me ketin wiahda mehkoaros.” (Ipru 3:4) Dahme e kin kawehwe pil kak dokedoke ireo me mie Sounkapikada men me ketin wiahda mehkoaros nanleng oh sampah.

¹⁴ Eri dahme Pohl ntingkilahng Kristian kan nan Rom kin uhdahn mehlel me pid aramas koaros iangahki mehn Israel ko me kin kaudokiong koht likamw akan, re “sohte kak peikidki ar wiewia kan.” Kitail pil kak ndahki duwen irail kan  me kin wia tiahk en nenek me uhwong koasoandi en paliweren lih oh ohl ong wia nsenen pwopwoud. (Rom 1:22-27) Ihme kahrehda Pohl kak koasoia: “Mehn Suhs akan oh mehn liki kan ar duwepenehte, irail koaros mihmi pahn manaman en dihp.”​—Rom 3:9.

“Kasalehda Duwen Mehlel”

15. Dahme aramas koaros ahneki oh dahme met kin wiahiong kitail?

¹⁵ Pwuhken Rom kawehwehda pil ehu kahrepe me aramas akan anahne pohnese me irail aramas dipan kei oh pil anahne ese ia duwen arail kak maiauda sang met. Me pid kosonnedo me Koht ketikihong mehn Israel kan, Pohl ntingihedi: “Re kin wiahda dihp oh pakadeingkihda Kosonnedo.” (Rom 2:12) E doula kawehwehda me aramas akan de keinek kan me sehse sapwellimen Koht kosonned kin kalapw “kapwaiada audepen Kosonnedo sang ni pein nsenarail.” Dahme kahrehda irail pwukat kin kalekeirailsang ngengngersuwed, kamaramas oh pirap? Pohl koasoia: Mie kadeikpen loalarail.​—Wadek Rom 2:14, 15.

16. Dahme kahrehda emen me ahneki kadeikpen loale sohte wehwehki me e kin soikala wia dihp?

¹⁶ Ahpw, mwein ke eseier me emen eh ahneki kadeikpen loale sohte kin wehwehki me e pahn idawehn dahme kadeikpen loale kin kaweidkin ih. Mehn Israel ko kasalehda mehlelpen met. Mendahki Koht ketikihong mehn Israel kan kadeikpen loalarail oh pil kosonned kan me ren dehr pirap oh kamwahl, re sohte kin kalapw idawehn kadeikpen loalarail oh pil kauwehla sapwellimen Siohwa kosonned kan. (Rom 2:21-23) Re uhdahn pwukoahki diparail ni ahl riau, re sohte kapwaiada sapwellimen Koht koasoandi kan oh pil kupwure. Met uhdahn kin kauwehla arail nanpwungmwahu rehn Sounkapikparail.​—Lip. 19:11; 20:10; Rom 3:20.

17. Mehn kangoang dahieu me kitail diar nan pwuhken Rom?

¹⁷ Dahme kitail tehkpeneier nan pwuhken Rom ele mwomwen kasalehda irair suwed en aramas akan iangahki kitail mwohn silangin Koht Wasa Lapalahpie. Ahpw, Pohl pil doula kawehwehda ireo. E kasalehda en Depit eh koasoi kan nan Melkahka 32:1, 2 oh ntingihedi: “Meid pai irail kan me aleier mahkpen ar sapwung kan rehn Koht, oh lapwapen diparail kan! Meid pai irail me Kaun-o sohte pahn ketin kapwukoanekin irail diparail kan!” (Rom 4:7, 8) Ei, Koht ketikihda koasoandi ehu ong mahkpen dihp ahpw met sohte kauwehla sapwellime kosonned pwung kan.

Rongamwahu me Pid Sises

18, 19. (a) Dahme Pohl kin kasalehda me pid rongamwahwo nan pwuhken Rom? (b) Dahme kitail anahne pohnese pwe kitail en kak ale kapai kan me kohsang Wehio?

¹⁸ Ni omw pahn medewe koasoandi me Siohwa ketikihda, ele ke pahn nda me, “Met uhdahn rongamwahu ehu!” Ei uhdahn, pwe e kin katamankin kitail rongamwahu me Pohl kasalehda nan pwuhken Rom. Pohl ntingihedi: “I uhdahn koapworopworki mehlel Rongamwahwo; pwe ih manaman en Koht me kin komourala koaros me kin pwoson.”​—Rom 1:15, 16.

¹⁹ Rongamwahwo duwen Sises kin pidada sapwellime pwais ong pweidahn sapwellimen Koht koasoandi kan. Pohl kak kasik “rahno me Koht pahn ketin kadeikada madamadau rir nan mohngiong en aramas akan rehn Sises Krais,” nin duwen rongamwahwo. (Rom 2:16) Eri, e sohte kin katikala kesempwalpen “Wehin Krais de Wehin Koht” de dahme Koht pahn ketin wia sang Wehio. (Ep. 5:5) Ahpw e kasalehda me pwe kitail en mour oh ahneki kapai kan me kohsang Wehin Koht, kitail anahne pohnese me (1) kitail aramas dipan kei mwohn silangin Koht oh (2) dahme kahrehda kitail anahne pwoson Sises  Krais pwe dipatail kan en lapwada. Ni ahnsou me emen wehwehkihla oh pwungkilahr ire pwukat duwen sapwellimen Koht koasoandi oh kilang ia duwen met eh kihong ih koapworopwor, e kak nda, “Ei, met uhdahn rongamwahu!”

20, 21. Ni atail kin kalohk, dahme kahrehda kitail anahne tamataman rongamwahwo me kin sansalda nan pwuhken Rom? Kamwahu dah kan pahn kohsang met?

²⁰ Kitail anahne tamataman ire pwukat me pid rongamwahwo ni atail kin kalohk oh padahkih aramas akan. Me pid duwen Sises, Pohl doadoahngki dahme Aiseia koasoia: “Mehmen me kin pwoson ih sohte pahn sarohdi.” (Rom 10:11; Ais. 28:16) Rohng me pid duwen Sises sohte kin kapwuriamwei ong irail kan me ese dahme Paipel mahsanih duwen dihp. Ahpw ong meteikan, rohng wet pahn wia mehkot kapw, mehkot me irail sehse de sohte kin kamehlele. Pwe soangen aramas pwukat en kamehlele Koht oh likih iren Paipel kan, kitail pahn anahne kawehwehiong irail duwen pwais me Sises sapwellimanki. Kitail pahn koasoiapene nan iren onop en mwuhr ia duwen Rom irelaud 5 eh kasalehda ire wet me pid rongamwahu. Ke pahn diar me iren onopo pahn sewese omw doadoahk en kalohk.

²¹ Ia uwen kaselel kapai wet en sewese aramas akan me ahneki mohngiong mehlel ren wehwehki rongamwahu me pwurepwurehng sansalda nan pwuhken Rom, rongamwahwo me “ih manaman en Koht me kin komourala koaros me kin pwoson.” (Rom 1:16) Eri, laud sang atail paiekihda, kitail pahn kilang meteikan ar pwungki dahme Pohl koasoia nan Rom 10:15: “Meid lingan oh kaselel atail udiahl meninkeder kan ni ar kin wa kohdo rongamwahu!”​—Ais. 52:7.

[Nting tikitik me mi pah]

Ke Tamataman?

• Dahme pwuhken Rom kin kasalehda me pid “Rongamwahwo”?

• Ire mehlel dahieu me kitail anahne sewesehki meteikan ren wehwehki?

• Ia duwen “Rongamwahu . . . duwen Krais” eh kak kapaikitailda oh meteikan?

[Peidek en Onop]

[Kilel nan pali 12]

Rongamwahwo me sansalda nan pwuhken Rom kin pidada sapwellimen Sises pwais kesempwal pwe en ketin kapwaiada kupwuren Koht

[Kilel nan pali 13]

Kitail koaros ipwidi nan dihp!