Hu Na Mafhungo Maḓifha Ane Vhathu Vhoṱhe Vha Tea U A Ḓivha
Hu Na Mafhungo Maḓifha Ane Vhathu Vhoṱhe Vha Tea U A Ḓivha
“Mafhungo-maḓifha . . . ndi maanḓa a Mudzimu, a u tshidza.”—VHA-ROMA 1:16.
1, 2. Ndi ngani ni tshi huwelela “mafhungo-maḓifha a muvhuso,” nahone ndi masia afhio ane na a ombedzela?
‘NDI a takalela u vhudza vhaṅwe mafhungo maḓifha ḓuvha ḽiṅwe na ḽiṅwe.’ Khamusi no no vhuya na amba maipfi o raloho kana u humbula nga hao. Samusi ni Ṱhanzi ya Yehova yo ḓikumedzaho, ni a zwi ḓivha uri ndi zwa ndeme vhukuma u huwelela “mafhungo-maḓifha aya a muvhuso.” Ni nga kha ḓi vha no tou rwela ngomani maipfi enea a vhuporofita ha Yesu malugana na u ita mushumo wonoyu.—Mat. 24:14.
2 Musi ni tshi huwelela “mafhungo-maḓifha a muvhuso” ni vha ni tshi khou bvela phanḓa na mushumo we wa thomiwa nga Yesu. (Vhalani Luka 4:43.) A zwi timatimisi uri ni anzela u ombedzela uri Mudzimu u ḓo dzhenelela kha mafhungo a vhathu hu si kale. Musi hu tshi ḓa “vhuṱungu vhuhulu,” Mudzimu u ḓo fhelisa vhurabeli ha mazwifhi na vhuvhi hoṱhe kha ḽifhasi. (Mat. 24:21) Khamusi ni dovha na ombedzela uri Muvhuso wa Mudzimu u ḓo ita uri ḽifhasi ḽi dovhe ḽi vhe Paradiso u itela uri hu ande mulalo na dakalo. Zwi re zwone ndi uri “mafhungo-maḓifha a muvhuso” ndi tshipiḓa tsha mafhungo maḓifha ‘e a dzula ó vhudzwa Abrahamu a uri: Vha dzitshakha dza nnḓa vhoṱhe vha ḓo fhaṱutshedzwa zwenezwi ene a tshi fhaṱutshedzwa.’—Vha-Gal. 3:8.
3. Ndi ngani ri tshi nga amba uri muapostola Paulo o ombedzela mafhungo-maḓifha kha bugu ya Vharoma?
3 Naho zwo ralo, naa zwi nga itea uri a ri khou livhisa ṱhogomelo yavhuḓi kha sia ḽa ndeme ḽa mafhungo-maḓifha ane vhathu vha tea u a ḓivha? Kha vhurifhi he a vhu ṅwalela Vharoma, muapostola Paulo o shumisa ipfi “muvhuso” luthihi fhedzi, fhedzi a shumisa maipfi ane a ri “mafhungo-maḓifha” lu swikaho 12. (Vhalani Vha-Roma 14:17.) Ndi ḽifhio sia ḽa mafhungo-maḓifha ḽe Paulo a ambela khaḽo lunzhi-lunzhi kha yeneyo bugu? Ndi ngani ḽeneḽo sia ḽa mafhungo-maḓifha ḽi ḽa ndeme? Nahone ndi ngani ri tshi fanela u dzula ri tshi elekanya nga ha sia ḽeneḽo musi ri tshi khou huwelela “Mafhungo-maḓifha a Mudzimu” kha vhathu vha re tsimuni yashu?—Marko 1:14; Vha-Roma 15:16; 1 Vha-Thes. 2:2.
Zwe Vharoma Vha Vha Vha Tshi Zwi Ṱoḓa
4. Musi o valelwa dzhele lwa u thoma ngei Roma, Paulo o huwelela nga ha mini?
4 Ri nga guda zwinzhi nga u ṱhogomela thero dze Paulo a amba nga hadzo musi o valelwa dzhele lwa u thoma ngei Roma. Ri vhala uri musi Vhayuda vhanzhi vha tshi mu dalela o vha ṱalutshedza a vha ‘ṱanzielela (1) a muvhuso wa Mudzimu, a vha funza (2) a Yesu.’ Ho vha na mvelelo dzifhio? “Vhaṅwe vha tenda zwe a amba; vhaṅwe vha si tende.” Nga murahu ha zwenezwo, Paulo ‘o ṱanganedza vhoṱhe vha ḓaho ha ene, a amba (1) a muvhuso wa Mudzimu, a funza (2) a Murena Yesu Kristo.’ (Mish. 28:17, 23-31) Zwi tou vha khagala uri Paulo o livhisa ṱhogomelo kha Muvhuso wa Mudzimu. Fhedzi ndi mini zwe a dovha a zwi ombedzela? O dovha a ombedzela tshithu tsha ndeme vhukuma kha Muvhuso wonoyo—mushumo wa Yesu malugana na ndivho ya Mudzimu.
5. Ndi ṱhoḓea ifhio ye Paulo a i ombedzela kha bugu ya Vharoma?
5 Vhathu vhoṱhe vha tea u ḓivha nga ha Yesu na u vha na lutendo khae. Kha bugu ya Vharoma Paulo o ombedzela ṱhoḓea ya u ita zwenezwo. U thomani o vha o ṅwala uri: “Mudzimu, ané nda mu shumela muyani wanga kha mushumo wa u huwelela mafhungo-maḓifha a Murwa wawe.” O dovha a ri: “Ngauri ’thi na ṱhoni ndi tshi amba mafhungo-maḓifha a Kristo, ngauri one ndi maanḓa a Mudzimu, a u tshidza vhoṱhe vha tendaho.” Nga murahu o amba nga ha ḓuvha ‘ḽiné Mudzimu a ḓo sengisa ngaḽo’ zwo dzumbamaho zwa vhathu; u amba ha Evangeli [mafhungo maḓifha] nga ha Yesu Kristo.’ O dovha a ri: “Vhunga ndó vuledza u amba mafhungo-maḓifha a Kristo Yerusalema na thungo dzaho, nda vhuya nda swika Iliria.” * (Vha-Roma 1:9, 16; 2:16; 15:19, maḽeḓeretsendama ndi ashu.) Ni humbula uri ndi ngani Paulo o ombedzela Yesu Kristo musi a tshi amba na Vharoma?
6, 7. Tshivhidzo tsha Roma tsho thoma hani nahone miraḓo yatsho yo vha i tshi katela vhathu vha vhubvo vhufhio?
6 A ri ḓivhi uri tshivhidzo tsha Roma tsho thoma hani. Naa ṱhunḓu kana Vhayuda vhe vha vha vhe hone nga Pentekoste ya 33 C.E. vho humela Roma vho no vha Vhakriste? (Mish. 2:10) Kana naa vhavhambadzi vha Vhakriste na vhaendelamashango ndi vhone vhe vha phaḓaladza mafhungo-ngoho ngei Roma? Hu sa londwi uri zwi re zwone ndi zwifhio, musi Paulo a tshi ṅwala yeneyo bugu hu ṱoḓaho u vha nga 56 C.E., ho vha hu kale tshivhidzo tsho no thomiwa. (Vha-Roma 1:8) Vhathu vha tshivhidzoni tshenetsho vho vha vhe vha vhubvo vhufhio?
7 Vhaṅwe vho vha vhe Vhayuda. Musi a tshi resha Androniko na Yunia, Paulo o ri “mashaka anga” khamusi zwe zwa vha zwi tshi amba uri ndi mashaka awe e a vha e Vhayuda. Akwila ndi muluki wa masila we a vha e ngei Roma, nahone ene na mufumakadzi wawe na vhone vho vha vhe Vhayuda. (Vha-Roma 4:1; 9:3, 4; 16:3, 7; Mish. 18:2) Fhedzi vhunzhi ha vhahashu vha tshinnani na vha tshisadzini vhe Paulo a vha resha khamusi vho vha vhe Vhannḓa. Vhaṅwe vhavho vho vha vhe “vha nnḓu ya vho-Thovhela,” khamusi vhe phuli dza Thovhela kana vhaḓinḓa vhawe.—Vha-Fil. 4:22; Vha-Roma 1:6; 11:13.
8. Vhathu vha re ngei Roma vho vha vho sedzana na vhuleme vhufhio vhuhulwane?
8 Mukriste muṅwe na muṅwe ngei Roma o vha o sedzana na vhuleme vhuhulwane, nahone na riṋe roṱhe ro sedzana na vhuleme honoho. Paulo o zwi vhea nga heyi nḓila: “Vho tshinya vhoṱhe, vhoṱhe vho ṱáhela vhurena ha Mudzimu.” (Vha-Roma 3:23) Zwi tou vha khagala uri vhoṱhe vhe Paulo a vha ṅwalelwa vho vha vha tshi fanela u ṱhogomela uri ndi vhaitazwivhi nahone vha sumbedza u vha na lutendo kha Mudzimu ane a nga kona u swikelela ṱhoḓea yeneyo.
Ri Tea U Ṱhogomela Uri Ri Vhaitazwivhi
9. Paulo o ita uri ri ṱhogomele mvelelo dzifhio dzavhuḓi vhukuma dza mafhungo maḓifha?
9 Mathomoni a vhurifhi he a vhu ṅwalela Vharoma, Paulo o amba nga ha mvelelo dzavhuḓi vhukuma dza mafhungo maḓifha musi a tshi ri: “Ngauri ’thi na ṱhoni ndi tshi amba mafhungo-maḓifha a Kristo, ngauri one ndi maanḓa a Mudzimu, a u tshidza vhoṱhe vha tendaho, ó thoma kha Vha-Yuda, zwino o ya kha Vha-Gerika.” Vhukuma, vhathu vho vha vha tshi nga tshidzwa. Naho zwo ralo, vho vha vha tshi tea u vha na lutendo, u tendelana na mafhungo-ngoho a ndeme a re kha Habakuku 2:4 ane a ri: “Muvhuya ene u ḓo hanya nga u tenda hawe.” (Vha-Roma 1:16, 17; Vha-Gal. 3:11; Vha-Heb. 10:38) Fhedzi eneo mafhungo maḓifha ane a nga tshidza vhathu a tshimbidzana hani na mafhungo a uri “vho tshinya vhoṱhe”?
10, 11. Ndi ngani mafhungo a re kha Vha-Roma 3:23 a tshi nga mangadza vhaṅwe vhathu fhedzi vhaṅwe a si vha mangadze?
10 Musi a sa athu ṱahulela lutendo lune lwa ḓo ita uri a tshidzwe, muthu u fanela u thoma nga u tenda uri u muitazwivhi. Vhathu vho aluwaho vha tshi tenda uri Mudzimu u hone na vho ḓowelaho Bivhili vha nga si wane zwi tshi vha mangadza uri vha vhaitazwivhi. (Vhalani Muhuweleli 7:20.) Hu sa londwi uri vha a tenda kana vha a timatima, ndi khwine uri vha a ḓivhanyana uri Paulo o vha a tshi khou amba mini musi a tshi ri “vho tshinya vhoṱhe.” (Vha-Roma 3:23) Naho zwo ralo, musi ri vhuḓinḓani, ri nga kha ḓi ṱangana na vhathu vhanzhi vhane vha sa pfesese uri ndimana yeneyo i amba mini.
11 Kha maṅwe mashango, vhathu nga u tou angaredza a vho ngo aluwa vha tshi ḓivha uri vho bebwa vhe vhaitazwivhi, vhe na tshivhi tshe vha tou tshi mamela. I ngoho, khamusi vha a zwi ṱhogomela uri vha ita vhukhakhi, uri vha na pfaneleo dzi sa ṱanganedzei, na uri vha nga vha vho no ita zwithu zwivhi. Nahone vha a ṱhogomela uri na vhaṅwe vhathu vha vhuimoni vhu fanaho na honoho. Naho zwo ralo, nga nṱhani ha nḓila ye vha aluswa ngayo, a vha pfesesi uri ndi ngani vhone na vhaṅwe vhathu vho tou ralo. Zwi re zwone ndi uri nga dziṅwe nyambo, arali na nga vhudza muthu uri ndi muitazwivhi, vhaṅwe vha nga kha ḓi humbula uri ni khou amba uri ndi ḽigevhenga kana uri ndi muthu ane a pfuka mulayo. Zwi tou vha khagala uri muthu ane a aluwa fhethu hune vhathu vha vha na mahumbulele o raloho a nga kha ḓi sa ḓidzhia sa muitazwivhi nga muhumbulo u fanaho na we Paulo a vha a tshi khou ambela khawo.
12. Ndi ngani vhathu vhanzhi vha sa tendi uri roṱhe ri vhaitazwivhi?
12 Na kha mashango o ḓalaho vhurereli ha ḽa Vhudzhagane, vhathu vhanzhi a vha tendi uri ndi vhaitazwivhi. Ndi ngani? Naho vha tshi ya dzikerekeni nga zwiṅwe zwifhinga, vha dzhia mafhungo a re Bivhilini a ambaho nga Adamu na Eva sa lungano. Vhaṅwe vha aluwa fhethu hune vhathu si tende uri Mudzimu u hone. Vha a timatima uri Mudzimu u hone, nahone a vha pfesesi uri Muthu Muhulwanesa kha vhoṱhe ndi ene ane a tea u vhetshela vhathu zwilinganyo zwa vhuḓifari nahone u sa tevhedza zwilinganyo zwenezwo zwi ḓo amba uri vha khou ita tshivhi. Nga iṅwe nḓila vha fana na vhathu vha ḓanani ḽa u thoma ḽa miṅwaha vhe Paulo a vha ṱalusa sa “vha sí na fulufhelo” na “vha sí na Mudzimu shangoni.”—Vha-Ef. 2:12.
13, 14. (a) Vhane vha sa tende kha Mudzimu na uri hu na tshivhi a vha na tshine vha nga kona u ḓilandula ngatsho nga nṱhani ha tshiitisi tshifhio? (b) U sa tenda kha Mudzimu zwo ita uri vhathu vhanzhi vha fheleledze vho ita mini?
13 Kha vhurifhi he a vhu ṅwalela Vharoma, Paulo o ṋea zwiitisi zwivhili zwine zwa khwaṱhisedza uri vhathu a vho ngo fanela u mangadzwa nga mafhungo a ndimana yeneyo a uri roṱhe ro tshinya, hu sa londwi vhubvo havho—nahone hu katelwa vha tshifhingani tshenetshiḽa na vha musalauno. Tshiitisi tsha u thoma ndi tsha uri tsiko yone ine i ṋea vhuṱanzi ha uri hu na Musiki. (Vhalani Vha-Roma 1:19, 20.) Zwenezwi zwi tshimbidzana na zwe zwa ṱhogomelwa nga Paulo musi a tshi ṅwalela Vhaheberu e ngei Roma a ri: “Ngauri nnḓu dzoṱhe dzi na vhafhaṱi vhadzo; hone o fhaṱaho zwoṱhe ndi Mudzimu.” (Vha-Heb. 3:4) Mafhungo eneo a zwi sumbedza zwavhuḓi uri hu na Musiki we a sika, kana we a ita uri zwithu zwoṱhe zwi vhe hone u katela na fhethu hoṱhe.
14 Nga zwenezwo, Paulo o vha e na khwaṱhisedzo musi a tshi ṅwalela Vharoma uri vhathu naho vhe vhafhio vhane vha ḓikumedzela u gwadamela midzimu i sili—u katela na Vhaisiraele vha misini ya kale—“a vha na tshiné vha kona u ḓi-landula ngatsho’.” Hu nga ambiwa zwi fanaho na kha vhathu vha re na vhuḓifari vhu songo kunaho ha zwa vhudzekani, vhane vha shumisa zwiraḓo zwavho zwa tshinnani na zwa tshisadzini nga nḓila i si ya nzulele. (Vha-Roma 1:22-27) Musi a tshi amba nga ha u vha na mavhonele o raloho, Paulo o phetha nga nḓila yo teaho musi a tshi ri ‘Vha-Yuda na Vha-Gerika vhoṱhe vho tsikiwa nga zwivhi.’—Vha-Roma 3:9.
Luvalo Lu A “Ṱanziela-Vho”
15. Ndi vhafhio vha re na luvalo, nahone lu ita uri vha ite mini?
15 Bugu ya Vharoma i dovha ya ṋea tshiṅwe tshiitisi tsha uri vhathu vha ṱhogomele uri ndi vhaitazwivhi na uri hu na ṱhoḓea ya uri vha bve kha honoho vhuleme vhuhulwane vhukuma he vha sedzana naho. Malugana na milayo ye Mudzimu a i ṋea Vhaisiraele vha kale, Paulo o ṅwala uri: “Vhoṱhe vho tshinyaho hú na mulayo, vha ḓo haṱulwa nga mulayo.” (Vha-Roma 2:12) Musi a tshi bvela phanḓa, o zwi bvisela khagala uri vhathu vha dzitshaka kana vha vhuṅwe vhubvo vhane vha si ḓivhe mulayo wa Mudzimu, nga lwa nzulele vha anzela u “sokou ita nga vhoṱhe zwiṅwe zwiné mulayo wa amba zwone.” Ndi ngani vhathu vhenevho vha sa zwi ṱanganedzi uri muthu a ite zwa vhudzekani na shaka ḽa tsini, uri a vhulahe, na u tswa? Paulo o amba uri luvalo ndi lwone lune lwa ita uri vha landule zwithu zwenezwo.—Vhalani Vha-Roma 2:14, 15.
16. Ndi ngani u vha na luvalo zwi sa ambi uri muthu u ḓo iledza u ita tshivhi?
16 Naho zwo ralo, khamusi no no ḓi zwi ṱhogomela uri u vha na luvalo lune lwa u tsivhudza a zwi ambi uri muthu u ḓo thetshelesa musi lu tshi mu livhisa. Zwe zwa itea kha Vhaisiraele vha misini ya kale zwi sumbedza zwenezwo. Naho Vhaisiraele vho vha vhe na luvalo na milayo yo tou livhaho i bvaho ha Mudzimu ye ya vha i tshi vha vhudza uri vha songo tswa kana u ita vhupombwe, vho vha vha tshi anzela u sa thetshelesa luvalo lwavho nahone vha tshi pfuka Mulayo wa Yehova. (Vha-Roma 2:21-23) Zwenezwo zwo ita uri vha vhe na mulandu u re kavhili nahone a zwi timatimisi uri vho vha vhe vhaitazwivhi, vhane vha kundwa u swikelela zwilinganyo zwa Mudzimu na u ita zwine a zwi funa. Zwenezwi zwo tshinya vhukuma vhushaka havho na Musiki wavho.—Lev. 19:11; 20:10; Vha-Roma 3:20.
17. Ndi khuthadzo ifhio ine ra i wana kha bugu ya Vharoma?
17 Zwe ra zwi haseledza u bva kha bugu ya Vharoma zwi nga kha ḓi ita uri ri vhone u nga vhathu vhoṱhe vha kha vhuimo vhu si havhuḓi phanḓa ha Ramaanḓaoṱhe, nahone na riṋe ro katelwa. Naho zwo ralo, Paulo o bvela phanḓa a tshi ri ṱalutshedza zwiṅwe zwithu. Musi a tshi redza maipfi a Psalme ya 32:1, 2, muapostola o ri: “Mashudu vho hangwelwaho u posa havho, vhe zwivhi zwavho zwa fukedzwa. Mashudu munna ané Mudzimu a si mu vhalele zwivhi.” (Vha-Roma 4:7, 8) I ngoho, Mudzimu o ita uri zwi konadzee uri vhathu vha hangwelwe zwivhi nahone o zwi ita a sa khou tsitsela fhasi zwilinganyo zwawe.
Mafhungo Maḓifha O Thewa Kha Yesu
18, 19. (a) Kha bugu ya Vharoma, Paulo o bvisela khagala sia ḽifhio ḽa mafhungo maḓifha? (b) U itela u wana phaṱhutshedzo dza Muvhuso, ri tea u ṱhogomela mini?
18 Khamusi ni nga kha ḓi ri, “Haya ndi mafhungo maḓifha zwa vhukuma!” I ngoho, ndi mafhungo maḓifha nahone a ri humbudza sia ḽa mafhungo eneo ḽe Paulo a ḽi ombedzela kha bugu ya Vharoma. Samusi zwo ambiwa, Paulo o ṅwala uri: “Ngauri ’thi na ṱhoni ndi tshi amba mafhungo-maḓifha a Kristo, ngauri one ndi maanḓa a Mudzimu, a u tshidza.”—Vha-Roma 1:15, 16.
19 Eneo mafhungo-maḓifha o thewa kha mushumo wa Yesu wa u ita uri ndivho ya Mudzimu i ḓadzee. Paulo o vha o lavhelela ‘ḓuvha ḽiné Mudzimu a ḓo sengisa ngaḽo’ zwo dzumbamaho zwa vhathu; u amba ha Evangeli [mafhungo maḓifha] nga ha Yesu Kristo.’ (Vha-Roma 2:16) Musi a tshi amba zwenezwo o vha a sa khou nyadza “vhuhosi ha Kristo na ha Mudzimu” kana zwine Mudzimu a ḓo zwi khunyeledza nga Muvhuso wawe. (Vha-Ef. 5:5) Fhedzi o sumbedza uri u itela uri ri kone u ḓiphina nga vhutshilo na phaṱhutshedzo dza Muvhuso wonoyo wa Mudzimu, ri fanela u ṱhogomela (1) uri ri vhaitazwivhi phanḓa ha Mudzimu na (2) uri ndi ngani ri tshi fanela u vha na lutendo kha Yesu Kristo u itela uri zwivhi zwashu zwi hangwelwe. Musi muthu a tshi pfesesa dzenedzi mbuno mbili dzine dza katelwa kha ndivho ya Mudzimu nahone zwa ita uri a vhe na fulufhelo ḽa vhumatshelo, a nga amba e na vhungoho uri, “haya ndi mafhungo maḓifha zwa vhukuma!”
20, 21. Musi ri vhuḓinḓani, ndi ngani ri tshi tea u ṱhogomela mafhungo maḓifha e a ombedzelwa kha bugu ya Vharoma, nahone hu nga vha na mvelelo dzifhio?
20 I ngoho, ri tea u ṱhogomela ḽeneḽi sia ḽa mafhungo maḓifha musi ri vhuḓinḓani hashu ha Vhukriste. Malugana na Yesu, Paulo o redza maipfi a Yesaya ane a ri: “Ané a mu tenda ha nga shoni.” (Vha-Roma 10:11; Yes. 28:16) Mulaedza wa mutheo malugana na Yesu u nga si mangadze vhathu vho ḓowelanaho na zwine Bivhili ya amba nga ha tshivhi. Naho zwo ralo, mulaedza wonoyu u ḓo vha u muswa kha vhaṅwe, u zwithu zwine zwa sa ḓivhiwe na luthihi zwine zwa sa tendiwe u ya nga mvelele yavho. Musi vhathu vhenevho vha tshi thoma u tenda Mudzimu na u fulufhela zwi re Maṅwaloni, ri ḓo fanela u vha ṱalutshedza mushumo wa Yesu. Thero i tevhelaho i ḓo haseledza nga ha nḓila ine Vharoma ndima ya vhuṱanu ya ḓo bvisela khagala ngayo ḽeneḽo sia ḽa mafhungo maḓifha. Khamusi ni ḓo wana uri u guda thero yeneyi zwi ḓo ni vhuyedza vhukuma vhuḓinḓani haṋu.
21 Zwi takadza lungafhani u thusa vhathu vha mbilu dzavhuḓi u pfesesa mafhungo maḓifha e ha ambiwa nga hao lunzhi-lunzhi kha bugu ya Vharoma, ndi mafhungo maḓifha “ngauri one ndi maanḓa a Mudzimu, a u tshidza vhoṱhe vha tendaho.” (Vha-Roma 1:16) Nga nnḓa ha u wana malamba, ri ḓo dovha ra vhona vhaṅwe vha tshi tendelana na maipfi a Paulo o redzwaho kha Vha-Roma 10:15 ane a ri: “I tamisa hani milenzhe ya vhahuweleli vha mafhungo-maḓifha a mulalo, ya vhaambi vha mavhuya!”—Yes. 52:7.
[Ṱhaluso i re magumoni a siaṱari]
^ phar. 5 Maipfi a fanaho na a re kha bugu yeneyi a a wanala na kha dziṅwe bugu dzo hevhedzwaho.—Marko 1:1; Mish. 5:42; 1 Vha-Kor. 9:12; Vha-Fil. 1:27.
Naa Ni A Zwi Elelwa?
• Bugu ya Vharoma yo ombedzela sia ḽifhio ḽa mafhungo maḓifha?
• Ndi mbuno ifhio ine ra fanela u thusa vhaṅwe vhathu uri vha i pfesese?
• “Mafhungo-maḓifha a Kristo” a ḓo ḓisela hani riṋe na vhaṅwe vhathu phaṱhutshedzo?
[Mbudziso dza Pfunzo]
[Maipfi o ṱumbulwaho kha siaṱari 8]
Mafhungo maḓifha e a ombedzelwa kha Vharoma a katela mushumo wa ndeme une wa ḓo itwa nga Yesu kha u ḓadzea ha ndivho ya Mudzimu
[Tshifanyiso kha siaṱari 9]
Roṱhe ro bebwa ri na tshivhi tshine tsha vha vhushayanungo vhuhulwane!