Li lekil aʼyejetik ti solel chtun kuʼuntike
Li lekil aʼyejetik ti solel chtun kuʼuntike
«Li Lequil Aʼyeje, [...] jaʼ stsatsal Dios. Jaʼ sventa [kolebal].» (ROM. 1:16)
1, 2. ¿Kʼu yuʼun ta jcholtik «li Lequil Aʼyej ta sventa ventainel yuʼun Diose», xchiʼuk kʼusi mas chkalbetik skʼoplal?
«TOJ lek chkaʼi ti jaʼ chiloʼilaj-o skotol kʼakʼal li lekil aʼyeje.» Yikʼaluk van oy jech kalojtik kʼuchaʼal taje, o xuʼ van oy junuk velta jech la jnoptik, yuʼun li yajtunelutik Jeovae jnaʼojtik ti toj tsots skʼoplal ti jcholtik li «lequil achʼ cʼop scʼoplal ti ventainel yuʼun ti Diose». Yuʼun xuʼ van komem ta joltik li kʼusi laj xa onoʼox yalbe skʼoplal Jesús ta sventa li abtelal taje (Mat. 24:14, Ch).
2 Kʼalal ta jcholtik «li Lequil Aʼyej ta sventa ventainel yuʼun Diose», jaʼ yakal ta jpastik batel li kʼusi laj slikes komel Jesuse (kʼelo Lucas 4:43). Ta melel, jtos li kʼusi chkalbetik li krixchanoetike jaʼ ti jutuk xa skʼan slajes Dios li kʼusitik chil-o svokolike. Mi sta yorail li «tsots vocole», ta slajes li jecheʼ relijionetike xchiʼuk tslokʼes skotol li choplejal ta Balumile (Mat. 24:21). Jech noxtok chkalbetik li krixchanoetik ti jaʼ koliyal li Ajvalilal yuʼun Diose ti chkʼataj ta jun paraiso spʼejel li Balumile, ti bu ta jkʼupintik lekilale xchiʼuk ti xi jmuyubaj noʼoxe. Ta melel, «li Lequil Aʼyej ta sventa ventainel yuʼun Diose» jaʼ te smakoj li kʼusi «laj yalbe Abraham li Lequil Aʼyej jech chac liʼi: “Voʼot ta aventa chichʼic bendición cristianoetic ta sbejel banamil”» (Gál. 3:8).
3. Li Pabloe, ¿kʼu yuʼun mas laj yakʼ ta ilel skʼoplal lekil aʼyejetik li ta karta la stakbe batel li jromaetike?
3 Vaʼun chaʼa, ¿mi oy van jtosuk kʼusi ti muʼyuk chkalbetik mas skʼoplal li ta lekil aʼyejetik ti skʼan chaʼiik li krixchanoetike? Kakʼtik venta ti ta karta la stakbe batel jromaetik li Pabloe lajcheb velta laj yal «Lequil Aʼyej», xi, pe jaʼ noʼox jun velta li jpʼel kʼop «ventainel», xie (kʼelo Romanos 14:17). Vaʼun chaʼa, ¿kʼusi ti mas tsots skʼoplal laj yal Pablo ta sventa li lekil aʼyej ti ep ta velta laj yale xchiʼuk kʼu yuʼun toj tsots skʼoplal skʼan xkil jkotoltik? ¿Kʼu yuʼun toj tsots skʼoplal ti teuk ta joltik kʼalal ta jcholtik «li Lequil Aʼyej yuʼun Diose»? (Mar. 1:14; Rom. 15:16; 1 Tes. 2:2.)
¿Kʼusi ti itun yuʼunik li jromaetike?
4. Kʼalal laj yichʼ chukel ta baʼyel velta ta Roma li Pabloe, ¿kʼusi chaʼtos mas laj yalbe skʼoplal kʼalal la xchol mantale?
4 Li kʼusi xuʼ skoltautik ta yaʼibel lek smelolal taje, jaʼ ti jkʼeltik lek li kʼusitik loʼilaj-o Pablo kʼalal ta baʼyel velta laj yichʼ chukel ta Romae. Li loʼile ta xal ti oy chaʼtos kʼusi la spas kʼalal bat vulaʼanatuk yuʼun jvokʼ judioetike. Baʼyele, «lic yalbe yaʼyic cʼu xʼelan chventainvan li Diose. La sjambe lec smelol». Ta xchibale, «laj yacʼbe lec yilic scʼoplal li [Jesuse]». ¿Kʼusi ikʼot ta pasel un? «Oy jayibuc la xchʼunic [...], pero oy yantic mu xchʼunic.» Xi to chal xtok kʼusi la spas li Pabloe: «Laj yicʼ ochel ta sna scotol li yuloʼtac te icʼotique» xchiʼuk ti jech la spas kʼuchaʼal tspas onoʼoxe, «jamal la xchol cʼu xʼelan chventainvan li Diose» xchiʼuk ta xchibale, «ichanubtasvan lec ta sventa li Cajvaltic Jesucristoe» (Hech. 28:17, 23-31). Jech kʼuchaʼal chkiltike jaʼ mas laj yalbe skʼoplal Ajvalilal yuʼun Dios li Pabloe. Pe ¿kʼusi ti mas to laj yalbe skʼoplale? Jaʼ li kʼusi mas tsots skʼoplal li ta Ajvalilal yuʼun Diose: ti kʼusi sbainoj li Jesús ta sventa li kʼusi tskʼan tspas Diose.
5. ¿Kʼusi ti toj tsots skʼoplal laj yalbe li ta karta la stakbe batel jromaetik li Pabloe?
5 Skotol li krixchanoetik ta skʼakʼalil Pabloe skʼan xojtikinik li Jesuse xchiʼuk ti oyuk xchʼunel yoʼontonik ta stojole. Li ta karta la stakbe batel jromaetik li Pabloe, te chalbe skʼoplal taje. Li ta baʼyel versikuloetike, xi chale: «Jaʼ li Dios ti chitun yuʼun ta scotol coʼntone, ti ta jcholbe scʼoplal li Lequil Aʼyej ta sventa Xnichʼone». Ta mas jelavele, xi laj yale: «Mu xiqʼuexov ta xcholel li Lequil Aʼyeje, yuʼun jaʼ stsatsal Dios. Jaʼ sventa chcol scotol li bochʼouc noʼox ta xchʼunique». Xchiʼuk xi to laj yal xtoke: «Cʼalal tsta yorail yuʼun Dios ta xchapan scotol cristianoetic ta sventa li Jesucristoe, [...] acʼo me ta mucul pasbil, yuʼun jaʼ jech chal li Lequil Aʼyej[e]». Ta slajebe xi laj yale: «Jech ipuc batel cuʼun li Lequil Aʼyej yuʼun Cristoe. Baʼyuc la jliques ta Jerusalén; tsʼacal lic jchol batel ta buyuc noʼox cʼalal to licʼot ta Ilírico banamil» (Rom. 1:9, 16; 2:16; 15:19). a ¿Kʼu van yuʼun ti ep ta velta la yalbe jromaetik ta sventa Cristo li Pabloe?
6, 7. ¿Kʼu yelan ilik tal li tsobobbail ta Romae xchiʼuk butik likemik talel li krixchanoetike?
6 Mu jnaʼtik kʼuxi i-ayan li tsobobbail ta Romae. Xuʼ van jaʼ la slikes li judioetik o li jyanlumetik ti lik xchʼunik Cristo ta Pentecostés ta sjabilal 33 xchiʼuk ti isutik batel yan velta li ta slumalike (Hech. 2:10, Ch). O xuʼ van jaʼ laj yichʼik batel lekil aʼyejetik ta Roma li jchonolajeletik, jpʼolmaletik xchiʼuk jxanviletik ti jaʼik yajtsʼaklomtak Cristoe. Kʼuxiuk noʼox, kʼalal la stsʼiba skarta li Pablo ta sjabilal 56, li tsobobbaile oy xaʼox kʼuk sjalil te oy (Rom. 1:8). ¿Kʼuyelan li ermanoetik ta lum taje?
7 Junantike, judioetik onoʼox. Jech kʼuchaʼal liʼe, li Pabloe laj yal batel ta skarta ti akʼo xalbeik chabanuk li Andrónico xchiʼuk Juniase, ti «jaʼ mero jvinquilal» o kutsʼ kalal xie, taje xuʼ van jaʼ chakʼ ta aʼiel ti jaʼ yutsʼ yalal sbaike o ti jmoj slumalike. Li Áquila xchiʼuk Priscilae jaʼik judioetik ek, ti jaʼ yabtelik spasel karpanaetik li ta lum taje (Rom. 4:1; 9:3, 4; 16:3, 7; Hech. 18:2). Pe li buchʼutik laj yalbe batel chabanuk li jtakbol Pabloe, yaʼeluke jutuk mu skotoluk ti jaʼik li ermanoetik ti likemik ta yan lume. Junantike yikʼaluk van te likemik batel li ta «sna ajvalil Cesare», taje jaʼ la skʼan laj yal ti te chtunik ta stojolal li ajvalile xchiʼuk ti oy tsots yabtelike (Fili. 4:22; Rom. 1:6; 11:13).
8. ¿Kʼusi skʼan xaʼibeik smelolal li jromaetike?
8 Skotol li yajtsʼaklomtak Cristo ta Romae oy toʼox kʼusi tsots vokol la snuptanik jech kʼuchaʼal voʼotike. Li Pabloe xi chalbe skʼoplale: «Scotol cristiano jpasmuliletic, batsʼi nom oy ta stojolic slequilal li Diose» (Rom. 3:23). Jech kʼuchaʼal chkiltike, li buchʼutik la stakbe batel skarta li Pabloe, toj tsots skʼoplal ti xaʼibeik smelolal ti jaʼik jpasmuliletik xchiʼuk ti skʼan ta xchʼunel yoʼontonik xchʼamik li koltael akʼbatik yuʼun Diose.
Kakʼtik venta ti jpasmulilutike
9. Jech kʼuchaʼal chal Pabloe, ¿kʼusi xuʼ xkʼot ta pasel yuʼun li lekil aʼyeje?
9 Li ta baʼyel versikuloetik ta skartae, li Pabloe laj yalbe li jromaetik ti oy kʼusi toj lek chkʼot ta pasel yuʼun li lekil aʼyej ta stojolalike, jaʼ yuʼun ep ta velta xi laj yale: «Mu xiqʼuexov ta xcholel li Lequil Aʼyeje, yuʼun jaʼ stsatsal Dios. Jaʼ sventa chcol scotol li bochʼouc noʼox ta xchʼunique. Baʼyuc ivul ta stojol li israeletique; jaʼo icʼot ta atojolic ec voʼoxuc li yanlum cristianooxuque». Jech kʼuchaʼal laj yal li Pabloe, manchuk mi judioetik o mi maʼuk, xuʼ sta skolelik. Pe skʼan xakʼik ta ilel ti oyuk xchʼunel yoʼontonike, jaʼ jech laj yakʼ ta ilel Pablo ti melel tajek kʼalal laj yal li kʼusi chal Habacuc 2:4: «Li bochʼo tucʼ yoʼnton chquil ta sventa xchʼunojel yoʼntone jaʼ ta xcuxi» (Rom. 1:16, 17; Gál. 3:11; Heb. 10:38). ¿Kʼuxi te tsakal skʼoplal li lekil aʼyej, ti chakʼ kolebal, xchiʼuk ti «scotol cristiano jpasmulileti[ke]»?
10, 11. ¿Kʼu yuʼun oy jlom ti kʼun ta aʼibel smelolal chaʼiik li kʼusi chal Romanos 3:23 xchiʼuk ti oy jlom ti mu xaʼibeik smelolale?
10 Sventa oyuk xchʼunel yoʼonton ti xuʼ xkol-o li jun krixchanoe, baʼyel skʼan xakʼ venta ti snaʼ saʼ smule. Taje mu labaluk sba ta aʼiel li ta mukʼta lumetik ti ta sbikʼtalik onoʼox xchʼunojik Diose xchiʼuk ti snaʼojik jutuk li kʼusi chal Vivliae (kʼelo Eclesiastés 7:20). Li ta lumetik taje xchiʼuk li buchʼutik chchibal kʼoptaik li kʼusi laj yal Pablo ti «scotol cristiano jpasmulileti[ke]», xaʼibeik smelolal jutuk li kʼusi la skʼan laj yale (Rom. 3:23). Akʼo mi jech, li ermanoetike oy bu tstaik ta cholmantal krixchanoetik ti mu xaʼibeik smelolal li jpʼel kʼop taje.
11 Ta junantik mukʼta lumetike, li krixchano ti muʼyuk mas tsots skʼoplale mu snaʼ mi jpasmulil chijvokʼ xchiʼuk ti jkuchojtik xa onoʼox tale. Pe snaʼoj ti oy kʼusi chopol chbat ta pasel yuʼune, ti oy xchopolil xchiʼuk ti oy kʼusitik chopol tspas bakʼintike. Jech noxtok, chakʼ venta ti jech tspasik li yan krixchanoetike. Akʼo mi jech li stalel xkuxlejalik li bu ichʼi tale mu xkoltaat sventa xaʼibe smelolal kʼu yuʼun ti jech chkʼot ta pasele. Maʼuk noʼox taj xtoke, yuʼun li ta skʼopike xuʼ van jaʼ noʼox jpasmulil chaʼiik li buchʼu mu xchʼun jlom mantale o li buchʼu tstikʼ sba ta kʼopetike. Li buchʼu jech laj yichʼ tsʼitesele, mu jechuk chaʼibe smelolal li kʼusi laj yal Pabloe, jaʼ yuʼun maʼuk jpasmulil chaʼi sba.
12. ¿Kʼu yuʼun mu xchʼunik epal krixchanoetik ti jpasmulilutike?
12 Li ta mukʼta lumetik ti jaʼik yajtsʼaklom Cristo ta alele, jutuk mu skotoluk ti mu skʼan xchʼamik ti jpasmulilutike. ¿Kʼu yuʼun? Yuʼun akʼo mi chkʼotik bakʼintik li ta xchʼulnaike, jecheʼ loʼil o ixtol loʼil noʼox chaʼiik li loʼil ta Vivlia ta sventa li Adán xchiʼuk Evae. Pe jaʼuk li jlome muʼyuk mas tstsakik ta mukʼ o muʼyuk srelijionik. Mu snaʼik lek mi oy Jpasvanej kuʼuntik, jaʼ yuʼun mu xchʼunik mi oy Buchʼu mas Toyol skʼoplal ti laj yakʼ mantaletik sventa li krixchanoetike xchiʼuk mu snaʼik mi jaʼ jun mulil ti kʼalal muʼyuk chichʼ chʼunele. Taje jutuk mu xkoʼolajik kʼuchaʼal li krixchanoetik ta baʼyel siglo ti laj yal Pablo ti muʼyuk spatobil yoʼontonik xchiʼuk ti muʼyuk sDiosik liʼ ta Balumile (Efe. 2:12).
13, 14. 1) ¿Kʼusi jun srasonal ti mu xuʼ spak-o skʼoplalik li buchʼutik mu xchʼunik Dios xchiʼuk ti mu xchʼunik ti jaʼik jpasmulilutike? 2) ¿Kʼusi kʼotem ta pasel yuʼunik epal krixchanoetik ti mu xchʼunik ti oy jun melel Diose?
13 Li ta skarta Romanose, li Pabloe laj yalbe chib srasonal ti kʼu yuʼun muʼyuk sbalil ti jech chichʼ nopel kʼuchaʼal laj xa kaltike. Li baʼyel srasonale jaʼ ti vinajel-balumile chakʼ ta ilel ti oy Jpasvanej kuʼuntike (kʼelo Romanos 1:19, 20). Ti vaʼ yelane xkoʼolaj xchiʼuk li kʼusi laj yal Pablo kʼalal la stsʼiba ta Roma li skarta sventa j-hebreoetik ti xi chale: «Yuʼun li jujubej nae persa oy bochʼo tspas. Pero li bochʼo la spas sbejel li banamile jaʼ stuc li Diose» (Heb. 3:4). Taje jaʼ srasonal ti chakʼ ta ilel ti oy jun Jpasvanej yuʼun sjunul li vinajel-balumile.
14 Oy srasonal yuʼun ti jech la stsiʼbabe batel jromaetik li Pabloe ti «muʼyuc cʼusi xuʼ tspoj sbaic o» li krixchanoetik ti chichʼik ta mukʼ lokʼoletike, manchuk mi jyanlum o mi j-israeletik. Jaʼ jech chichʼik albel skʼoplalik ek li buchʼutik chmulivajik ta sventa li chiʼinejbail ta vayele, ti «jaʼ la spas xchiʼuc sbecʼtalic li cʼusi mu jechuc scʼoplal ta [pasel]» ta sventa li sbekʼtal jun vinik xchiʼuk jun antse (Rom. 1:22-27). Ta sventa ti jech-o li srasonal yuʼun li Pabloe kʼot ta nopel yuʼun ti «scotolic pasbilic ta mantal yuʼun ti mulile, mi israeletic, mi jyanlumetic» (Rom. 3:9).
«Li sjol yoʼntonique snaʼ lec ti cʼu xʼelan yabtelique»
15. ¿Buchʼutik ti oy sjol yoʼontonike, xchiʼuk kʼusi xuʼ lek tspasik ta skoj taje?
15 Li karta sventa jromaetike chakʼ ta ilel ti oy yan srasonal ti skʼan xakʼik venta ti jpasmulil li krixchanoetike xchiʼuk ti skʼanik koltael lokʼel li ta il vokol taje. Kʼalal laj yalbe skʼoplal li mantaletik laj yichʼik akʼbel li voʼneal Israele, li Pabloe xi laj yale: «Li bochʼotic tsaʼ smulic ti yaʼyojic smantaltac Diose, jaʼ ta sventa mantaletic chichʼic chapanbel smulic» (Rom. 2:12). Ta sventa ti jech-o snopobil yuʼun li Pabloe, ep ta velta laj yakʼ ta aʼiel ti krixchanoetik ti likemik ta yantik lum xchiʼuk ti yan-o stsʼunbalike «ta stalelic noʼox [tspasik] jech chac cʼu chaʼal chal li smantaltac Diose». Jaʼ jech tspʼajik li xchiʼinel ta vayel yutsʼ yalal noʼox sbaike, li milvaneje xchiʼuk li elekʼe. ¿Kʼu yuʼun? Yuʼun jech kʼuchaʼal chal Pabloe, skotol li krixchanoetike oy sjol yoʼontonik (kʼelo Romanos 2:14, 15).
16. ¿Kʼu yuʼun maʼuk skʼan xal ti muʼyuk xa ta jpas jmultik ti oy jol koʼontontike?
16 Pe ti jech oy jol koʼontontik ti snaʼ lek ti kʼusi lek xchiʼuk chopole, maʼuk me skʼan xal ti skotol xa velta ta jchʼuntik li kʼusi chalbutike. Kalbetik skʼoplal li voʼneal j-israeletike. Ep ta velta muʼyuk la xchikintaik li kʼusi chal sjol yoʼontonik ti akʼbilik yuʼun Jeovae, mi jaʼuk li kʼusi chal li Mantaletike ti chal ti chopol li elekʼe xchiʼuk li sloʼlael chiʼilil ta nupunele (Rom. 2:21-23). Jaʼ yuʼun li smulike toj echʼ xa noʼox tsots. Ta melel jmulavil ikʼotik, yuʼun mu spas yuʼunik ti kʼuyelan chal smantaltak Diose xchiʼuk mu staik ta pasel li kʼusi oy ta yoʼonton Jeovae. Taje jaʼ tsok-o ta jyalel ti kʼuyelan yiloj sbaik xchiʼuk Jeovae (Lev. 19:11; 20:10; Rom. 3:20).
17. ¿Kʼusi spatobil koʼontontik ta jtatik li ta Romanose?
17 Jech kʼuchaʼal laj xa kiltik tale, oy van buchʼu tsnop ti chakʼ at-oʼonton ti kʼuyelan oyutik ta stojolal li Dios ti Skotol xuʼ yuʼun ta sventa li kʼusi chal slivroal Romanose. Pe laj to yalbe mas smelolal li Pabloe. Kʼalal laj yalbe skʼoplal li kʼusi laj yal David ta Salmo 32:1, 2, xi la stsʼibae: «Toj xcuxet yoʼnton li bochʼo ipasbatic xa perdón yuʼun smulique, ti ichʼaybat xa scotol li xchopolilique. Xcuxet noʼox yoʼnton, yuʼun mu xa xʼacʼbat stoj smulic yuʼun li Diose» (Rom. 4:7, 8). Jech kʼuchaʼal chkiltike, li Diose tspasbutik perton li jmultike jaʼ yuʼun yakʼoj li koltael ti chtun kuʼuntike.
Lekil aʼyej ti jaʼ chalbe skʼoplal li Jesuse
18, 19. 1) Li ta skarta Romanose, ¿kʼusi mas laj yalbe skʼoplal ta sventa lekil aʼyej li Pabloe? 2) ¿Kʼusi skʼan jpastik sventa jkʼupintik li bendisionetik chakʼ li Ajvalilal yuʼun Diose?
18 ¡Toj echʼ xa noʼox tspat koʼontontik li aʼyejetike! Taje jaʼ tsvules ta joltik li kʼusi mas laj yalbe skʼoplal ta sventa lekil aʼyej kʼalal la stakbe batel karta sventa jromaetik li Pabloe. Jech kʼuchaʼal laj kiltik xae, li Pabloe xi la stsʼibae: «Mu xiqʼuexov ta xcholel li Lequil Aʼyeje, yuʼun jaʼ stsatsal Dios. Jaʼ sventa [kolebal]» (Rom. 1:15, 16).
19 Ta sventa taje, li lekil aʼyeje jaʼ mas chalbe skʼoplal kʼusi yabtel Jesús sventa chkʼot ta pasel li kʼusi tskʼan tspas Diose. Jech kʼuchaʼal liʼe, li Pabloe laj yal ti «jaʼ jech chal li Lequil Aʼyej[e]» xchiʼuk «cʼalal tsta yorail yuʼun Dios ta xchapan scotol cristianoetic ta sventa li Jesucristoe, scotol ta xacʼ ta ilel, acʼo me ta mucul pasbil» (Rom. 2:16). Kʼalal jech laj yale maʼuk laj yakʼ ta aʼyel ti muʼyuk tsots skʼoplal ti «chventainvan li Cristoe xchiʼuc li Diose» mi jaʼuk li kʼusi tspas Jeova ta sventa li ajvalilal taje (Efe. 5:5). Li kʼusi laj yale jaʼ ti mi oy buchʼu tskʼan chkuxi sventa jaʼ chventainat yuʼun li Ajvalilal yuʼun Diose xchiʼuk ti tskʼan tskʼupin li bendisionetike, oy kʼusi chaʼtos skʼan spas: baʼyel, skʼan snaʼ ti jpasmulil ta sba sat li Diose, ta xchibale, skʼan oyuk xchʼunel yoʼonton ta stojolal Jesús sventa xchʼaybat li smule. Kʼalal chkaʼibetik smelolal xchiʼuk ta jchʼamtik li kʼusitik tskʼan tspas Diose xchiʼuk ti chkakʼtik venta li kʼusi ta jtatik ta mas jelavele oy srasonal kuʼuntik ti xi xkaltike: «¡Toj yan xa noʼox sba yutsil li aʼyejetik taje!».
20, 21. ¿Kʼu yuʼun skʼan teuk ta joltik kʼalal ta jcholtik mantal li lekil aʼyej ti mas chalbe skʼoplal li Romanose, xchiʼuk kʼusi lek xuʼ jtatik?
20 Ta melel, kʼalal ta jcholtik mantale skʼan me teuk ta joltik li kʼusi mas tsots skʼoplal sventa li lekil aʼyeje. Li Pabloe xi la stsʼiba kʼalal laj yal li kʼusi yaloj Isaiase: «Ti buchʼu ta spat yoʼnton ta stojol ti Cajvaltique, mu xlaj ta loʼlael», jaʼ xkaltik ta kʼexlal (Rom. 10:11, Ch; Isa. 28:16). Li ta lumetik ti oy yabinojbeik skʼoplal li chanubtaseletik ta Vivlia ta sventa ti jmulavilutike, mu labaluk sba chaʼiik li aʼyej ta sventa Jesuse. Pe mu jechuk chkʼot ta pasel li bu jelel stalel xkuxlejal li krixchanoetike o ti mu snabeik skʼoplal ta jyalele. Jaʼ yuʼun, kʼalal chlik xchʼunik ti oy Dios li krixchanoetik taje xchiʼuk chlik xchʼunik li ta sKʼope, toj tsots skʼoplal ti xkalbetik lek smelolal kʼusi yabtel li Jesuse. Li ta yan xchanobile jaʼ ta jkʼeltik kʼuxi chchapbe batel smelolal li lekil aʼyej taje, ti te chlokʼ ta kapitulo 5 yuʼun Romanose. Li mantal taje xuʼ xtun kuʼuntik li ta cholmantale.
21 Jech kʼuchaʼal laj xa kiltike, li karta la stakbe batel jromaetik li Pabloe ep ta velta chalbe skʼoplal li lekil aʼyejetike xchiʼuk chakʼ ta ilel ti «jaʼ sventa chcol scotol li bochʼouc noʼox ta xchʼunique» (Rom. 1:16). ¡Xijmuyubaj tajek ti ta jchʼamtik li aʼyej taje xchiʼuk ti ta jkoltatik li krixchanoetik ti oy ta yoʼontonik mantale sventa jechuk spasik batel ek! Toj kʼupil sba ta kʼelel ti buchʼutik skʼanojik li kʼusi melele jaʼ jech chalik kʼuchaʼal laj yal Pablo ta Romanos 10:15: «Toj cʼupil sba yacan chanovic batel li bochʼo chbat xcholic Lequil Aʼyeje» (Isa. 52:7).
[Tsʼib ta yok vun]
a Yan livroetik ti yakʼoj ta naʼel Diose, jech tstunes li jpʼel kʼop taj eke (Mar. 1:1; 1 Cor. 9:12; 2 Cor. 2:12; Fili. 1:27).
¿Mi xvul ta joltik liʼe?
• ¿Kʼusi mas laj yalbe skʼoplal ta sventa lekil aʼyej li slivroal Romanose?
• ¿Kʼusi skʼan jkoltatik ta yaʼibel smelolal li krixchanoetike?
• ¿Kʼusi spatobil koʼontontik chakʼbutik «li Lequil Aʼyej yuʼun Cristoe»?
[Sjakʼobiltak sventa xchanobil]
[Lokʼol ta pajina 8]
Li lekil aʼyej ti mas chalbe skʼoplal Romanose jaʼ sventa li yabtel ti tsots skʼoplal yichʼoj Jesús ta sventa li kʼusi tskʼan tspas Diose
[Lokʼol ta pajina 9]
Kʼalal chijvokʼe oy kʼusi chopol jkuchojtik tal ti chismilutike: jaʼ li mulile
