Gutnius Olgeta Man i Mas Harim

‘Gutnius em strong bilong God long kisim bek olgeta man.’​—ROM 1:16.

1, 2. Bilong wanem yu save autim “gutnius bilong Kingdom”? Wanem tok bilong gutnius yu save stori long en?

 ‘MI AMAMAS long autim gutnius long olgeta de.’ Ating sampela taim yu bin mekim dispela tok. Yu wanpela Witnes Bilong Jehova, olsem na yu save em i bikpela samting tru long yu autim “dispela gutnius bilong Kingdom.” Ating yu inap kolim long tingting tok profet bilong Jisas long dispela wok yumi mekim.​—Mat. 24:14.

² Taim yu autim “gutnius bilong Kingdom,” yu mekim wok Jisas i bin kirapim. (Ritim Luk 4:43.) Ating wanpela samting yu toktok long en, em olsem klostu nau God bai mekim sampela samting. Taim “traipela hevi tru” i kamap, em bai pinisim lotu giaman na pasin nogut bilong dispela graun. (Mat. 24:21) Ating yu save stori tu long Kingdom Bilong God bai kamapim Paradais long graun na bai ol manmeri i ken stap bel isi na amamas. “Gutnius bilong Kingdom” em hap bilong “gutnius [ol i autim] long Abraham pastaim, olsem: ‘Long rot bilong yu, olgeta lain man bai kisim blesing.’”​—Gal. 3:8.

3. Olsem wanem yumi ken tok aposel Pol i stori planti long gutnius long Buk Rom?

³ Tasol ating yumi no save stori tumas long wanpela bikpela samting bilong gutnius em ol manmeri i mas harim. Long Baibel bilong pastaim, long pas aposel Pol i raitim long ol Rom, em i yusim wed “kingdom” wanpela taim tasol, tasol em i kolim dispela tok “gutnius” inap 12-pela taim. (Ritim Rom 14:17.) Long dispela buk Pol i raitim, planti taim em i stori long wanem bikpela tok bilong gutnius? Bilong wanem dispela tok bilong gutnius i bikpela samting? Na bilong wanem yumi mas tingim dispela tok taim yumi autim “gutnius bilong God” long ol manmeri long teritori bilong yumi?​—Mak 1:14; Rom 15:16; 1 Tes. 2:2.

Save Ol Kristen Long Rom i Nidim

4. Taim Pol i kalabus long Rom long namba wan taim, em i autim tok long wanem samting?

⁴ I gutpela long tingim ol samting Pol i stori long en taim em i kalabus long Rom long namba wan taim. Baibel i tok olsem taim sampela Juda i kam lukim Pol, em i ‘autim gut tru ol tok (1) bilong kingdom bilong God na em i stori long (2) Jisas long pasin we inap kirapim tingting bilong ol man.’ Wanem samting i kamap? “Sampela i kirap bilipim ol tok Pol i mekim na sampela i no laik bilipim.” Bihain, Pol ‘i amamas long ol man i kam lukim em, na em i  autim tok long ol long (1) kingdom bilong God na em i skulim ol long ol samting bilong (2) Bikpela Jisas Krais.’ (Apo. 28:​17, 23-31) Tru tumas, Pol i tingim tru Kingdom Bilong God. Tasol em i tingim wanem narapela samting tu? Em i tingim wanpela bikpela samting bilong Kingdom​—em wok Jisas i mekim bilong kamapim ol samting God i tingting pinis long mekim.

5. Long Buk Rom, Pol i kamapim klia wanem samting?

⁵ Olgeta manmeri i mas save long Jisas na bilip long em. Long Buk Rom, Pol i kamapim klia dispela samting. Long kirap bilong dispela buk, em i tok: “Mi save givim mi yet olgeta long mekim wok bilong God na autim gutnius i stori long Pikinini bilong em.” Na em i tok moa: “Mi no sem long autim gutnius, long wanem, strong bilong God i stap long gutnius, em strong bilong kisim bek olgeta man i bilip.” Bihain, em i stori long taim we “God i skelim ol tingting hait na pasin hait bilong ol man, em bai mekim olsem long rot bilong Krais Jisas. Dispela tok i hap bilong gutnius mi save autim.” Na em i tok: “Kirap long Jerusalem na i go inap long Ilirikum, mi bin inapim tru wok bilong autim gutnius bilong Krais.” a (Rom 1:​9, 16; 2:16; 15:19) Yu ting i gat wanem as na long pas Pol i raitim long ol Rom, em i stori planti long Jisas?

6, 7. Olsem wanem kongrigesen long Rom i bin kamap? Husat ol i insait long en?

⁶ Yumi no save hau kongrigesen Rom i bin kamap. Ol Juda o ol man i joinim lotu Juda, em ol i bin stap long Pentikos 33 C.E., ating ol i kamap Kristen na bihain ol i go bek long Rom? (Apo. 2:10) O ating ol Kristen i mekim wok bisnis o i go raun long Rom na ol i autim tok i tru long ol man na kongrigesen i kamap long dispela rot? Yumi no save. Tasol taim Pol i raitim Buk Rom, long 56 C.E. samting, kongrigesen i stap pinis long Rom. (Rom 1:8) Wanem kain ol man i stap insait long dispela kongrigesen?

⁷ Sampela bilong ol em ol Juda. Pol i tok gude long Andronikus na Junias na kolim ol olsem “tupela wanblut bilong mi,” dispela i makim olsem ol i Juda husat i wanblut bilong em. Man bilong wokim haus sel, Akwila, na meri bilong em Prisila, em ol i stap long Rom, ol tu i Juda. (Rom 4:1; 9:​3, 4; 16:​3, 7; Apo. 18:2) Tasol planti brata na sista em Pol i salim gude long ol, em ol man bilong ol narapela lain. Ating sampela bilong ol em ol lain “i stap long haus bilong Sisar,” ating ol i wokboi nating bilong Sisar o ofisa bilong em.​—Fili. 4:22; Rom 1:6; 11:13.

8. Ol lain long Rom i gat wanem hevi?

⁸ Olgeta Kristen long Rom i gat wanpela hevi, em wanpela hevi yumi olgeta wan wan i gat. Pol i stori long en olsem: “Olgeta man i bin mekim sin na ol i sot long kamapim ol gutpela pasin bilong God.” (Rom 3:23) Tru tumas, olgeta man em Pol i raitim pas long ol, ol i mas save olsem ol i gat sin na ol i mas bilip long rot God i makim bilong givim helpim long ol.

Ol i Mas Save Olsem Ol i Gat Sin

9. Pol i stori long wanem gutpela samting bilong gutnius?

⁹ Long kirap bilong pas Pol i raitim long ol Rom, em i stori long gutpela samting inap kamap long rot bilong dispela gutnius em i stori long en planti taim. Em i tok: “Mi no sem long autim gutnius, long wanem, strong bilong God i stap long gutnius, em strong bilong kisim bek olgeta man i bilip. Em bilong kisim bek ol Juda pastaim, na ol Grik tu.” Yes, God bai kisim bek ol man. Tasol ol i mas i gat bilip, dispela i stret wantaim wanpela bikpela tok i tru i stap long Habakuk 2:4 (NW), em Pol i kamapim, olsem: “Stretpela man bai stap laip long rot bilong bilip bilong en.” (Rom 1:​16, 17; Gal.  3:11; Hib. 10:38) God inap kisim bek ol man long rot bilong gutnius, tasol olsem wanem dispela gutnius i insait long dispela tok olsem “olgeta man i bin mekim sin”?

10, 11. Bilong wanem sampela man i kliagut long tok i stap long Rom 3:​23, tasol sampela narapela nogat?

¹⁰ Paslain long man i kisim kain bilip we i helpim em long kisim laip, em i mas save olsem em i gat sin. Ol lain husat i bilip long God taim ol i liklik yet na i save long sampela tok bilong Baibel, ol i kliagut long dispela samting. (Ritim Saveman 7:20.) Maski ol i wanbel wantaim dispela tok olsem ol i gat sin o ol i gat tupela tingting long en, ol i gat sampela save long mining bilong tok bilong Pol taim em i tok: “Olgeta man i bin mekim sin.” (Rom 3:23) Tasol taim yumi autim tok, ating yumi bungim ol man husat i no kliagut long dispela tok.

¹¹ Long sampela kantri, planti man i no lain olsem ol i bon wantaim sin, olsem em samting ol i kisim long papamama. Tru, ating ol i save olsem ol i mekim ol popaia, ol i gat sampela pasin i no gutpela tumas, na ating ol i bin mekim sampela pasin nogut. Na ol i luksave olsem ol narapela man i wankain. Tasol ples ol i kamap bikpela long en i mekim na ol i no kliagut long as na ol i kain olsem. Long sampela tokples, sapos yu tokim man olsem em i sinman, ol narapela inap ting yu tok em i wanpela raskol o em i bin brukim sampela lo. Ol man i kamap bikpela long kain ples olsem, ating ol i no ting ol i kain sinman em Pol i stori long en.

12. Bilong wanem planti man i no bilip olsem olgeta man i gat sin?

¹² Long ol kantri i gat nem Kristen, long ol dispela kantri tu planti man i no ting ol i sinman. Bilong wanem i olsem? Maski ol i go lotu sampela taim, ol i ting stori bilong Baibel long Adam tupela Iv em wanpela stori nating tasol. Sampela narapela i kamap bikpela long hap we planti man i no laikim God. Ol i gat tupela tingting long God i stap o nogat, olsem na ol no kliagut olsem i gat wanpela God i stap husat i givim ol man ol lo bilong stretpela pasin, na sapos ol i no bihainim ol dispela lo, ol i mekim sin. Ol i kain olsem ol man long taim bilong ol aposel, em Pol i tok ol i “no wetim wanpela gutpela samting” na ol i “no save long God.”​—Efe. 2:12.

13, 14. (a) Ol man husat i no bilip long sin na long God, wanem wanpela risen na ol i no gat eskius? (b) Dispela pasin bilong i no bilip i bin kirapim planti man long mekim wanem?

¹³ Long pas Pol i raitim long ol Rom em i kamapim tupela risen, na ol man long bipo na long nau tu, em ol i kamap bikpela long hap we planti i no bilip long God, ol i no gat eskius. Namba wan risen, em olsem ol samting God i bin wokim i kamapim klia olsem i gat Krieta i stap. (Ritim Rom 1:​19, 20.) Dispela i stret wantaim tok Pol i mekim taim em i stap long Rom na i raitim pas i go long ol Hibru. Em i tok: “Olgeta wan wan haus i gat man i bin wokim. Tasol man i bin wokim olgeta samting em God.” (Hib. 3:4) Dispela tok Pol i mekim i soim olsem i gat wanpela Krieta husat i wokim heven na graun.

¹⁴ Olsem na i gat as tru na long pas Pol i raitim long ol Rom, em inap tok olsem ol man​—na lain Israel bilong bipo tu​—husat i lotuim ol imis ol “i no gat eskius.” Na dispela tok i stret tu long ol man i mekim pasin sem wantaim ol man na ol meri husat i mekim pasin sem wantaim ol meri, em God i no bin wokim ol bilong mekim olsem. (Rom 1:​22-27) Olsem na i stret Pol i tok “sin i pas long yumi olgeta, yumi Juda na Grik wantaim.”​—Rom 3:9.

 ‘Maus Bilong Bel i Tokaut’

15. Olgeta man i gat wanem samting? Dispela i mekim wanem long ol?

¹⁵ Buk Rom i kamapim narapela risen na ol man i mas luksave olsem ol i gat sin na ol i nidim helpim. Pol i stori long lo God i bin givim long lain Israel bilong bipo, na i tok: “Ol man i stap aninit long lo na ol i mekim sin, lo bai kotim ol.” (Rom 2:12) Em i tok moa olsem ol man bilong ol narapela lain na ples husat i no save long dispela lo bilong God, planti taim “tingting bilong ol yet i kirapim ol long bihainim pasin bilong lo.” I gat wanem as na planti man olsem i no orait long ol man i mekim pasin sem long wanblut, kilim man i dai, na pasin stil? Pol i kamapim as bilong dispela: Ol i gat maus bilong bel.​—Ritim Rom 2:​14, 15.

16. Tru man i gat maus bilong bel, tasol bilong wanem dispela i no makim olsem em i no inap mekim sin?

¹⁶ Tasol ating yu lukim pinis olsem maski man i gat maus bilong bel i tokaut na i skelim em, dispela i no makim olsem man bai bihainim maus bilong bel. Stori bilong lain Israel bilong bipo i kamapim klia dispela samting. Maski lain Israel i gat maus bilong bel em God i givim ol na ol i gat lo i tambuim ol long stil na mekim pasin adaltri, planti taim ol i brukim Lo Bilong Jehova na ol i no bihainim maus bilong bel bilong ol. (Rom 2:​21-23) Ol i gat asua long tupela samting, olsem na ol i mekim sin, ol i no bihainim laik bilong God na ol lo bilong em. Dispela i mekim na ol i no pas gut wantaim Man i bin wokim ol.​—Wkp. 19:11; 20:10; Rom 3:20.

17. Wanem tok bilong strongim bel i stap long Buk Rom?

¹⁷ Ating tok yumi skelim long Buk Rom inap kirapim yumi long ting olsem ol man​—na yumi tu​—i stap nogut long ai bilong God i Gat Olgeta Strong. Tasol Pol i mekim sampela tok moa. Em i kamapim tok Devit i bin mekim long Song 32:​1, 2, Pol i tok: “Ol man em ol i bin brukim ol lo na God i fogivim ol na i karamapim sin bilong ol, ol i ken amamas. Man em Jehova i no save tingim ol sin bilong en, em i ken amamas.” (Rom 4:​7, 8) Yes, God i stretim pinis rot bilong lusim sin bilong ol man na em i mekim long pasin i stret wantaim lo.

Gutnius i Stori Long Jisas

18, 19. (a) Taim Pol i raitim pas long ol Rom, em i stori long wanem bikpela tok bilong gutnius? (b) Bilong kisim ol blesing bilong Kingdom, yumi mas kliagut long wanem samting?

¹⁸ Ating yu bai tok, “Dispela em i gutpela nius tru!” Yes, em i gutpela nius na em i kirapim yumi long tingim gen dispela bikpela tok bilong gutnius em Pol i stori long en long Buk Rom. Pol i tok: “Mi no sem long autim gutnius, long wanem, strong bilong God i stap long gutnius, em strong bilong kisim bek olgeta man i bilip. Em bilong kisim bek ol Juda pastaim, na ol Grik tu.”​—Rom 1:​15, 16.

¹⁹ Dispela gutnius i stori long wok Jisas i mekim bilong kamapim ol samting God i tingting pinis long mekim. Olsem Pol i kamapim, em i wetim taim we “God i skelim ol tingting hait na pasin hait bilong ol man, em bai mekim olsem long rot bilong Krais Jisas. Dispela tok i hap bilong gutnius.” (Rom 2:16) Taim em i mekim dispela tok, em i no min olsem “kingdom bilong Krais na bilong God” na ol samting God bai mekim long rot bilong Kingdom, ol i liklik samting, nogat. (Efe. 5:5) Tasol em i soim olsem sapos yumi laik i stap laip na kisim ol blesing Kingdom Bilong God bai kamapim, yumi mas kliagut olsem (1) long ai bilong God yumi sinman na (2) yumi mas bilip long Jisas Krais sapos yumi laik bai God i fogivim sin bilong yumi. Taim man i kliagut na bilip olsem God i laik bai ol man i mekim dispela tupela samting, na em i save olsem dispela i opim rot long em long kisim gutpela sindaun long bihain, orait i stret em i tok, “Tru tumas, dispela em i gutpela nius tru!”

20, 21. Taim yumi autim tok, bilong wanem yumi mas tingim gutnius olsem Buk Rom i stori long en? Dispela inap kamapim wanem gutpela samting?

 ²⁰ Yumi mas tingim tru dispela hap tok bilong gutnius taim yumi autim tok. Pol i stori long Jisas na i kamapim tok bilong Aisaia, olsem: “Man i bilip long em bai i no inap bel hevi.” (Rom 10:11; Ais. 28:16) Long ol man husat i save long tok Baibel i mekim long sin, ating stori bilong ol bikpela samting Jisas i bin mekim i no narapela kain long ol. Tasol long sampela narapela man, dispela tok i nupela samting long ol, em samting ol man long ples bilong ol i no save long en o ol i no bilip long en. Taim ol kain man olsem i kirap bilip long God na long Baibel, yumi mas helpim ol long kliagut long wok bilong Jisas. Stadi i kamap bihain long dispela bai stori long olsem wanem Rom sapta 5 i kamapim sampela tok moa long dispela hap tok bilong gutnius. Ating dispela stadi bai helpim yu long wok autim tok bilong yu.

²¹ Em i gutpela samting tru long helpim ol man i gat gutpela bel long kliagut long gutnius em Buk Rom i stori long em planti taim, olsem ‘gutnius em strong bilong God long kisim bek olgeta man i bilip.’ (Rom 1:16) Na tu, bai yumi amamas long lukim ol narapela i wanbel long tok Pol i mekim long Rom 10:15: “Ol man i autim gutnius long ol gutpela samting, lek bilong ol i naispela tumas!”​—Ais. 52:7.

[Futnot]

Yu Inap Tingim?

• Buk Rom i kamapim wanem bikpela tok bilong gutnius?

• Yumi mas helpim ol narapela long kliagut long wanem samting?

• Olsem wanem yumi na ol narapela inap kisim ol blesing long rot bilong “gutnius bilong Krais”?

[Askim Bilong Stadi]

[Rait long pes 8]

Gutnius long Buk Rom i stori long bikpela wok Jisas i mekim bilong kamapim ol samting God i tingting pinis long mekim

[Piksa long pes 9]

Yumi olgeta i bon wantaim sin!